Read gen Yeremìa 35 Bible Online

Yeremìa 35 - gen bible

Yeremìa 35

¹Tɔhonɔ̀ be ègbè ɖì na Yeremìa, wàlɛbɛ kè Yehoyakìm kè nyi Yosìas, Yudà be èfìɔ be èvia le ɖùfìɔa; e gblɔ̃ na ɛ̀ be:

²“Yì Rekab be xòmèa gbɔ, kpe wo be woa va Tɔhonɔ̀ be àxuea be èxɔ̀ kèwo ye lè àwàwo mèa dòmètɔ ɖèka mè. Na wo vɛ̃, ne woa nù.”

³Eye, mù yì kplɔ̀ Yàzanìa, Yeremìa kè nyi Habasinìa be èvia be èvi, ku èviawo kpata, Rekab be xòmè bliboa.

⁴Mù kplɔ̀ wo va Tɔhonɔ̀ be àxuea mè, ɖo Mawu be àmè, Yigdalìa be èvi, Hanàn be èviwo be èxɔ̀ mè. Èxɔ̀ kèa lè àgbònùglawo be èxɔ̀a be àxàdamè, lè Salùm be èvi, Màseyà kè nyi èhɔ̃jikpɔtɔa be èxɔ̀a be ètamè.

⁵Ekèa yomè a, mù sɔ ègò kèwo ɖɔ ku vɛ̃a ku kogòwo ɖo ŋùkɔ̀ na Rekab be xòmèa be ŋusùwo, eye mù gblɔ̃ na wo be: “Mì nù àhà fàa.”

⁶Vɔ̀a, wo ɖo e ŋuti na mù be: “Mi mu nùnà vɛ̃ ò, ɖoa, mia tɔgbe Yònadàb kè nyi Rekab be èvia do èse kèa na mi be: 'Mìawo ŋutɔ cã, mìabe jìjimèviwo cã, mì mu la nù vɛ̃ gbèɖe ò.

⁷Mì mu la tù àxue, la do ènuku, àlo, la dà àgblè ò, mì mu la do ènu ɖekpe ò. Vɔ̀a, mì la nɔ̀ gòxɔwo mè, mìabe àgbè ŋùkèkèwo kpata. Nène a ye mì la nɔ̀ àgbè dìdi, lè ànyigbã kè ji mì la nɔ̀a ji.'”

⁸“Mi zɔ̃nà ɖo ɖoɖo ɖe sia ɖe kè mia tɔgbe Yònadàb, Rekab be èvia wɔ̀ na mia nu. Nène a, mia ŋutɔwo cã, mia srɔ̃wo, miabe ŋusùviwo, àlo miabe nyɔ̃nùviwo cã, mu nù vɛ̃ kpɔ ò.

⁹Mi mu tù èxɔ̀, ne mia nɔ̀ woa mè, àlo, ɖo vɛ̃-gble, àlo àgblè nuku la do kpɔ ò.

¹⁰Vɔ̀a mi nɔ̀nà gòxɔwo mè, eye mi zɔ̃nà ɖo èse ɖe sia ɖe kè mia tɔgbe Yònadàb do na mia ji.

¹¹Vɔ̀a, ekè Nèbukàdnezà, Babɛ̀l be èfìɔa va cɔ̃ ànyigbã kèa jia, mi gblɔ̃ be: Mì va, ne mia si jo yì Yèruzàlɛm, lè Babɛ̀ltɔwo ku Aràmtɔwo be àhùakɔ̃wo nu. Ekèa na be mi ci Yèruzàlɛm.”

¹²Ekèa yomè a, Tɔhonɔ̀ be ègbè ɖì na Yeremìa be:

¹³“Tɔhonɔ̀ Ŋusɛ̃kpatatɔ, Izràɛl be Mawu a gblɔ̃ be: 'Yì biɔ Yudàviwo ku Yèruzàlɛmtɔwo be: Mì mu la kpla ènunya, ne mìa sè àpe ègbèa?' Tɔhonɔ̀ ye gblɔ̃ ɛ̀.

¹⁴Yònadàb, Rekab be èvia do èse na èviawo be wo mu gbà nù vɛ̃ ò, eye wo le èse kèa ɖo àsi. Kaka va na egbèa, wo mu nùnà vɛ̃ ò, ɖoa, wo le zɔ̃ ɖo woa tɔgbe be èsedodo ji. Vɔ̀ ènyè Tɔhonɔ̀ yaa, mù le gblɔ̃ ènyà na mì, gbè sia gbè, gãkea, mì mu le sè ètonu na mù ò.

¹⁵Gbè sia gbè, mù le dɔ̃ sumɔ̃vi nyè, gblɔ̃ɖɛtɔwo ɖoɖa mì. Wo gblɔ̃nà na mì be: 'Mìa dòmètɔ ɖe sia ɖe ɖo la trɔ lè yebe àgbè kpòtoe nɔ̀nɔ yomè, ne bɛ̀a trɔ èdɛ̃. Mì mu gbà kplɔ̀ èdù bu mètɔ be vòduwo do, ne mìa sɛ̃ wo ò, àleke be mìa teŋu nɔ̀ ànyigbã kè mù sɔ na mìa tɔwoa ji.' Vɔ̀a, mì mu kpɔ gbɔ nyè, àlo, la ɖo èto mù ŋutɔ cã ò.”

¹⁶Yònadàb, Rekab be èvia be èviwo le woa tɔgbe be èse kè be do na woa ɖo àsi, vɔ̀a, dùkɔ̃ kèa mu sè àpe ègbè ò.

¹⁷Ekèa ŋuti, Tɔhonɔ̀ Ŋusɛ̃kpatatɔ, Izràɛl be Mawu a gblɔ̃ be: “Kpɔɖa! Mù la hɛ̃ jɔ̀gbèvuɛ̃ ɖe sia ɖe kè be ènyà mù gblɔ̃ ɖo Yudàviwo ku àmè ɖekpekpe kè lè Yèruzàlɛm ŋutia va woa ji, sɔ̀sɔɛ ɖe. Ɖoa, mù pò nupo na wo, gãke, wo mu ɖo èto ò. Mù yɔ wo, vɔ̀a, wo mu tɔ̀ na mù ò.'”

¹⁸Ekèa yomè a, Yeremìa gblɔ̃ na Rekab be jìjimèviwo be: “Tɔhonɔ̀ Ŋusɛ̃kpatatɔ, Izràɛl be Mawu a gblɔ̃ be: 'Mì sè ètonu na mìa tɔgbe Yònadàb, mì zɔ̃ ɖo yebe èsewo keŋu ji, eye mì wɔ̀ ɖo yebe ɖoɖo ɖe sia ɖe nu.'”

¹⁹Ekèa ŋuti, Tɔhonɔ̀, Ŋusɛ̃kpatatɔ, Izràɛl be Mawu a gblɔ̃ be: “Àmè kè la nɔ̀ àpe ŋùkɔ̀, la sɛ̃ mùa mu la dɛ̃ lè Yònadàb, Rekab be èvia be jìjimèviwo dòmè gbèɖe ò.”