Read gen Yeremìa 34 Bible Online

Yeremìa 34 - gen bible

Yeremìa 34

¹Wàlɛbɛ kè Nèbukàdnezà, Babɛ̀l be èfìɔa ku yebe àhùakɔ̃wo keŋu kudo èfìɔduwo gbàkudo dùkɔ̃ kèwo keŋu lè yebe àcɛ̀ gɔ̃mèawo le wɔ̀ àhùa[51] ku Yèruzàlɛm kudo èdù kèwo keŋu trɔ do èa, ègbè kèa so Tɔhonɔ̀ gbɔ, va na Yeremìa be:

²Ènyà kè Tɔhonɔ̀, Izràɛl be Mawu a gblɔ̃a ye nyi be: “Yì Sedekìa, Yudà be èfìɔa gbɔ, ne wòa gblɔ̃ na ɛ̀ be: 'Tɔhonɔ̀ gblɔ̃ be: Kpɔɖa, mù la sɔ èdù kèa do àsi na Babɛ̀l be èfìɔa, sɔ̀sɔɛ ɖe, eye be la tɔ ɛ̀ èzò.

³Èwò yaa, wò mu la si lè e nu ò; wo la ɖo àsi ji wò godo, eye wo la sɔ wò do àsi na ɛ̀. Wò ŋutɔ wò la kpɔ Babɛ̀l be èfìɔa ku àpo ŋùkuviwo; e la pò nupo na wò àgbãŋùgbà, eye wò la yì Babɛ̀l.

⁴Gãkea, Sedekìa, Yudà be èfìɔa, ɖo èto àjɔ̀gbè kè Tɔhonɔ̀ fìãa. Ènyà kè Tɔhonɔ̀ gblɔ̃ so ŋuti wòa ye nyi ekèa be: Wò mu la ci èwui nu ò.

⁵Wò la ku lè ŋuti fàfa mè. Eye sìgbè lekè wo tɔna èzò lifi, sɔ wɔ̀nà ècɔ na tɔgbe wò, èfìɔ kèwo ye jè ŋùkɔ̀ na wòa nènea, nènea ke ye wo la tɔzò lifi, sɔ wɔ̀ ècɔ na wò, la nɔ làmɔɛ̃ be: 'Aò, miabe àpetɔ ku!' Ènyè ŋutɔ ye le fìã àjɔ̀gbè kèa na wò.” Tɔhonɔ̀ ye gblɔ̃ ɛ̀.

⁶Ekèa yomè a, Yeremìa, gblɔ̃ɖɛtɔa gblɔ̃ ènyà kèawo keŋu na Sedekìa, Yudà be èfìɔa, lè Yèruzàlɛm,

⁷wàlɛbɛ kè Babɛ̀l be èfìɔa be àhùakɔ̃a le wɔ̀ àhùa ku Yèruzàlɛmtɔwo kudo Yudà be èdù kpɔ̀tɛawo mètɔ kèwo ye kpɔ̀tɔ̀ le Làkis ku Àzekà be èdùawo ɖo àsi, ɖoa, èdù kèawo ye nyi àgbògbò be èdù kèwo ye kpɔ̀tɔ̀ lè Yudà-nyigbã jia.

⁸Ekè èfìɔ Sedekìa ɖùzò ku dùkɔ̃ kèwo keŋu lè Yèruzàlɛm, be yèwo la jo kluviwo kpata vɔ̀a, Tɔhonɔ̀ be ègbè ɖì na Yeremìa be:

⁹“Àmè sia àmè ɖo la ɖè àsi lè kluvi ku kòsìvi kèwo nyi Hebrùviwoa ŋuti, eye àmè ɖekpe mu gbà ɖo la na nɔ̀via[52] Yudàvi la wɔ̀ kluvi-dɔ na ɛ̀ ke ò.

¹⁰Ekèa na be àgbònùglawo ku àmè kèwo keŋu ɖùzò kèa, lɔ̃ ɖo e ji be yèwo la jo yèwo be kluviwo ku kòsìviwo, eye wo mu la gbà nɔ̀ yèwo be èse gɔ̃mè ò. Ekè wo lɔ̃ ɖo e jia, wo ɖè àsi lè woa ŋuti.

¹¹Gãke e yomè a, wo gbà trɔ ètamè, eye wo gbìgbɔ̀ kplɔ̀ kluvi ku kòsìvi kèwo ŋuti wo ɖè àsi lèawo gbɔ̀, eye wo gbà trɔ wo sɔ wɔ̀ kluviwo ku kòsìviwo.

¹²Ekèa yomè a, Tɔhonɔ̀ be ègbè ɖì na Yeremìa be:

¹³Tɔhonɔ̀, Izràɛl be Mawu a gblɔ̃ be: “Mù ɖùzò ku mìa tɔgbewo, wàlɛbɛ kè mù kplɔ̀ wo to so Ejiptè-nyigbã ji, àfi kè wo yì nɔ̀ kluvi be àgbè lèa.

¹⁴Èpè adrɛ̃ sia sìaa, mìa dòmètɔ ɖe sia ɖe ɖo la ɖè àsi lè nɔ̀via Hebrùvi kè sɔ ye ɖokoe do àwòba na ɛ̀a ŋuti. Ne e wɔ̀ èdɔ na wò èpè àdɛ̃ yomè a, wò ɖo la ɖè àsi lè e ŋuti[53]. Gãkea, mìa tɔgbewo mu ɖo èto mù, àlo, la sɔ èɖe lè e mè na mù ŋutɔ cã ò.

¹⁵Lè hùe kèawo nua, mì trɔ èjìmè, eye mì wɔ̀ ènu kè jèa lè ŋùmè na mù. Mìa dòmètɔ ɖe sia ɖe ɖo ègbèta be yè la ɖè àsi lè yè nɔ̀vi ŋuti. Mì ɖùzò ŋutɔ cã ku mù, lè àxue kè ŋuti nyikɔ nyè lèa mè.

¹⁶Gãke fifìa, mì gbà trɔ, eye mì dovlo nyikɔ nyè. Mìa dòmètɔ ɖe sia ɖe gbìgbɔ̀ kplɔ̀ ye ŋutɔ be kluvi ku kòsìvi kèwo mì jo sãa, be woa jo yì àfi kè wo jro a. Mì gbà zĩ woa ji, be woa gbà nyi mìabe kluvi ku kòsìviwo ke.

¹⁷Ekèa ŋuti Tɔhonɔ̀ gblɔ̃ be: Mì mu sè ètonu na mù ò. Ekè mì mu ɖè àblɔ̀ɖè be ègbèfã na mìa nɔ̀viwo, mìa havi, kèwo nyi mìabe èdùmètɔwo òa, ènyè yaa, mù la ɖè vòvo be ègbèta na mì. Tɔhonɔ̀ ye gblɔ̃ ɛ̀ be: Mì la vò, la ci èwui nu, èdɔ̀ vuɛ̃ ku àdɔ̀wùamè mè, àleke be mì la nyɔŋu na èfìɔduwo keŋu lè ànyigbã ji.

¹⁸Àmè kèwo ye dà èzòɖùɖu nyèa ji, eye wo mu zɔ̃ ɖo ɖoɖo kè lè èzò kè wo ɖù lè ŋùku nyè mèa ji ò a, mù la wɔ̀ ènu kè woa ŋutɔwo wɔ̀ ku ènyìvi kè wo ma ɖo tèpe èvè, eye wo zɔ̃ to mamã èvèawo dòmèa ku wo.

¹⁹Yudà-nyigbã jitɔwo ku Yèruzàlɛm be àgbònùglawo, èfìɔ-xomè be àgbònùglawo, hũbonɔwo ku èdùamètɔ kèwo keŋu zɔ̃ to ènyìvia be mamã èvèawo dòmèa,

²⁰mù la sɔ woa kpata do àsi na woabe kɛ̃tɔ kèwo le ji èku na woa. Woabe ŋutilã kukuawo la nyi ènu ɖùɖu na àyamè xèviwo ku ànyigbã ji be èlãwo.

²¹Mù la sɔ Sedekìa, Yudà be èfìɔa ku yebe àgbònùglawo do àsi na woabe kɛ̃tɔ kèwo le ji èku na woa, na Babɛ̀l be èfìɔa be àhùakɔ̃ kè jo lè mìabe ŋùkɔ̀a.”

²²Tɔhonɔ̀ gblɔ̃ be: “Mù la ɖè ègbè, sɔ̀sɔɛ ɖe, eye mù la na wo la trɔ gbɔ̀ va èdù kèa mè, ne woa kpe àhùa ku ì, ne woa tɔ ɛ̀ èzò. Mù la gble Yudà be èdùwo, àleke be àmè ɖekpe mu gbà teŋu nɔ̀ woa mè ò!”