Read gen Yeremìa 33 Bible Online

Yeremìa 33 - gen bible

Yeremìa 33

¹Wàlɛbɛ kè Yeremìa kpɔ̀tɔ̀ lè ègàkpa mè, lè ɖiatɔwo be ègàxɔ mèa, Tɔhonɔ̀ be ègbè gbà ɖì na ɛ̀, zè èvègɔ̃a be:

²Tɔhonɔ̀ kè wɔ̀ ànyigbãa, Tɔhonɔ̀ kè na ɛ̀ nɔ̀nɔmè, eye be ɖo è ànyi a, Tɔhonɔ̀ ye nyi yebe nyikɔ, eye be gblɔ̃ be:

³'Yɔ mù, mù la tɔ̀ na wò. Mù la ɖè ènu gã kàkò kèwo wò mu nya ò a fiɔ wò.'

⁴Ɖoa, ènyà kè Tɔhonɔ̀, Izràɛl be Mawu a gblɔ̃ so èdù kèa be àxuewo ku Yudà be èfìɔwo be èfìɔsa kèwo ye wo gbã, so èkpo kèwo ji wo lia, sɔ kpe àkɔ ku ì, sɔ zĩ èdùa ji ku èwui,

⁵lè àhùa kè wo kpe ku Babɛ̀ltɔwo mèa, ye nyi be: Wo la ɖɔ ku àmè kèwo mù la wù, lè àpe àdɔ̀mèze be àdã wɔ̀wɔ mèawo be àmèkpòtiwo. Mù la wla àpe ŋùmè do èdù kèa, ɖo yebe èvuɛ̃jɔ̀jɔ ŋuti.

⁶“Gãkea, mù la dà èdɔ̀ na ɛ̀, eye mù la na ɛ̀ lãmèsɛ̃. Mù la dà èdɔ̀ na dùkɔ̃ nyèa, eye mù la na ŋuti fàfa ku ètùjèanyi la flãŋu ɖo e ji.

⁷Mù la kplɔ̀ Yudà ku Izràɛl be jìjimèviwo gbɔ̀ so gàtɔnugbe ji, eye mù la gbìgbɔ̀ tù wo ɖo, eye wo la gbà nɔ̀ sìgbè leke wo nɔ̀ sãa[48] nène.

⁸Mù la klɔ ènuvuɛ̃ kè wo wɔ̀ sãa ɖo ŋuti nyèa keŋu be èɖi, jo lè woa ŋuti, eye mù la sɔ àglajèje be èvuɛ̃ kèwo wo wɔ̀ ɖo ŋuti nyèa keŋu kè wo.

⁹Ekèa yomè a, èdù kèa la ɖè nyikɔ na mù, e la nyi kafu na mù, e la do jìjɔɛ na mù, eye be la nyi àpe gogo lè ànyigbã ji-dù kèwo keŋu la sè ènu nyuɛ̃ kèwo keŋu mù wɔ̀ na ɛ̀a. Wo la ɖo sisi na dùkɔ̃ nyèa, eye wo la nɔ pò tìtìtì, ne wo kpɔ nyɔna ku fàfa kè mù la ɖùɖù kɔ̀ ɖo dùkɔ̃ nyèa jia.”

¹⁰Tɔhonɔ̀ gblɔ̃ be: “Mì le gblɔ̃ so tèpe kèa ŋuti be: 'E trɔ zũ zògbè kè ji àgbètɔ, àlo, èlã mu lè ò a.' Gãkea, lè Yudà be èdùwo ku Yèruzàlɛm be èmɔ kèwo ci àgbaa, kèwo ji àgbètɔ, àlo èlã mu lè ò a, wo la gbà sè

¹¹jìjɔɛkpɔkpɔ ku àyosòso be àpawo la gbà ɖì ke, nyɔ̃nùkpetɔ ku nyɔ̃nùkpekpe be ègbèwo la gbà ɖì, eye wo la gbà sè àmè kèwo le hɛ̃ àkpedodo be ènunanawo va Tɔhonɔ̀ be àxomèa be ègbèwo la nɔ gblɔ̃ be: 'Mì do àkpe na Tɔhonɔ̀, Ŋusɛ̃kpatatɔa, ɖoa yebe àdɔ̀mè nyɔ, eye yebe màjea lè kòkòkò!' Ɖoa, mù la gbìgbɔ̀ trɔ ànyigbãa be nyɔnawo ɖotè, sìgbè lekè wo nɔ̀ sãa nène.” Tɔhonɔ̀ ye gblɔ̃ ɛ̀.

¹²Tɔhonɔ̀, Ŋusɛ̃kpatatɔa gblɔ̃ be: “Tèpe kèa kè ci gbalo, eye àmè àlo èlã ɖe mu lè ò a, èlãnyìpewo la gbà nɔ̀ yebe èdùwo keŋu mè. Funua ye èlãkplɔ̀tɔwo la gbà nɔ na woabe èlãhawo, la nɔ cɔ̃ àkɔ ànyi ɖo.

¹³Lè èwèɖoxɔ̀pe be ètokɔ̃ɛ̃wo be èdùwo mè, lè èto-nyigbã be èdùwo mè ku àpùgo be èdùwo mèa, lè Bɛnyamìn be ànyigbã ji, lè èdù kèwo trɔ do Yèruzàlɛm kudo lè Yudà be èdùwo mèa, èlãwo la gbà nɔ to àmè kèwo le hlɛ̃ woawo be àlɔ̀wo mè.” Tɔhonɔ̀ ye gblɔ̃ ɛ̀.

¹⁴Tɔhonɔ̀ gblɔ̃ be: “Èŋùwo gbãnà, la va kè, ekè mù la wɔ̀ ɖo àjɔ̀gbè kè mù sɔ àdɔ̀mè nyuɛ̃ fìã na Izràɛl be àxue ku Yudà be àxuea ji.

¹⁵Gbè ŋua gbè, eye lè hùe ŋua nua, mù la na àlɔ̀zɛ̃ jɔ̀jɔɛ ɖe la to so David be èflì mè. E la nɔ wɔ̀ ènu jɔ̀jɔɛ kè jè a, lè ànyigbãa ji.

¹⁶Gbè ŋuawo gbèa, Yudà la xɔ̀ hlùɛ̃gã, eye Yèruzàlɛm la nɔ̀ àgbè, lè ètùjèanyi mè. Wo la yɔ ɛ̀ be: 'Tɔhonɔ̀ ye nyi miabe jɔ̀jɔɛwɔ̀wɔ.'”

¹⁷Ènyà kè Tɔhonɔ̀ gblɔ̃a ye nyi ekèa be: “Àmè kè la nɔ̀ Izràɛl be èfìɔzìkpe jia mu dɛ̃ lè David[49] be jìjimèviwo dòmè ò.

¹⁸Nène a ke ye hũbonɔ kèwo la so Levì[50] be jìjimèviwo dòmèawo mu la dokpò àmè kè la nɔ̀tè lè ŋùkɔ̀ na mù, wè sia wèa kpɔkpɔ, ne bèa nɔ wɔ̀ vɔsa mème, la nɔ fiɔ̃ ènu ɖùɖu vɔsa, eye be la nɔ wɔ̀ àkpedodo vɔsa ò.”

¹⁹Tɔhonɔ̀ be ègbè ɖì na Yeremìa be:

²⁰“Ènyà kè Tɔhonɔ̀ gblɔ̃a ye nyi ekèa be: 'Ne mì la teŋu gbã èzò kè mù ɖù ku ŋùkèkèa, la gbã èzò kè mù ɖù ku èzãa, àleke be ŋùkèkè ku èzã mu la gbà nɔ va ɖo gà kè mè wo vana kòkòkòa nu ò a',

²¹eŋuã, wo la teŋu gbã èzò kè mù ɖù ku David, sumɔ̃vi nyèa, èzò kè mù ɖù ku Levì be jìjimèviwo, àmè kèwo nyi hũbonɔ kèwo wɔ̀nà hũbonɔ be èdɔ lè ŋùkɔ̀ na mùa, nènea, David mu la gbà ɖo jìjimèvi kè la ɖùfìɔ, la nɔ̀ yebe èfìɔzìkpe ji ò.

²²Sìgbè lekè àmè ɖe mu la teŋu hlɛ̃ wètriviwo lè jiŋùkusi, àlo, la teŋu jije èkɔ, lè àpùta nène ò a, nènea ye mù la na sumɔ̃vi nyè, David be jìjimèviwo ku Levì be jìjimèvi kèwo ye wɔ̀nà sɛ̃sɛ̃dɔ lè ŋùkɔ̀ na mùawo la sùgbɔa yeŋu.”

²³Tɔhonɔ̀ be ègbè ɖì na Yeremìa be:

²⁴“Wò mu sè be dùkɔ̃ kèa le gblɔ̃ be: 'Tɔhonɔ̀ gbe xòmè èvè kèwo be cãawoa? Ekèa ŋuti ye wo le crì àmèha nyèa ɖo, eye wo mu gbà le kpɔ ɛ̀ sìgbè dùkɔ̃ nène ŋutɔ cã ke ò.'”

²⁵Ènyà kè Tɔhonɔ̀ gblɔ̃a ye nyi be: “Ne ɖe ye nyè mu ɖùzò ku ŋùkèkè ku dɔ̃ŋùkusu, eye mù ɖo ɖoɖowo na jiŋùkusi ku ànyigbã ò a,

²⁶eŋuã, mù la gbe Yakɔb ku David, sumɔ̃vi nyèa be jìjimèviwo, eye nyè mu la cã yebe èviwo dòmètɔ ɖèka, ne bèa nɔ̀ Abràham, Izàk ku Yakɔb be èviwo nu ò. Ɖoa, mù la gbà ɖo wo tè, eye mù la ku ŋuzĩzĩ na wo.”