Read gen Yeremìa 43 Bible Online

Yeremìa 43 - gen bible

Yeremìa 43

¹Ekè Yeremìa gblɔ̃ Tɔhonɔ̀ be ènyàawo keŋu na dùkɔ̃ bliboa vɔ̀a, kè be gblɔ̃ ènyà ɖe sia ɖe kè Tɔhonɔ̀, woabe Mawu a do àsi na ɛ̀ be ne gblɔ̃ na woa,

²Àzarìa, Hosayà be èvia ku Yohanàn, Kareà be èvia kudo ŋusù kèwo keŋu nyi àmè màxɔ̀ kpakplawo gblɔ̃ na Yeremìa be: “Wò le ɖà àjè! Tɔhonɔ̀, miabe Mawu a mu dɔ̃ be wòa gblɔ̃ na mi be: 'Mi mu ɖo la yì Ejiptè, la yì ci funua ò.

³Vɔ̀a, Bàruk, Neriyà be èvia bòhũ ye le do ègbè èto mè na wò, ɖo mia ŋuti, àleke be wòa sɔ mi do àsi na Babɛ̀ltɔwo, ne woa wù mi, àlo, woa kplɔ̀ mi àhùale yì Babɛ̀l.'”

⁴Nène a, Yohanàn, Kareà be èvia cã, àhùaŋùkɔ̀nɔ̀tɔawo, dùkɔ̃ bliboa cã, woa dòmètɔ ɖekpe mu ɖo èto Tɔhonɔ̀ be ègbè be wo ne ci Yudà nyigbãa ji ò.

⁵Bòhũa, Yohanàn, Kareà be èvia ku àhùaŋùkɔ̀nɔ̀tɔwo keŋu kplɔ̀ Yudàvi kpɔ̀tɛ kèwo ye trɔ gbɔ̀, so dùkɔ̃ kèwo keŋu mè wo kãkã ɖoa, va la ci Yudà nyigbã jiawo jo.

⁶Wo kplɔ̀ ŋusùwo, nyɔ̃nùwo ku ɖèviwo cã jo, kpe ɖo èfìɔ be nyɔ̃nùvi kèwo Nebuzàradàn, Babɛ̀l be èfìɔa be ɖiatɔwo be àhùagbèɖètɔa gble ɖo Gedalìa, kè nyi Ahikàm, Safàn be èvia gbɔa jo. Wo kplɔ̀ Yeremìa, gblɔ̃ɖɛtɔa cã ku Bàruk, Neriyà be èvia cã jo.

⁷Wo va ɖo Ejiptè-nyigbã ji, ekè wo gbe èto ɖoɖo Tɔhonɔ̀a, eye wo va yì ɖo kaka Tafanhɛ̀s.

⁸Ekè wo yì Tafanhɛ̀s nyigbã jia, Tɔhonɔ̀ be ègbè ɖì na Yeremìa be:

⁹“Sɔ èkpe gãwo, ne wòa ɖì wo ɖo ànyikɔ mè lè èmɔ kè yì Faraɔ̀n, Ejiptè be èfìɔa be àxue kè lè Tafanhɛ̀s-dùa be èmɔnua, lè Yudàviwo be ŋùmè.

¹⁰Ekèa yomè a, gblɔ̃ na wo be: 'Ènyà kè Tɔhonɔ̀, Ŋusɛ̃kpatatɔ, Izràɛl be Mawu a gblɔ̃a ye nyi be: Kpɔɖa! Mù la na, wò la li yebe èfìɔzìkpea ɖo èkpe kèawo, kèwo mù ɖì ɖo fikèa ji. E la kèkè yebe gòxɔa be àvɔwo ɖo woa ji.

¹¹E la va ɖè àhùa kpe na Ejiptè be èdùa; e la hɛ̃ èku va na àmè kèwo ye la kua, wo la le àmè kèwo wo la lèa, eye àmè kèwo la ci èwui nua, wo la ci èwui nu.

¹²E la tɔzò Ejiptè be vòduwo be àdokpawo, e la fiɔ̃ woabe vòduxɔwo eye be la le wo àhùale. E la sɔ Ejiptè-nyigbãa do sìgbè leke àlɛ̃kplɔ̀tɔ dona yebe àwùgãa nène, eye be la jo lè ŋuti fàfa mè.

¹³E la gbã Èwè be vòduxɔ be kpèli kèwo ye lè Ejiptè-nyigbã jia, eye be la tɔzò Ejiptè vòduwo be èxɔ̀wo.'”