Read gen Yeremìa 29 Bible Online

Yeremìa 29 - gen bible

Yeremìa 29

¹Ènyà kèwo ye lè xoma kè gblɔ̃ɖɛtɔ Yeremìa ŋlɔ̀ so Yèruzàlɛm, ɖoɖa àhùale kèwo ye ci àgbè lè àmèsĩsĩwo, hũbonɔwo, gblɔ̃ɖɛtɔwo, ku àmè kpɔ̀tɛ kèwo keŋu Nèbukàdnezà kplɔ̀ àhùale, so Yèruzàlɛm, yì Babɛ̀l nyigbã jiawo dòmèa ye nyi ekèawo.

²Ekè wo le èfìɔ Yekonìa ku èfìɔ-srɔ̃a, èfìɔ xòmè be àgbònùglawo, Yudà ku Yèruzàlɛm be àgbònùglawo, àɖàŋùɖètɔwo ku àlɔ̀nudɔwɔ̀tɔwoa, wo kplɔ̀ wo yì Babɛ̀l.

³Yeremìa sɔ xoma a do àsi na Elasà, Safàn be èvia ku Gemarìa, Hilkiyà be èvia, wàlɛbɛ kè Sedekìa, Yudà be èfìɔa dɔ̃ wo ɖoɖa Nèbukàdnezà gbɔ, lè Babɛ̀l-nyigbã jia. Yeremìa ŋlɔ̀ ɖo xoma a mè be:

⁴“Tɔhonɔ̀ Ŋusɛ̃kpatatɔ, Izràɛl be Mawu a gblɔ̃ be: 'Na àmè kèwo keŋu, mù na wo kplɔ̀ àhùale, so Yèruzàlɛm, yì Babɛ̀l nyigbã jia:

⁵Mì sò àxuewo, ne mìa nɔ̀ woa mè. Mì do ènu ɖo àbɔwo mè, ne mìa ɖù woabe ènukuwo.

⁶Mì ɖè èsrɔ̃, ne mìa jì ŋusùvi ku nyɔ̃nùviwo. Mì ɖè èsrɔ̃ na mìabe ŋusùvi ku mìabe nyɔ̃nùviwo, àleke be woawo cã woa teŋu jì ŋusùvi ku nyɔ̃nùviwo. Mì jì ɖo e ji, lè funua, ne mì mu gbà hùe ò.

⁷Mì ji ŋuti fàfa ku nyɔna na èdù kè mè mù ɖo mì ɖoɖa àhùale lèa. Mì fãkue na Tɔhonɔ̀ ɖo e ta, ɖoa, ne èdùa kpɔ nyɔnaa, mìawo cã mì la kpɔ nyɔna.'”

⁸Ɛ̃ɛ, Tɔhonɔ̀, Ŋusɛ̃kpatatɔ, Izràɛl be Mawu a gblɔ̃ be: “Mì mu gbà na gblɔ̃ɖɛtɔ ku àfãkãtɔ kèwo yè lè mìa dòmèawo ne flù mì ò. Mì mu gbà ɖo èto èdrɔ̃[27] kèwo mì le kua ò.

⁹Àjè be ènyàwo ye wo gblɔ̃nà ɖɛ na mì, lè àpe nyikɔ mè. Nyè mu dɔ̃ wo ò.” Tɔhonɔ̀ ye gblɔ̃ ɛ̀.

¹⁰Tɔhonɔ̀ gblɔ̃ be: “Ne èpè èkà takpo ci èwo nu va yì, lè Babɛ̀l be èdùa mè vɔ̀a, mù la va kpɔ mìa gbɔ, eye mù la wɔ̀ ɖo àjɔ̀gbè nyuɛ̃ kè mù fìã na mìa ji, be mù la kplɔ̀ mì gbɔ̀ va àfi kèa.”

¹¹Tɔhonɔ̀ gblɔ̃ be: “Ɖoa mù nya ɖoɖo kèwo mù wɔ̀ na mìa, nyɔna be ɖoɖowo ye wo nyi, mu nyi èvuɛ̃ be ɖoɖowo ò, ɖoɖo na èmɔkpɔkpɔ na èsɔ̀mè ne nyɔ.

¹²Ne mì yɔ mùa, ne mì zɔ̃ gogo mù, fãkue yɔ mùa, mù la ɖo èto mì.

¹³Mì la ji mù, eye mì la kpɔ mù, ne mì ji mù ku èjì bliboa.

¹⁴Mù la na, mì la kpɔ mù, eye mù la kplɔ̀ mì gbɔ̀ so gàtɔnugbe.” Tɔhonɔ̀ ye gblɔ̃ ɛ̀ be: “Mù la bɔ̀ mì, so dùkɔ̃wo dòmè ku tèpe kèwo keŋu mù nyà mì ɖo ègbe yìa.” Tɔhonɔ̀ ye gblɔ̃ ɛ̀ be: “Eye mù la kplɔ̀ mì gbɔ̀ va tèpe kè mù kplɔ̀ mì so, yì àhùalea.”

¹⁵Mìawo yaa, mì le gblɔ̃ be: “Tɔhonɔ̀ ye ɖo gblɔ̃ɖɛtɔwo na mi lè Babɛ̀l.”

¹⁶Vɔ̀a, ènyà kè Tɔhonɔ̀ gblɔ̃, so èfìɔ kè nɔ̀ ànyi, ɖo David be èfìɔzìkpea jia ku so àmè kèwo keŋu ci èdù kèa mè, mìa detɔ kèwo ye mu yì gàtɔnugbe ò a,

¹⁷Ɛ̃ɛ, ènyà kè Tɔhonɔ̀, Ŋusɛ̃kpatatɔa gblɔ̃a ye nyi ekèa: “Mù la ɖo èwui, àdɔ̀wùamè ku èdɔ̀vuɛ̃ ɖo woa ŋuti, eye mù la na, wo la nɔ̀ sìgbè ègbo vovo kèwo nyìnyɔ̀, àleke be wo mu gbà nyɔ na ɖùɖu ò a nène.

¹⁸Mù la sɔ èwui, àdɔ̀wùamè ku èdɔ̀vuɛ̃ nyà wo ɖo-nu, eye mù la sɔ wo wɔ̀ ènunyɔŋu na ànyigbã ji be èfìɔduwo keŋu, ku vɔ̃vɔ̃donu kè ji kpɛ̃sɛ̃ lèa, èɖinu, èvlodonu kè la nyi àlɔmèɖènu lè dùkɔ̃ kèwo kpata dòmè mù la nyà wo ɖoɖaa.

¹⁹Ɖoa, wo mu ɖo èto àpe ègbè ò.” Tɔhonɔ̀ ye gblɔ̃ ɛ̀. “Ènyà kè mù do àsi na sumɔ̃vi nyè, gblɔ̃ɖɛtɔwo, èɖe lè èɖe yomè ɖoɖa woa, cã a, wo gbe be yèwo mu la ɖo èto è ò.” Tɔhonɔ̀ ye gblɔ̃ ɛ̀.

²⁰“Ekèa ŋutia, mì ɖo èto Tɔhonɔ̀ be ègbè, mì, àmè kèwo keŋu mù nyà so Yèruzàlɛm, yì gàtɔnugbe, lè Babɛ̀l!”

²¹Ènyà kè Tɔhonɔ̀, Ŋusɛ̃kpatatɔ, Izràɛl be Mawu a gblɔ̃ na Àhab, Kolayà be èvia ku Sedekìa, Mahaseyà be èvi kèwo gblɔ̃ àjè-nyàwo ɖɛ na mì, lè nyikɔ nyè mèa ye nyi be: “Mù la sɔ wo do àsi na Nèbukàdnezà, Babɛ̀l be èfìɔa, eye be la wù wo, lè mìa ŋutɔwo, mìabe ŋùkumè.

²²Woawo ŋutia, àmè kèwo keŋu wo kplɔ̀ so Yudà yì gàtɔnugbe, lè Babɛ̀l nyigbã jiawo la nɔ zã kpɛ̃sɛ̃ kèa be: “Tɔhonɔ̀ la wɔ̀ wò sìgbè Sedekìa ku Àhab, kèwo Babɛ̀l be èfìɔa tɔzò, eye wo fiɔ̃awo nène.

²³Ɖoa, wo wɔ̀ ènu nyɔŋu lè Izràɛl-nyigbã ji. Wo wɔ̀ àhasì ku woa nɔ̀viwo be èsrɔ̃wo, eye wo pò nupo lè àpe nyikɔ mè, sɔ gblɔ̃ ènyà kè nyè mu dɔ̃ wo ò a. Ènyè yaa, mù nya ɛ̀, ɖo, mù nyi ɖàsèfo.” Tɔhonɔ̀ ye gblɔ̃ ɛ̀.

²⁴Gblɔ̃ na Semayia, Nehelamì ŋusùa be:

²⁵Ènyà kè Tɔhonɔ̀, Ŋusɛ̃kpatatɔ, Izràɛl be Mawu a gblɔ̃a ye nyi be: Wò ŋlɔ̀ xoma, lè wò ŋutɔ àpo nyikɔ mè[28] ɖoɖa àmè kèwo keŋu lè Yèruzàlɛm, ɖoɖa Sèfanìa, ɖoɖa Mahaseyà, ɖoɖa hũbonɔa be èvia ku ɖoɖa hũbonɔwo kpata. Wò gblɔ̃ na Sèfanìa be:

²⁶“Tɔhonɔ̀ sɔ wò ɖo hũbonɔ, ɖo Yehoyada tèpe, ne wòa nɔ̀ Tɔhonɔ̀ be mawuxɔa nu. Àmè ɖekpekpe kè be èta gbɔ la gble, eye be la sɔ ye ɖokoe wɔ̀ gblɔ̃ɖɛtɔa, wò la le è, la do è èkɔ̀-gà, la do è kɔ̀sɔ̀kɔsɔ, eye wò la do è ègà.

²⁷Eye nukɛ ŋuti wò mu la kã ŋùkumè na Yeremìa, Ànatɔt ŋusù kè le wɔ̀ gblɔ̃ɖɛtɔ be èdɔ lè mìa dòmèa ò?

²⁸E ye sɔ àŋɛ̀do kèa ɖoɖa mi be: 'Gàtɔnugbe nɔ̀nɔa la dìdì. Ekèa ŋutia, mì sò àxue, ne mìa nɔ̀ woa mè. Mì sò àbɔ, ne mìa do ènu, ne mìa ɖù woabe ènukuwo'”

²⁹Vɔ̀a, hũbonɔ Sèfanìa hlɛ̃ xoma kèa ɖo Yeremìa, gblɔ̃ɖɛtɔa be èto mè.

³⁰Ekèa yomè a, Tɔhonɔ̀ be ègbè ɖì na Yeremìa be:

³¹“Àŋɛ̀do kèa ne yì na àmè kèwo keŋu lè gàtɔnugbea be: 'ènyà kè Tɔhonɔ̀ gblɔ̃, so Semayà, Nehelamì ŋusùa ŋutia ye nyi ekèa: To e gbɔ be nyè mu dɔ̃ Semayà ò, vɔ̀a, e gblɔ̃ ènyà ɖɛ na mì, eye be na, mì xɔ̀ àjèɖàɖa ji sè a,

³²Tɔhonɔ̀ gblɔ̃ be: Mù la dɔ̃ èto na Semayà, Nehelamì ŋusùa ku yebe jìjimèviwo godo! Woa dòmètɔ ɖekpe mu la kpɔ̀tɔ̀, lè dùkɔ̃a mè ò, eye wo mu la kpɔ ènu nyuɛ̃ kèwo mù la wɔ̀ na dùkɔ̃ nyèa ò.' Tɔhonɔ̀ ye gblɔ̃ ɛ̀. Ɖoa, e gblɔ̃ àglajènyà ɖo ŋuti nyè.'”