Read gen Yeremìa 2 Bible Online

Yeremìa 2 - gen bible

Yeremìa 2

¹Tɔhonɔ̀ be ègbè ɖì na mù be:

²“Yì, ne wòa gblɔ̃ ɛ̀ ɖo èto mè na Yèruzàlɛmtɔwo be: Tɔhonɔ̀ gblɔ̃ be: Mù le ɖoŋù àpo tùgbɛ̀jɛ mè be ànùkuawɔ̀wɔ, lè hùe ŋua nu, na wò. Mù le ɖoŋù lekè, sìgbè nyɔ̃nù yeye[2] nènea, wò lɔ̃ mù, eye wò kplɔ̀ mù do, lè zògbèa ji. Wò kplɔ̀ mù do, to ànyigbã kè ji wò mu do ènu ɖe ɖo òa ji.

³Izràɛl lè kɔ̀kɔ̀ɛ, eye be nyi Tɔhonɔ̀ tɔ̀. E nyi Tɔhonɔ̀ be àgblèmènuku cucugbãa. Àmè kèwo keŋu la ɖù ìawo la jè àgɔ̀, eye jɔ̀gbèvuɛ̃ la jɔ̀ ɖo woa ji. Tɔhonɔ̀ ye gblɔ̃ ɛ̀.

⁴Mì ɖo èto Tɔhonɔ̀ be ègbè, mì, Yakɔb be jìjimèviwo! Mì, àmè kèwo keŋu so Izràɛl be xòmè be hɛ̃nu mèawo,

⁵Tɔhonɔ̀ gblɔ̃ be: Àgɔ̀ kɛ ye mù jè do mìa tɔgbewo, eye wo tètè jo lè gbɔ nyè ò? Wo kplɔ̀ vòdu kèwo nyi ènu gbaloawo do, eye woa ŋutɔwo trɔ zũ àmè gbalowo.

⁶Wo mu biɔ sè be: “Fikɛ ye Tɔhonɔ̀, àmè kè kplɔ̀ mi to so Ejiptè be ànyigbã ji, àmè kè kplɔ̀ mi to zògbèa jia, zògbè kè nyi èkuɖìɖi-nyigbã ku èmɔ̃tetre-nyigbãa, zògbè kè nyi ànyigbã kè ji pu, ku àvlìmè vìvìti-nyigbãa, zògbè kè nyi ànyigbã kè ji àmè ɖe mu tona òa, zògbè kè nyi ànyigbã kè ji àmè ɖe mu nɔ̀nà òa.”

⁷Mù kplɔ̀ mì va àgblè-nyigbã nyuɛ̃ ji. Mù kplɔ̀ mì va àtikusɛ̃sɛ̃wo be ànyigbã ji, ne mìa ɖù yebe èkusɛ̃sɛ̃wo, ku yebe ènu nyuɛ̃wo. Vɔ̀a, kè mì vaa, mì dovlo ànyigbã nyèa, eye mì sɔ ècrɔ̃nu nyèa wɔ̀ èŋunyɔnu.

⁸Mawunɔwo mu biɔ sè be: “Fikɛ ye Tɔhonɔ̀ lè ò?” Àmè kèwo si Mawu be èseawo lèawo mu gbà jèsi mù ò. Kplɔ̀tɔwo jè àgla ɖo ŋuti nyè. Gblɔ̃ɖɛtɔwo gblɔ̃ vòdu Baal be ènyà ɖɛ, eye wo kplɔ̀nà legba gbalowo do.

⁹Ekèa ŋuti mù la gbà sɔ ènyà ɖo mìa ŋuti!” Tɔhonɔ̀ ye gblɔ̃ ɛ̀, e gbà gblɔ̃ be: “Ekèa yomè a, mù la gbà sɔ ènyà ɖo mìabe èviwo be èviwo ŋuti.

¹⁰Mì yì Kitìtɔwo be ètɔ̀dòmèkɔ̃ɛ̃wo ji, ne mìa kpɔ àgowo ji. Mì dɔ̃ àmè ɖoɖa Kedàr, ne mìa hũ ŋùku nyuɛ̃ ɖe, ne mìa kpɔ be ènu kèa hati jɔ̀ kpɔ màa.

¹¹Dùkɔ̃ ɖe ɖɔ̀lì yebe ènusɛ̃sɛ̃wo kpɔa? Ènusɛ̃sɛ̃ kèawo mu nyi vòduwo ŋutɔ cã ò. Gãkea, dùkɔ̃ nyèa yaa, e sɔ yebe gogoa ɖɔ̀lì ku legbavi gbalowo.

¹²Jiŋùkusiwo, ènu kèa ne dãŋù do mì! Ne nyɔŋu na mì, ne sò àdìka na mì! Ne mìa hũhũ pò tìtìtì!” Tɔhonɔ̀ ye gblɔ̃ ɛ̀.

¹³Ènuvuɛ̃ èvè ye dùkɔ̃ nyèa wɔ̀: Wo trɔ ŋùgbe do ènyè kè nyi àgbè be èsìjɔ̀pea. Woa ŋutɔwo, wo ɖè woabe vudowo, vudo gbãgbã kèwo mè èsì mu teŋu nɔ̀ ò a.”

¹⁴“Izràɛl be dùkɔ̃a ɖe, kluvi ye be nyia? Àmèpèple ye be nyi, so jɔ̀jɔmèa? Vɔ̀a, nukɛ ŋuti ye be va trɔ zũ dùkɔ̃wo be èlã ɖùɖu ɖo ò?

¹⁵Jãŋùtawo ɖè ègbè ɖo e ta; wo fã ku àdã. Wo gbã yebe èdùwo keŋu-keŋu Wo tɔzò yebe èdùgãwo, eye èdùawo mètɔwo si àhùa

¹⁶Nɔfviwo ku Tafanèviwo ŋutɔ cã ɖù ègbe lè zòdòmè na wò.

¹⁷Mu nyi wò ŋutɔ ye hɛ̃ ekèa va ɖokoe wò ji, wàlɛbɛ kè wò trɔ ŋùgbe do Tɔhonɔ̀ kè nyi àpo Mawu, wàlɛbɛ kè be le kplɔ̀ wò lè èmɔ̃ jɔ̀jɔɛ jia ò a?

¹⁸Fifìa ɖe, nukɛ be èmɔ̃ wò jè tùtà Ejiptè ò? Ne wòa yì nù Nil be ètɔa be èsìa? Nukɛ be èmɔ̃ wò jè tùtà Àsur ò? Ne wòa yì nù Efratà be ètɔ̀ sàsraa be èsìa?

¹⁹Wò ŋutɔ àpo àgɔ̀jèje la dɔ̃ èto na wò; wò ŋutɔ àpo ànùkua mà-wɔ̀ la kã ŋùkumè na wò! Eye wò la sè veve kaɖi kaɖi, kaka la ɖù àɖuklui, la sɔ nya lekè be nyrã, eye be vena ɖo, be wòa trɔ lè Tɔhonɔ̀, àpo Mawu yomè, ekè vɔ̃vɔ̃ tètè mu gbà ɖo wò, ɖo ŋuti nyè òa!” Tɔhonɔ̀ Mawu, Ŋusɛ̃kpatatɔa ye gblɔ̃ ɛ̀!

²⁰“Ekè wò ŋɛ̃ àpo èkɔ̀kuti, so kaka gbè ɖe gbè ke, eye wò sò àpo èkàwoa, wò gblɔ̃ be: “Nyè mu jro la gbà nyi sumɔ̃vi ò!” Gãkea, lè ètokɔ̃ɛ yìji ɖe sia ɖe ji, ku àti ɖe sia ɖe kè vũa gɔ̃mèa, wò jè ŋɛ̃sì, sìgbè àhasìtɔ[3] nène.

²¹Ènyè yaa, mù do wò, sìgbè vɛ̃-gble nène. Vɛ̃ku nyuɛ̃ kè mù cã, lè ànùkua vɛ̃ka àdodoewo dòmèa. Leke wɔ̀ ye wò va trɔ ɖo ŋuti nyè, zũ àhasì be vɛ̃ka, nyrãhũ kè be èkusɛ̃sɛ̃wo gble ò?

²²Ne wò sɔ àkãŋù[4], klɔ ɖokoe wò, eye wò lè ɖokoe wò ku àɖi gbogbo ɖe ŋutɔ cã a, àpo àgɔ̀jèje be èɖia gbà lè ŋùku nyè mè.” Tɔhonɔ̀ Mawu Ŋusɛ̃kpatatɔa ye gblɔ̃ ɛ̀.

²³Leke wò la teŋu kãsè gblɔ̃ be: “Èɖi mu lè ŋuti nyè ò, ɖoa, nyè mu kplɔ̀nà vòdu Baalwo do ò!” ɖo ò? Kpɔ ènu kè wò wɔ̀ lè bàlìa mèa ɖa! Le ŋùkuvi ɖo ènu kè wò wɔ̀ lè bàlìa mèa ŋuti, ne wòa jèsi ì! Èsɔ èkpovènɔ̀ kè le ɖìsàa ye wò nyi!

²⁴Ègbemè be èsɔàkɛtɛ-nɔ̀ kè ma do zògbè, wàlɛbɛ kè be le ji àsua, e huɛ̃na àya sè. Àmè kɛ ye la teŋu ɖo àlɔ̀ e ji, wàlɛbɛ kè be le ji àsua ò? Àsu kèwo keŋu jro la ji ìa, wo mu hiã la jè àgbàgba ɖekpe, lè yebe àsudodo hùenu ò!

²⁵Kpɔ àfɔ̀ wòwo ji nyuɛ̃ ɖe, ne wò mu gbà va zɔ̃ àfɔ̀ gbalo ò! Kpɔ èhlò wò mè ji nyuɛ̃ ɖe, ne èsìkɔ mu gbà va tì wò ò! Vɔ̀a, wò le gblɔ̃ be: “Kpao! Mu la teŋu jè e ji ò! Èdù bu mè be vòduwo jɔ̀nàjì na mù, ekèa ŋuti mù ɖo la jè woa yomè ɖo.”

²⁶Tɔhonɔ̀ gblɔ̃ be: “Sìgbè lekè èŋù kpɛ̃nà fìãfìtɔ, ne àsi jè e jia nènea, nènea ke ye èŋù la kpɛ̃ Izràɛl be àxuea, woawo ŋutɔwo, woabe èfìɔwo ku woabe àgbònùglawo, woabe hũbonɔwo ku woabe gblɔ̃ɖɛtɔwo.

²⁷Wo gblɔ̃nà na àti be: “Èwò ye nyi ètɔ nyè!” Eye wo gblɔ̃nà na èkpe be: “Èwò ye jì mù!” Wo trɔ ŋùgbe do mù, Wo mu jè ŋùkɔ̀ mù ò. Vɔ̀a, ne wo lè èhiã mèa, wo gblɔ̃nà be: “Va hlùɛ̃ mi gã!”

²⁸Fifìa ɖe, fikɛ ye vòdu kèwo wò wɔ̀, na ɖokoe wòawo lè ò? Wo ne sitè, ne wo la teŋu hlùɛ̃ wò gã lè tùkaɖawo mèa, na, ne woa va! Ɖoa, àpo vòduwo va sùgbɔ, sìgbè lekè èdùwo sùgbɔ, lè àsi wòa nène, Oò, Yudà-nyigbã!”

²⁹“Nukɛ be ènyà mì le sɔ ɖo ŋuti nyè ò? Mìa kpata, mì jè àgla ɖo ŋuti nyè!” Tɔhonɔ̀ ye gblɔ̃ ɛ̀.

³⁰“Mù dɔ̃ èto na mìabe èviwo kaka e glo! Wo sɔ ɛ̀ do ètoku mè. Mìabe èwuiwo vũvũ mìabe gblɔ̃ɖɛtɔwo, Sìgbè lekè jãŋùta vũvũna èlã nène.

³¹Mì, jìjimèvi kèawo, Mì sè Tɔhonɔ̀ be ènyà kèa mè be: “Zògbè ye mù trɔ zũ, na Izràɛlviwo loo, àlo, vìvìti cricri-nyigbã ye mù nyi na wo? Nukɛ ŋuti dùkɔ̃ nyèa le gblɔ̃ be: 'Mi mu la gbà trɔ va gbɔ wò ò!'” ɖo ò?

³²Tùgbɛ̀jɛ ŋlɔ̀nàbe yebe sìkanuwoa? Àgɔ̀sɔ ŋlɔ̀nàbe yebe àcɔɖonuwoa? Gãkea, àpe dùkɔ̃mèviwo ŋlɔ̀be mù, so kaka gbè ɖe gbè ke!

³³Wò gbà bi lè àɖàŋùɖèɖe mè, la sɔ jè àzìãvi! Àleke be nyɔ̃nù kèwo yì le dãhlɔ̃a ŋutɔ cã kpla ènu so gbɔ wò!

³⁴Èɖemànyatɔ ŋuzĩzĩmewo be èhũ cã lè àpo àwù be ètomè. Mu nyi èhɔ̃gbãgbã, na èfĩ fìfi mè ye mù kpɔ ɛ̀ lè ò, to e gbɔ be ènu lè lekea cã a.

³⁵Wò gbà le gblɔ̃ be: “Nyè mu wɔ̀ ènu ɖekpe ò, Mawu be àdɔ̀mèzea la trɔ jo lè ji nyè.” Vɔ̀a, ènyè yaa, mù la ɖo kòjo na wò, Ɖoa, wò le gblɔ̃ be: “Nyè mu wɔ̀ nuvuɛ̃ ò.”

³⁶Ne wò nɔ̀ èmìɔ̃ mèa, wò la nɔ̀ ɖùsi mè, le ɖìgbɔ ɖokoe wò kpò! Ŋùkpɛ̃ kpò wò la gbà hɛ̃ gbɔ̀, so Ejiptè, sìgbè lekè wò hɛ̃ ɛ̀ gbɔ̀, so Àsirìa gbɔa nène.

³⁷So funua cã a, wò la gbà gbɔ̀, ku àsi kpla èta, ɖoa, Tɔhonɔ̀ crì àmè kèwo ŋuti wò dojì ɖoa; wo mu la teŋu wɔ̀ ɖàgbè na wò ò.”