Read gen Yeremìa 22 Bible Online

Yeremìa 22 - gen bible

Yeremìa 22

¹Tɔhonɔ̀ gblɔ̃ be: “Yì Yudà-fìɔa be àxomè. Ne wò ɖo funua, gblɔ̃ ènyà kèa be:

²Aò, Yudà be èfìɔ, èwò, àmè kè ye nɔ̀ ànyi ɖo David be èfìɔzìkpea jia, ɖo èto Tɔhonɔ̀ be ègbè, wò ŋutɔ, àpo àgbònùglawo, ku àpo dùkɔ̃ kè tona àgbo kèawo nu, yìnà, gbɔ̀nàa.

³Tɔhonɔ̀ gblɔ̃ be: Mì nɔ wɔ̀ ènu kè jɔ̀, eye be nyɔa. Mì nɔ hlùɛ̃ àmè kè wo le tafua, so àmè kè le tafu ìa si. Mì mu gbà nɔ wɔ̀ èvuɛ̃, àlo èhlɔ̃dãnu ɖo àmèjro, cɔɛvi, àlo àhòsì ŋuti ò. Mì mu gbà nɔ kɔ̀ ɖemànyatɔ be èhũ ɖɛ, lè tèpe kèa ò.

⁴Ekèa ŋutia, ne mì kpɔ nyuɛ̃ ɖe, eye mì zɔ̃ ɖo èse kèawo jia, eŋuã, èfìɔ kèwo ye la nɔ̀ David be èfìɔzìkpea jiawo la nɔ̀ èsɔwo ji, la nɔ̀ àhùakèkewo mè, woabe àgbònùglawo ku woabe èdù mètɔwo la kplɔ̀ wo do, la nɔ yì, la nɔ gbɔ̀, to èdù kèa be àgbowo nu.”

⁵Vɔ̀a, ne mì mu zɔ̃ ɖo èse kèawo ji òa, Tɔhonɔ̀ gblɔ̃ be: “Mu tà ɖokoe nyè be èdù kèa la trɔ zũ èglìkpowo”.

⁶Ɖoa, ènyà kè Tɔhonɔ̀ gblɔ̃ so Yudà be èfìɔwo be àxuea ŋutia ye nyi ekèa: “To e gbɔ be wò nyɔ, sìgbè lekè Gilead lè na mù a nènea, sìgbè lekè Libàn-toa tamè lè na mù a nènea, nya be mù la na, wò la trɔ zũ zògbè, wò la trɔ sìgbè èdù kèwo mè àmè mu lè òa nène.

⁷Mù la dɔ̃ ènugbãtɔwo ɖo yo wò mè, woa dòmètɔ ɖe sia ɖe ku yebe àhùawɔ̀nuwo. Wo la mù àpo sedàti nyuɛ̃wo pu ànyi, eye wo la fɔ̀ wo dà ɖo èzò mè.

⁸Ne àmèwo so dùkɔ̃ sùgbɔwo mè, va to èdù kèa gbɔa, wo la biɔ woa nɔ̀nɔwo sè be: 'Nukɛ ŋuti Tɔhonɔ̀ wɔ̀ ènu veve kèa ku èdù gã kèa ɖo ò?'

⁹Eye wo la ɖo e ŋuti na wo be: 'Ekè wo trɔ ŋùgbe do èzò kè wo ɖù ku Tɔhonɔ̀ kè nyi woabe Mawu, vɔ̀a, yì le sɛ̃ èdù bu mètɔwo be vòduwoa ŋuti ye.'”

¹⁰Mì mu gbà fã àvi ɖo àmè kè kua ta ò, mì mu gbà lòfũ ɖo e ta ò. Vɔ̀a, mì fã àvi veveɖe, ɖo àmè kè wo kplɔ̀ àhùalea ta, ɖoa, mu la gbà trɔ gbɔ̀ va àxue, àlo, la gbà kpɔ woa de be ànyigbã gbèɖe ò.

¹¹Ɛ̃ɛ, ènyà kè Tɔhonɔ̀ gblɔ̃ ɖo Salùm, Yosìas be èvi, Yudà be èfìɔ kè nɔ ètɔa tèpe, lè Yudà be èfìɔzìkpea ji, gãkea, jo le funua ye nyi be: “Mu la gbà trɔ gbɔ̀ gbèɖe ò!

¹²E la ku lè àfi kè wo le è sɔ yìa. Mu la gbà kpɔ woa de be ànyigbã ke ò!”

¹³“Hèlu na àmè kè tù yebe èfìɔsa ɖo jɔ̀jɔɛ mà-wɔ̀ ji, kè tù yebe àsãŋuwo ɖo ènyà gɔ̃glɔ̃ ji, kè nana yebe èdù mètɔwo wɔ̀nà èdɔ gbalo, kè mu tuna èfɛ̃ na wo, ɖo woabe àyàɖùɖu ta òa.

¹⁴Nènemea gblɔ̃nà be: “Mù la tù èfìɔsa gã ɖe na ɖokoe nyè, kè mè èxɔ̀wo la kèkè, lè àsãŋu ji lèa.” Eye be ɖona flɛsɛ̀ kèwo ye kèkèa na èfìɔsaa. Wo kpànà sedàti ɖona àcɔ na ɛ̀, eye be sìnà àŋɔ̀ jɛ̃ na ɛ̀.

¹⁵“Wò susu be sedàti kè wò sɔ le yigòa, ye le nyi èfìɔɖùɖua? Sãa, ètɔ wòa ɖe, mu ɖùnà, nùnà òa? Gãkea ɖe, e wɔ̀nà ènu kè nyɔa ku ènu kè jɔ̀ a! Ekèa na be ènu sia ènu jè e ji na ɛ̀ nyuɛ̃ ɖe.

¹⁶E xɔ̀nà ènyà ɖo wɔ̀amènɔ̀wo ku èhiãtɔwo ta. Eye ènuwo keŋu zɔ̃nà nyuɛ̃ ɖe. Mu nyi ekèa ye nyi woa jèsi mù a?” Tɔhonɔ̀ ye gblɔ̃ ɛ̀.

¹⁷“Vɔ̀a, èwò yaa, àpo, èjì ku àpo ŋùkuviwo lè, ɖo àlè vuɛ̃wo ɖùɖu ŋuti. Wo lè, ɖo ɖemànyatɔwo be èhũ kɔ̀kɔ̀ ɖɛ ŋuti. Wo lè, ɖo ènu hàhla le àmè si ŋuti.”

¹⁸Ekèa ŋutia, ènyà kè Tɔhonɔ̀ gblɔ̃ so Yehoyakìm, Yudà be èfìɔ, kè nyi Yosìas be èvia ŋutia ye nyi ekèa: “Wo mu la wɔ̀ ècɔ na ɛ̀ ò. Aò, nɔ̀vi nyè ŋusù! Aò, nɔ̀vi nyè nyɔ̃nù! Wo mu la wɔ̀ ècɔ na ɛ̀ ò! “Aò, àpetɔ nyè! Aò, leke be klɛ̃na ɖoa!”

¹⁹Wo la ɖì ì, sìgbè lekè wo ɖìnà èsɔ-àkɛtɛ kè wo dɔ̃nà lè ànyigbã, sɔ dãnà ŋùgbe ɖo Yèruzàlɛm be àgbowo godoa nène.”

²⁰“Yì Libàn be ètoa ji, ne wòa do àpa, ne woa sè àpo ègbè lè Bacàn be ànyigbã a ji. Kpà àbòbo so kaka Àbàrim be ànyigbã a ji, ɖoa, wo gbã àzìãvi wòwo keŋu gudu-gudu!

²¹Mù sìa wò sã, wàlɛbɛ kè wò susu be vɔ̃vɔ̃ mu lè òa. Gãkea, wò ɖo e ŋuti na mù be: 'Nyè mu la ɖo èto ò!' Lekea kpò wò wɔ̀nà, so kaka ɖèvi mè ke. Ɖoa wò mu sè ètonu na mù ò.

²²Àya le pò àpo àlɛ̃kplɔ̀tɔwo keŋu jo, eye wo le kplɔ̀ àpo àzìãviwo keŋu àhùale. Ɛ̃ɛ, wo la do wò vlo, ne wòa ɖù ŋùkpɛ̃, ɖo àpo èkunyànyrãwo keŋu ŋuti.

²³Èwò kè nɔ̀nà Libàn be èto ji, ɖo àtɔ̃ ɖo sedàtiwo mèa, wò la fã, wàlɛbɛ kè vevesèse la jè e ji wò, la zĩ ji wò, sìgbè nyɔ̃nù kè le lekua be vevesèse nène!”

²⁴Tɔhonɔ̀ gblɔ̃ be: “Mù tà nyè ŋutɔ àpe àgbè be, ne èwò, Kòniyàhu, Yehoyakìm, Yudà be èfìɔa be èvi, wò nyi ènutre jèsìdo be àlɔ̀gàvi lè àpe ɖùsi-lɔ̀ ŋutɔ cã a, mù la ɖè wò jo.

²⁵Mù la do wò àsi na àmè kèwo ye le ji èvuɛ̃ na àpo àgbèa, do àsi na àmè kèwo ye wò le vɔ̃awo, mù la do wò àsi na Nebukàdnetzà, Babɛ̀l be èfìɔa, mù la do wò àsi na Babɛ̀l be èdùmètɔwo.

²⁶Mù la sɔ èwò kù ènɔ̀ wò kè jì wòa dãŋùgbe ɖo èdù bu kè mè wo mu jì mìa dòmètɔ ɖekpe lè ò a mè, eye mì, àmè èvèawo, mì la ku lè funua.

²⁷Mì mu la gbà trɔ gbɔ̀ va èdù kè mè e le jro mì be mìa trɔ gbɔ̀ vaa mè gbèɖe ò.”

²⁸Àmèwo la biɔ sè be: “Ŋusù Kòniyàhu kèa ɖe, èze gbãgbã be nyia? Mu la nɔ̀ èbò ɖe nua! Nukɛ ŋuti wo nyà ye kudo èviawo ɖo ɖa ànyigbã ɖe, kè ŋuti mu nya ènu ɖe soa, ji ɖo ò?”

²⁹Ànyigbã, ànyigbã, ànyigbã! Ɖo èto ènyà kè Tɔhonɔ̀ gblɔ̃a.

³⁰E gblɔ̃ be: “Wo ne ŋlɔ̀ Kòniyàhu, ŋusù kèa sìgbè àmè mà-ɖo èviwo nène! Yebe àgbèa mu ɖè àlè ɖekpe ò. Yebe xòmètɔ ɖekpe mu la teŋu va nɔ̀ David be àzìkpea ji, sɔ kplɔ̀ Yudà be dùkɔ̃a ò.”