Read gen Yeremìa 23 Bible Online

Yeremìa 23 - gen bible

Yeremìa 23

¹“Bàbà na àlɛ̃kplɔ̀tɔ kèwo ye ɖè èkɔ̀ lè èlãnyìpe nyè be àlɛ̃haa ŋuti, be ɖìkù eye be kãhlɛ̃a!” Tɔhonɔ̀ ye gblɔ̃ ɛ̀.

²Ekèa ŋutia, ènyà kè Tɔhonɔ̀, Izràɛl be Mawu a le gblɔ̃ na àlɛ̃kplɔ̀tɔ kèwo kpɔna dùkɔ̃ nyèa jia ye nyi be: “Ekè mì kã àlɛ̃ha nyèa hlɛ̃, mì kplɔ̀ wo jo, eye mì mu lebè na wo òa, mù la kɔ̀ ètodɔ̃ ɖo mìa ji, ɖo èvuɛ̃ kè mì wɔ̀a ŋuti.” Tɔhonɔ̀ ye gblɔ̃ ɛ̀.

³Tɔhonɔ̀ gblɔ̃ be: “Nyè ŋutɔ mù la bɔ̀ àlɛ̃ha kè kpɔ̀tɔ̀ na mù a, so ànyigbã kèwo keŋu ji mù kplɔ̀ wo ɖoɖaawo ji. Mù la gbìgbɔ̀ kplɔ̀ wo gbɔ̀ va woabe nyìpe, àfi kè wo la jì ɖo e ji, eye wo la kèkè èta lèa.

⁴Mù la gbìgbɔ̀ ɖo kplɔ̀tɔ kèwo la lebè na woa, na wo, eye àdìka mu la gbà sò wo, àlo vɔ̃vɔ̃ bèa ɖo wo, àlo woa dòmètɔ ɖe ne bu ò.” Tɔhonɔ̀ ye gblɔ̃ ɛ̀.

⁵Tɔhonɔ̀ gblɔ̃ be: “Èŋù ɖewo gbãnà, la va kè, ekè mù la na jìjimèvi àdodoe la jɔ̀, so David be hɛ̃nu mè. E la nyi èfìɔ kè la sɔ àɖàŋù kplɔ̀ dùkɔ̃a. E la sɔ jɔ̀jɔɛwɔ̀wɔ ku ànùkua, hlùɛ̃ dùkɔ̃a ta.

⁶Yebe hùenu ye Yudàviwo la kpɔ hlùɛ̃gã lè. Eye Izràɛlviwo la nɔ̀ àgbè lè ŋuti fàfa mè. Nyikɔ kè wo la nɔ yɔ na mù a ye nyi: Tɔhonɔ̀ ye nyi miabe jɔ̀jɔɛ.

⁷“Ɛ̃ɛ, èŋù ɖewo gbãnà, la va kè!” Tɔhonɔ̀ ye gblɔ̃ ɛ̀. “Kè ye àmèwo mu la gbà gblɔ̃ be: 'Mi tà Tɔhonɔ̀ kè kplɔ̀ Izràɛlviwo gbɔ̀ so Ejiptè a be àgbè, godo', ke ò.”

⁸Vɔ̀a, wo la nɔ gblɔ̃ be: “Mi tà Tɔhonɔ̀ kè kplɔ̀ Izràɛl be jìjimèviwo gbɔ̀ so èvègo be ànyigbãwo ji, ku so èdù kèwo keŋu mè wo nyà wo lèa, godo.” Ekèa yomè a, wo la nɔ̀ woa ŋutɔwo woa de.”

⁹So gblɔ̃ɖɛtɔwo ŋuti: Èjì nyè flì lè àdɔ̀mè na mù. Èpu nyèwo keŋu le pò tìtìtì. Ɖoa, Tɔhonɔ̀ ku yebe ènyà kɔ̀kɔ̀ɛa na be mù zũ sìgbè àmè kè nù àhà mua nène, sìgbè ŋusù kè vɛ̃ sò èkà lè lãmè na a nène.

¹⁰Àhasìwɔ̀tɔwo ɖèɖe kpò ye ɖɔ ànyigbã a ji, woabe àtãŋukãkã na be ànyigbã a le lòfũ. Zògbè be èlãnyìpewo gbà le pu ɖo e ji, ɖoa, gblɔ̃ɖɛtɔwo be àzɔ̃lì nyi èvuɛ̃ ɖèɖe, eye wo le zã woabe àcɛ̀, sɔ le wɔ̀ ènuvuɛ̃.

¹¹Ɛ̃ɛ, gblɔ̃ɖɛtɔwo ku hũbonɔwo cã, woa kpata, wo mu nya Mawu ò. Lè mawuxɔa mè ŋutɔ cã a, mù le kpɔ woabe èvuɛ̃jɔ̀jɔ. Tɔhonɔ̀ ye gblɔ̃ ɛ̀.

¹²“Ekèa ŋutia, woabe èmɔ̃wo la nɔ ɖiɖi, Eye wo la kpɔ woa ɖokoewo lè vìvìti mè, àfi kè wo la klì ènu, la jè ànyi lèa. Èpè kè mè wo la xɔ̀ ètodɔ̃a, mù la hɛ̃ jɔ̀gbèvuɛ̃ va woa ji.” Tɔhonɔ̀ ye gblɔ̃ ɛ̀.

¹³“Lè Sàmarìa be gblɔ̃ɖɛtɔwo dòmèa, mù kpɔ bòmècici be ènuwɔ̀na kèa: Wo le gblɔ̃ ènyà ɖɛ, lè vòdu Baal be nyikɔ mè, sɔ le tre èmɔ̃ na Izràɛl, dùkɔ̃ nyèa.

¹⁴Lè Yèruzàlɛm be gblɔ̃ɖɛtɔwo dòmèa, mù kpɔ èŋunyɔnu ɖo vɔ̃vɔ̃ ɖe: Wo le wɔ̀ àhasì, eye wo lè àgbè lè àjèɖàɖa mè. Wo le do àlɔ̀ èvuɛ̃wɔ̀tɔwo, àleke be àmè ɖekpe mu le trɔ lè ènu nyànyrã wɔ̀wɔ yomè ò. Woa kpata, wo lè na mù sìgbè Sodɔ̀mtɔwo nène, eye Yèruzàlɛmtɔwo lè sìgbè Gòmɔràtɔwo nène.”

¹⁵Ekèa ŋuti ye Tɔhonɔ̀ Ŋusɛ̃kpatatɔa gblɔ̃ so gblɔ̃ɖɛtɔwo ŋuti be: “Kpɔɖa, mù la na wo vevesèse wo la ɖù, eye wo la kpe èsì kè mè àɖi lèa na wo, wo la nù. Ɖoa, Yèruzàlɛm be gblɔ̃ɖɛtɔwo ye na Mawu màvɔ̃ mà-vɔ̃ kãkã ɖo ànyigbãa keŋu ji.”

¹⁶Tɔhonɔ̀ Ŋusɛ̃kpatatɔa gblɔ̃ be: “Mì mu gbà ɖo èto ènyà kè gblɔ̃ɖɛtɔawo le gblɔ̃ ɖɛ na mì ò. Àjè be ènyà kpò wo le gblɔ̃ na mì. Woa ŋutɔ be susuwo mè ye wo so, mu nyi Tɔhonɔ̀ be ènu mè wo so ò.

¹⁷Wo kpɔ̀tɔ̀ gblɔ̃nà na àmè kèwo crì àpe ènyàwoa be: “Tɔhonɔ̀ gblɔ̃ be: Mì la kpɔ ɖàgbè.” Eye wo gblɔ̃nà na àmè kèwo keŋu le kplɔ̀ woabe ètamèsɛ̃sɛ̃a doawo be: “Èvuɛ̃ ɖekpe mu la jɔ̀ ɖo mìa ji ò.”

¹⁸Gãkea ɖe, woa dòmètɔ kɛ ye nɔ̀ Tɔhonɔ̀ be àɖàŋù mè, ne bèa kpɔ, àlo, ne bèa sè yebe ènyà ò? Àmè kɛ ye ɖo èto, eye be sè yebe ènyà ò?

¹⁹Kpɔɖa! Tɔhonɔ̀ be àdɔ̀mèze be àya sɛ̃sɛ̃a la so! Àdɔ̀mèze be àya hũhũ la ɖuɖu, la tro le èta ji na àmè vuɛ̃wo.

²⁰Tɔhonɔ̀ be àdɔ̀mèzea mu la fa, ne mu wɔ̀ ènu kè lè Tɔhonɔ̀ be èjì mèa, ku Tɔhonɔ̀ be ɖoɖowo keŋu-keŋu ò. Èŋùwo gbãnà, la va kè, mì la va sè e gɔ̃mè nyuɛ̃ ɖe, be nyè mu do èdɔ àsi na wo ò.

²¹Nyè mu dɔ̃ gblɔ̃ɖɛtɔ kèawo ò, gãkea, wo ɖìsà, le do woabe àŋɛ̀a. Nyè mu gblɔ̃ ènyà ɖekpe na wo ò, gãkea, wo gblɔ̃ ènyà ɖɛ.

²²Vɔ̀a, ne ɖe wo nɔ̀ àpe àɖàŋù mèa, wo la kè na dùkɔ̃ nyèa la sè àpe ènyàwo, wo la kè na dùkɔ̃ nyèa la trɔ lè èvuɛ̃ yomè. Wo la kè na dùkɔ̃ nyèa la trɔ lè ènu bàɖà yomè.

²³Tɔhonɔ̀ gblɔ̃ be: “Kpòepe be Mawu kpò ye mù nyi, eye nyè mu nyi Mawu kè be ŋusɛ̃ yì dìdìpea?

²⁴Àmè ɖe la teŋu wla ye ɖokoe do mù, kaka nyè mu la teŋu kpɔ ɛ̀ òa? Nyè ɖèka, nyè mu ɖɔna jiŋùkusi ku ànyigbã a?” Tɔhonɔ̀ ye gblɔ̃ ɛ̀.

²⁵“Mù sè gblɔ̃ɖɛtɔ kèwo sɔ ènyàgblɔ̃ɖɛwo le ɖà àjè ɖo àsi nyè, le gblɔ̃ be: “Mù kudrɔ̃! Mù kudrɔ̃a!” Be ènyàwo.

²⁶Kaka na gà kɛ mè, ènu kèa la yì e ji, lè àjè gblɔ̃ɖɛtɔ kèawo be èjìwo mè ò? Àmèflùnya kèwo lè woa ŋutɔ be susu mèawo kpò wo le gblɔ̃ ɖɛ.

²⁷Wo susu be èdrɔ̃ kèwo yèwo gblɔ̃nà na yèwo nɔ̀nɔwoa la na be dùkɔ̃ nyèa la ŋlɔ̀be mù, sìgbè leke woa tɔwo ŋlɔ̀be mù, wàlɛbɛ kè wo le sumɔ Baal be vòdua nène.

²⁸Gblɔ̃ɖɛtɔ kè kudrɔ̃a, ne gblɔ̃ yebe èdrɔ̃a. Vɔ̀a, woa dòmètɔ kè si àpe ènyà lèa, ne gblɔ̃ ɛ̀ tututu! Ɖoa, èkàdodo kɛ ye gbà lè èbli kè wo le fua ku fòflo kè àya sɔ le yìa dòmè ò? Tɔhonɔ̀ ye gblɔ̃ ɛ̀.

²⁹“Ènyà nyèa, lè sìgbè èzò nène; sìgbè hãmà kè gbãnà èkpea nène!

³⁰Tɔhonɔ̀ gblɔ̃ be: “Ekèa ŋutia, kpɔɖa, mù sitè ɖo gblɔ̃ɖɛtɔ kèwo ye fĩnà ènyà kèwo nyi ènyà nyèwo lè woa nɔ̀nɔwo siawo ŋuti.”

³¹Ɛ̃ɛ, Tɔhonɔ̀ gblɔ̃ be: 'Mù sitè ɖo gblɔ̃ɖɛtɔ kèwo vivina ènumè, eye wo gblɔ̃nà be: Tɔhonɔ̀ ye gblɔ̃ ɛ̀a ŋuti'.

³²Tɔhonɔ̀ be “Nyàwo ye! Mù sitè ɖo gblɔ̃ɖɛtɔ kèwo ye gblɔ̃nà àjè be ènyà ɖɛ, so drɔ̃kuku ŋutiawo ŋuti. Wo sɔna woabe drɔ̃kukuawo flùnà dùkɔ̃ nyèa, eye woabe àjèɖàɖawo nana wo trãnà èmɔ̃, vɔ̀a, ènyè yaa, nyè mu dɔ̃ wo ò, eye nyè mu do ègbè àsi na wo ò. Wo mu le ɖè àlè ɖekpe na dùkɔ̃ nyèa klua ò”. Tɔhonɔ̀ ye gblɔ̃ ɛ̀.

³³“Ne àmè ŋuawo dòmètɔ ɖe, gblɔ̃ɖɛtɔ ɖe, àlo hũbonɔ ɖe biɔ mì be: “Ènyà kɛ ye Tɔhonɔ̀ gblɔ̃ ò?” Mì ɖo e ŋuti na ɛ̀ be: “Tɔhonɔ̀ gblɔ̃ be: Mìawo ye nyi Tɔhonɔ̀ be àgbã, eye ènyè yaa, mù la sɔ mì dãŋùgbe!”

³⁴Ne gblɔ̃ɖɛtɔ ɖe, hũbonɔ ɖe, àlo àmè bu le gblɔ̃ be: “Nukɛ be àgbã na Tɔhonɔ̀ ò?” Mù la dɔ̃ èto na àmè ŋua ku yebe àxuedo a kpata.

³⁵Ènyà kè mì la nɔ biɔ mìa nɔ̀nɔwo, àlo, mìa nɔ̀viwo a ye nyi: “Leke ye Tɔhonɔ̀ ɖo e ŋuti ɖo ò?” Àlo, “Àŋɛ̀ kɛ ye Tɔhonɔ̀ do ò?”

³⁶Vɔ̀ a, mì mu ɖo la yɔ 'Tɔhonɔ̀ be àgbã' be nyikɔ ke ò, ɖoa, àmè sia àmè ŋutɔ be ènyà trɔ zũ yebe àgbã, eye nènea, mì trɔna èta do ègũ na Mawu àgbèagbè, Ŋusɛ̃kpatatɔ kè nyi miabe Mawu a be ènyà.

³⁷Ekèa ŋutia, ènyà kè, mì ɖo la nɔ biɔ gblɔ̃ɖɛtɔwoa ye nyi: 'Leke ye Tɔhonɔ̀ ɖo e ŋuti na wò ò?' Àlo, Ènyà kɛ ye Tɔhonɔ̀ gblɔ̃ ò?”

³⁸Mì kpɔ̀tɔ̀ gblɔ̃nà be: “Tɔhonɔ̀ be àŋɛ̀a ye nyi àgbã kèa”, àlo, “àŋɛ̀ kè Tɔhonɔ̀ do a ye nyi àgbã kèa,” to e gbɔ be mù do yebe èse na mìa, mì sè ènyà kè mù le gblɔ̃a be:

³⁹Ekèa ŋutia, mù la ɖè èkɔ̀ lè mìa ŋuti, eye mù la ɖè mìa ku èdù kè mù sɔ na mìa tɔwoa jo lè àpe ŋùmè.

⁴⁰Mù la dovlo mì, la do mì ŋùkpɛ̃ kaka be wo mu la ŋlɔ̀be ekèa kpɔ ò.”