Read gen Yeremìa 37 Bible Online

Yeremìa 37 - gen bible

Yeremìa 37

¹Babɛ̀l be èfìɔ, Nèbukàdnezà sɔ Sedekìa, Yosìas be èvia ɖo èfìɔ ɖo Yudà-nyigbã nu. E ɖùfìɔ ɖo Konìa kè nyi Yehoyakìm be èvia tèpe.

²Ye ŋutɔ cã, yebe ŋutimewo cã, ànyigbãa ji-dùkɔ̃wo cã, woa dòmètɔ ɖekpe mu ɖo èto ènyà kè Tɔhonɔ̀ gblɔ̃, to Yeremìa, gblɔ̃ɖɛtɔa ji ò.

³Gãkea, èfìɔ Sedekìa dɔ̃ Yehukàl, Selemìa be èvia ku Sèfanìa, Màseyà be èvi kè nyi hũbonɔa ɖoɖa Yeremìa, gblɔ̃ɖɛtɔa, be woa do àŋɛ̀ na ɛ̀ be: “Tɔ̀ wò jɔ̀, fãkue na Tɔhonɔ̀, miabe Mawu a ɖo mia ta.”

⁴Gà ŋua mèa, Yeremìa yìnà, gbɔ̀nà fàa, lè dùkɔ̃a dòmè, ɖoa, wo mu do è ègàkpamè ò.

⁵Ekè Ejiptè be èfìɔ, Faraɔ̀n be àhùakɔ̃a zɔ̃, to so Ejiptè a, Babɛ̀ltɔ kèwo ye xa Yèruzàlɛm hùenu ŋuawo sè è, eye wo ɖè àsi lè èdùa ŋuti, jo.

⁶Ekèa yomè a, Tɔhonɔ̀ be ègbè ɖì na Yeremìa, gblɔ̃ɖɛtɔa be:

⁷Ènyà kè Tɔhonɔ̀, Izràɛl be Mawu a gblɔ̃a ye nyi be: “Gblɔ̃ na Yudà be èfìɔ kè dɔ̃ àmè ɖoɖa wò, sɔ biɔ èta nyèa be: 'Ejiptè be èfìɔ be àhùakɔ̃ kè to va xɔ̀ na mìa, la gbà trɔ jo yì woa de lè Ejiptè.

⁸E yomè a, Babɛ̀ltɔwo la gbà trɔ va ɖè àhùa kpe na èdù kèa. Wo la xɔ̀ èdùa, eye wo la tɔ ɛ̀ èzò.'”

⁹Tɔhonɔ̀ gblɔ̃ be: “Mì mu gbà blè mìa ɖokoewo ku susu be 'Fifìa, Kaldeatɔwo la gble mi ɖɛ kòkòkò ò'. Wo mu la gble mì ɖɛ ò!

¹⁰Ne e nyi be mì ɖù Kaldeatɔwo be àhùakɔ̃ blibo kè ɖè àhùa kpe na mìa ji, eye àmè kèwo jè àbìawo kpò ye kpɔ̀tɔ̀ lè woabe gòxɔwo mè ŋutɔ cã a, àmè kèawo la to va tɔzò èdù kèa.”

¹¹Ekè Babɛ̀l be àhùakɔ̃a kpɔ Ejiptè-fìɔa be àhùakɔ̃a, eye be ɖè àsi lè Yèruzàlɛm ŋuti vɔ̀a,

¹²Yeremìa to so Yèruzàlɛm, le yì Bɛnyamìn be ànyigbã ji, la yì kpɔ gomè lè woabe xòmè be ènu mamã mè.

¹³Vɔ̀a, ekè Yeremìa ɖo Bɛnyamìn be àgboa[54] nua, gbãdãgbã kèwo lè ɖia àgboa nuawo be ŋùkɔ̀nɔ̀tɔ kè wo yɔna be Yiriyà, Selemìa, Hanàn tɔ̀ jìji be èvia le gblɔ̃ɖɛtɔa, eye be gblɔ̃ na ɛ̀ be: “Wò le si, la yì nɔ̀ Babɛ̀ltɔwo ji!”

¹⁴Yeremìa ɖo e ŋuti be: “Àjè ye! Nyè mu le si, le yì Babɛ̀ltɔwo be àsà mè ò!” Gãkea, Yiriyà mu ɖo èto è ò. E le Yeremìa bòhũ, eye be kplɔ̀ ɛ̀ yì na àgbònùglawo.

¹⁵Wo do àdɔ̀mèze do Yeremìa; wo na wo pò è, eye wo tu ì ɖo Yehonatàn, ènuŋlɔ̀tɔa be àxue kè wo sɔ trɔ zũ ègàkpaa mè.

¹⁶Wo tu Yeremìa ɖo ègũmèxɔ ɖe kè mè be nɔ̀ ŋùkèkè sùgbɔa.

¹⁷Ekèa yomè a, èfìɔ Sedekìa dɔ̃ àmè ɖoɖa ɛ̀, ne woa kplɔ̀ ɛ̀ va èfìɔsaa mè. Funua, èfìɔa kplɔ̀ ɛ̀ yì àsà mè, eye be biɔ ɛ̀ be: “Tɔhonɔ̀ be ègbè ɖe lèa?” Yeremìa ɖo e ŋuti be: “Ɛ̃ɛ, wo la sɔ wò do àsi na Babɛ̀l be èfìɔa.”

¹⁸Yeremìa biɔ Sedekìa be: “Èvuɛ̃ kɛ ye mù wɔ̀ ɖo ŋuti wò, àlo, ɖo àgbònùgla wòwo ŋuti, àlo, ɖo dùkɔ̃ kèa ŋuti, eye wò le mù do ègà ò?

¹⁹Fikɛ ye gblɔ̃ɖɛtɔ wò kèwo ye gblɔ̃ ènyà ɖɛ na wò be: “Babɛ̀l be èfìɔa mu la ɖè àhùa kpe na wò, àlo, kpe na ànyigbã kèa ò a” lè ò?”

²⁰Vɔ̀ fifìa, àpetɔ nyè, èfìɔ bùbùtɔ ne ɖo èto mù jro! Mù le bɔ̀bɔ̀ ɖokoe nyè, le blìbɔ̀ na wò, sɔ le le àfɔ̀ na wò be: “Tɔ̀ wò jɔ̀, mù gbà trɔ mù ɖoɖa Yehonatàn, ènuŋlɔ̀tɔa be àxomè ke ò. Ne mu nyi nène ò a, mù la ku lè funua.”

²¹Ekèa yomè a, èfìɔ Sedekìa ɖè ègbè be wo ne sɔ Yeremìa ɖo ɖiatɔwo be èkpa mè, ne woa nɔ̀ xɔ̀ kpɔ̃nɔ ɖèka, gbè sia gbè, so kpɔ̃nɔtɔwo be èmɔ ji, va na ɛ̀, va sɛ̃ ɖo gà kè mè kpɔ̃nɔ la vɔ̀ keŋu, lè èdùa mèa. Nène a ye Yeremìa ci ɖiatɔwo be èkpa a mèa yeŋu.