Read gen Yeremìa 41 Bible Online

Yeremìa 41 - gen bible

Yeremìa 41

¹Lè wètri adrɛ̃gɔ̃ a mèa, Ismàɛl, Netanìa kè Elisamà jìa be èvi kè be lãmè èfìɔvi be èhũ lè, eye be nyi èfìɔa bè àhùagawo dòmètɔ ɖèkaa va Gedalìa, Ahikàm be èvia gbɔ, lè Mispà ku ŋusù èwo. Wàlɛbɛ kè wo le ɖùnu ɖodu, lè e gbɔa,

²Ismàɛl, Netanìa be èvia ku yebe ŋutime èwoawo sitè, eye wo dà èwui Gedalìa, Ahikàm kè Safàn jìa be èvia, eye wo wù ì. E ye kè Babɛ̀l-fìɔa ɖo ɖo ànyigbã ŋua nua.

³Ismàɛl wù Yudàvi kèwo keŋu lè Gedalìa gbɔ, lè Mispàa, kpe ɖo Babɛ̀l be gbãdãgbã kèwo ye lè funua kudo èa.

⁴Ekè wo wù Gedalìaa be ŋùkè gbèa, wàlɛbɛ kè àmè ɖekpe mu kpɔ nya ò a,

⁵ŋusù èkà èvè kèwo lũ woabe ègɛ̃a, lè àwù vũvũwo mè, sì woa ɖokoewo, so Sikɛ̀m, Silò ku Sàmarìa, hɛ̃ ènu ɖùɖu vɔsa ku lifi va Mawuxɔa mè.

⁶Ismàɛl, Netanìa be èvia to lè Mispà-dùa mè, lè àvi ji, yì dogò wo. Ekè be dogò woa, e gblɔ̃ be: “'Mì va kpɔ Gedalìa, Ahikàm be èvia ɖa.”

⁷Ekè wo ɖo èdùa mèa, Ismàɛl, Netanìa be èvia ku àmè kèwo bɔ̀ ɖo e ŋutiawo sò èkɔ̀ na wo, eye wo fɔ̀ wo dà ɖo èsìdo mè.

⁸Vɔ̀a, woa dòmètɔ àtɔ̃ gblɔ̃ na Ismàɛl be: “'Mù gbà wù mi ò! Ɖoa, èlù, èpò, àmì ku ànyisi lè mia si, mi sɔ wla ɖo àgblè ɖe mè.” Ekèa yomè a, Ismàɛl ɖè àsi lè woa ŋuti, eye mu wù wo, kpe ɖo àmè kpɔ̀tɛawo ŋuti ò.

⁹Vɔ̀a, èsìdo kè mè Ismàɛl fɔ̀ àmè kèwo be wù, bɔ̀ ɖo Gedalìa ŋutiawo be àmèkpòtiawo keŋuã, èfìɔ Asà ye kù ì, wàlɛbɛ kè Izràɛl be èfìɔ Baesà ɖè àhùa kpe na ɛ̀a. Èsìdo kèa mè ye Ismàɛl, Netanìa be èvia fɔ̀ àmèkukuawo ɖɔ.

¹⁰Ekèa yomè a, Ismàɛl kplɔ̀ dùkɔ̃a mètɔ kèwo ye kpɔ̀tɔ̀ ɖo Mispàa àhùale: èfìɔ be nyɔ̃nùviwo ku àmè kèwo kpata kpɔ̀tɔ̀ lè Mispà-dùa mè, kèwo nu Nebuzàradàn, èfìɔa be ɖiatɔwo be àhùagbèɖètɔa sɔ Gedalìa, Ahikàm be èvia ɖoa, woawo keŋu ye Ismàɛl, Netanìa be èvia kplɔ̀ àhùale, eye be jè èmɔ, tùtà, Amɔ̀nviwo be ànyigbã ji.

¹¹Ekè Yohanàn, Kareà be èvia ku yebe àhùa ŋùkɔ̀nɔ̀tɔwo keŋu sè èhlɔ̃dãnu kèwo keŋu Ismàɛl, Netanìa be èvia wɔ̀a,

¹²Wo kplɔ̀ woabe gbãdãgbãwo keŋu, eye wo yì kpe àhùa ku Ismàɛl, Netanìa be èvia. Wo yì kè ɖo e ŋuti lè Gibeɔ̀n be tɔ̀gba gãa gbɔ.

¹³Ekè àmè kèwo keŋu Ismàɛl kplɔ̀ ɖo ŋuti, le yìawo kpɔ Yohanàn, Kareà be èvia ku àhùa ŋùkɔ̀nɔ̀tɔ kèwo keŋu lè e ŋutia, wo kpɔ jìjɔɛ.

¹⁴Dùkɔ̃ blibo kè Ismàɛl kplɔ̀ àhùale, so Mispàa trɔ lè e yomè, yì nɔ̀ Yohanàn, Kareà be èvia ji.

¹⁵Vɔ̀a, Ismàɛl, Netanìa be èvia ku yebe ŋutime ènyi si lè Yohanàn nu, yì Amɔ̀nviwo gbɔ.

¹⁶Ekèa yomè a, Yohanàn, Kareà be èvia ku yebe àhùa ŋùkɔ̀nɔ̀tɔwo keŋu kplɔ̀ àmè kèwo keŋu ci àgbè, so Mispàa, àmè kèwo be xɔ̀ lè Ismàɛl, Netanìa bè èvia si, wàlɛbɛ kè Ismàɛl wù Gedalìa, Ahikàm be èvia vɔ̀a. Àmè kèawo nyi gbãdãgbãwo, nyɔ̃nùwo, ɖèviwo ku kòjoɖope be èdɔwɔ̀tɔ kèwo be kplɔ̀ so Gibeɔ̀n be èdùa mèa.

¹⁷Wo jè èmɔ, eye wo va nɔ̀tè ɖo Gerut-Kiham, lè Bɛtlɛhɛ̀m gbɔ, lè èmɔ ji, tùtà Ejiptè,

¹⁸ne woa si lè Babɛ̀ltɔwo nu. Wo le vɔ̃ Babɛ̀ltɔwo, ɖoa, Ismàɛl, Netanìa be èvia wù Gedalìa kè nyi Ahikàm be èvia, Gedalìa kè Babɛ̀l be èfìɔa sɔ ɖo èdùjiɖùtɔ, lè woabe ànyigbãa jia.