Read gen Yeremìa 4 Bible Online

Yeremìa 4 - gen bible

Yeremìa 4

¹“Ne wò la trɔ gbɔ̀ vaa, oò Izràɛl, gbɔ nyè ye wò la trɔ va.” Tɔhonɔ̀ ye gblɔ̃ ɛ̀. “Ne wò ɖè àpo vòdu nyɔŋuwo jo lè ŋùmè na mù a, eŋuã, wò mu la gbà nɔ dãgbã ke ò!

²Eye ne wò sɔ nyàwototo, ku jɔ̀jɔɛwɔ̀wɔ kã àtãŋu be “Kaka kè Tɔhonɔ̀ lè àgbèa” eŋuã dùkɔ̃wo la xɔ̀ sìtu so e gbɔ, eye wo la kpɔ gogo lè yebe nyikɔa mè.”

³Ekèa ye nyi ènyà kè Tɔhonɔ̀ gblɔ̃ na Yudà-nyigbã jitɔwo ku Yèruzàlɛm be èdu mètɔwo be: “Mì dè àgblè yeye na mìa ɖokoewo. Mì mu gbà do nukuwo[9] ɖo àŋɔ̀kawo mè ò!

⁴Mì sò èvo na mìa ɖokoewo ɖo Tɔhonɔ̀ ŋuti, mì, Yudà ŋusùwo, ku Yèruzàlɛmtɔwo, mì sò àtɔ̀tɔ̀ be àyua jo lè mìabe èjìwo ŋuti! Ne mu nyi nène òa, àpe àdɔ̀mèze la bì, la fiɔ̃ ènu, sìgbè èzò nène, ɖo mìabe wɔ̀na vuɛ̃wo ŋuti, eye àmè ɖekpe mu la teŋu ci ì ò!”

⁵Mì gblɔ̃ ɛ̀ lè Yudà-nyigbãa ji, eye mì kãkã ɛ̀ lè Yèruzàlɛm be: “Mì ku èkpɛ̃ lè ànyigbã a keŋu ji! Mì kpà àbòbo gblɔ̃ be: 'Mìa kpata, mì bɔ̀!' Ne mia ɖo àgbògbò be èdùwo mè!

⁶Mì kɔ àplãŋugaa tùtà Ziɔ̀n! Mì si yì bè, eye mì mu gbà nɔ̀tè ò! Ɖoa, jɔ̀gbèvuɛ̃ ye mù hɛ̃ so èvègo va! Cɔ̃crɔ̃ gã ŋutɔ cã ye be nyi!

⁷Jãŋùta to so àve mè. Èdùwo gbãtɔ jè èmɔ̃. E hɔ̃ so yebe nɔ̀pe, la va kãkã àpo èdù. Wo la tɔzò àpo èdùawo, eye àmè ɖekpe mu la gbà nɔ̀ woa mè ò.

⁸Ekèa ŋutia, mì tà kòtòku àlo sako! Mì na àle, ne mìa xànu! Ɖoa, Tɔhonɔ̀ be àdɔ̀mèze hɛlihɛli ɖo mia ŋutia mu trɔ lè mia yomè ò.”

⁹Tɔhonɔ̀ gblɔ̃ be: “Gbè ŋua gbèa, èfìɔa ku àgbònùglawo la bu jìdo. Hũbonɔwo la srè lè ètènu, eye gblɔ̃ɖɛtɔwo be ŋùmè la wɔ̀ yàa.”

¹⁰Ekèa yomè a, mù gblɔ̃ be: “Aò, Tɔhonɔ̀, Mawu! Eŋuã, ɖe ye wò flù dùkɔ̃ kèa ku Yèruzàlɛm be èdùa, wàlɛbɛ kè wò gblɔ̃ be: “Mì la kpɔ ŋuti fàfa”, vɔ̀a, èwui ye lè èhlò ji na mi ŋua!”

¹¹Wàlɛbɛ ŋua, wo la gblɔ̃ na Yèruzàlɛm ku dùkɔ̃ kèa be: “Èzò be àya ɖe pò, so zògbè be èto pɔplɔwo tamè, tùtà dùkɔ̃ nyè gbɔ, vɔ̀a, mu nyi ne bèa fu dùkɔ̃ nyèa, àlo, ne bèa klɔ e ŋuti ye ò.

¹²Àya kè sɛ̃ŋua ye so funu va na mù. Fifìa, nyè cã, mù la sɔ ènyà ɖo woa ŋuti.

¹³Kpɔɖa! E hɔ̃ gbãnà, sìgbè lilikpowo nène. Yebe àhùakèkewo gbãnà sìgbè àya wɔ̀adã nène. Yebe èsɔwo be èdùpupu sɔ̀ wu èhɔ̃ tɔ̀, lè àya mè. Bàbàa na mi! Mi crɔ̃ vɔ!

¹⁴“Aò, Yèruzàlɛm! klɔ èvuɛ̃ jò lè àpo èjì ŋuti, ne wòa kpɔ hlùɛ̃gã! Kaka na hùe kɛ nu ye wò la gbà kpɔ̀tɔ̀, la nɔ susu ènu bàɖàwo ò?

¹⁵So kaka Dàn-nyigbã ji kea, ègbè ɖe le ɖè gbèfã, eye, so Efràyim be ètoa jia, wo na be woa sè jɔ̀gbèvuɛ̃ be ènyà be:

¹⁶Mì gblɔ̃ ekèa, na dùkɔ̃wo. Mì kãkã ɛ̀ na Yèruzàlɛm, bèa sè è be: “Àhùakɔ̃ gã ɖe kè la zĩ dùkɔ̃a ɖo ànyia so ànyigbã dìdi ɖe ji gbãnà. Wo le do àhùa be àpa, ɖo Yudà-nyigbã be èdùwo ŋuti.

¹⁷Wo pòxla do Yudà, sìgbè àmè kèwo ye le ɖia àgblèwoa nène, ɖoa, e jè àgla ɖo ŋuti nyè.” Tɔhonɔ̀ ye gblɔ̃ ɛ̀.

¹⁸Wò ŋutɔ àpo èdɛ̃ ku wɔ̀nawo ye hɛ̃ ekèawo va ji wò. Àpo àgɔ̀jèje be fɛ̃tu ye ekèa nyi. E ve kaɖi kaɖi ŋutɔ! Eye be le ŋɔ kaka àpo èjì ke!”

¹⁹Aò, àdɔ̀ nyè mè! Àdɔ̀ nyè mè! Aò, mù le sè vève lo ò! Aò, èjì nyè be èkàwo! Èjì nyè le pò èhũ le mè nyè! Eye nyè mu la teŋu bɔ̀nu ò, ɖoa, èkla nyè le sè, èkpɛ̃wo le ɖì! Mù le sè àhùa be àpa.

²⁰Wo le gblɔ̃ be: Gbledo jè gbledo ji! Ɛ̃ɛ, wo gbã èdùa keŋu-keŋu! Gòxɔ nyèwo kãkã, eye nɔ̀pe nyèwo gble lè àɖàbà pòpo ɖèka mè.

²¹Kaka na hùe kɛ nu, mù la nɔ kpɔ àhùa plãŋugaa ò? Kaka na hùe kɛ nu, mù la nɔ sè àhùa kpɛ̃a be ɖìɖi ò?

²²“Dùkɔ̃ nyèa kusù, ɖoa, wo mu jèsì mù ò. Èvi ci bòmèwo, wo nyi, eye ènunya hùetè do wo. Wo bi le èvuɛ̃ wɔ̀wɔ mè, vɔ̀a wo mu nya ènyuɛ̃ wɔ̀wɔ ò.”

²³Ekè mù ɖè èkɔ̀, kpɔ ànyigbã jia, kpɔɖa, nɔ̀nɔmè mu gbà lè e si ò, eye be ci gbalo. Ekè mù ɖè èkɔ̀ kpɔ jiŋùkusia, kpɔɖa, kɛ̃klɛ̃ ɖekpe mu gbà lè ò.

²⁴Ekè mù ɖè èkɔ̀ kpɔ ètowoa, kpɔɖa, wo le hũhũ, eye ètokɔ̃ɛwo kpata le hùã.

²⁵Ekè mù drɛ̃ èkɔ̀ kpɔ ɖaa, àgbètɔ mu gbà lè ò. Àyamè xèviwo cã si jo keŋu.

²⁶Ekè mù drɛ̃ èkɔ̀ kpɔ ɖaa, ànyigbã kè ji ɖɔ ku àtikusɛ̃sɛ̃woa trɔ zũ zògbè, yebe èdùwo keŋu trɔ zũ èglìkpowo, lè Tɔhonɔ̀ be ŋùkɔ̀. Ɛ̃ɛ, lè Tɔhonɔ̀ be àdɔ̀mèze hɛli-hɛlia be ŋùkɔ̀.

²⁷Tɔhonɔ̀ ye gblɔ̃ be: “Ànyigbã a kpata la crɔ̃, gãkea, nyè mu la crɔ̃ ɛ̀ keŋu-keŋu ò.

²⁸Ekèa ŋuti ye ànyigbãa la lòfũ, eye jiŋùkusi la do vìvìti, ɖoa, ènu kè mù gblɔ̃a, ye mù ɖo. Mù ɖo è vɔ̀, nyè mu la gbà trɔ va e ji ò.”

²⁹Ne èdù ɖe mètɔwo sè èsɔdotɔwo ku àŋùtidàtɔwo be ègbèa, woa kpata, wo sina. Àmè ɖewo sina ɖo àve mè. Àmè buwo sina lia àkpãwo tamè. Wo gblena èdù bliboawo ɖɛ, eye àmè ɖekpe mu gbà nɔ̀nà èdùawo mè ò.

³⁰Vɔ̀a, èwò, èdù kè wo gbãa ya ɖe, Nukɛ ye wò le wɔ̀ ò? To e gbɔ be wò tà àvɔ jɛ̃ xɔ̀asì, àlo, wò do èwlɔ ku sìkanuwo, eye wò gbà ɖo ŋùgazu na ŋùkuviwo cã a, gbalo ye wò le ɖo àcɔ na ɖokoe wò. Àzìãvi wòwo le dovlo wò. Wo jro la crɔ̃ àpo àgbè.

³¹Ɖoa, mù le sè àlenana ɖe kè lè ɖì, sìgbè nyɔ̃nù kè le le èkua be àvi nène. E le ɖì, sìgbè nyɔ̃nù kè le jì èvi cucugbãa be àpa nène. Ziɔ̀n be nyɔ̃nùvi kè gbɔ̃gbɔ̃ mu le sù ò, kè le ji àya, eye be le drɛ̃ àlɔ̀, le gblɔ̃ be: “Bàbà na mù! Ɖoa, mù le gbɔjɔ, eye èkla nyè ci àmèwùtɔwo si!”