Read gen Yeremìa 16 Bible Online

Yeremìa 16 - gen bible

Yeremìa 16

¹Tɔhonɔ̀ be ègbè ɖì na mù be:

²“Wò mu la ɖè èsrɔ̃, ne wòa jì ŋusùviwo, àlo nyɔ̃nùviwo ɖo tèpe kèa ò”.

³Ɖoa, ènyà kè Tɔhonɔ̀ gblɔ̃ so ŋusùvi ku nyɔ̃nùvi kèwo wo jì ɖo ànyigbã kèa jiawo, so nyɔ̃nù kèwo ye nyi woa nɔ̀woa ŋuti, ku ŋusù kèwo ye nyi woa tɔ̀awoa ŋutia ye nyi be:

⁴“Wo la le èdɔ̀, la ku. Àmè ɖe mu la fã wo, àlo, la ɖì wo ò. Vɔ̀a, wo la ci sìgbè ègbeɖiɖɔ, lè ànyigbã nène. Wo la ci èwui nu, eye wo la ku àdɔ̀-ku. Woabe àmèkpòtiawo la trɔ zũ ènuɖùɖu na àyamè xèviwo ku ànyigbã ji be èlãwo.”

⁵Eye Tɔhonɔ̀ gbà gblɔ̃ be: “Mù gbà ɖo àxue kè mè wo le wɔ̀ ècɔ be ènuɖùɖu lèa ò. Mù gbà yì cɔxɔmè, la yì làmɔɛ̃, àlo, la yì ɖè vevesèse be jèsì ɖe fiɔ ò; ɖoa, mù gbìgbɔ̀ xɔ̀ àpe sìtu, àpe lɔ̃lɔ̃ ku àpe ŋuzĩzĩkuku jo lè dùkɔ̃ kèa si”. Tɔhonɔ̀ ye gblɔ̃ ɛ̀.

⁶Hùɛ̃yiwo ku àmè gbalowo keŋu la ku lè ànyigbã kèa ji. Wo mu la ɖì wo, àlo, la wɔ̀ ècɔ na wo ò! Àmè ɖekpe mu la sì ye ɖokoe[25], àlo, la lũ èta, àlo, la lũ ègɛ̃ ɖo woa ŋuti ò.

⁷Àmè ɖekpe mu la na ènuɖùɖu, la sɔ fa àkɔ na àmè kèwo le lòfũ na àmèkukuawo ò. Wo mu la na àhà kogò ɖèka ŋutɔ cã, la sɔ fa àkɔ na àmè kè be ètɔ, àlo ènɔ̀ kua ò.

⁸“Wò mu la ɖo àxue kè mè wo le ɖù àzã lè, la nɔ̀ ànyi, la ɖù, la nù lèa ò”

⁹Tɔhonɔ̀, Ŋusɛ̃kpatatɔ, Izràɛl be Mawu a gblɔ̃ be: “Lè mìabe àgbè mè, lè mìabe ŋùku mè ye mù la na nyɔ̃nùkpetɔ ku ŋusùɖètɔwo be jìjɔɛkpɔkpɔ ku àyosòso nu la ci lè, lè tèpe kèa.”

¹⁰Ne wò gblɔ̃ ènyà kèawo keŋu na dùkɔ̃ kèa, eye wo biɔ wò be: 'Nukɛ ŋuti ye Tɔhonɔ̀ ɖè èse gã kèa to ɖo mia ŋuti ɖo ò? Àgɔ̀ kɛ ye mi jè ò? Ènuvuɛ̃ kɛ ye mi wɔ̀ ɖo Tɔhonɔ̀, miabe Mawu a ŋuti ò mà a?'.

¹¹Eŋuã, wò la ɖo e ŋuti na wo be: Tɔhonɔ̀ gblɔ̃ be: 'Ekè mìa tɔwo gble mù ɖɛ, jo kplɔ̀ ènusɛ̃sɛ̃ buwo do, wo sumɔ wo, eye wo sɛ̃ woa, mìa tɔwo gble mù ɖɛ, eye wo mu le èse nyèwo ɖo àsi òa ŋuti ye.

¹²Gãke a, mìawo ya a, mì gbà nɔ̀ àgbè vlo wu mìa tɔwo. Ekè mì la ɖo èto àpe ègbè a, mì kpɔ leke mìa dòmètɔ ɖe sia ɖe le kplɔ̀ ye ŋutɔ yebe èjì tìtri be ɖoɖowo do ɖa.

¹³Ekèa ŋuti ye mù la nyà mì jo lè ànyigbã kèa ji, yì ànyigbã ɖe, kè mìa ŋutɔwo ku mìa tɔwo cã, mì mu jèsi òa ji. Funua ye mì la sumɔ ènusɛ̃sɛ̃ buwo lè, èzã ku kedè, ɖoa, nyè mu la gbà kpɔ ɖo e mè na mì ò.

¹⁴“Gãke, èŋùwo la va kè, kè àmèwo mu la gbà gblɔ̃ be: 'Mi tà Tɔhonɔ̀ kè kplɔ̀ Izràɛlviwo so Ejiptè vaa, be àgbè ò'.

¹⁵Vɔ̀a, wo la gblɔ̃ be: 'Mi tà Tɔhonɔ̀ kè kplɔ̀ Izràɛlviwo so èvègo be ànyigbã ji, ànyigbã kèwo keŋu ji be nyà wo ɖoɖa sãa, be àgbè'. Ɖoa, mù la gbìgbɔ̀ ɖo wo tè, ɖo ànyigbã kè mù na woa tɔgbe-tɔ̀gbèwoa ji.” Tɔhonɔ̀ ye gblɔ̃ ɛ̀.

¹⁶Tɔhonɔ̀ gblɔ̃ be: “Kpɔɖa, mù la ɖo èɖɔkplɔ̀tɔwo ɖoɖa gbãŋu-gbãŋu, ne woa le wo. Ekèa yomè a, mù la ɖo àdèlãwo ɖoɖa gbãŋu-gbãŋu, ne woa nyà wo ɖo ènu, lè èto ɖe sia ɖe tamè, lè ètokɔ̃ɛ ɖe sia ɖe ji, to le àkpãdo ɖe sia ɖe mè.

¹⁷Ŋùkuvi nyèwo la nɔ̀ woabe èmɔ̃wo keŋu ji. Wo mu teŋu bè do mù ò, eye woabe ènuvuɛ̃wo cã mu teŋu wla do àpe ŋùkuviwo ò.

¹⁸Mù la tu woabe èvuɛ̃jɔ̀jɔ ku ènuvuɛ̃wo be èfɛ̃, ze èvè sɔ̃ŋu na wo, ɖoa wo sɔ woabe ènu kukuwo be èɖiwo gble èkɔ̀ na àpe ànyigbã a, eye wo sɔ woabe èŋunyɔnuwo va ɖɔ àpe ècrɔ̃-nyigbãa.”

¹⁹Aò, Tɔhonɔ̀, àpe ŋusɛ̃ ku àpe àgbògbò, Àpe bèbèpe lè àkpɔ̃ hùenu! Gbɔ wò ye dùkɔ̃wo la va, Eye wo la nɔ gblɔ̃ be: “Mu nyi ènu ɖɔ̀hũi ɖe ye mia tɔgbewo xɔ̀, sɔ wu ènusɛ̃sɛ̃ gbalo kèwo mu wɔ ènu nyuɛ̃ ɖekpe na wo ò.

²⁰Àgbètɔwo la teŋu wɔ̀ ènusɛ̃sɛ̃wo na woa ɖokoewoa? Ɛ̃ɛ, wo la teŋu wɔ̀ wo, Vɔ̀a, ekèawo mu nyi mawuwo ò.

²¹Tɔhonɔ̀ gblɔ̃ be: Ekèa ŋuti mù la fiɔ wo, ɛ̃ɛ fifìa, mù la ɖè àpe ŋusɛ̃, ku àpe ègãnyinyi fiɔ wo, ne woa nya be nyikɔ nyè ye nyi Tɔhonɔ̀!”