Read gen Yeremìa 30 Bible Online

Yeremìa 30 - gen bible

Yeremìa 30

¹Ègbè kè ɖì na Yeremìa, so Tɔhonɔ̀ gbɔa ye nyi ekèa:

²“Tɔhonɔ̀, Izràɛl be Mawu a gblɔ̃ be: 'Ŋlɔ̀ ènyà kèwo mù gblɔ̃ na wòa kpata ɖo xoma mè.

³Ŋùkèkèwo gbãnà.' Tɔhonɔ̀ ye gblɔ̃ ɛ̀. 'Mù la kplɔ̀ dùkɔ̃ nyè, Izràɛl ku Yudà gbɔ̀ so gàtɔnugbe,[29] eye mù la likè wo ɖo ànyigbã kè mù sɔ na woa tɔgbe-tɔ̀gbèwo, be e la nyi woa tɔ̀a ji.' Tɔhonɔ̀ ye gblɔ̃ ɛ̀.”

⁴Ènyà kèwo Tɔhonɔ̀ gblɔ̃ so Izràɛl ku Yudà ŋutiawo ye nyi ekèawo:

⁵Tɔhonɔ̀ gblɔ̃ be: Vɔ̃vɔ̃ be àpawo le ɖì; àdìka sò àmè, ŋuti fàfa ɖekpe mu lè ò!

⁶Mì biɔ sè! Mì hũ ŋùku, ne mìa kpɔ, be ŋusù jìnàvi màa! Eŋuã, nukɛ ŋuti mù le kpɔ ŋusù sɛ̃sɛ̃ ɖe sia ɖe sɔ àlɔ̀ ɖo pòdo ji, sìgbè nyɔ̃nù kè le le èkua nène ɖo ò? Nukɛ ŋuti woa kpata woabe ŋùmè ɣe tìì, sìgbè àŋùãlìwo be ŋùmè nène ò?

⁷Hèlu loo! Ŋùkèkè bàɖà kɛ ye gbè ŋua gbè ŋua la nyi ò! Ŋùkèkè ɖekpe mu la ɖì gbè ŋua gbè ò! E la nyi tùkaɖa be ŋùkèkè na Yakɔb be jìjimèviwo, gãkea, wo la hlùɛ̃ ɛ̀ gã, to lè e mè.

⁸Tɔhonɔ̀, Ŋusɛ̃kpatatɔa gblɔ̃ be: “Gbè ŋua gbèa, mù la ŋɛ̃ èkɔ̀kùtia jo lè èkɔ̀ na wo. Mù la sò èkà kè wo sɔ bla woa jo, eye wo mu la gbà nyi kluviwo na àmèjro ɖekpe ò.

⁹Bòhũa, wo la sumɔ Tɔhonɔ̀, woabe Mawu, ku David, woabe èfìɔa, kè mù la gbìgbɔ̀ ɖotè na woa.”

¹⁰Tɔhonɔ̀ gblɔ̃ be: “Ekèa ŋutia, sumɔ̃vi nyè Yakɔb,[30] mù gbà vɔ̃ ò! Izràɛl, mù gbà gbɔjɔ ò!” Tɔhonɔ̀ ye gblɔ̃ ɛ̀ “Mù la hlùɛ̃ wò gã, so dìdìpe godo! Mù la hlùɛ̃ jìjimèvi wòwo gã, so ànyigbã kè ji wo kplɔ̀ wo yì àhùalea. Yakɔb be jìjimèviwo la gbà nɔ̀ àgbè, lè ŋuti fàfa ku ètù fàfa mè. Eye àmè ɖekpe mu la do vɔ̃vɔ̃ na wo ò.

¹¹Mù lè ku wò, eye mù la hlùɛ̃ wò gã.” Tɔhonɔ̀ ye gblɔ̃ ɛ̀. “Ne mù crɔ̃ dùkɔ̃ kèwo keŋu dòmè mù kã wò hlɛ̃ ɖoawo gbidi cã a, èwò yaa, nyè mu la crɔ̃ wò gbidi ò. Ɖe kpò ye mù la dɔ̃ èto na wò. Vɔ̀a, mù la wɔ̀ ɛ̀, lè jɔ̀jɔɛwɔ̀wɔ mè. Gãkea, nyè mu la gble wò ɖɛ èto mà dɔ̃ ò.”

¹²Tɔhonɔ̀ gblɔ̃ be: “Àbì wòa, mu la ku gbèɖe ò; àtikè ɖekpe mu lè na àbì kè wò xɔ̀a ò.

¹³Àmè ɖekpe mu lè, la xɔ̀ ènyà ɖo èta wò ò. Ègbe mu lè, la dà vevesèse wòa ò. Xàyàxaya ɖekpe mu lè na àbì wòa ò.

¹⁴Lɔ̃lɔ̃tɔ wòwo keŋu ŋlɔ̀be wò. Wo mu gbà sɔ èɖe lè e mè na wò ò, ɖoa, mù pò wò, sìgbè leke kɛ̃tɔ la pò wòa nène, eye mù dɔ̃ èto na wò, sìgbè leke àmè nyrãhũ la dɔ̃ ètoa nène, ɖo leke àgɔ̀jèje wò lòlò ɖoa ku leke nuvuɛ̃ wòawo sùgbɔ ɖoa ŋuti.

¹⁵Nukɛ ŋuti wò le fã àvi ɖo àpo àbì a ta ɖo ò? Ɖo àpo vevesèse kèwo mu la vɔ̀ ò a, ta ɖo ò? Mù wɔ̀ ènu kèawo ku wò, ɖo leke àgɔ̀jèje wòa lòlò ɖo, ku leke èvuɛ̃ wòawo sùgbɔ ɖoa ŋuti.

¹⁶Vɔ̀a, wò la vũvũ àmè kèwo keŋu le vũvũ wòawo, eye kɛ̃tɔ wòwo keŋu la yì gàtɔnugbe. Wo la hlà àmè kèwo keŋu le hlà wòa cã be ènuwo, eye mù la gbã ènu na àmè kèwo keŋu le gbã ènu na wòa.

¹⁷Gãkea, mù la gbìgbɔ̀ xaya wò, eye mù la dà ègbe lè àbì wòwo ŋuti.” Tɔhonɔ̀ ye gblɔ̃ ɛ̀. Ɖoa, wo le yɔ wò be 'Àmè nyà ɖo ègbe', èwò Ziɔ̀n kè ŋuti wo ɖè èkɔ̀ lèa.

¹⁸Tɔhonɔ̀ gblɔ̃ be: “Kpɔɖa, mù la gbìgbɔ̀ sɔ Yakɔb be gòxɔwo be àdɔ̀kùnuwo na wo, eye mù la ku ŋuzĩzĩ na yebe nɔ̀pewo. Wo la gbìgbɔ̀ tù èdùa ɖo yebe ètokɔ̃ɛ̃a ji, eye èfìɔsaa ɖo ye ŋutɔ be tèpe.

¹⁹Àkpedohàwo ku jìjɔɛkpɔkpɔ la nɔ to so woa mè. Mù la na, wo la jì ɖo e ji, eye wo mu la hùe ò. Mù la hɛ̃ bùbu va na wo, eye àmè ɖe mu la dovlo wo ò.

²⁰Woabe èviwo la gbà nɔ̀ sìgbè leke wo nɔ̀ sãa nène, eye woabe àmèha a la likè ɖo ŋùkɔ̀ na mù. Mù la dɔ̃ èto na àmè kèwo keŋu la zĩ wo ɖo ànyia.

²¹Woawo ŋutɔ dòmètɔ ɖèka ye la kplɔ̀ wo. Woa dòmè ye woabe ŋùkɔ̀nɔ̀tɔa la so. Mù la kplɔ̀ ɛ̀ ɖo ŋuti, eye be la dɔ̃ gogo mù, ɖoa, àmè kɛ ye la dojì, la teŋu tètè gogo mù ò?” Tɔhonɔ̀ ye gblɔ̃ ɛ̀.

²²“Lekea, mìawo, mì la nyi dùkɔ̃ nyè, eye nyè cã, mù la nyi mìabe Mawu.”

²³Kpɔɖa, àya sɛ̃sɛ̃ ɖe le so. Tɔhonɔ̀ be àdɔ̀mèze ye be nyi. Àdã be àya vùdùa le tro, le blù, lè èta ji na àmè vuɛ̃wo.

²⁴Tɔhonɔ̀ be àdɔ̀mèze be àdã a mu la fa, ne mu wɔ̀ ènu kè lè yebe susu mèa keŋu ò. Ne ènu kèawo keŋu jɔ̀ vɔ̀a, mì la sè ekèa gɔ̃mè.