Read gen Yeremìa 26 Bible Online

Yeremìa 26 - gen bible

Yeremìa 26

¹Lè Yudà be èfìɔ, Yòyakìm, Yosìas be èvia be èfìɔɖùɖu be gɔ̃mèjèje a, Tɔhonɔ̀ gblɔ̃ ènyà kèa be:

²“Yì nɔ̀tè ɖo Tɔhonɔ̀ be àxuea be gbàjà ji, ne wòa pò nupo na Yudà-nyigbã ji be èdù vòvòwo mètɔ kèwo keŋu va sɛ̃na lè Tɔhonɔ̀ be àxuea mèa. Gblɔ̃ ènyà ɖe sia ɖe kè be ègbè mù ɖè na wòa, na wo, eye mù gbà gble ɖekpe ɖɛ ò.

³Èta mu nyɔ òa, wo la ɖo èto wò, eye woa dòmètɔ ɖe sia ɖe la trɔ lè yebe èmɔ̃ bàɖàa ji. Ne wo wɔ̀ ekèa, eŋuã, mù la trɔ ètamè, eye, nyè mu la gbà wɔ̀ èvuɛ̃ kè mù ɖo be ma wɔ̀ ku wo, ɖo woabe èvuɛ̃ wɔ̀wɔ taa, ku wo ke ò.

⁴Ekèa ŋutia, wò la gblɔ̃ na wo be: “Tɔhonɔ̀ gblɔ̃ be: 'Ne mì mu ɖo èto mù, ne mìa zɔ̃ ɖo èse kè mù sɔ ɖo ŋùmè na mìa ji ò,

⁵eye ne mì mu ɖo èto sumɔ̃vi nyè gblɔ̃ɖɛtɔ kèwo mù le dɔ̃ ɖoɖa mì, gbè sia gbè, vɔ̀ mì gbe be yèwo mu la ɖo èto wo òa,

⁶eŋuã, mù la wɔ̀ ènu kè mù wɔ̀ ku Silò be èdùa ku àxuedo kèa cã, eye mù la na èdù kèa la nyi kpɛ̃sɛ̃ ɖèɖe, lè ànyigbã ji be èdùwo keŋu dòmè.'”

⁷Hũbonɔwo, gblɔ̃ɖɛtɔwo ku àmèwo keŋu sè, Yeremìa gblɔ̃ ènyà kèawo lè Tɔhonɔ̀ be àxuea mè.

⁸Vɔ̀a ekè Yeremìa gbe gblɔ̃ ènyà kèwo keŋu be ègbè Tɔhonɔ̀ ɖè na ɛ̀, be ne gblɔ̃ na dùkɔ̃a vɔ̀ kpɔ̀a, hũbonɔawo, gblɔ̃ɖɛtɔawo ku àmèwo keŋu le è, eye wo gblɔ̃ be: “Wò jè na ku!

⁹Nukɛ ŋuti wò le gblɔ̃ ènyà ɖɛ lè Tɔhonɔ̀ be nyikɔ mè, be àxue kèa la nɔ̀ sìgbè Silò nène, eye èdù kèa la trɔ zògbè, eye be la ci gbalo ɖo ò?” Eye àmè sia àmè va bɔ̀ do Yeremìa, lè Tɔhonɔ̀ be àxuea mè.

¹⁰Ekè Yudà-nyigbã ji be àgbònùglawo sè ènyà kèawoa, wo so èfìɔ xòmè, lia ètoa, yì mawuxɔa mè, eye wo zɔ̃ yì nɔ̀ mawuxɔa be àgbo yeyea nu.

¹¹Ekèa yomè a, hũbonɔawo ku gblɔ̃ɖɛtɔawo gblɔ̃ na àgbònùglaawo ku dùkɔ̃ bliboa be: “Wo ɖo la sò èku kòjo na ŋusù kèa, ɖoa, e gblɔ̃ ènyà ɖɛ ɖo èdù kèa ŋuti. Mìa ŋutɔwo mì sè è ku mìabe ètowo!”

¹²Eye Yeremìa gblɔ̃ na àgbònùglawo keŋu ku dùkɔ̃ bliboa be: “Tɔhonɔ̀ ye dɔ̃ mù be ma va gblɔ̃, ènyà kèwo keŋu mì sèawo, ɖɛ, so àxue kèa ku dùkɔ̃ kèa ŋuti.

¹³Fifìa, mì trɔ mìabe èdɛ̃ ku wɔ̀nawo, ne mìa sè Tɔhonɔ̀, mìabe Mawu be ègbè. Ne mì wɔ̀ ekèa, Tɔhonɔ̀ la trɔ ètamè, eye mu la gbà na jɔ̀gbèvuɛ̃ kè be ɖo ɖo mìa ŋutia la jɔ̀ ɖo mìa ji ò.

¹⁴Ènyè yaa, mù lè mìa simè. Ènu kè mì gbe kpɔ be e nyɔ, eye be jè kpòa, mì wɔ̀ ɛ̀ ku mù fàa.

¹⁵Vɔ̀a, mì kãɖoji be, ɖekpekpe kè be nyia, ne mì wù mù a, mì la hɛ̃ èɖe mà-nyãtɔ be èhũ be àgɔ̀jèje va mìa ɖokoewo ji, va èdù kè a ji, kù àmè kèwo keŋu lè e mèawo ji, ɖo a, Tɔhonɔ̀ dɔ̃ mù nyàwo, ɖoɖa mì, be ma gblɔ̃ ènyà kèawo keŋu na mì, ne mì a sè.”

¹⁶Ekè a yomè a, àgbònùglawo ku dùkɔ̃ blibo a gblɔ̃ na hũbonɔawo ku gblɔ̃ɖɛtɔawo be: “Wo mu ɖo la sò èku kòjo na ŋusù kè a ò! Ɖo a, Tɔhonɔ̀, miabe Mawu be nyikɔ mè ye be pò nupo na mi lè.”

¹⁷Èdùa mè be àmègãwo dòmètɔ ɖewo to va ŋùkɔ̀, eye wo gblɔ̃ na dùkɔ̃a be àmèha bliboa be:

¹⁸“Mikà, Mɔrasɛ̀t ŋusùa gblɔ̃ ènyà ɖɛ, lè Yudà be èfìɔ Ezekìas hùenu, eye be gblɔ̃ na dùkɔ̃ bliboa be: Tɔhonɔ̀ Ŋusɛ̃kpatatɔa gblɔ̃ be: “Wo la gã Ziɔ̀n sìgbè àgblè nène, Yèruzàlɛm la trɔ zũ èglìkpowo ɖèɖe, Eye mawuxɔa be ètokɔ̃ɛa la to àve.”

¹⁹Ɖe Yudà be èfìɔ Ezekìas, àlo àmè bu, lè Yudà-nyigbã ji wù gblɔ̃ɖɛtɔa? Èfìɔa mu vɔ̃ Tɔhonɔ̀ bòhũ, eye be blìbɔ̀ na ɛ̀, sɔ ji yebe ŋùmèa? Kè be wɔ̀ ekèa ɖe, Tɔhonɔ̀ mu trɔ ètamè, eye mu gbà hɛ̃ jɔ̀gbèvuɛ̃ kè be gblɔ̃ ɖo woa ŋutia, va woa ji ke òa? Fifìa ɖe, miawo ya, mi la hɛ̃ jɔ̀gbèvuɛ̃ gã kèa va mia ɖokoewo jia?”

²⁰Ŋusù bu cã, kè wo yɔna be Uriyà, àmè kè nyi Semayà, Kiriyàt-Yearìm ŋusùa be èvia gbà gblɔ̃ ènyà kèawo tututu ɖɛ, lè Tɔhonɔ̀ be nyikɔ mè, ɖo èdù kèa ku ànyigbã kèa ŋuti, sìgbè lekè Yeremìa wɔ̀ ɛ̀a nène.

²¹Ekè èfìɔ Yehoakìm ku yebe àgbònùglawo keŋu sè Uriyà be ènyàa, èfìɔa jro la wù ì. Vɔ̀a, kè Uriyàa sè èa, e vɔ̃, eye be si jo yì Ejiptè.

²²Gãkea, èfìɔ Yehoakìm gbà dɔ̃ Ɛlnatàn, kè nyi Akbɔ̀r be èvia ku ŋusù buwo ɖoɖa Ejiptè.

²³Wo trɔ kplɔ̀ Uriyà so Ejiptè, gbɔ̀ va na èfìɔ Yehoakìm, eye e na wo wù ì ku èwui, eye wo sɔ yebe àmèkpòtia dàɖo èhahò be èyɔ̀do mè.

²⁴Ekèa yomè a, Ahikàm, kè nyi Safàn be èvia kpe ɖo Yeremìa ŋuti, eye wo mu sɔ ɛ̀ do àsi na dùkɔ̃a, ne woa wù ì ò.