Read gen Yeremìa 38 Bible Online

Yeremìa 38 - gen bible

Yeremìa 38

¹Sefatìa, Matàn be èvia, Gedalìa, Pasur be èvia, Yehukà, Selemìa be èvia ku Pasur, Malkìa be èvia sè ènyà kè Yeremìa le gblɔ̃ na dùkɔ̃ bliboa, wàlɛbɛ kè be le gblɔ̃ be:

²“Ènyà kè Tɔhonɔ̀ gblɔ̃a ye nyi be: “Àmè ɖekpekpe àmè kè la ci èdù kèa mèa, la ci èwui nu, la ku àdɔ̀kù, àlo, la ku ci èdɔ̀vuɛ̃ simè. Vɔ̀a, àmè ɖekpekpe kè to yì, jo èta na Kaldeatɔwoa la ci àgbè. Eye be la nɔ̀ àgbè.”

³Eye Tɔhonɔ̀ gblɔ̃ be: “Wo la sɔ èdù kèa do àsi na Babɛ̀l be èfìɔa be àhùakɔ̃a godo, eye be la xɔ̀ ɛ̀.”

⁴Ekèa yomè a, àgbònùglawo gblɔ̃ na èfìɔa be: “Wo ɖo la wù ŋusù kèa. E le sɔ ènyà kèwo be le gblɔ̃a, le gbɔjɔ gbãdãgbã kèwo ye ci èdùa mè, la xɔ̀ na dùkɔ̃a. Ŋusù kèa mu le ji dùkɔ̃ kèa be nyuɛ̃ ò, vɔ̀ bòhũa, yebe cɔ̃crɔ̃ be le ji.”

⁵Èfìɔ Sedekìa ɖo e ŋuti na wo be: “E lè mìa simè. Èfìɔa mu la teŋu wɔ̀ ènu ɖekpe ɖo mìa ŋuti ò.”

⁶Eye wo le Yeremìa, sɔ ɛ̀ do Malkìa, èfìɔvia be èsìdo mè, lè ɖiatɔwo be èkpa mè. Wo sɔ èkà ɖiɖi Yeremìa ɖo èsìdoa mè. Èsì mu lè e mè ò. Bàba kpò ye lè e mè, eye èbàa mì Yeremìa.

⁷Gãkea, Ebɛd-Mèlɛk, Kusì ŋusù ɖe kè nyi àmègã lè èfìɔsaa mèa sè be wo sɔ Yeremìa do èsìdoa mè. Wàlɛbɛ kè èfìɔa nɔ̀ ànyi ɖo Bɛnyamìn be àgboa nua,

⁸Ebɛd-Mèlɛk to lè èfìɔsaa mè, yì gblɔ̃ na ɛ̀ be:

⁹“Àpetɔ nyè, èfìɔ bùbùtɔ, ŋusù kèawo wɔ̀ ènukpòtoewo sɔ̃ŋu ɖo gblɔ̃ɖɛtɔ Yeremìa ŋuti. Wo le è, sɔ dà ɖo èsìdo mè, ne àdɔ̀ ne wù ì, bèa ku, ɖo kpɔ̃nɔ mu gbà lè èdùa mè ò.”

¹⁰Ekèa yomè a, èfìɔ ɖè ègbè na Ebɛd-Mèlɛk, Kusì ŋusùa be: “Sɔ ŋusùti ègbã bɔ̀ ɖo ɖokoe wò ŋuti, ne mìa ɖè Yeremìa, gblɔ̃ɖɛtɔa to lè èsìdoa mè, keŋu gbɔ̀xue bèa ku.”

¹¹Eye Ebɛd-Mèlɛk ɖè ŋusùawo kpe ɖo ye ɖokoe ŋuti, ɖo èxɔ̀ ɖe mè, lè èfìɔsaa mè, lè ènujràɖopea gɔ̃mè. E sɔ àvɔvũ xoxo ku àwù ɖewo lè funua, eye be sɔ wo ɖo èkà nu ɖoɖa Yeremìa lè èsìdoa mè.

¹²Ebɛd-Mèlɛk, Kusì ŋusùa gblɔ̃ ɖoɖa Yeremìa be: “Sɔ àvɔvũ xoxo ku àwù vũvũ kèawo ɖo èkàawo ji lè àxatomè.” Eye Yeremìa wɔ̀ ɖo e ji.

¹³E yomè a, wo sɔ èkàawo dɔ̃ Yeremìa va èji, eye wo kɔ ɛ̀ to lè èsìdoa mè. Eye Yeremìa nɔ̀ ɖiatɔwo be èkpa a mè.

¹⁴Ekèa yomè a, èfìɔ Sedekìa dɔ̃ àmè, wo yì kplɔ̀ Yeremìa, gblɔ̃ɖɛtɔa va na ɛ̀, lè Tɔhonɔ̀ be àxuea be àgbo ètɔ̃gɔ̃a nu. Èfìɔa gblɔ̃ na Yeremìa be: “Mù jro la biɔ wò ènyà ɖe. Mù gbà wla ènu ɖekpe ɖo mù ò.”

¹⁵Yeremìa biɔ Sedekìa be: “Ne mù ɖo e ŋuti na wòa, wò mu la wù mù ò a? Ne mù pò ètoɖo na wò ŋutɔ cã a, wò mu la ɖo èto mù ò.”

¹⁶Vɔ̀a, èfìɔ Sedekìa kã àtãŋu kèa na Yeremìa lè wawla mè be: “Kaka kè kãkã ɖo e ji lè be Tɔhonɔ̀ kè do yebe gbɔ̃gbɔ̃ mia mèa, lè àgbèa, nyè mu la wù wò, àlo, la do wò àsi na àmè kèwo le jro la ɖè àpo àgbèa ò.”

¹⁷Ekèa yomè a Yeremìa gblɔ̃ na Sedekìa be: “Ènyà kè Tɔhonɔ̀ Ŋusɛ̃kpatatɔ, Izràɛl be Mawu a gblɔ̃a ye nyi be: 'Ne wò jo èta na Babɛ̀l be èfìɔa be àhùa ŋùkɔ̀nɔ̀tɔwoa, wo la gble wò ɖo àgbè, eye wo mu la tɔzò èdù kèa ò. Wò ŋutɔ ku àpo xòmèa, mì la ci àgbè.

¹⁸Vɔ̀a, ne wò mu jo èta na Babɛ̀l-fìɔa be àhùa ŋùkɔ̀nɔ̀tɔwo ò a, wo la sɔ èdu kèa do àsi na Babɛ̀ltɔwo, eye wo la tɔ ɛ̀ èzò. Èwò ŋutɔ cã wò mu la to lè woa si ò?'”

¹⁹Èfìɔ Sedekìa ɖo e ŋuti na Yeremìa be: “Mù le vɔ̃ Yudàvi kèwo jo yì Babɛ̀ltɔwo jiawo, ɖoa, Babɛ̀ltɔwo teŋu sɔ mù do àsi na wo, eye wo la do àyà na mù.”

²⁰Yeremìa ɖo e ŋuti be: “Wo mu la do wò àsi ò. Ɖo èto Tɔhonɔ̀, ne wòa wɔ̀ ɖo ènyà kè mù gblɔ̃ na wòa ji. Ne bèa nyɔ na wò, ne wòa ci àgbè.

²¹Vɔ̀a, ne wò gbe be yè mu la jo èta ò a, ènu kè Tɔhonɔ̀ ɖè fiɔ mùa ye nyi be:

²²Kpɔɖa, wo la kplɔ̀ nyɔ̃nù kèwo keŋu la kpɔ̀tɔ̀ ɖo Yudà be èfìɔsa mèawo to va na Babɛ̀l be èfìɔ be àgbònùglawo. Nyɔ̃nù ŋuawo la gblɔ̃ na wò be: 'Èxlɔ̃ wò kèwo ji wò kã ɖoawo flù wò, eye wo kpe ji wò. Ekè èbà le mì àfɔ̀ wòwoa, wo si gble wò ɖɛ.'

²³Wo la kplɔ̀ èsrɔ̃ wò ku èvi wòwo keŋu to va na Babɛ̀ltɔwo. Èwò ŋutɔ wò mu la teŋu to lè woa si ò, vɔ̀a, Babɛ̀l be èfìɔa be àsi la jè ji wò, eye wo la tɔzò èdù kèa.”

²⁴Ekèa yomè a, Sedekìa gblɔ̃ na Yeremìa be: “Mù gbà na, àmè ɖekpe ne nya ènu ɖe so àseŋu kè mi kãa ŋuti ò; ne mu nyi nène ò a, wò la ku.

²⁵Ne àgbònùglawo sè be mù pò nupo ku wò, eye wo va to na wò be: “Gblɔ̃ ènyà kè wò to na èfìɔa ku ekè èfìɔa to na wòa, na mi; mù gbà wla ɛ̀ do mi ò, ne mu nyi nène ò a, mi la wù ò,

²⁶eŋuã, wò la ɖo e ŋuti na wo be: 'Mù bɔ̀bɔ̀ ɖokoe nyè, le blìbɔ̀ na èfìɔa be mu gbà trɔ mù ɖoɖa Yonatàn be àxomè, ne ma ku lè funua ò.'”

²⁷Ekè àgbònùglawo kpata va kpɔ Yeremìa, eye wo biɔ ɛ̀ ènyàa. E gblɔ̃ ènyà kèwo keŋu èfìɔa ɖè ègbè na ɛ̀ be ne gblɔ̃ na woa, eye, àmè ɖekpe mu sè nupo kè be pò ku èfìɔa ò. Wo trɔ jo kpoo.

²⁸Eye Yeremìa ci ɖiatɔawo be èkpa mè, kaka na gà kè mè wo xɔ̀ Yèruzàlɛm be èdùa. Ènu kèwo jɔ̀, wàlɛbɛ kè wo xo Yèruzàlɛm be èdù a ye nyi ekè a: