Read gen Yeremìa 20 Bible Online

Yeremìa 20 - gen bible

Yeremìa 20

¹Ekè Pasehùr, Emèr kè nyi hũbonɔ kèwo lè Tɔhonɔ̀ be àxuea mèawo be ègaa be èvi sè be Yeremìa le gblɔ̃ ènyà kèawo ɖɛa,

²e na wo pò Yeremìa, eye be na wo do è ègà ɖo Bɛnyamìn-nyigbãa be èkpoji be àgboa nu, na Tɔhonɔ̀ be àxuea.

³Ekè èŋù kè, eye Pasehùr na wo ɖè àsi lè Yeremìa ŋutia, Yeremìa gblɔ̃ na ɛ̀ be: “Tɔhonɔ̀ mu la gbà yɔ wò be Pasehùr ke ò. Vɔ̀a, 'Màgɔr-Misàbib', ekè gɔ̃mè ye nyi: 'Vɔ̃vɔ̃ lè àfi sia àfi gòdòo'”.

⁴Ɖoa, Tɔhonɔ̀ gblɔ̃ be: “Mù la na, wò la nɔ do vɔ̃vɔ̃ na ɖokoe wò, ku èxlɔ̃ wòwo keŋu. Wò ŋutɔ, wò la kpɔ ku àpo ŋùkuviwo, wo la ci woabe kɛ̃tɔwo be èwui nu. Mù la sɔ Yudà-nyigbã jitɔwo keŋu do àsi na Babɛ̀l bè èfìɔa. E la kplɔ̀ wo jo yì Babɛ̀l-nyigbã ji, àlo la crɔ̃ wo ku èwui.

⁵Mù la sɔ èdù kèa be àdɔ̀kùnuwo keŋu do àsi na woabe kɛ̃tɔwo. Mù la sɔ yebe nukuwo keŋu, yebe ènuxɔ̀asìwo keŋu, ku Yudà be èfìɔwo be àdɔ̀kùnuwo keŋu kpe ɖo woa ŋuti. Mìabe kɛ̃tɔwo la hlà ènu kèawo keŋu jo, wo la lɔ wo jo yì Babɛ̀l.

⁶Eye èwò, Pasehùr ku àmè kèwo keŋu lè àpo àxomèa, wo la kplɔ̀ mì àhùale, yì Babɛ̀l. Funua ye mì la ku lè, eye wo la ɖì mì lè, èwò ku èxlɔ̃ wò kèwo keŋu wò gblɔ̃ àjè be ènyàwo ɖɛ na a”.

⁷Aò Tɔhonɔ̀, wò gblɔ̃ ènyà ɖo èto mè na mù, eye mù xɔ̀ ègbè sè na wò, ènu mà-nya. Ekè wò zĩ ji nyèa, wò kpe ji nyè nyàwo. Ŋùkèkè bliboa, mù trɔ zũ àlɔmè ɖènu, eye àmèwo kpata le kò mù.

⁸Wè sia wè, ne mù pò nupoa, mù dona àpa, ɖènà èhũnyànyrã ku ènùgbegble sia. Tɔhonɔ̀ be ènyàa ŋuti mù xà ɖo, xɔ̀nà èzũ ku ŋùmèkãkã, ŋùkèkè bliboa.

⁹Gãkea, ne mù gblɔ̃ be: “Nyè mu gbà la yɔ yebe nyikɔ, àlo, nyè mu gbà la pò nupo lè yebe nyikɔ mè ò a”, eŋuã, yebe ènyà trɔna zũ èzò bìbi lè èjì nyè mè. Èzò kè nu wo tu ènu ɖo lè èpu nyèwo mèa. Mù jè àgbàgba, ne ma kpe e ji kaka, vɔ̀a, e glo mù.

¹⁰Woabe ègbèwo pòxla mù fuu, eye wo le do ŋùklɛ̃ na mù. Wo le do vɔ̃vɔ̃ na mù, to àfi sia àfi, le gblɔ̃ be: “Mì ɖè è gblɔ̃! Ɛ̃ɛ, mia ɖè è gblɔ̃!” Èxlɔ̃ nyèwo kpata le kpɔ èmɔ̃ be ma ɖiɖi, eye wo le gblɔ̃ be: “Èta mu nyɔ ò a, wo la flù ì, eye mi la kpe e ji, ne mia biɔ ɛ̀ èhlɔ̃.”

¹¹Gãkea, Tɔhonɔ̀ nyi àhùawɔ̀tɔ gã ɖe, lè ku mù. Ekèa ŋutia, yo nyè mè tĩtɔwo la klɛ̃ àfɔ̀; wo mu la ɖùji ò. Woabe ɖoɖowo la gble, wo la ɖù ŋùkpɛ̃ veveɖe, eye àmè ɖe mu la ŋlɔ̀be woabe ŋùkpɛ̃a gbèɖe ò!

¹²Aò, Tɔhonɔ̀ Ŋusɛ̃kpatatɔ, èwò kè dànà àmè jɔ̀jɔɛwo kpɔ, eye wò jrònà èjì ku susuwo mè kpɔa, ɖè àpo èhlɔ̃ kè wò la biɔ woa fiɔ mù. Ɖoa, àsi wò mè, mù sɔ àpe ènyà do.

¹³Mì jìhà kafu Tɔhonɔ̀! Mì mlã Tɔhonɔ̀ be nyikɔ! E hlùɛ̃nà àmè kè lè èhiã mèa gã, Lè àmè vuɛ̃ si mè.

¹⁴Kpɛ̃sɛ̃ ne jè gbè kè gbè wo jì mù a ji! Sìtu mu gbà nɔ̀ gbè kè gbè ènɔ̀ nyè kɔ̀ mù ɖɛa ji ò!

¹⁵Kpɛ̃sɛ̃ ne jè àmè kè hɛ̃ àŋɛ̀a va na ètɔ nyèa ji! Kpɛ̃sɛ̃ ne jè àmè kè do jìjɔɛ na ètɔ nyè be: “Wo jì èvi na wò! Wo jì ŋusùvi na wò!”

¹⁶Ŋusù ŋua ne nɔ̀ sìgbè èdù kèwo Tɔhonɔ̀ trɔ mù pu ànyi, ŋuzĩzĩ mà kutɔ̀a nène; ŋusù ŋua ne sè àlenana, lè nùdekɛ̃nyɛ mè, eye, ne sè àhùa be àbòbo, dɔ̃ŋùkusu mè.

¹⁷Ɖoa, mu wù mù lè àdɔ̀mè, ne ènɔ̀ nyè ne nyi yɔ̀do na mù, ne èfu ne ci e si tɛ̀gbɛ̀ ò.

¹⁸Nukɛ ŋuti mù to so ènɔ̀ nyè be àdɔ̀a mè, va le kpɔ èfũkpekpe, ku vevesèse, ne àgbè nyè ne vɔ̀ lè ŋùkpɛ̃ mè ɖo ò?