Read gen Yeremìa 32 Bible Online

Yeremìa 32 - gen bible

Yeremìa 32

¹Lè Sedekìa be èfìɔɖùɖu be èpè èwogɔ̃a[42], lè Yudà-nyigbã ji, ekè le nyi Nèbukàdnezà be èpè woènyigɔ̃a, Tɔhonɔ̀ be ègbè ɖì na Yeremìa.

²Wàlɛbɛ ŋua, Babɛ̀l be èfìɔa be àhùakɔ̃a xa Yèruzàlɛm be èdùa, le zĩ ì ɖo ànyi, eye wo le gblɔ̃ɖɛtɔ Yeremìa, sɔ tu ɖo èfìɔsaa be ègàkpa mè, lè Yudà be ànyigbã ji.

³Ekè Sedekìa, Yudà be èfìɔa le Yeremìa tua, e kã ŋùmè na ɛ̀ be: “Wò gblɔ̃ ènyà ɖɛ be: 'Tɔhonɔ̀ gblɔ̃ be: Kpɔɖa, mù la sɔ èdù kèa do àsi na Babɛ̀l be èfìɔa, ne bèa ɖo àsi e ji.

⁴Èfìɔ Sedekìa mu la to lè àlɔ̀ mè na Babɛ̀lviwo ò; bòhũa, wo la do è àsi na Babɛ̀l be èfìɔa godo, eye be la pò nupo ku ì, àgbãŋùgbà, eye be la kpɔ ɛ̀ ku ye ŋutɔ be ŋùkuviwo.

⁵E la le Sedekìa yì Babɛ̀l, àfi kè be la nɔ̀, kaka va na gà kè mè nyè ku ì, mi la dogòa. Tɔhonɔ̀ ye gblɔ̃ ɛ̀ be: Ne mì wɔ̀ àhùa ku Babɛ̀lviwoa, mì mu la ɖùji ò.'” Nukɛ ŋuti wò wɔ̀ ekèa ɖo ò?

⁶Ènyà kè Yeremìa gblɔ̃a ye nyi ekèa: “Tɔhonɔ̀ gblɔ̃ na mù be:

⁷'Kpɔɖa, Hanamèl, àtàvi wò Salumì be èvia la va gbɔ wò, la gblɔ̃ na wò be: Xɔ̀ àgblè nyè kè lè Ànatɔt be ànyigbã jia plè, ɖoa, sìgbè àpe èxòmètɔ kpãŋù kpãŋù nènea, èwò ye ɖo[43] la plè è.'

⁸Ekèa yomè a, sìgbè lekè Tɔhonɔ̀ gblɔ̃ ɛ̀a tututu nènea, àtàvi nyè be èvi Hanamèl va kpɔ mù lè ɖiatɔwo be èkpa a mè, eye be gblɔ̃ na mù be: 'Xɔ̀ àgblè nyè kè lè Ànatɔt, lè Bɛnyamìn be ànyigbã jia plè. Ekè àpo jèna be nyi be wòa hlùɛ̃ e taa, ne bèa nyi tɔ̀ wòa, xɔ̀ ɛ̀ plè.'

⁹Ekèa yomè a, mù sè e gɔ̃mè be Tɔhonɔ̀ be ègbè ye be nyi, eye mù xɔ̀ àgblèa plè, lè àtàvi nyè be èvi, Hanamèl si, lè Ànatɔt. Mù hlɛ̃ klòsalò-gà, sekɛ̀l woeàdɛ̃, sɔ tufɛ̃ na ɛ̀.

¹⁰Mù do àsi xoma a mè, tù ènu-tre jèsì ɖo e ji, lè ɖàsèfowo be ŋùmè. Mù dà ègàa lè ènudànu ji[44], sɔ na ɛ̀.

¹¹Mù xɔ̀ àgblè kè mù plèa be xoma kè mè wo do àsia, sɔ zɔ̃ ɖo èsea ji; gbà xɔ̀ xoma kpɔ̀tɛawo cã.

¹²Mù sɔ ènuplè xoma kèa do àsi na Bàruk[45] kè nyi Neriyà kè Maxseyà jìa be èvia, lè àtàvi nyè be èvi Hanamèl ku ɖàsèfo kèwo do àsi xoma a mèawo kudo Yudàvi kèwo keŋu nɔ̀ ànyi ɖo ègàkpaɖiatɔa be èkpa a mèawo be ŋùmè.

¹³Mù do ègbè kèa àsi na Bàruk lè woabe ŋùmè be:

¹⁴'Ènyà kè Tɔhonɔ̀ Ŋusɛ̃kpatatɔ, Izràɛl be Mawu a gblɔ̃a ye nyi be: Xɔ̀ xoma kèawo, ànyigbã plè xoma kè ji ènu-tre jèsì lèa ku ekè ji mu lè ò a, sɔ wo do ànyikɔ-ze mè, àleke be woa nɔ̀ e mè dìdì ɖe.

¹⁵Ɖoa, Tɔhonɔ̀ Ŋusɛ̃kpatatɔ, Izràɛl be Mawu a ye gblɔ̃ be: Wò la gbà plè àxuewo, ànyigbãwo ku vɛ̃-gblewo, lè ànyigbã kèa ji.'

¹⁶Ekè mù sɔ ànyigbã plè xoma a na Bàruk, Neriyà be èvia vɔ̀a, mù fãkue na Tɔhonɔ̀ be:

¹⁷'Aò, Tɔhonɔ̀ kè lè ye ɖokoe sia, èwò ye sɔ àpo ŋusɛ̃ be àcɛ̀ ku àpo àlɔ̀ sɛ̃ŋu wɔ̀ jiŋùkusi ku ànyigbã. Nukɛ ye la teŋu sɛ̃ŋu na wò ò?

¹⁸Èwò kè ɖènà àpo àdɔ̀mè nyuɛ̃ fiɔ jìjimè èkàwìvɔàtɔ̃a, èwò kè gbà dro ètɔwo be nuvuɛ̃wo be àgbã ɖo èta na woabe jìjimèviwoa. Aò, àhùadù Tɔhonɔ̀, nyikɔ wò ye nyi Mawu Ŋusɛ̃kpatatɔ!

¹⁹Àpo susuwo kɔkɔ boo, eye àpo ènuwɔ̀wɔwo lòlò! Àpo ŋùkuwo lè hũhũ ɖo àgbètɔwo be àfɔ̀ɖèɖe ɖekpekpe ŋuti, àleke be wò ɖona e tèpe na àmè sia àmè, ɖo yebe zɔ̃zɔ̃ nu, eye wò wɔ̀nà ekè jè a ɖo yebe èdɛ̃wùwu nu.

²⁰Èwò ye wɔ̀ nùkunuwo ku ŋùdã jèsìwo lè Ejiptè, eye wò gbà kpɔ̀tɔ̀ le wɔ̀ wo, kaka va na egbè, lè Izràɛl ku àgbètɔ xòmèa keŋu mè. Ekèa ye wò sɔ na nyikɔ ɖokoe wò, sìgbè lekè be lè egbèa nène.

²¹Wò sɔ àpo àlɔ̀ sɛ̃sɛ̃ wɔ̀ jèsìwo ku ŋùdãnu ɖo vɔ̃vɔ̃ gãwo, sɔ ɖè àpo dùkɔ̃ Izràɛl to lè Ejiptè.

²²Wò sɔ ànyigbã kèa kè ŋuti wò kã àtãŋu ɖo, na woa tɔgbe-tɔ̀gbèwo, be yè la sɔ ànyigbã kè ji nyìnɔsi ku ànyisi bɔ ɖoa na woa, do àsi na wo.

²³Wo va e ji, eye wo xɔ̀ ɛ̀, gãkea, wo mu sè ètonu na wò ò, eye wo mu zɔ̃ ɖo àpo èse ji ò. Wo mu wɔ̀ ɖo ɖoɖo kè be ègbè wò ɖè na woa ji ò. Ekèa ŋuti ye wò hɛ̃ jɔ̀gbèvuɛ̃ kèawo va woa ji ɖo.

²⁴Kpɔɖa! Èkpo kè wo le bɔ̀, la sɔ xa èdùa le sɔ̀gbè vɔ̀. Èwui, àdɔ̀wùamè ku èdɔ̀vuɛ̃ la na be èdùa la ci Babɛ̀ltɔ kèwo ye le ɖè àhùa kpe na ɛ̀a si. Ènu kè wò gblɔ̃a ye jɔ̀ fifìa ŋua.

²⁵Eye, to e gbɔ be wo la jo èdùa na Babɛ̀lviwo cã a, aò, Tɔhonɔ̀ Ŋusɛ̃kpatatɔ lè ye ɖokoe si, wò gblɔ̃ na mù be: 'Hlɛ̃ klòsalò-gà, sɔ plè ànyigbãa, eye yɔ ɖàsèfowo, ne woa kpɔ e tèpe'”

²⁶Ekèa yomè a, Tɔhonɔ̀ be ègbè ɖì na Yeremìa be:

²⁷“Ènyè ye nyi Tɔhonɔ̀, àgbètɔ-xòmèa kpata be Mawu. Ènu ɖe be wɔ̀wɔ glo mùa?

²⁸Ekèa ŋutia, ènyà kè Tɔhonɔ̀ gblɔ̃a ye nyi be: Mù la sɔ èdù kèa do àsi na Babɛ̀ltɔwo[46], sɔ̀sɔɛ ɖe. Mù la sɔ ɛ̀ do àsi na Nèbukàdnezà, Babɛ̀l be èfìɔa, ne bèa xɔ̀ èdùa.

²⁹Babɛ̀ltɔ kèwo ye lè wɔ̀ àhùa ku èdù kèa la ɖo èdù kèa mè, la tɔ ɛ̀ èzò, eye wo la fiɔ̃ ɛ̀, wo la fiɔ̃ èdùa ku àxue kèwo be èta mè àmèwo nɔ̀nà, tɔna èzò lifi na vòdu Baal, sɔna àhà kɔ̀nà èsì ɖɛ na vòdu buwo, sɔ dona àdɔ̀mèze na mùa.

³⁰Tɔhonɔ̀ gblɔ̃ be: “So kaka woabe ɖèvimè kea, Izràɛl ku Yudà be dùkɔ̃wo mu wɔ̀ ènu bu sɔ wu èvuɛ̃ ɖèɖe kpò, lè ŋùmè na mù ò. Lè nyàwototo mèa, Izràɛl dùkɔ̃a mu wɔ̀ ènu bu, sɔ wu be woa do àdɔ̀mèze na mù, ku ènu kè woawo ŋutɔ, wo wɔ̀ ku woabe àlɔ̀wo ò.” Tɔhonɔ̀ ye gblɔ̃ ɛ̀.

³¹So gbè kè gbè wo sò è, kaka va na egbèa, èdù kèa mètɔwo fɔ̃ àpe èjìbibi ku àdɔ̀mèze, àleke be mù la ɖè èdùa jo lè àpe ŋùmè.

³²Izràɛl ku Yudà be dùkɔ̃awo sɔ èvuɛ̃ kèwo woabe èfìɔwo ku woabe àgbònùglawo wɔ̀awo, ekèwo woabe hũbonɔwo ku woabe gblɔ̃ɖɛtɔwo wɔ̀awo, ekèwo woabe Yudà-nyigbã ji ku Yèruzàlɛmtɔwo wɔ̀awo keŋu sɔ le do àdɔ̀mèze na mù.

³³Wo trɔ ŋùgbe do mù, eye wo mu le kpɔ gbɔ nyè ò. To e gbɔ be mù le fiɔ wo ènu, gà sia gàmè cã a, wo sɔ do ètoku mè, eye wo gbe be yèwo mu la xɔ̀ kpakpla ò.

³⁴Wo li woabe legba nyɔŋuwo ɖo àxue kè ŋuti nyikɔ nyè lèa mè[47], eye wo do è èvlo.

³⁵Wo tù kpèli yìjiwo na vòdu Baal, ɖo Bɛn-Hinɔ̀n be bàlìa mè, ne woa nɔ sɔ woabe ŋusùviwo ku nyɔ̃nùviwo savɔ na vòdu Mɔ̀lɛk; nyè mu ɖè ègbè na wo kpɔ, àlo, mu va susu mè na mù kpɔ be woa wɔ̀ ènu nyɔŋu kèa, kè na Yudà wɔ̀ ènuvuɛ̃a ò.

³⁶Ekèa ŋutia, ènyà kè Tɔhonɔ̀, Izràɛl be Mawu a le gblɔ̃ fifì, so èdù kè ŋuti mìawo ya, mì le gblɔ̃ so be: 'Wo la do è àsi na Babɛ̀l be èfìɔa, to èwui ku àdɔ̀wùamè mèa' ye nyi ekèa be:

³⁷“Kpɔɖa, mù la bɔ̀ woa kpata gòdò, so ànyigbã kèwo keŋu ji mù nyà wo ɖoɖa, wàlɛbɛ kè mù bijì ŋutɔ, eye mù do àdɔ̀mèze gã ɖe a ji. Mù la kplɔ̀ wo gbɔ̀ va tèpe kèa, eye, wo la nɔ̀ àgbè lè ŋuti fàfa mè.

³⁸Wo la gbà nyi dùkɔ̃ nyè, eye nyè cã, mù la gbà nyi woabe Mawu.

³⁹Mù la na wo èjì ɖèka, eye woabe wɔ̀nawo la to èmɔ ɖèka, àleke be wo la nɔ si mù, na woa ŋutɔwo be ènyuɛ̃, eye, lè woa yomè a, na woabe jìjimèviwo be ènyuɛ̃.

⁴⁰Mù la ɖù èzò kòkòɖàbì ku wo: nyè mu la nɔ̀tè ènyuɛ̃ wɔ̀wɔ na wo ò. Mù la sɔ ɖokoe nyè be sisi ɖo woabe èjì mè, ne wo mu gbà trã èmɔ, jo lè gbɔ nyè, gbèɖe ke ò.

⁴¹Mù la nɔ kpɔ jìjɔɛ so ènyuɛ̃ kè mù la nɔ wɔ̀ na woa ŋuti, eye mù la sɔ àpe èjì blibo ku àpe àmèti blibo likè wo, ɖo ànyigbã kèa ji godo.”

⁴²Tɔhonɔ̀ gblɔ̃ be: “Ɛ̃ɛ, sìgbè lekè mù hɛ̃ jɔ̀gbèvuɛ̃ kèawo keŋu va dùkɔ̃ kèa jia vaa nènea, nènea ke ye mù la hɛ̃ nyɔna kèwo keŋu be àjɔ̀gbè mù fìã na woa, va na wo.

⁴³Àmèwo la gbà plè àgblèwo, lè ànyigbã kèa kè ŋuti mù gblɔ̃ so be: 'E nyi zògbè-nyigbã pɔplɔ kè ji àgbètɔ àlo, èlã mu lè ò, ɖoa, wo sɔ ɛ̀ do àsi na Babɛ̀ltɔwoa' ji ke.

⁴⁴Ɛ̃ɛ, àmèwo la gbà hlɛ̃ ègà, lè Bɛnyamìn be ànyigbã ji, lè kɔpe kèwo trɔ do Yèruzàlɛm be èdùa mè, lè Yudà-nyigbã ji be èdùwo, ku lè èto-nyigbã be èdù kèwo ye lè èwèɖoxɔ̀pe be ètoviwo ji, kudo lè àpùgo lɔ̀geawo mè. Wo la plè àgblèwo, la do àsi xomawo mè, la tù ènu-tre jèsì ɖo woa ji, lè ɖàsèfowo be ŋùmè, ɖoa, mù la gbìgbɔ̀ trɔ woabe nyɔna va na wo.” Tɔhonɔ̀ ye gblɔ̃ ɛ̀.