Read gen Yeremìa 27 Bible Online

Yeremìa 27 - gen bible

Yeremìa 27

¹Lè Yehoyakìm kè nyi Yudà be èfìɔ Yosìas be èvia be èfìɔɖùɖu be gɔ̃mèjèje mèa, Tɔhonɔ̀ be ègbè ɖì na Yeremìa be:

²“Gbĩ èkà, ne wòa sɔ àti wɔ̀ èkɔ̀kùtiwo sɔ do èkɔ̀.

³Ekèa yomè a, sɔ wo do àsi na àmèdɔ̃dɔ̃ kèwo ye va Yèruzàlɛm, lè Yudà be èfìɔ Sedekìas gbɔa, ne woa sɔ wo yì na Edɔ̀m be èfìɔ, Mòab be èfìɔ, Amɔ̀n be èfìɔ, Tirò be èfìɔ ku Sidɔ̀n be èfìɔ.

⁴Do wo àŋɛ̀ na woabe àpetɔwo be: Tɔhonɔ̀, Ŋusɛ̃kpatatɔ, Izràɛl be Mawu a gblɔ̃ be: Mì gblɔ̃ na mìabe àpetɔwo be:

⁵Ènyè ye sɔ àpe àcɛ̀, ku àlɔ̀ sɛ̃sɛ̃ nyè wɔ̀ ànyigbãa ku àmè kèwo ye lè e jiawo, kudo èlã kèwo keŋu lè e jiawo, eye mù sɔ ɛ̀ do àsi na àmè kè mù jro a.

⁶Fifìa, mù la sɔ mìabe èdùawo keŋu do àsi na sumɔ̃vi nyè Nèbukàdnezà, Babɛ̀l nyigbã ji be èfìɔa. Mù la na ègbemèlãwo ŋutɔ cã la bɔ̀bɔ̀ woa ɖokoewo na ɛ̀.

⁷Dùkɔ̃wo keŋu la sumɔ ɛ̀, wo la sumɔ èviaa, wo la sumɔ tɔgbeyɔvia kaka na gà kè mè yebe ànyigbã a be gàmè la va sùa. Gà ŋua mè ye dùkɔ̃ sùgbɔwo ku èfìɔ gãwo la ɖù e ji lè.

⁸Vɔ̀a, ne dùkɔ̃, àlo èfìɔdu ɖe gbe be yè mu la sumɔ Nebukàdnedzà, Babɛ̀l be èfìɔa ò, eye mu la bɔ̀bɔ̀ yebe èkɔ̀ ɖo yebe èkɔ̀kùtia gɔ̃mè òa, mù la dɔ̃ èto na dùkɔ̃ ŋua ku èwui, àdɔ̀wùàmè ku èdɔ̀vuɛ̃, kaka na gà kè mè mù la crɔ̃ dùkɔ̃ ŋua ku yebe àlɔ̀a.

⁹Ekèa ŋutia, mì mu gbà nɔ ɖo èto mìabe gblɔ̃ɖɛtɔwo, mìabe àfãkãtɔwo, mìabe èdrɔ̃ gɔ̃mèɖètɔwo, mìabe èxɔ̀yɔtɔwo, àlo mìabe àzetɔ kèwo ye gblɔ̃nà na mì be: 'Mì mu la sumɔ Babɛ̀l be èfìɔ òa'.

¹⁰Àjèɖàɖa kèwo ye la ɖè mì jo, boo lè mìabe ànyigbãwo jia kpò wo le gblɔ̃ ɖɛ na mì. Mù la kã mì hlɛ̃, eye mì la crɔ̃.

¹¹“Vɔ̀a, ne dùkɔ̃ ɖe bɔ̀bɔ̀ ye ɖokoe ɖo Babɛ̀l be èfìɔa be èkɔ̀kùti gɔ̃mè, eye be sumɔ ɛ̀a, mù la na dùkɔ̃ ŋua la nɔ̀ ye ŋutɔ be ànyigbã ji, la ɖè èjì ɖɛ, la dà àgblè lè e ji, eye be la nɔ̀ e ji.” Tɔhonɔ̀ ye gblɔ̃ ɛ̀.”

¹²Mù do àŋɛ̀ ŋua ke na Sedekìas, Yudà be èfìɔa, eye mù gblɔ̃ na ɛ̀ be: “Bɔ̀bɔ̀ ɖokoe wò ɖo Babɛ̀l be èfìɔa be èkɔ̀kùti gɔ̃mè, ne wòa sumɔ ye ku yebe dùkɔ̃a, ne wòa nɔ̀ àgbè.

¹³Nukɛ ŋuti èwò ku dùkɔ̃ wòa, mì le ji la ku lè èwui nu, la ku àdɔ̀-ku, la ku lè èdɔ̀vuɛ̃ mè, ènu kèwo Tɔhonɔ̀ be yè la sɔ dɔ̃ èto na dùkɔ̃ ɖekpekpe kè mu la sumɔ Babɛ̀l be èfìɔa òa, mè ɖo ò?

¹⁴Mì mu gbà ɖo èto gblɔ̃ɖɛtɔ kèwo gblɔ̃nà na mì be: Mì mu la sumɔ Babɛ̀l be èfìɔ òa, be ènyà ò. Ɖoa, àjè be ènyà ye wo le gblɔ̃ ɖɛ na mì.

¹⁵'Nyè mu dɔ̃ wo ò.' Tɔhonɔ̀ ye gblɔ̃ ɛ̀. Àjè be ènyà ye wo le gblɔ̃ ɖɛ, lè nyikɔ nyè mè, ekèa ŋutia, mù la nyà mìa ku gblɔ̃ɖɛtɔ kèwo gblɔ̃nà ènyà ɖɛ na mìawo, eye mì la crɔ̃”.

¹⁶Eye, mù le gblɔ̃ na hũbonɔwo ku dùkɔ̃ blibo kèa be: “Tɔhonɔ̀ gblɔ̃ be: Mì mu gbà nɔ ɖo èto gblɔ̃ɖɛtɔ kèwo gblɔ̃nà be: 'Zãɖe kèa, wo la gbìgbɔ̀ hɛ̃ mawuxɔa mènuwo gbɔ so Babɛ̀l' ò. Àjè be ènyà ye wo le gblɔ̃ ɖɛ na mì.

¹⁷Mì mu gbà ɖo èto wo ò. Mì sumɔ Babɛ̀l be èfìɔa bòhũ, ne mìa nɔ̀ àgbè. Nukɛ ŋuti ye èdù kèa la trɔ zũ èglìkpɔwo ɖo ò?”

¹⁸Ne wo nyi Mawu be gblɔ̃ɖɛtɔwo nyàwo, eye Mawu be ègbè lè woa mèa, eŋuã, wo ne blìbɔ̀ na àhùadù Tɔhonɔ̀a, ne wo mu gbà lɔ ènuzãzãwo kèwo lè mawuxɔa mè, lè èfìɔsaa mè kudo Yèruzàlɛm be èdùa mèa jo yì Babɛ̀l ò.

¹⁹Ɖoa, ènyà kè Tɔhonɔ̀ Ŋusɛ̃kpatatɔa gblɔ̃ so sɔtiawo, àdàwaa, gɔ̃mèɖonuawo, ku ènu bu kèwo ye kpɔ̀tɔ̀ ɖo èdù kèa mè,

²⁰kèwo ye Babɛ̀l be èfìɔ, Nèbukàdnezà mu sɔ jo, wàlɛbɛ kè be kplɔ̀ Yekoniyà kè nyi Yudà be èfìɔ Yehoyakìm be èvia jo, lè Yèruzàlɛm, yì gàtɔnugbe, lè Babɛ̀l, kpe ɖo Yudà-nyigbã ku Yèruzàlɛm be àgbònùglawo ŋutia,

²¹Ɛ̃ɛ, ènyà kè Tɔhonɔ̀ Ŋusɛ̃kpatatɔ, Izràɛl be Mawu a, gblɔ̃ so ènu kèwo kpɔ̀tɔ̀ ɖo Tɔhonɔ̀ be àxuea mè, kèwo kpɔ̀tɔ̀ ɖo Yudà-fìɔ be àxuea mè, ku ekèwo kpɔ̀tɔ̀ ɖo Yèruzàlɛm be èdùa mèawo ŋutia ye nyi be:

²²“Wo la sɔ wo yì Babɛ̀l, funua ye wo la nɔ̀, kaka na gbè kè gbè mù la va ɖo woa ŋutia.” Tɔhonɔ̀ ye gblɔ̃ ɛ̀. “Ekèa yomè a, mù la sɔ wo gbɔ̀, eye mù la gbìgbɔ̀ sɔ wo va ɖo tèpe kèa.”