Read gen Yeremìa 18 Bible Online

Yeremìa 18 - gen bible

Yeremìa 18

¹Ènyà kè Tɔhonɔ̀ gblɔ̃ na Yeremìaa ye nyi ekèa:

²“Yì èzemètɔa be àxomè. Funua ye mù la sɔ ègbè nyè do àsi na wò lè.”

³Eye ekè mù yì èzemètɔa be àxomèa, mù kpɔ ɛ̀, be le wɔ̀ èdɔ ku èze totro be èmɔ̃.

⁴Vɔ̀a, ne èze kè be sɔ ànyikɔ le mlìa gble lè àlɔ̀ mè na ɛ̀, sìgbè lekè be jɔ̀nà ɖo èzemètɔwo ji nènea, èzemètɔa gbìgbɔ̀ sɔ wɔ̀nà èze bu, ɖo ye ŋutɔ be èjro nu.

⁵Ekèa yomè a, Tɔhonɔ̀ be ègbè gbà ɖì na mù be:

⁶“Izràɛl be àxue, nyè mu teŋu wɔ̀ ku mì, sìgbè lekè èzemètɔ kèa le wɔ̀a nènea?” Tɔhonɔ̀ ye gblɔ̃ ɛ̀. “Mì, Izràɛl be àxuea cã, mì lè àlɔ̀ mè na mù, sìgbè lekè ànyikɔ lè, lè èze mètɔa be àlɔ̀ mèa nène.

⁷Ne gà ɖe mè, mù gblɔ̃ be mù la hɔ̃ dùkɔ̃ ɖe, àlo èfìɔdu ɖe joa, mù la mù ì pu ànyi, àlo la gbã ɛ̀,

⁸eye, ne dùkɔ̃ kè mù sìaa, trɔ èjìmè, lè yebe ènuvuɛ̃wo yomè a, eŋuãa, ènyè cã, mù la ɖo àlɔ̀ tè, eye nyè mu la gbà hɛ̃ jɔ̀gbèvuɛ̃ kè mù ɖo ɖo e ŋutia, va e ji ke ò.

⁹Nène a ke ye, ne gà bu mè, mù gblɔ̃ be mù la likè dùkɔ̃ ɖe, àlo èfìɔdu ɖe,

¹⁰eye ne dùkɔ̃, àlo èfìɔdu kèa le wɔ̀ ènuvuɛ̃ lè ŋùku nyè mè, eye mu le sè ètonu na mù òa, eŋuã mù la gbìgbɔ̀ bù ènyuɛ̃ kè mù ɖo ɖo woa ŋutia kpɔ.

¹¹Ekèa ŋutia, gblɔ̃ na Yudà-nyigbã jitɔwo ku Yèruzàlɛmtɔwo be: “Ènyà kè Tɔhonɔ̀ gblɔ̃a ye nyi be: Kpɔɖa, mù le ɖo jɔ̀gbèvuɛ̃ ku ènu bàɖà ɖo mìa ŋuti. Ekèa ŋutia, mì trɔ lè mìabe èmɔ̃ vuɛ̃wo ji, ne àmè sia àmè ne trɔ yebe nɔ̀nɔmè ku àfɔ̀ɖèɖe.”

¹²Vɔ̀a, wo la ɖo e ŋuti be: “Mu lè veveɖe ò. Mi la kpɔ̀tɔ̀ nɔ zɔ̃ ɖo mia ŋutɔ miabe ɖoɖowo ji, eye àmè sia àmè la kpɔ̀tɔ̀ nɔ zɔ̃ ɖo ye ŋutɔ yebe èjì vuɛ̃ be èkãsĩsĩ ji.”

¹³Ekèa ŋutia, ènyà kè Tɔhonɔ̀ gblɔ̃a ye nyi be: “Mì biɔ sè, lè dùkɔ̃wo dòmè be: Àmè kɛ ye sè ènyà kèa hati kpɔ màa? Ènu bàɖà ŋutɔ ye Izràɛl, tùgbɛ̀jɛ lè àxuea wɔ̀.

¹⁴Libàn be èsì-wɔ ɣeawo buna lè yebe àkpã-toawo be tamèa? Yebe èsì fàfa kè so kaka yebe èsìjɔ̀sopea tɔnatè sàsra gbèɖea?

¹⁵Gãkea, dùkɔ̃ nyè ya ŋlɔ̀be mù, Eye be tɔnazò lifi na legba mà-ɖìnuwo, legba kèwo nana be klɛ̃nà àfɔ̀ lè èmɔ̃ ji, legba kèwo kplɔ̀nà ɛ̀ jo lè èmɔ̃ xoxowo ji, tona ègbemèmɔwo ji, tona èmɔ̃ kèwo wo mu do òa ji.

¹⁶Ekèa ŋuti woabe ànyigbã la trɔ zũ zògbè, ku àlɔmè ɖènu tɛ̀gbɛ̀. Àmè ɖekpekpe kè va le yìa, e la dãŋù do è, eye be la hũhũ èta.

¹⁷Mù la kãkã wo hlɛ̃ ɖo woabe kɛ̃tɔwo nu, sìgbè èwèzɛ̃pe be àya nène. Woabe cɔ̃crɔ̃ gbèa, ŋùgbe ye mù la trɔ do wo, mu nyi ŋùkɔ̀ ò.”

¹⁸Wo le gblɔ̃ be: “Mì va, mia bla èse ɖo Yeremìa ŋuti, ɖoa, ne hũbonɔ mu lè ò ŋutɔ cã a, èsea mu la bu ò. Eye, ne àɖàŋùmewo mu lè òa, àɖàŋùɖèɖe mu la bu ò. Nène a ke ye, ne gblɔ̃ɖɛtɔwo mu lè òa, ènyàgblɔ̃ɖɛ mu la bu ò. Yeŋutia, mì va, ne mia sɔ àɖe, sɔ pòɖi Yeremìa. Mi mu gbà ɖo èto ènyà kèwo be le gblɔ̃awo ò.”

¹⁹Aò Tɔhonɔ̀, ɖo èto mù jro! Sè ènyà kè kɛ̃tɔ nyèwo le gblɔ̃a ɖa!

²⁰Wo wɔ̀nà èvuɛ̃ cã ɖo ènyuɛ̃ tèpea? Gãkea, woawo yaa, wo tre èmɔ̃ na mù. Ɖoŋù be mù nɔ̀tè ɖo ŋùkɔ̀ na wò, mù xɔ̀ ènyà ɖo woa nu, ne ma sɔ trɔ àpo àdɔ̀mèze, jo lè woa ji.

²¹Ekèa ŋutia, sɔ woabe èviwo do àsi na àdɔ̀wùàmè, sɔ wo do àsi na èwui be ŋusɛ̃, na woa srɔ̃wo ne nyi kònɔ̀wo, ku àhòsìwo. Crɔ̃ woabe ŋusùwo, ne èwui ne ɖè woabe ɖèkajɛwo, lè àhùa gbe ji.

²²Àbòbo ne ɖì lè woabe àxuewo mè, wàlɛbɛ kè wò la na, àhùa la va cɔ̃ woa jia. Ɖoa, wo kù èdo, la sɔ le mù, eye wo wla èɖɔ ɖɛ na àfɔ̀ nyèwo.

²³Gãkea Tɔhonɔ̀, èwò yaa, wo nya woabe èsebla, kè wo jro la sɔ wù muawo keŋu. Mù gbà sɔ woabe ènuvuɛ̃wo kè wo ò. Mù gbà tutu woabe àgɔ̀jèjewo jo lè àpo ŋùku mè ò. Na woa jè ànyi lè àpo ŋùmè. Dɔ̃ èto na wo lè àpo àdɔ̀mèze mè.