Read gen Yeremìa 3 Bible Online

Yeremìa 3 - gen bible

Yeremìa 3

¹Gblɔ̃ na ɛ̀ be: “Ne ŋusù ɖe gbe èsrɔ̃a, eye nyɔ̃nùa jo, yì ɖe ŋusù bua, ŋusùa la gbà yì nyɔ̃nù ŋua ke gbɔa? Ekèa mu gble èkɔ̀do na ànyigbã ŋua keŋu-keŋu òa? Eye, èwò kè wɔ̀ àhasì ku ŋusùwo keŋuã, wò gbà ji be yèa gbà trɔ va gbɔ nyèa?” Tɔhonɔ̀ ye gblɔ̃ ɛ̀.

²Kɔ ŋùmè yì èji, ne wòa kpɔ èto pɔplɔwo tamè. Àfi ɖe lè kè ye wò mu wɔ̀ àhasì lè òa? Wò bɔ̀bɔ̀nà, nɔ̀nà ànyi ɖo èmɔ̃wo to, sɔ nɔ̀nàtè kpɔ àmè kèwo, wò la wɔ̀ àhasì kudoa, sìgbè Arabìatɔwo lè zògbè ji nène. Wò sɔ àpo àhasìwɔ̀wɔ ku àpo hũnyànyrãa dovlo ànyigbã a ji.

³Ekèa na be èjijàja gãwo gbe wò, eye kèlè-ji cã mu gbà jà na wò ò. Gãkea, wò gbà le sɛ̃ ètamè, le ɖo àhasìwɔ̀wɔ be àzìãŋùku ku èzò ɖèɖe, eye èŋù gbe wò kpɛ̃kpɛ̃ ɖo e ŋuti.

⁴Fifìa, wò mu gbà va le do àpa yɔ mù be: 'Ètɔ nyè! Èwò ye nyi àpe tùgbɛ̀jɛmè be kplɔ̀tɔ!

⁵Wò la bijì do mù, kaka sɔ yìa? Àpo àdɔ̀mèzea la yì e ji, kaka sɔ yìa?' Lekea ye wò le pò nupo, gãkea, wò le wɔ̀ èvuɛ̃ kèwo keŋu wò jro a.

⁶Wàlɛbɛ kè èfìɔ Yosìas[5] le ɖùfìɔa, Tɔhonɔ̀ gblɔ̃ na mù be: “Wò kpɔ xɔ̀se mà-ɖo be ènu kè Izràɛl[6] wɔ̀a? E yìnà èto kɔ yì èji ɖe sia ɖe ji, yìnà àti ɖe sia ɖe kè vũa gɔ̃mè, yì wɔ̀nà àhasì.

⁷Mù susu be, ekè be wɔ̀ ènu kèa keŋu vɔ̀a, e la trɔ va gbɔ nyè. Gãkea, mu trɔ gbɔ̀ ò, eye nɔ̀via Yudà, àmè mà-wɔ̀ ànùkua a kpɔ ènu kè be wɔ̀a.

⁸Ekèa ŋutia, mù ŋlɔ̀ nyɔ̃nù gbegbe be xoma na Izràɛl, xɔ̀se mà-ɖotɔa, eye mù nyà ɛ̀ jo, ɖo àhasì gbogbo kè be wɔ̀a ŋuti. Gãkea, nɔ̀via Yudà jɔ̀vuɛ̃a mu vɔ̃ ènu ɖekpe ò. E ye cã tɔ àhasì wɔ̀wɔ ji.

⁹Leke be àhasì wɔ̀wɔa mu ɖì ènu ɖe lè ŋùmè na ɛ̀ ò, ɖoa, e na be e dovlo ànyigbãa, wàlɛbɛ kè be wɔ̀ àhasì ku èkpewo, ku àtiwo.

¹⁰Ekèa keŋu jɔ̀, gãkea, nɔ̀via Yudà, xɔ̀se mà-ɖotɔa, mu trɔ gbɔ̀, va gbɔ nyè ku èjì blibo ò; vɔ̀a, àyèmènu bòhũ be wɔ̀” Tɔhonɔ̀ ye gblɔ̃ ɛ̀.

¹¹Tɔhonɔ̀ gblɔ̃ na mù be: “Izràɛl mà-wɔ̀ ànùkua tɔ̀ nyɔ wu Yudà jɔ̀vuɛ̃a tɔ̀.

¹²Yì kãkã àŋɛ̀do kèa na èvègo lɔ̀ge tɔwo be: “Trɔ gbɔ̀ va, èwò, Izràɛl màvɔ̃ Mawu kèa! Nyè mu la gbà ɖo àdã ɖo ŋuti wò ke ò, ɖoa, xòmèfanɔ̀ ye mù nyi. Tɔhonɔ̀ ye gblɔ̃ ɛ̀: Nyè mu la bijì kaka sɔ yì ò.

¹³Gãkea, jèsi àpo àgɔ̀jèje be: Tɔhonɔ̀ àpo Mawu ŋuti ye wò jè àgla ɖo. Wò sɔ ɖokoe wò dãgbã, lè èdù bu be vòduwo gbɔ, lè àti do àmà ɖe sia ɖe gɔ̃mè, eye wò mu sè ètonu na mù ò.” Tɔhonɔ̀ ye gblɔ̃ ɛ̀.

¹⁴“Mì, èvi jè àglawo, mì trɔ gbɔ̀! Tɔhonɔ̀ ye gblɔ̃ ɛ̀ be: Ekè, mù nyi mìabe àpetɔa, mù la cã àmè ɖèka, so èdù ɖe mè, mù la cã àmè èvè, so kɔ̀ta ɖe mè, eye mù la kplɔ̀ mì va Ziɔ̀n.

¹⁵Ekèa yomè a, mù la ɖo àlɛ̃kplɔ̀tɔ kèwo ye jè ŋùmè na mùawo ɖo mìa nu, àleke be woa sɔ ènunya ku ènugɔ̃mèsèse kplɔ̀ mì.

¹⁶Wàlɛbɛ ŋua, ne mì sùgbɔ, eye mì jì ɖo e ji, lè ànyigbã ŋua jia, Tɔhonɔ̀ ye gblɔ̃ ɛ̀ be wo mu la gbà nɔ pò nupo so Tɔhonɔ̀ be Zòɖùɖu-Ɖakà a ŋuti ò[7]. Àmè ɖekpe mu la gbà nɔ susu ì, àlo, la nɔ ɖoŋù ì ò. Àmè ɖekpe mu la gbà nɔ hiã ɛ̀, ne woa va wɔ̀ èbu ò.

¹⁷Wàlɛbɛ ŋua, wo la yɔ Yèruzàlɛm be “Tɔhonɔ̀ be Èfìɔzìkpe”. Dùkɔ̃wo keŋu la va bɔ̀ ɖo Yèruzàlɛm, la do bùbu Tɔhonɔ̀ be nyikɔ ŋuti. Wo mu la gbà zɔ̃ ɖo woabe èjì vuɛ̃wo be ètamèsɛ̃sɛ̃ nu ke ò.

¹⁸Wàlɛbɛ ŋua, Yudàviwo la va Izràɛlviwo gbɔ. Wo la zɔ̃ ɖodu, so èvègo-nyigbã ji, va ànyigbã kè mù sɔ wɔ̀ ècrɔ̃nu na woa tɔgbewoa ji.”

¹⁹Nyè ŋutɔ mù gblɔ̃ be: Lekè mù la ɖè èjì, la ɖo wò èvi, lè èvi nyèwo domè ɖoa, la na be mù la sɔ ànyigbã nyuɛ̃ na wò. E la nyi ècrɔ̃nu kè la nyɔ wu, lè dùkɔ̃wo dòmèa. Mù susu be wò la yɔ mù be “Ètɔ nyè!” Eye wò mu la gbà trɔ lè yo nyè mè ò.

²⁰Vɔ̀a, lè nyàwototo mèa, sìgbè nyɔ̃nù mà-wɔ̀ ànùkua na èsrɔ̃a, nènea, nènea ke ye wò mu wɔ̀ ànùkua na mù ò, Izràɛl be àxue! Tɔhonɔ̀ ye gblɔ̃ ɛ̀.

²¹Àbòbo ɖe ɖì, lè èto pɔplɔawo tamè. Izràɛlviwo ye le fã àvi, eye wo le do hèhè. Ɖoa, wo trã èmɔ̃, eye wo ŋlɔ̀be Tɔhonɔ̀, woabe Mawu.

²²Tɔhonɔ̀ gblɔ̃ be: “Mì, èvi jè àglawo, mì trɔ gbɔ̀; Mù la dà èmɔ̃ tãtrã be èdɔ̀a na mì.” Dùkɔ̃a ɖo e ŋuti be: “Miawo ye nyi ekèawo! Mì la trɔ va gbɔ wò, ɖoa, èwò ye nyi Tɔhonɔ̀, miabe Mawu.

²³Nyàwo ye be nyi be, Ètowo ku ètokɔ̃ɛwo ji be tùkaɖawo keŋu nyi fùflu sɔ̃ŋu. Nyàwo ye be nyi be Tɔhonɔ̀ mè kpò ye Izràɛl be hlùɛ̃gã lè.

²⁴So kaka miabe ɖèvi mè kea, ŋùkpɛ̃ be vòduwo ɖù èdɔ kè mia tɔgbewo wɔ̀a be èkusɛ̃sɛ̃wo keŋu! Wo ɖù woabe àlɛ̃hawo ku ènyìhawo keŋu! Wo ɖù woabe ŋusùviwo ku nyɔ̃nùviwo[8] keŋu!

²⁵Mia mlɔ̃ miabe ŋùkpɛ̃a mè, ne miabe vlododo ne cɔ̃ mia ji! Ɛ̃ɛ, mi wɔ̀ èvuɛ̃ ɖo Tɔhonɔ̀, miabe Mawu ŋuti, mia ŋutɔ ku mia tɔwo. So kaka miabe ɖèvimè kea, mi mu sè ètonu na Tɔhonɔ̀, miabe Mawu ò.”