Read gen Yeremìa 17 Bible Online

Yeremìa 17 - gen bible

Yeremìa 17

¹Wo sɔ ègà be ènuŋlɔ̀nu kè nu èlotamèkpe sɛ̃ŋu lèa ŋlɔ̀ Yudàviwo be ènuvuɛ̃wo. Wo ŋlɔ̀ wo ɖo woabe èjìwo be ènuŋlɔ̀kpe ji ku woabe vɔsakpewo be àzòwo ji.[26]

²Leke wo ɖonaŋù woabe èviwo ɖoa, nènea ke ye wo ɖonaŋù woabe vɔsakpewo ku vòdu Aserà be kpèli kèwo lè àti mumuwo gɔ̃mè ku ètokɔ̃ɛ yìjiwo be tamè.

³Mù la sɔ èto nyè kè li ɖo ègbe jia, mù la sɔ mìabe àdɔ̀kùnuwo ku mìabe èci kpɔkpɔwo keŋu, mù la sɔ wo keŋu na, wo la hlà, kpe ɖo mìabe sɛ̃sɛ̃pewo le ètowo ji ŋuti, ɖo èvuɛ̃ kè mì le wɔ̀ lè mìabe ànyigbã bliboa jia ŋuti.

⁴Mìawo ŋutɔ ye na be mì la bu ècrɔ̃nu kè mù sɔ na mìa. Mù la sɔ mì wɔ̀ kluviwo na mìabe kɛ̃tɔwo, lè ànyigbã kè mì mu jèsi òa ji. Ɖoa, mì na àpe àdɔ̀mèze le èzò, eye èzò kèa la bì kaka sɔ yì.

⁵Tɔhonɔ̀ gblɔ̃ be: “Kpɛ̃sɛ̃ na ŋusù kè be èjì trɔ ŋùgbe do Tɔhonɔ̀, ŋusù kè kãɖo ŋutilã be ŋusɛ̃ ji, eye be dojì ɖo àgbètɔ ŋutia.

⁶E la nɔ̀ sìgbè ègbe kè lè ègbegbà jia nène, mu la kpɔ nyɔna, wàlɛbɛ kè nyɔna la vaa ò. E la ci tèpe fiɔ̃fiɔ̃wo, lè zògbè ji. Lè èjè-nyigbã kè ji àmè ɖe mu lè òa ji.

⁷Vɔ̀a, sìtu na ŋusù kè dojì ɖo Tɔhonɔ̀ ŋuti, eye be kãɖo e jia.

⁸E la nɔ̀ sìgbè àti kè wo do ɖo ètɔ to, eye be vlũna yebe èkèwo ɖoɖa èsìa gbɔa nène. Vɔ̃vɔ̃ mu ɖona ɛ̀, wàlɛbɛ kè zòzo vanaa ò. Yebe àmàkpawo dona àmà, wè sia wè. Èpè kè mè èku le ɖìa, mu dona ŋùklɛ̃ na ɛ̀ ò, eye èkusɛ̃sɛ̃ ji kpò be nɔ̀nà.

⁹Àgbètɔ be èji ɖɔ ku àjèɖàɖa, wu ènuwo keŋu. E ɖɔ ku àmèfùflu kè trɔ zũ èdɔ̀ mà dà a. Àmè kɛ ye la teŋu sè e gɔ̃mè ò?

¹⁰Ènyè, Tɔhonɔ̀ ye jrònà èjì mè kpɔ, eye mù kpɔna àmè be susu mè, mù ɖona ènu tèpe na àmè sia àmè, sɔ zɔ̃ ɖo yebe àzɔ̃lì nu, sɔ zɔ̃ ɖo yebe wɔ̀nawo nu, sɔ zɔ̃ ɖo yebe èkusɛ̃sɛ̃wo nu.

¹¹Àmè kè bɔ̀ àdɔ̀kùnuwo lè màjɔ̀ màjɔ mèa, lè sìgbè tèkle kè pò àzì kèwo mu ɖo òa nène. Àdɔ̀kùnuawo la gble è ɖɛ, lè yebe àgbè be dòdòmè, eye lè ènuwùwua, àmèa la ze hɔ̃vi.”

¹²Gogo be èfìɔzìkpe kè wo na bùbu so gɔ̃mèjèje a kea ye nyi nɔ̀pe na miabe kɔ̀kɔ̀ɛpea.

¹³Aò Tɔhonɔ̀, Izràɛlviwo be èmɔ̃kpɔkpɔ, àmè kèwo kpata la gble wò ɖɛawo la ɖù ŋùkpɛ̃. Wo la xɔ̀ àmè kèwo kpata la do ŋùgbe wòawo ɖo èkɔ mè. Ɖoa, wo gble Tɔhonɔ̀ kè nyi àgbè be èsì vudoa ɖɛ.

¹⁴Aò Tɔhonɔ̀, dà èdɔ̀ na mù, ne ma kpɔ xàyàxaya! Hlùɛ̃ mù gã, ne ma kpɔ hlùɛ̃gã! Ɖoa, èwò kpò ye mù le kafu.

¹⁵Kpɔɖa, àmèwo kpɔ̀tɔ̀ le biɔ mù be: “Fikɛ ye Tɔhonɔ̀ be ènyàa ci ò? Fifì ye be la va e mè, ne mia kpɔ!”

¹⁶Gãkea, ènyè yaa, nyè mu gble àlɛ̃kplɔ̀tɔ be èdɔ kè wò do àsi na mùa ɖɛ ò. Wò ŋutɔ wò nya be nyè mu ciji be wòa hɛ̃ ŋùkèkè vuɛ̃ va ò. Ènyà kè to so ènu mè na mù a, wò ŋutɔ àpo ŋùmè ye mù gblɔ̃ ɛ̀ lè.

¹⁷Aò, èwò kè nyi àpe bèbèpe, lè àzã vuɛ̃wo gbèa, mù gbà nɔ sò àdìka na mù ò!

¹⁸Èŋù ne kpɛ̃ àmè kèwo le tĩ yo nyè mèa, vɔ̀a, ɖè mù jo lè ŋùkpɛ̃ gbɔ. Do ŋùklɛ̃ na wo, vɔ̀a, ɖè mù jo lè ŋùklɛ̃ gbɔ. Hɛ̃ jɔ̀gbèvuɛ̃ va woa ji; gbã wo gudugudu, zè èvè.

¹⁹Tɔhonɔ̀ gblɔ̃ na mù be: “Yì tɔtè ɖo èdùa be àgbo nu, àgbo kè nu Yudà-nyigbã ji be èfìɔwo tona, yìnà, gbɔ̀nàa. Yì tɔtè ɖo Yèruzàlɛm be àgbo kpɔ̀tɛawo cã nu.

²⁰Gblɔ̃ na wo be: Mì sè ènyà kè Tɔhonɔ̀ gblɔ̃a, mì, Yudà be èfìɔwo ku Yudà-nyigbã ji dùkɔ̃wo keŋu kudo àmè sia àmè kè lè Yèruzàlɛm be èdùa mè, àmè kèwo keŋu tona àgbo kèawo nua.

²¹Ènyà kè Tɔhonɔ̀ gblɔ̃a ye nyi be: Mì kpɔ nyuɛ̃ ɖe, ne mì mu gbà dro àgbã lè jɛ̃gbɔ̃zã gbè, àlo la kɔ àgbã to Yèruzàlɛm be àgboawo mè ò.

²²Mì mu gbà kɔ àgbã ɖekpe so mìabe àxomè, àlo la wɔ̀ èdɔ ɖe lè jɛ̃gbɔ̃zãa gbè ò, vɔ̀a, mì kɔ̀ jɛ̃gbɔ̃zãa ŋuti, sìgbè leke mù do è àsi na mìa tɔgbe-tɔ̀gbèwoa nène.

²³Gãkea, woawo yaa, wo mu ɖo èto, eye wo mu sɔ èɖe lè e mè ò. Wo lìa èkɔ̀, wo mu ɖo èto àlo zɔ̃ ɖo ɖoɖo a nu ò.

²⁴Tɔhonɔ̀ gblɔ̃ be: “Ne mì hɛ̃ àdòdò, eye mì ɖo èto mù, eye mì mu sɔ àgbã ɖekpe to èdù kèa be àgbowo mè, jɛ̃gbɔ̃zã gbè ò, eye mì kɔ̀ jɛ̃gbɔ̃zãa ŋuti, eye mì mu le wɔ̀ èdɔ ɖekpe lè jɛ̃gbɔ̃zãa gbè òa,

²⁵eŋuã, èfìɔ kèwo le nɔ̀ David be èfìɔzìkpea jiawo la nɔ̀ àhùakèkevivi mè, èsɔwo ji ku woabe àgbònùglawo, la to èdù kèa be àgbowo nu, la ɖo èdùa mè kudo Yudà-nyigbã jitɔwo gbàkudo àmè kèwo ye nɔ̀nà Yèruzàlɛm be èdùa mèawo, eye àmèwo la gbà nɔ̀ èdù kèa mè kaka sɔ yì.

²⁶Àmèwo la so Yudà be èdùwo ku kɔpe kèwo trɔ do Yèruzàlɛm be èdùa mè. Àmèwo la so Bɛnyamìn be ànyigbãwo ku ètokɔ̃ɛ kèwo ye lè èwèɖoxɔ̀peawo ji, so èto-nyigbãwo ji ku so àpùgo, la hɛ̃ ènumème vɔsa ku ènùɖùɖu vɔsa, vɔsa vòvòvòwo ku àzìzɔ xɔ̃xũɛ gbligbli be vɔsa kpe ɖo àkpedo vɔ̀sawo ŋuti, va Tɔhonɔ̀ be àxuea mè.

²⁷Vɔ̀a, ne mì mu le sè àpe ègbè, ne mìa kɔ̀ jɛ̃gbɔ̃zã nyèa ŋuti, ne mì mu gbà nɔ kɔ àgbã, sɔ to Yèruzàlɛm be àgbowo nu, ɖo èdùa mè, lè jɛ̃gbɔ̃zãa gbè òa, eŋuã, mù la do èzò mà ci gbèɖe ɖo Yèruzàlɛm be àgbowo nu, ne bèa fiɔ̃ yebe àgbògbòwo.”