Read gen Yeremìa 21 Bible Online

Yeremìa 21 - gen bible

Yeremìa 21

¹Tɔhonɔ̀ be ègbè ɖì na Yeremìa, wàlɛbɛ kè èfìɔ Sedekìas dɔ̃ Pasehùr, Malkìa be èvia ku hũbonɔ Sèfanìa, kè nyi Màseyà be èvia ɖoɖa Yeremìa gbɔ, ne woa gblɔ̃ na ɛ̀ be:

²“Biɔ ènyà Tɔhonɔ̀ sè na mi, ɖoa Babɛ̀l be èfìɔ Nèbukàdnezà ɖè àhùa kpe na mi. Èta mu nyɔ ò a, Tɔhonɔ̀ la wɔ̀ ŋùdãnu na mi, sìgbè sãa nène, àleke be Babɛ̀l be èfìɔa ne dɔ̃ yì ŋùgbe lè mia ŋuti”.

³Yeremìa ɖo e ŋuti na wo be: “Mì gblɔ̃ na Sedekìas be:

⁴“Ènyà kè Tɔhonɔ̀, Izràɛl be Mawu a gblɔ̃a ye nyi ekèa: Kpɔɖa, mù la na àhùawɔ̀nu kèwo ye lè mìabe àlɔ̀wo mè, mì sɔ le kpãŋùkɔ̀ Babɛ̀l be èfìɔ ku Kaldeatɔ kèwo ye trɔ do mì gòdò, lè èdùa be èglìwo godo, le zĩ mìa jia, mù la trɔ wo ɖoɖa èdùa be dòdòmè, ɖo mìa ŋuti. Mù la bɔ̀ wo keŋu ɖo èdù kèa mè.

⁵Nyè ŋutɔ, mù la kpãŋùkɔ̀ wò, mù la vlũ àbɔ ku àdɔ̀mèze be àlɔ̀ sɛ̃sɛ̃, la sɔ àdɔ̀mèze wɔ̀ àhùa ku wò.

⁶Mù la pò àmè kèwo ye lè èdù kèa mèawo pu ànyi, àmèwo ku èlãwo keŋu, eye èdɔ̀ vuɛ̃ sɛ̃ŋuɖe la wù wo.”

⁷Tɔhonɔ̀ gblɔ̃ be: “Ekèa yomè a, mù la sɔ Sedekìas, Yudà be èfìɔa, yebe àgbònùglawo ku àmè kèwo la ci àgbè le èdɔ̀ vuɛ̃ a yomè awo do àsi na èwui ku àdɔ̀wùàmè. Mù la sɔ wo do àsi na Nèbukàdnezà, Babɛ̀l be èfìɔa ku woabe kɛ̃tɔ kèwo le ji la crɔ̃ woa. E la sɔ èwui wù wo, eye mu la kpɔ ɖo e mè na wo, àlo la ku ŋuzĩzĩ na wo ò”.

⁸“Sɔ yì e jia, gblɔ̃ na dùkɔ̃a be: Tɔhonɔ̀ gblɔ̃ be: Kpɔɖa, mù le sɔ àgbè be èmɔ̃ ku èku be èmɔ̃ le ɖo ŋùmè na wò.

⁹Àmè ɖekpekpe àmè kè la ci èdù kèa mèa la ci èwui nu, àlo, la ku àdɔ̀ku, àlo èdɔ̀ vuɛ̃ la wù ì. Vɔ̀a, àmè ɖekpekpe àmè kè la to lè èdùa mè, la yì na èta Babɛ̀ltɔ kèwo le zĩ mìa jia, la ci àgbè eye be la hlùɛ̃ ye ɖokoe be àgbè gã.”

¹⁰Tɔhonɔ̀ gblɔ̃ be: “Mù ɖo è be mù la wɔ̀ èvuɛ̃ ku èdù kèa, eye nyè mu la wɔ̀ ènyuɛ̃ na ɛ̀ ò. E la ci àsi na Babɛ̀l be èfìɔ, eye be la crɔ̃ ɛ̀ ku èzò.”

¹¹Tɔhonɔ̀ gblɔ̃ be, gblɔ̃ na Yudà-fìɔ be àxomètɔwo be: “Mì sè ègbè na Tɔhonɔ̀.

¹²Aò, David be àxue, ènyà kè Tɔhonɔ̀ gblɔ̃a ye nyi ekèa: Mì nɔ sò jɔ̀jɔɛ ŋùdekɛ̃nyɛ sia ŋùdekɛ̃nyɛ. Mì hlùɛ̃ àmè kè wo le tafua gã, lè àmè kè le tafu ìa si. Ne mu nyi nène òa, àpe àdɔ̀mèze la wo, eye be la bì, sìgbè èzò nène. Ènuvuɛ̃ kèwo mì le wɔ̀awo la na be la bì, Eye àmè ɖekpekpe mu la teŋu ci ì ò.

¹³Mù sitè ɖo ŋuti wò, Yèruzàlɛm, èwò kè lè bàlì kèa mè, lè àkpã be èto gbàjàa tamèa.” Tɔhonɔ̀ ye gblɔ̃ ɛ̀. “Èwò kè gblɔ̃ be: Àmè kɛ ye la teŋu va kpe àkɔ ku mi ò? Àmè kɛ ye la teŋu ɖo miabe bèbèpea ò?

¹⁴Mù la dɔ̃ èto na wò ɖo àpo àgɔ̀jèjewo nu, Tɔhonɔ̀ gblɔ̃ be: Mu la tɔzò àpo àvewo, eye be la bì ènu sia ènu kè trɔ do wòa.”