Read gen Yeremìa 28 Bible Online

Yeremìa 28 - gen bible

Yeremìa 28

¹Le èpè ŋua ke be wètri àtɔ̃gɔ̃a mèa, lè Sedekìa be èfìɔɖùɖu lè Yudà-nyigbã ji be èpè ènègɔ̃a mèa, Asur, Gibeɔ̀n ŋusùa be èvi, Hananìa kè nyi gblɔ̃ɖɛtɔa gblɔ̃ na mù, lè Tɔhonɔ̀ be àxuea mè, lè hũbonɔwo ku dùkɔ̃a keŋu be ŋùkɔ̀ be:

²“Ènyà kè Tɔhonɔ̀ Ŋusɛ̃kpatatɔ, Izràɛl be Mawu a gblɔ̃a ye nyi be: “Mù la ŋɛ̃ Babɛ̀l be èfìɔa be èkɔ̀kùtia.

³Lè èpè èvè yomè a, mù la gbìgbɔ̀ hɛ̃ ènu kèwo keŋu Babɛ̀l be èfìɔ, Nèbukàdnezà lɔ jo lè Tɔhonɔ̀ be àxuea mè, yì Babɛ̀l nyigbã jiawo gbɔ̀ va fikèa.

⁴Mù la kplɔ̀ Yekonìa, Yehoyakìm be èvi kè nyi Yudà be èfìɔa cã gbɔ̀ ku Yudàvi kèwo keŋu lè gàtɔnugbe, lè Babɛ̀l, ɖoa, mù la ŋɛ̃ Babɛ̀l be èfìɔa be èkɔ̀kùtia.” Tɔhonɔ̀ ye gblɔ̃ ɛ̀.

⁵Eye gblɔ̃ɖɛtɔ Yeremìa ɖo e ŋuti na gblɔ̃ɖɛtɔ Hananìa, lè hũbonɔawo ku àmèha kè kpata tɔtè lè Tɔhonɔ̀ be àxuea mèawo be ŋùmè.

⁶E gblɔ̃ be: “Àmèn! Tɔhonɔ̀ ne wɔ̀ nènea! Tɔhonɔ̀ ne wɔ̀ ɖo ènyà kè wò gblɔ̃ ɖɛa ji, ne bèa hɛ̃ Tɔhonɔ̀ be àxomè be ènuzãzãwo ku àmè kèwo kpata lè gàtɔnugbe, lè Babɛ̀l nyigbã jia gbɔ̀ va tèpe kèa.

⁷Gãkea, ɖo èto ènyà kè mù ɖo be ma gblɔ̃ ɖo èto mè na wò, ku na àmèhaa kpata:

⁸So blèmà mè kea, gblɔ̃ɖɛtɔ kèwo ye jè ŋùkɔ̀ na nyè ku wòawo gblɔ̃nà ènyà ɖɛ so àhùa, jɔ̀gbèvuɛ̃ ku èdɔ̀vuɛ̃ ŋuti, lè èdù sùgbɔ ku èfìɔdu gãwo mè.

⁹Vɔ̀a, ne gblɔ̃ɖɛtɔ ɖe gblɔ̃ ŋuti fàfa be ènyà ɖɛa, wàlɛbɛ kè yebe ènyàgblɔ̃ɖɛa va e mè vɔ̀a, yomè ye wo kpɔna ɛ̀ jènàsi be Tɔhonɔ̀ ye dɔ̃ ɛ̀ ɖoɖa nyàwo.”

¹⁰Ekèa yomè a gblɔ̃ɖɛtɔ Hananìa ɖè èkɔ̀kùtia jo lè gblɔ̃ɖɛtɔ Yeremìa be èkɔ̀, eye be ŋɛ̃ ɛ̀.

¹¹Ènyà kè Tɔhonɔ̀ gblɔ̃a ye nyi: “Lekea ye mù la ŋɛ̃ Nèbukàdnezà, Babɛ̀l be èfìɔa, be èkɔ̀kùtia jo lè èkɔ̀ na dùkɔ̃wo keŋu, le èpè èvè mè.” Kè be wɔ̀ ekèa, gblɔ̃ɖɛtɔ Yeremìa le yebe èmɔ̃, eye be jo.

¹²Ekè gblɔ̃ɖɛtɔ Hananìa ŋɛ̃ èkɔ̀kùtia lè gblɔ̃ɖɛtɔ Yeremìa be èkɔ̀ yomè a, Tɔhonɔ̀ be ègbè gbà ɖì na gblɔ̃ɖɛtɔ Yeremìa be:

¹³Yì gblɔ̃ na Hananìa be: “Ènyà kè Tɔhonɔ̀ gblɔ̃a ye nyi ekèa be: Wò ŋɛ̃ àti be èkɔ̀kùtia, vɔ̀a, wò la sɔ ègà be èkɔ̀kùti ɖo e tèpe.”

¹⁴Tɔhonɔ̀, Ŋusɛ̃kpatatɔ, Izràɛl be Mawu a gblɔ̃ be: “Mù la do ègà be èkɔ̀kùti na dùkɔ̃ kèawo keŋu, àleke be wo la sumɔ Babɛ̀l be èfìɔ, Nèbukàdnezà, eye wo la sumɔ ɛ̀. Mù la na èlãwo ŋutɔ cã la sumɔ ɛ̀.”

¹⁵Ekèa yomè a, gblɔ̃ɖɛtɔ Yeremìa gblɔ̃ na gblɔ̃ɖɛtɔ Hananìa be: “Hananìa, ɖo èto! Kpɔɖa, mu nyi Tɔhonɔ̀ ye dɔ̃ wò ò, gãkea, èwò ye na dùkɔ̃ kèa le dojì ɖo àjèɖàɖa ŋuti.

¹⁶Ekèa ŋutia, Tɔhonɔ̀ gblɔ̃ be: Kpɔɖa, mù la ɖè wò jo lè ànyigbã ji. Èpè kèa mè tututu, wò la ku, ɖoa, wò gblɔ̃ ènyà kè sitè ɖo Tɔhonɔ̀ ŋutia”.

¹⁷Lè èpè ŋua be wètri adrɛ̃gɔ̃ a mèa, Hananìa, gblɔ̃ɖɛtɔa ku.