Read gen Yeremìa 14 Bible Online

Yeremìa 14 - gen bible

Yeremìa 14

¹Ènyà kè Tɔhonɔ̀ gblɔ̃ na Yeremìa, so èkuɖìɖi ŋutia ye nyi ekèa be:

²“Yudà-nyigbã ji be èdùwo le xànu, wo le na àle ɖo woabe ànyigbãa ta, eye àvifãfã le ɖì, so Yèruzàlɛm.

³Bùbumewo dɔ̃ woabe sumɔ̃viwo yì èsì kù gbe. Wo yì èsìdoawo to, vɔ̀a, wo mu kpɔ èsì ɖekpe ò. Wo trɔ gbɔ̀ ku èze gbalowo. Wo titɔ, wo gbɔjɔ. Ŋùkpɛ̃ na be wo cɔ̃ ènu èta.

⁴Ekè èji mu le jà ɖo ànyigbãa ji ò a, ànyigbãa pu, eye be fɛ̃ nyànyànyà; àgblèdàtɔwo gbɔjɔ, ŋùkpɛ̃ na be wo cɔ̃ ènu èta.

⁵Èzĩ ŋutɔ cã, kè lè ègbe mèa, jì èvi, gble è ɖɛ, jo, ɖoa, ègbe mu lè, bèa ɖù ò.

⁶Ègbemè be èsɔ-àkɛtɛwo nɔ̀tè ɖo ètowo tamè. Wo le hũɛ àya sè, sìgbè ègbe-vũwo nène. Woabe ŋùkuviwo le gbɔjɔ, ɖoa, wo mu kpɔ ègbe le ɖù ò.”

⁷Aò, Tɔhonɔ̀! Ne miabe ènuvuɛ̃wo le ɖù ɖase so miabe àgɔ̀jèje ŋuti cã a, wɔ̀ ènu ɖe na mi jro, ɖo àpo nyikɔ be gogo ŋuti. Ɖoa, miabe ètonumàsewo sùgbɔ. Èwò ye mi jè àgɔ̀ do.

⁸Aò, Izràɛl be ŋùɖo, Izràɛl be hlùɛ̃tɔ, lè tùkaɖa hùenuwo! Nukɛ ŋuti ye wò le wɔ̀ lè ànyigbã a ji, sìgbè àmèjro nène ò? Sìgbè àmèjro kè la nɔ̀ ànyigbã a ji, èzã ɖèka pɛ kpò nène ò?

⁹Nukɛ ŋuti wò jo lè sìgbè ŋusù kè àvò pòa nène ò? Sìgbè àhùawɔ̀tɔ kè mu ɖo ŋusɛ̃, la sɔ hlùɛ̃ àmè gã ò a, nène ò? Aò, Tɔhonɔ̀, wò lè mia dòmè! Nyikɔ wò ye lè mia ŋuti. Ekèa ŋutia, mù gbà gble mi ɖɛ ò!

¹⁰Ènyà kè Tɔhonɔ̀ gblɔ̃ so dùkɔ̃ kèa ŋutia, ye nyi ekèa: “Èsàɖìɖi jɔ̀nàjì na wo ŋutɔ, eye wo mu ɖona woabe àfɔ̀wo tè ò. Ekèa ŋuti ye Tɔhonɔ̀ mu lɔ̃nà ènu na wo ò. Fifìa, e le ɖoŋù woabe èvuɛ̃jɔ̀jɔ, eye be le dɔ̃ èto na wo, ɖo woabe èvuɛ̃wɔ̀wɔwo ŋuti.”

¹¹Ekèa yomè a, Tɔhonɔ̀ gblɔ̃ na mù be: “Mù gbà fãkue na dùkɔ̃ kèa be nyɔna ò.

¹²Ne wo blanu ŋutɔ cã a, nyè mu la ɖo èto woabe àvifãfã ò. Ne wo wɔ̀ ènumème vɔsa ku ènunana vɔsa cã a, nyè mu la xɔ̀ wo ò. Bòhũa, mù la crɔ̃ wo ku èwui, àdɔ̀wùàmè ku èdɔ̀vuɛ̃.”

¹³Vɔ̀a, mù ɖo e ŋuti be: “Aò, Tɔhonɔ̀ Mawu! Gblɔ̃ɖɛtɔwo gblɔ̃nà na wo be: “Kpɔɖa, mì mu la kpɔ èwui, àlo àdɔ̀wùàmè ò. Bòhũa, ŋuti fàfa mà-vɔ ye mù la na mì lè àfi kèa.”

¹⁴Eye Tɔhonɔ̀ gblɔ̃ na mù be: “Gblɔ̃ɖɛtɔawo le ɖà àjè ɖɛ, do àsi nyè. Nyè mu dɔ̃ wo, àlo do èdɔ àsi na wo, àlo pò nupo na wo ò. Àjè ŋùtègã nukpɔkpɔwo, àfãkãkãwo, vòdu sùmɔ̀sumɔwo ku woa ŋutɔ be susuwo be àmèflù-nyàwo ye wo gblɔ̃ ɖɛ na mì.”

¹⁵Ekèa ŋutia, Tɔhonɔ̀ gblɔ̃ be: “Sɔ kù ɖo gblɔ̃ɖɛtɔ kèwo le gblɔ̃ ènyà ɖɛ, lè nyikɔ nyè mèawo ŋutia: Nyè mu dɔ̃ wo ò. Wo le gblɔ̃ be: “Èwui àlo àdɔ̀wùàmè mu la va ànyigbã kèa ji ò”. Gblɔ̃ɖɛtɔ kèawo ŋutɔ la crɔ̃ lè èwui ku àdɔ̀wùàmè nu.

¹⁶Eye àdɔ̀wùàmè ku èwui la ɖè dùkɔ̃ kè wo le gblɔ̃ ènyà ɖɛ na a to, kɔ̀ ɖo Yèruzàlɛm be èmɔ̃wo ji. Àmè ɖekpe mu la nɔ̀ ànyi, la ɖì woawo ŋutɔwo, woa srɔ̃wo, woabe ŋusùviwo, àlo woabe nyɔ̃nùviwo ò. Mù la kɔ̀ jɔ̀gbèvuɛ̃ kè jè na woa, ɖo woa ji.”

¹⁷“Gblɔ̃ ènyà kèa na wo be: “Ŋùkuvi nyèwo ne fã àɖàsì, èzã ku kedè, ètè mà-tɔ, ɖoa, èvi nyè, nyɔ̃nùvi lè àxue, dùkɔ̃ nyèa jè àfɔ̀ku gã ɖe, wo do àbì veve ɖe e ŋuti.

¹⁸Ne mù to jè àgblè jia, kpɔɖa, àmè kèwo ci èwui nuawo ye ŋua. Ne mù ɖo èdùa mèa, kpɔɖa, àmè kèwo àdɔ̀wùàmè do àyà na, kaka wo kua, wo ye nyi ekèawo. Gblɔ̃ɖɛtɔwo ku hũbonɔwo jo yì èdù mànya ɖe mè.”

¹⁹Wò gbe Yudà gbidi-gbidia? Ziɔ̀n jo le nyɔŋu na èkla wòa? Nukɛ ŋuti wò pò mi, àleke be mi mu gbà teŋu xaya ò? Mi kpɔ èmɔ̃ na hùenu kè, mi la gãa, gãkea, àdìka kpò ye gbà sò mi.

²⁰Aò, Tɔhonɔ̀! Mi jèsi miabe èvuɛ̃wɔ̀wɔwo, ku mia tɔwo be àgɔ̀jèjewo. Nyàwo be nyi be mi wɔ̀ ènuvuɛ̃ ɖo ŋuti wò.

²¹Aò, lè àpo nyikɔa ŋutia, mù gbà crì mi ò. Mù gbà ɖìgbɔ àpo gogo be èfìɔzìkpea ò. Ɖoŋù èzò kè wò ɖù ku mia, ne wò mu gbà gbã ɛ̀ ò.

²²Dùkɔ̃wo be vòdu màɖìnuwo dòmètɔ ɖe nana èji jànàa? Jiŋùkusi nana èsì jànà, lè ye ŋutɔ ɖokoe sinua? Gbèɖe! Èwò ye nana. Aò, Tɔhonɔ̀, miabe Mawu! Ekèa ŋutia, èwò ŋuti mi ɖoŋù ɖo! Ɖoa, èwò ye wɔ̀nà ènu kèawo keŋu.