Read gen Yeremìa 42 Bible Online

Yeremìa 42 - gen bible

Yeremìa 42

¹Ènu ŋuawo keŋu yomè a, àhùa ŋùkɔ̀nɔ̀tɔwo kèwo keŋu dòmè Yohanàn, Kareà be èvia ku Yezanìa, Hosayà be èvia kpe ɖo àmèha bliboa ŋuti, so ɖèvi ji kaka yì kɔ̀ ɖo àmègãwo jia, zɔ̃ gogo

²Yeremìa, gblɔ̃ɖɛtɔa, eye wo gblɔ̃ na ɛ̀ be: “Tɔ̀ wò jɔ̀, sè miabe kuku ɖèɖe, ne wòa fãkue na Tɔhonɔ̀, àpo Mawu a, ɖo àmè kèawo kpata kèwo kpɔ̀tɔ̀awo ta. Ɖoa, sìgbè lekè wò ŋutɔ, wò nya ɛ̀a nènea, to e gbɔ be mi sùgbɔ sãa, fifìa, àmè vi ɖe kpò yè kpɔ̀tɔ̀.

³Fãkue, ne Tɔhonɔ̀, àpo Mawu a, ne wòa gblɔ̃ àfi kè mi la yì, ku ènu kè mi la wɔ̀a na mi.”

⁴Yeremìa, gblɔ̃ɖɛtɔa ɖo e ŋuti na wo be: “Mù sè è. Mù la fãkue na Tɔhonɔ̀, miabe Mawu a, ɖo mìa ta, sìgbè lekè mì biɔa nène, eye mù la gblɔ̃ ènyà ɖe sia ɖe kè Tɔhonɔ̀ la gblɔ̃a na mì; nyè mu la ɖè ɖekpe to lè e mè na mì ò.”

⁵Ekèa yomè a, wo gblɔ̃ na Yeremìa be: “Tɔhonɔ̀ ŋutɔ ne nyi nyàwo ku ànùkuawɔ̀wɔ be ɖàsèfo na mi, ne mi mu wɔ̀ ɖo ènu ɖekpekpe kè Tɔhonɔ̀, àpo Mawu a dɔ̃ wò, be wòa gblɔ̃ na mia ji ò a.

⁶Ne ènyà kè Tɔhonɔ̀ gblɔ̃a dɔ̃ mia ji, àlo mu dɔ̃ mia ji ò cã a, mi la sè ètonu na Tɔhonɔ̀, miabe Mawu kè gbɔ mi le dɔ̃ wò ɖoɖaa, àleke be ènu ne nyɔ na mi, ɖoa, mi la sè ètonu na Tɔhonɔ̀, miabe Mawu a.”

⁷Ŋùkèkè èwo yomè a, Tɔhonɔ̀ be ègbè ɖì na Yeremìa.

⁸E yɔ Yohanàn, Kareà be èvia ku àhùaŋùkɔ̀nɔ̀tɔ kèwo lè e ŋutia, wo bɔ̀ ku àmèha bliboa, so ɖèviwo ji, kaka yì àmègãwo ji.

⁹E gblɔ̃ na wo be: “Ènyà kè Tɔhonɔ̀, Izràɛl be Mawu kè gbɔ mì ɖɔ̃ mù ɖoɖa, ne ma sɔ mìabe kukuɖèɖèwo na a ye nyi ekèa:

¹⁰'Ne mì ci ànyigbã kèa jia, mù la li mì ɖotè, eye nyè mu la gbã mì ò, nyè mu la hɔ̃ mì jo ò, ɖoa, mù sèveve ɖo jɔ̀gbèvuɛ̃ kèwo mù hɛ̃ va mìa jiawo ta.

¹¹Babɛ̀l be èfìɔ kè mì le vɔ̃ egbèa, mu gbà ɖo vɔ̃vɔ̃ na mì ò. Ènyè Tɔhonɔ̀a, mù le gblɔ̃ be: Babɛ̀l be èfìɔa mu gbà do vɔ̃vɔ̃ na mì ò, ɖoa, mù lè ku mì, eye mù la xɔ̀ na mì, eye mù la hlùɛ̃ mì gã, so e simè.

¹²Mù la ɖè àdɔ̀mè nyuɛ̃ fiɔ mì, àleke be ye cã be àdɔ̀mè la trɔ ɖo mìa ŋuti, eye be la gbìgbɔ̀ trɔ mì, yì ɖo mìabe ànyigbã ji.'”

¹³“Ɖe kpekpe ɖe kè be nyia, ne mì gblɔ̃ be: 'Mi mu la nɔ̀ ànyigbã kèa ji ò', eye mì mu sè ètonu na Tɔhonɔ̀, miabe Mawu ò,

¹⁴eye, ne mì gblɔ̃ be 'Kpao! Mi la jo, yì nɔ̀ Ejiptè, àfi kè mi mu la gbà kpɔ àhùa, àlo, la sè àhùa be àpa, àlo, la ci àdɔ̀ lè ke ò',

¹⁵eŋuã, mì sè Tɔhonɔ̀ be ègbè; Aò! Yudàvi kèwo kpɔ̀tɔ̀awo! Tɔhonɔ̀, ŋusɛ̃kpatatɔ, Izràɛl be Mawu a gblɔ̃ be: 'Ne mì ɖo èkpe e ji kpò, be yèwo la yì Ejiptè, la ci funua nyàwo a,

¹⁶eŋuã, èwui kè mì le vɔ̃a, la va sò mì lè funua, eye àdɔ̀wùamè kè le sò àdìka na mìa, la kplɔ̀ mì do yì Ejiptè, eye mì la ku lè funua.

¹⁷Eye, lè nyàwototo mèa, àmè kèwo keŋu ɖo è, be yèwo la yì Ejiptè, la yì ci funua, wo la ku lè èwui nu, wo la ku àdɔ̀kù, eye wo la ku to èdɔ̀vuɛ̃ ji. Woa dòmètɔ ɖèka mu la ci àgbè, àlo, la si lè jɔ̀gbèvuɛ̃ kè mù la hɛ̃ va woa jia nu ò'”

¹⁸Tɔhonɔ̀, Ŋusɛ̃kpatatɔ, Izràɛl be Mawu a gblɔ̃ be: “Sìgbè lekè àpe àdɔ̀mèze ku àdã wɔ̀wɔ kɔ̀ ɖo àmè kèwo ye nɔ̀ Yèruzàlɛm tɔawo ji ɖoa, nènea ke àpe àdãwɔ̀wɔ la kɔ̀ ɖo mìawo cã, mìa ji, ne mì yì Ejiptè a yeŋu. Mì la trɔ zũ kpɛ̃sɛ̃nu, ŋɔjinu, èvlodonu ku àlɔmèɖènu, eye mì mu la gbà kpɔ ànyigbã kèa gbèɖe ke ò.”

¹⁹Aò, mìa Yudàvi kpɔ̀tɛawo, Tɔhonɔ̀ gblɔ̃ na mì be: “Mì mu gbà yì Ejiptè ò! Mì kã ɖo e ji be mù sìa mì egbèa.

²⁰Be àfɔ̀ku ye mì sɔ flù mìa ɖokoewo, wàlɛbɛ kè mì dɔ̃ mù ɖoɖa Tɔhonɔ̀, mìabe Mawu a gbɔ be: 'Fãkue na Tɔhonɔ̀, miabe Mawu a, ɖo mia ta. Gblɔ̃ ènu sia ènu kè be gblɔ̃a na mi, ne mia wɔ̀ ɖo e ji.'

²¹Mù gblɔ̃ ɛ̀ na mì egbèa, gãkea, mì mu ɖo èto Tɔhonɔ̀, mìabe Mawu a be ènyà kèwo keŋu be dɔ̃ mù be ma gblɔ̃ na mìa ò kpò ye.

²²Ekèa ŋutia, fifìa, mì kã ɖo e ji be: Mì la ku ci èwui nu, mì la ku àdɔ̀kù, eye mi la ku to èdɔ̀vuɛ̃ ji, lè tèpe kè tutu mì jro la yì cia.”