Read gen Yeremìa 31 Bible Online

Yeremìa 31 - gen bible

Yeremìa 31

¹Tɔhonɔ̀ gblɔ̃ be: “Gà ŋua mèa, mù la nyi Izràɛl be xòmèwo kpata be Mawu, eye wo la nyi dùkɔ̃ nyè.”

²Tɔhonɔ̀ gblɔ̃ be: “Dùkɔ̃ kè kpɔ̀tɔ̀ ci àgbè so èwui nua, kpɔ ɖàgbè so gbɔ nyè, lè zògbè a ji. Ekèa ŋutia, Izràɛl la yì kpɔ gbɔ̃jɛ̃.”

³Dùkɔ̃a gblɔ̃ be: “Sãa, kaka dìdìpe ke Tɔhonɔ̀ ɖè ye ɖokoe fiɔ mù lè”, eye be gblɔ̃ be: “Mù sɔ lɔ̃lɔ̃ kòkòɖàbì lɔ̃ wò, ekèa ŋuti ye mù sɔ ànùkua be xòmèfa dɔ̃ wò va ɖokoe nyè gbɔ ɖo.

⁴Mù la gbìgbɔ̀ tù wò ɖotè ke, Ɛ̃ɛ, Izràɛl nyɔ̃nùvi lè àxue! Eye wò la likè goŋu-goŋu! Wò la gbà sɔ àsi-hũvi wòa ke, eye wò la gbà to, la yì ɖuwè ku àmè kèwo le sò àyoa.

⁵Wò la gbà dè vɛ̃-gblè ɖo Sàmarìa be ètokɔ̃ɛ̃wo ji ke. Àgblèdàtɔwo la dè vɛ̃-gblèawo eye wo la ɖù woabe èkusɛ̃sɛ̃awo

⁶Èŋù ɖe la va kè, ekè èzãɖiatɔwo la do àpa, lè Efràyim be ètoa ji be: 'Mì va, ne mia yì Ziɔ̀n, yì Tɔhonɔ̀ miabe Mawu gbɔ!'”

⁷Tɔhonɔ̀ gblɔ̃ be: “Mì jì jìjɔɛ-hà na Yakɔb! Mì sɔ àbòbo sò àyo, sɔ kafu dùkɔ̃wo be ŋùkɔ̀nɔ̀tɔa! Mìabe kafu-hàwo ne ɖì be: 'Aò Tɔhonɔ̀, hlùɛ̃ dùkɔ̃ wò, àmè kèwo kpɔ̀tɔ̀ lè Izràɛlviwo dòmèawo gã'!

⁸“Kpɔɖa, mù la kplɔ̀ wo gbɔ̀, so àvego be ànyigbãwo ji, eye mù la bɔ̀ wo ɖodu, so ànyigbã be ènukpòpewo! Ŋùvìnɔ̀wo ku kpòtɛ̃wo la nɔ̀ woa dòmè, èfunɔ̀wo ku nyɔ̃nù kèwo ye le le èkuawo keŋu la nɔ̀ woa dòmè. Wo la nyi àmèha gã ɖe la gbɔ̀ va tèpe kèa.

⁹Wo la nɔ̀ àvi ji, la gbɔ̀ va, wo la nɔ̀ fãkue, ne mù kplɔ̀ wo gbãnà a. Mù la kplɔ̀ wo to èmɔ kè ji zìɔ̃, kèwo ji wo mu la klɛ̃ àfɔ̀ lè ò a ji, yì ètɔ̀ sàsrawo to, ɖoa, Izràɛl be ètɔ ye mù nyi, eye Efràyim nyi ŋùkɔ̀gbevi nyè ŋusù.”

¹⁰Dùkɔ̃wo, mì sè ènyà kè Tɔhonɔ̀ le gblɔ̃a. Mì gblɔ̃ ɛ̀, kaka yì ɖo àpù kèwo ye lè dìdìpeawo to be: “Tɔhonɔ̀ kè ŋutɔ kã Izràɛlviwo hlɛ̃a la gbìgbɔ̀ bɔ̀ wo ɖodu, eye be la nɔ kpɔ yebe èlãhaa ji, sìgbè leke àlɛ̃kplɔ̀tɔ wɔ̀nà ɛ̀a nène.”

¹¹Ɖoa, Tɔhonɔ̀ la xɔ̀ Yakɔb plè, eye be la hlùɛ̃ ɛ̀ gã, so àmè kèwo sɛ̃ŋu wu ìawo si.

¹²Izràɛlviwo la va kpà àbòbo ku jìjɔɛ, lè Ziɔ̀n be ètoa tamè. Wo la kpɔ jìjɔɛ, so Tɔhonɔ̀ be àdɔ̀mè nyuɛ̃ ŋuti, àdɔ̀mè nyuɛ̃ kè flãŋu ku vɛ̃ kudo èlù yeye gbàkudo àmìa, àlɛ̃viwo ku ènyìwo kudo èlãhaa. Izràɛlviwo be èklawo la nɔ̀ sìgbè àbɔ kè wo wusì nyuɛ̃ ɖe a nène, eye wo mu la gbà ɖo àkpɔ̃ ke ò.

¹³Ekèa yomè a, tùgbɛ̀jɛviwo la sò àyo, wo la ɖuwè ku ɖèkajɛviwo kudo àmè sĩsĩwo. Mù la trɔ woabe àlenanaa zũ jìjɔɛ. Mù la fa àkɔ, eye mù la do jìjɔɛ na wo, ɖo woabe vevesèse tèpe.

¹⁴Mù la sɔ èlã doàmì ɖɔpò na hũbonɔ nyèwo, eye mù la sɔ àpe àdɔ̀mè nyuɛ̃ ɖɔ dùkɔ̃ nyèa.” Tɔhonɔ̀ ye gblɔ̃ ɛ̀.

¹⁵Tɔhonɔ̀ gblɔ̃ be: “Wo sè, àpa ɖe le ɖì lè Ramà[31], àvifãfã be àlenana veve ɖe. Raxɛ̀l ye le fã èviawo, eye be gbe be wo mu gbà fa àkɔ na yè ò, ɖoa, èviawo mu gbà lè ò.

¹⁶Tɔhonɔ̀ gblɔ̃ be: “Ègbè wò ne nɔ̀tè àvifãfã, eye ŋùkuvi wòwo ne nɔ̀tè àɖàsì kpɔ̀kplɔ, ɖoa, fɛ̃tu lè na àpo èdɔwɔ̀wɔwo, eye wò la trɔ gbɔ̀ so kɛ̃tɔwo be ànyigbã ji.

¹⁷Ekèa ŋutia, èmɔkpɔkpɔ lè àsi wò na èsɔ̀mè.” Tɔhonɔ̀ ye gblɔ̃ ɛ̀.

¹⁸“Ɛ̃ɛ, mù sè Efràyim le na àle be: 'Wò dɔ̃ èto na mù, eye mù ɖè àsi lè ɖokoe nyè ŋuti, wò kpla mù, sìgbè ènyì-suvi kè mu xɔ̀ kpakpla ò a nène. Gbìgbɔ̀ kplɔ̀ mù gbɔ̀, ne ma trɔ èta mè, ɖoa, èwò Tɔhonɔ̀ ye nyi Mawu nyè.

¹⁹Ɖoa, ekè mù trɔ èta mèa, mù sè veve, eye, ekèa yomè a, mù sè e gɔ̃mè, eye mù pò àsi àkɔ. Èŋù kpɛ̃ mù be mù ɖè ɖokoe nyè kpɔ̀tɔ̀, ɖoa, ɖèvimè be ŋùkpɛ̃ lè ŋuti nyè.

²⁰Efràyim nyèa ɖe, mu nyi èvi ɖève kè ŋuti nyè mu lɔ̃nà ènu lè ò a ye be nyi na mùa? To e gbɔ be mù pònà nupo ɖo e ŋuti, e ji e ji cã a, yebe ènu nɔ̀nà èjì mè na mù, wè sia wè. Ekèa ŋutia, àpe àdɔ̀mè trɔ ɖo e ŋuti, eye mù la ku ŋuzĩzĩ[32] na ɛ̀ godo!” Tɔhonɔ̀ ye gblɔ̃ ɛ̀.

²¹“Ɖo èmɔto jèsìdowo, ɖo èmɔfiɔ jèsìdokpewo, kpɔ nyuɛ̃ ɖe, lè èmɔ kè ji wò le zɔ̃a ŋuti. Trɔ gbɔ̀, Izràɛl, tùgbɛ̀jɛvi lè àxue, trɔ gbɔ̀, va wò ŋutɔ èdù wòwo mè.

²²Kaka na gà kɛ mè ye wò la kpɔ̀tɔ̀ la nɔ dãgbã ò? Aò, èvi nyɔ̃nùvi mà wɔ̀ ànùkua! Ɖoa, Tɔhonɔ̀ gbà ɖo ènu yeye ɖo ànyigbãa ji: Nyɔ̃nù ye la nɔ[33] ji ŋusù.”

²³Tɔhonɔ̀, Ŋusɛ̃kpatatɔ, Izràɛl be Mawu a gblɔ̃ be: “Ne mù kplɔ̀ wo gbɔ̀ so gàtɔnugbe ji[34], va ànyigbã kèa ji ku Yudà-nyigbã be èdùwo mèa, wo la gbà gblɔ̃, zè ɖèka ke be: 'Tɔhonɔ̀ ne tusì na wo, jɔ̀jɔɛwɔ̀wɔ be nɔ̀pe, èto kɔ̀kɔ̀ɛ!'”

²⁴Dùkɔ̃awo la nɔ̀du, lè Yudà-nyigbã ji ku yebe èdùwo keŋu mè, àgblèdàtɔwo ku àmè kèwo kplɔ̀nà èlãhawo ɖìnàsàawo keŋu.

²⁵Mù la na èsì, àmè kèwo ènu tìkɔ̀ na, wo la nù; mù la nyì àmè kèwo gbɔjɔa, eye mù la do ŋusɛ̃ wo.

²⁶Ekè mù sè ènyà kèawoa, mù fɔ̃. Mù sãŋùku gòdò, eye mù kpɔ be àlɔ̃a[35] vivi na mù.

²⁷Tɔhonɔ̀ gblɔ̃ be: “Kpɔɖa! Èŋùwo la va kè, kè mù la wu àgbètɔ be nukuwo ku èlã be nukuwo ɖo Izràɛl be àxomè ku Yudà be àxomè.

²⁸Eye, sìgbè leke mù sitè ɖo woa ŋuti be ma hɔ̃ wo jo, ma vũvũ wo, ma gbã wo, ma gble wo, ne ma crɔ̃ wo nènea, nènea ke ye mù la nɔ̀ ŋùzɔ̃ ɖo woa ŋuti, ne ma tù wo ɖo[36], ne ma likè woa yeŋu. Tɔhonɔ̀ ye gblɔ̃ ɛ̀.

²⁹Ekèa yomè a, àmè ɖe mu la gbà gblɔ̃ be “Ètɔwo ɖù vɛ̃ku gbogbo, eye àɖu va le nyinyi[37] na ɖèviawo” ò.

³⁰Bòhũa, àmè sia àmè la ku ɖo ye ŋutɔ be èvuɛ̃ ta, eye, àmè kè ɖù vɛ̃ku gbogboa ye àɖu la nyinyi.

³¹Tɔhonɔ̀ gblɔ̃ be: “Kpɔɖa, ŋùkèkèwo gbãnà, ekè mù la wɔ̀ zòɖùɖu[38] yeye ku Izràɛl be àxue ku Yudà be àxue.

³²Zòɖùɖu kèa mu la nɔ̀ sìgbè ekè mù wɔ̀ ku woa tɔgbe-tɔ̀gbèwoa nène, wàlɛbɛ kè nyè ŋutɔ mù le àlɔ̀ na wo, kplɔ̀ wo jo lè Ejiptè-nyigbã jia ò. Ɖoa, woawo yaa, wo gbã zòɖùɖu ŋua, to e gbɔ be èsrɔ̃ kpò mù gbà nyi na woa.” Tɔhonɔ̀ ye gblɔ̃ ɛ̀.

³³Gãkea, èzò kè mù la gbà ɖù ku Izràɛl be àxuea, lè ŋùkèkè ŋuawo yomè a ye nyi: Mù la sɔ èse nyèa ɖo woabe susuwo mè, eye mù la ŋlɔ̀ ɛ̀ ɖo woabe èjìwo mè. Mù la nyi woabe Mawu, eye wo la nyi dùkɔ̃ nyè.

³⁴Àmè ɖekpe mu la gbà fiɔ ènu yebe èhavi, àlo, la fiɔ ènu nɔ̀via be: 'Jèsi Tɔhonɔ̀' ò! Ɖoa, woa kpata, wo la jèsi mù, so woa dòmètɔ kèwo mu ɖì ènu ɖewo ji, sɔ yì ekèwo nyi gãwo, lè àmè gãwo dòmèa ji.” Tɔhonɔ̀ ye gblɔ̃ ɛ̀ be: “Mù la sɔ woabe èvuɛ̃jɔ̀jɔwo kè wo, eye nyè mu la gbà ɖoŋù[39] woabe ènuvuɛ̃wo ji ò.”

³⁵Tɔhonɔ̀ kè ɖo èwè, be ne klɛ̃ na ŋùkèkè, kè ɖo è na wètri ku wètriviwo, be woa klɛ̃ lè èzã mèa, kè blùnà àpù, àleke be àsrɔ̀kewo ɖènà ègbèa, àmè kè be nyikɔ ye nyi Tɔhonɔ̀, Ŋusɛ̃kpatatɔa gblɔ̃ be:

³⁶“Ne e teŋu jɔ̀ be ɖoɖo kèawo ɖè woa dokoewo jo, lè ŋùmè na mù kpòa, Izràɛl be jìjimèviwo cã nu la ci, eye wo mu la gbà nyi dùkɔ̃ nyè gbèɖe ò!

³⁷Tɔhonɔ̀ gblɔ̃ be: “Ne e teŋu jɔ̀ be woa jije jiŋùkusi, lè èji boo, eye woa jije ànyigbã be dodoewo be ègũnu, lè gɔ̃mèa, eŋuã, mù la gbe Izràɛl be jìjimèviwo kpata, ɖo ènu kèwo keŋu wo wɔ̀a ŋuti.” Tɔhonɔ̀ ye gblɔ̃ ɛ̀.

³⁸Tɔhonɔ̀ gblɔ̃ be: “Kpɔɖa, èŋùwo gbãnà, la va kè, kè wo la gbìgbɔ̀ tù èdù kèa na mù[40], so kaka Hananèl be èmɔ̃jikpɔxɔ̀a ji, kaka va ɖo Koŋùji-Gboa nu.

³⁹Lipòa la so funua tɛ̃ɛ, kaka va Garɛb be ètokɔ̃ɛ̃a ji, eye be la trɔ tùtà Goa.

⁴⁰Bàlì blibo kè mè wo fɔ̀nà àmè kukuwo ku vɔsa be àfiwo vanaa ku èto ŋuti be àgblè kèwo ye lè Kidrɔ̀n[41] be bàlìa mè, lè èwèɖoxɔ̀pe, kaka yì èsɔwo be àgboa be koŋùa jia keŋu la nɔ̀ kɔ̀kɔ̀ɛ na Tɔhonɔ̀. Wo mu la gbà gbã wo ke, àlo, la mù wo pu ànyi gbèɖe ke ò.”