Read gen Yeremìa 24 Bible Online

Yeremìa 24 - gen bible

Yeremìa 24

¹Ekè Babɛ̀l be èfìɔ Nèbukàdnezà le Yudà be èfìɔ Yekonìa, Yòyakìm be èvia, ku Yudà be àgbònùglawo, Yudà be ètopòɖotɔwo ku Yudà be àlɔ̀nu-dɔwɔ̀tɔwo so Yèruzàlɛm, yì ègàtɔnugbe lè Babɛ̀l vɔ̀a, Tɔhonɔ̀ ɖè àjàfi èvè kè mè ègbowo lè, lè Tɔhonɔ̀ be àxuea be ŋùkɔ̀a fiɔ mù.

²Ègbo nyuɛ̃wo lè àjàfi ɖèka mè, wo nyɔ sìgbè ègbo kèwo ɖì cucugbãawo nène; àjàfi èvègɔ̃a be ègbowo ɖìkù, wo mu nyɔ ò, àleke be wo mu nyɔ na ɖùɖu ò.

³Ekèa yomè a, Tɔhonɔ̀ biɔ mù be: “Yeremìa, nukɛ wò le kpɔ ò?” Mù ɖo e ŋuti be: “Mù le kpɔ ègbowo; ekèwo nyɔawo nya kpɔkpɔ ŋutɔ. Vɔ̀a, ekèwo mu nyɔ òa, mu jè na ɖùɖu ŋutɔ cã ò.”

⁴Ekèa yomè a, Tɔhonɔ̀ be ègbè gbà ɖì na mù be:

⁵“Tɔhonɔ̀, Izràɛl be Mawu a gblɔ̃ be: 'Sìgbè lekè ègbo nyuɛ̃ kèawo lèa nènea, nènea tutu ye àmè kèwo mù na, wo kplɔ̀ so Yudà be ànyigbã ji, yì ègàtɔnugbe, lè Babɛ̀l be ànyigbã jiawo lè na mù a yeŋu.

⁶Ŋùkuvi nyèwo la nɔ̀ woa ŋuti, na woabe nyuɛ̃, eye mù la gbà kplɔ̀ wo gbɔ̀ va ànyigbã kèa ji. Mù la gbìgbɔ̀ tù wo ɖo, eye nyè mu la gbã wo ò. Mù la gbìgbɔ̀ likè wo, nyè mu la hɔ̃ wo jo ò.

⁷Mù la na wo èjì kè wo la sɔ nya mù, be ènyè ye nyi Tɔhonɔ̀. Wo la nyi àpe dùkɔ̃, eye mù la nyi woabe Mawu, ɖoa wo la trɔ gbɔ̀, va gbɔ nyè ku woabe èjì blibo.

⁸Sìgbè lekè ègbo bàɖà kèwo àmè ɖe mu la teŋu ɖù ò a, lèa nènea, nènea tutu ye mù la wɔ̀ ku Sedekìas, Yudà be èfìɔa, kudo yebe àgbònùglawo, gbàkudo àmè kèwo la ci àgbè lè Yèruzàlɛm, ne wo kpɔ̀tɔ̀ lè ànyigbã kèa ji, àlo, wo lè Ejiptè a yeŋu.

⁹Mù la na, wo la trɔ zũ bìbì ku jɔ̀gbèvuɛ̃ na ànyigbã ji be fìɔduwo kpata. Wo la nyi ŋùmèkãkã, àlɔmèɖènu, èlodonu, àjàkpàkpanu, ènu ɖì kòkoe kè ji kpɛ̃sɛ̃ la nɔ̀, lè tèpe kèwo keŋu mù nyà wo yì kɔ̀ ɖoa.

¹⁰Mù la ɖo èwui, àdɔ̀wùàmè, ku èdɔ̀vuɛ̃ ɖoɖa wo, kaka na gà kè mè wo la crɔ̃ lè ànyigbã kè mù sɔ na woa ku woa tɔwoa ji.”