Read gen Yeremìa 15 Bible Online

Yeremìa 15 - gen bible

Yeremìa 15

¹Ekèa yomè a, Tɔhonɔ̀ gblɔ̃ na mù be: “Ne Mosè ku Samuɛl la va nɔ̀tè ɖo ŋùkɔ̀ na mù ŋutɔ cã a, èjì nyè mu la trɔ ɖo dùkɔ̃ kèa ŋuti ò. Nyà wo jo lè ŋùmè na mù! Wo ne jo!

²Eye, ne wo biɔ wò be: “Fikɛ ye mi la yì ò?” Ɖo e ŋuti na wo be: “Ènyà kè Tɔhonɔ̀ gblɔ̃ a ye nyi: 'Àmè kèwo jè na èku a, la ci èku mè. Àmè kèwo jè na èwui a, la ci èwui nu. Àmè kèwo jè na àdɔ̀wùamèawo la ci àdɔ̀wùàmè mè. Àmè kèwo jè na àhùalea, wo la yì gàtɔnugbe'”

³“Mù la ɖo ènugbletɔ vòvòvò ènè ɖo woa ŋuti.” Tɔhonɔ̀ ye gblɔ̃ ɛ̀. “Èwui la wù àmè, àvũwo la dɔ̃ àmèkpòtiawo lè ànyigbã, eye jiŋùkusi xèviwo ku ànyigbã ji be èlãwo la vũvũ àmèkpòtiawo ɖù, ne woa crɔ̃ wo.

⁴Mù la na èfìɔduwo keŋu la nɔ vɔ̃ wo lè ànyigbã ji, ɖo ènu kè Manasè, Ezekìas[24], Yudà be èfìɔa be èvia wɔ̀, lè Yèruzàlɛm be èdùa mèa ŋuti.”

⁵“Ɖoa, Yèruzàlɛm, àmè kɛ ye la ku ŋuzĩzĩ na wò ò? Àmè kɛ ye la lòfũ ɖo ŋuti wò ò? Àmè kɛ ye la nɔ̀tè, la biɔ wò be leke wò fɔ̃ ɖo ò?

⁶Èwò ye gbe mù.” Tɔhonɔ̀ ye gblɔ̃ ɛ̀. “Wò trɔ ŋùgbe do mù. Ekèa ŋutia, mù la do àlɔ̀ ɖoɖa gbɔ wò, eye mù la crɔ̃ wò. Ŋuzĩzĩkukua tìkɔ̀ na mù.

⁷Mù sɔ sàsràdo fu dùkɔ̃ nyèa kã-hlɛ̃, lè èdùa be àgbowo nu. Mù la ɖè dùkɔ̃ nyè mètɔwo be èviwo jo, eye mù la crɔ̃ dùkɔ̃ nyèa, ɖoa wo gbe be yèwo mu la trɔ lè yèwo be èmɔ̃ vuɛ̃wo ji ò.

⁸Mù la na woabe àhòsìwo la sùgbɔ wu èkɔkui lè àpùta. Mù la na ènugbletɔa la va pò woabe ɖèkajɛwo be ènɔ̀wo pu ànyi, dɔ̃ŋùkusu tata. Mù la na àdìka la sò wo, le àvò mè, eye àkpɔ̃ la ɖɔ wo.

⁹Nyɔ̃nù kè jì èvi adrɛ̃ a, la pò yùkpà, gbɔ̃gbɔ̃ la ci pò na ɛ̀ eye yebe èzã la do, dɔ̃ŋùkusu jàse. Wo la dà ɛ̀ ɖo ànyi, eye èŋù la kpɛ̃ ɛ̀. Àmè kèwo la ci àgbèa, mù la do wo àsi na kɛ̃tɔwo, eye wo la ci èwui nu.” Tɔhonɔ̀ ye gblɔ̃ ɛ̀.

¹⁰Aò, ènɔ̀ nyè! Hèlu na mù! Nukɛ ŋuti wo jì mù, eye mù nyi àjrè-me, kè le drɛ̃ àvũ ku ànyigbã a jitɔwo keŋu ɖo ò? Nyè mu ɖù èfɛ̃ do àmè ɖe ò, àmè ɖe cã mu ɖù èfɛ̃ do mù ò. Gãkea, àmè sia àmè le sɛ̃kpɛ̃ na mù.

¹¹Tɔhonɔ̀ ɖo e ŋuti be: “Mù le kã àtãŋu be: nyàwo ye be nyi, mù la hlùɛ̃ wò gã na nyɔna; nyàwo ye be nyi, mù la na kɛ̃tɔ wòwo la blìbɔ̀ na wò, lè jɔ̀gbèvuɛ̃ hùenu ku lè àkpɔ̃ hùenu.

¹²Wo la teŋu ŋɛ̃ ègà yìbɔa? Ègà yìbɔ kè so èvègo, àlo, àkɔ̀blìa?

¹³Mù la na wo la hlà àpo àdɔ̀kùnuwo ku àpo ènuxɔ̀asìwo, ɖo èvuɛ̃ kèwo keŋu wò wɔ̀, lè àpo ànyigbãwo keŋu jia ŋuti.

¹⁴Mù la sɔ wò wɔ̀ kluvi na àpo kɛ̃tɔwo, lè èdù kè wò mu jèsi òa mè. Ɖoa, àpe àdɔ̀mèze be èzòa la bì; e la bì ɖo ŋuti wò.”

¹⁵Aò, Tɔhonɔ̀! Èwò yaa, wò nya! Ɖoŋù mù, ne wòa kpɔ ji nyè. Biɔ èhlɔ̃ àmè kèwo le tĩ yo nyè mèa. Àpo xòmèfa na wo, mù gbà na, ma ci àgba ò! Ɖoa, wò nya be, ŋuti wò ye mù xà ɖo, eye wo le do mù ŋùkpɛ̃.

¹⁶Ne àpo ènyàwo gbe ɖo gbɔ nyè kpòa, mù lena wo, mìnà. Ɛ̃ɛ, àpo ènu mè be ènyàwo vivina na àpe èjì, eye wo dona jìjɔɛ na mù, ɖoa, nyikɔ wò ye lè ŋuti nyè, Mawu Ŋusɛ̃kpatatɔ!

¹⁷Nyè mu bɔ̀bɔ̀nà, nɔ̀nà ànyi, la kpɔ jìjɔɛ ku àmè kèwo kònà àmèa ò. Àpo àlɔ̀ sɛ̃sɛ̃a ŋutia, nyè ɖèka ye nɔ̀nà ànyi, lè àzɔ̀ge, ɖoa, wò na mù ɖɔ ku àdɔ̀mèze fuu.

¹⁸Nukɛ ŋuti vevesèse nyèa mu le tɔtè ò? Nukɛ ŋuti àbì nyèa gbà le ve ŋutɔ lekea, eye be gbe kuku ò? Wò jo trɔ sìgbè èsìdo kè le flù àmèa nènea? Sìgbè èsìjɔ̀pe kè ŋuti wo mu teŋu ɖoŋù ɖo òa?”

¹⁹Tɔhonɔ̀ ɖo e ŋuti be: “Ne wò trɔ èjì mèa, mù la gbìgbɔ̀ ɖo wò tè, àleke be wò la gbà teŋu sɛ̃ mù. Ne wò trɔ lè ènyà fùfluwo yòmè, eye wò lebè na ènyà ɖɔ̀hũiwoa, eŋuã, àpo ènu la nyi àpe ènu. Àmè ŋuawo ye la trɔ va gbɔ wò. Mu nyi èwò ye la yì woa gbɔ ò.

²⁰Mù la sɔ wò wɔ̀ gàjɛ̃ be èglì sɛ̃sɛ̃ ɖe na dùkɔ̃ kèa. Wò la nyi gàjɛ̃ be àgbògbò lè ŋùkɔ̀ na wo. Wo la kpe àhùa ku wò, vɔ̀a, wo mu la teŋu kpe ji wò ò. Ɖoa, mù lè ku wò, ne ma ɖè wò, eye ma hlùɛ̃ wò gã! Tɔhonɔ̀ ye gblɔ̃ ɛ̀.

²¹Mù la ɖè wò le àmè vuɛ̃wo simè, eye mù la hlùɛ̃ wò gã, lè àmè nyrãhũwo si.” Tɔhonɔ̀ ye gblɔ̃ ɛ̀.