Read gen Yeremìa 39 Bible Online

Yeremìa 39 - gen bible

Yeremìa 39

¹Lè Yudà be èfìɔ, Sedekìa be èpè àsiɖèkɛgɔ̃a, lè èfìɔzìkpea ji be wètri èwogɔ̃a mèa, Nèbukàdnezà, Babɛ̀l be èfìɔa, zɔ̃ ku yebe àhùakɔ̃ bliboa, ɖo Yèruzàlɛm ji, eye be trɔ do è, sɔ zĩ e ji.

²Lè Sedekìa be èfìɔɖùɖu be èpè woeɖèkagɔ̃a be wètri ènègɔ̃a be ŋùkèkè àsiɖèkɛgɔ̃a gbèa, wo gbã èdùa be èglìkpaa, jè e mè.

³Ekèa yomè a, Babɛ̀l be èfìɔa be àhùa ŋùkɔ̀nɔ̀tɔwo keŋu va xɔ̀ tèpe ɖo èdù-gbo gãa nu. Lè woa dòmèa, mi le kpɔ: Nergal-Sarezɛr so Samgàr; Nebò-Sarsekinì, àhùa ŋùkɔ̀nɔ̀tɔ gã ɖèka, Nergal-Sarezɛr àhùa ŋùkɔ̀nɔ̀tɔ gãwo be àmègã ku Babɛ̀l be èfìɔa be àhùa ŋùkɔ̀nɔ̀tɔ kpɔ̀tɛawo.

⁴Ekè Sedekìa, Yudà be èfìɔa ku yebe gbãdãgbãwo keŋu kpɔ woa, wo si. Wo jo lè èdùa mè, èzã mè, to èfìɔa be àbɔ mè, to àgbo kè lè èglì èvèawo dòmèa nu, tùtà Àrabà, lè àpùgo.

⁵Vɔ̀a, Babɛ̀ltɔwo be àhùakɔ̃a kplɔ̀ wo do, eye be yì sò Sedekìa lè Yerikò be ègbà mè. Wo le è, eye wo kplɔ̀ ɛ̀ yì na Nèbukàdnezà, Babɛ̀l be èfìɔa lè Riblà, lè Hamat-nyigbã ji, àfi kè wo dohùɛ do è lè.

⁶Lè Riblà funua, Babɛ̀l be èfìɔa sò èta na Sedekìa be èvi ŋusùviwo, lè ye ŋutɔ be ŋùkumè. Babɛ̀l be èfìɔa gbà wù Yudà be àgbònùglawo cã keŋu.

⁷Babɛ̀l be èfìɔa na wo gbã ŋùkuviwo na Sedekìa eye be na wo do è, gàjɛ̃ be kɔ̀sɔ̀kɔsɔ, ne woa kplɔ̀ ɛ̀ yì Babɛ̀l.

⁸Babɛ̀ltɔwo tɔzò èfìɔsa ku dùkɔ̃a be àxuewo, eye wo gbã Yèruzàlɛm be èglìwo.

⁹Nebuzàradàn, Babɛ̀l-fìɔa be ɖiatɔwo be ègbèɖètɔa kplɔ̀ dùkɔ̃ mèvi kèwo ye ci èdùa mèa, kpe ɖo àmè kèwo ye jo èta na woa ŋuti, ku àmèha kpɔ̀tɛawo àhùale, yì Babɛ̀l.

¹⁰Gãkea, Nebuzàradàn, ɖiatɔawo be ègbèɖètɔa gble wɔ̀amènɔ̀ ɖewo kèwo sì ènu ɖekpe mu lè ò a ɖo Yudà-nyigbã ji. Gà ŋua mèa, e na wo àgblèwo ku vɛ̃-gblewo.

¹¹E yomè a, Nèbukàdnezà, Babɛ̀l be èfìɔa na ègbè kèa Nebuzàradàn, ɖiatɔawo be ègbèɖètɔa so Yeremìa ŋuti be:

¹²“Kplɔ̀ ɛ̀, ne wòa lebe na ɛ̀. Mù gbà wɔ̀ èvuɛ̃ ɖekpe ku ì ò. Vɔ̀a, ènu kè be biɔa, ye wò la nɔ wɔ̀ na ɛ̀.”

¹³Ekèa ŋutia, Nebuzàradàn, ɖiatɔwo be ègbèɖètɔa, Nebusàzebàn, àhùakplɔ̀tɔwo dòmètɔ ɖèka, Negal-Sarezɛr, àhùaŋùkɔ̀nɔ̀tɔ ɖèka ku Babɛ̀l-fìɔa be àhùaŋùkɔ̀nɔ̀tɔ buwo

¹⁴dɔ̃ àmè, wo yì kplɔ̀ Yeremìa jo lè ɖiatɔawo be èkpa a mè. Wo trɔ ɛ̀ ɖoɖa Gedalìa, Ahikàm kè nyi Safàn be èvia be èvi, ne woa kplɔ̀ ɛ̀ yì ye ŋutɔ be èdù mè. Nène a ye Yeremìa ci ye ŋutɔ be èdù mèa yeŋu.

¹⁵Wàlɛbɛ kè wo tu Yeremìa ɖo ɖiatɔwo be èkpa mèa, Tɔhonɔ̀ be ègbè ɖì na ɛ̀ be:

¹⁶“Yì gblɔ̃ na Evɛd-Mèlɛk, Kusì ŋusùa be: Tɔhonɔ̀ Ŋusɛ̃kpatatɔ, Izràɛl be Mawu a gblɔ̃ be: kpɔɖa, mù la wɔ̀ ɖo jɔ̀gbèvuɛ̃, mu nyi jɔ̀gbènyuɛ̃ ò, be ènyà kèwo mù gblɔ̃ ɖo èdù kèa ŋutia ji, sɔ̀sɔɛ ɖe. Wàlɛbɛ ŋuaa, ènyàawo la va e mè, lè wò ŋutɔ àpo ŋùku mè.

¹⁷Tɔhonɔ̀ gblɔ̃ be: 'Vɔ̀a, gbè ŋua gbè, mù la hlùɛ̃ wò gã. Wo mu la sɔ wò do àsi na àmè kèwo, wò le vɔ̃a ò.

¹⁸Mù la xɔ̀ na wò. Wò mu la ci èwui nu ò, vɔ̀a, wò la gã, ɖoa, wò kã ɖo ji nyè.'” Tɔhonɔ̀ ye gblɔ̃ ɛ̀.