Read gen Yeremìa 19 Bible Online

Yeremìa 19 - gen bible

Yeremìa 19

¹Ènyà kè Tɔhonɔ̀ gblɔ̃a ye nyi be: “Yì plè èsìkùze lè èzemètɔ gbɔ. Kplɔ̀ dùkɔ̃a be àmèsĩsĩ ku hũbonɔ ɖewo ɖo ŋuti.

²Fifìa, to lè èdùa mè, yì Bɛn-Hinɔ̀n be bàlìa mè, lè àgblɛkɛwo be àgboa nu lɔ̀ge. Funua, kãkã ènyà kèwo mù do àsi na wòa,

³ne wòa gblɔ̃ be: Yudà be èfìɔwo ku Yèruzàlɛmtɔwo, mì sè Tɔhonɔ̀ be ègbè. Tɔhonɔ̀, Ŋusɛ̃kpatatɔ, Izràɛl be Mawu a gblɔ̃ be: Mì sè è! Mù la na jɔ̀gbèvuɛ̃ ɖe la jɔ̀ lè fikèa, eye àmè ɖekpekpe kè la sè èa, la titɔ.

⁴Ɖoa, wo trɔ ŋùgbe do mù, eye wo sɔ tèpe kèa wɔ̀ èdù bu mètɔwo be vòduwo be tèpe, àfi kè wo tɔnazò vɔ̀sawo lè na vòdu kèwo woa ŋutɔ ku woa tɔgbewo cã, Yudà be èfìɔwo cã mu jèsi ò a, eye wo kɔ̀ èɖemànyatɔwo be èhũ ɖɛ keŋu, ɖo tèpe kèa.

⁵Wo li kpèliwo ɖo ètowo ji na vòdu Baal, àfi kè wo tɔnazò woabe ŋusùviwo lè, sɔ sanavɔ na Baal. Ènu ɖe kè be ègbè nyè mu ɖè na wo, àlo gblɔ̃ kpɔ ò, eye mu va susu mè ŋutɔ cã na mù kpɔ òa.

⁶Ekèa ŋutia, mì kpɔ nyuɛ̃ ɖe; ŋùkèkèwo gbãnà, Tɔhonɔ̀ ye gblɛ̃ ɛ̀, ŋùkèkèwo gbãnà, ekè àmèwo mu gbà la yɔ tèpe kèa be Tofɛ̀t àlo Bɛn-Hinɔ̀n be Bàlì mè ò, vɔ̀a wo la yɔ ɛ̀ be “àmè-cɔ̃crɔ̃ be bàlìmè.”

⁷Mù la crɔ̃ Yudà ku Yèruzàlɛm be ɖoɖowo lè tèpe kèa, eye mù la na wo la jè ànyi lè èwui nu lè woabe kɛ̃tɔwo be ŋùkɔ̀, wo la ci àmè kèwo le ji la crɔ̃ woabe àgbèwoa si, eye mù la sɔ woabe ŋutilã kukuawo na àyamè xèviwo ku ègbemèlãwo, wo la ɖù.

⁸Mù la gbã èdù kèa, eye mù la na tèpe kèa la trɔ zũ zògbè, eye be la ɖì kòkoe. Àmè kèwo keŋu la to e gbɔ va yìawo be ènu la ku, eye ne wo kpɔ yebe àbìwo a, wo la ɖè àlɔmè lè e ŋuti.

⁹Mù la na, wo la ɖù woabe ŋusùviwo ku woabe nyɔ̃nùviwo be èlã. Wo la ɖù woa nɔ̀nɔwo be èlã, wàlɛbɛ kè woabe kɛ̃tɔwo la zĩ wo ɖo ànyi, lè àkpɔ̃ kè la ɖɔ wo, lè àmè kèwo le jro la crɔ̃ woabe àgbèawo be àcɛ̀ gɔ̃mèa mè.

¹⁰Ne wò gblɔ̃ ènyà kèawo vɔ̀a, wò la gbã èsìkùzea lè àmè kèwo kplɔ̀ wò doawo be ŋùmè.

¹¹Wò la gblɔ̃ na wo be: Ènyà kè Tɔhonɔ̀ Ŋusɛ̃kpatatɔa gblɔ̃a ye nyi be: “Mù la sɔ dùkɔ̃ kèa ku èdù kèa xla ɖo ànyi, sìgbè èzemètɔ be èsìkùze kèa nène, àleke be wo mu la gbà teŋu jrà ɛ̀ ɖo ò. Wo la ɖì àmèkukuwo ɖo Tofɛ̀t, kaka na gà kè mè èmɔ̃ mu la gbà nɔ̀ ànyi òa.

¹²Ekèa ye nyi ènu kè mù la wɔ̀ lè tèpe kèa, ku àmè kèwo lè fikèawo”. Tɔhonɔ̀ ye gblɔ̃ ɛ̀. Mù la na èdù kèa la gũ sìgbè Tofɛ̀t nène.

¹³Kpɛ̃sɛ̃ la nɔ̀ Yèruzàlɛm be àxuewo ku Yudà be èfìɔwo be àxuewo ji, sìgbè lekè be lè Tofɛ̀t kèa jia nène. Ɛ̃ɛ, ekèa ye la jɔ̀ ɖo àxue kèwo kpata be èxɔ̀tamè wo tɔnazò lifi na wètriviwo lè, eye wo kɔ̀nà èsì ɖɛ na èdù bu mètɔwo be vòduwo lèa.”

¹⁴Ekèa yomè a, Yeremìa trɔ gbɔ̀ so Tofɛ̀t, àfi kè Tɔhonɔ̀ dɔ̃ ɛ̀ ɖoɖa, ne bèa yì gblɔ̃ ènyà ɖɛ lèa. E nɔ̀tè ɖo Mawu be àxuea be gbàjà ji, eye be gblɔ̃ na dùkɔ̃ bliboa be:

¹⁵“Ènyà kè Tɔhonɔ̀, Ŋusɛ̃kpatatɔ, Izràɛl be Mawu a gblɔ̃a ye nyi ekèa: Mì ɖo èto! Mù la na jɔ̀gbèvuɛ̃ kèwo mù gblɔ̃ ɖo èdù kèa ku kɔpe kèwo trɔ do èa, ŋutiawo la jɔ̀ ɖo woa ji, ɖo woabe èkɔ̀ lìa, eye wo gbe be yèwo mu la sè àpe ègbè ò.”