Read gen Yeremìa 44 Bible Online

Yeremìa 44 - gen bible

Yeremìa 44

¹Ègbè kè ɖì na Yeremìa, so Yudàvi kèwo keŋu yì ci Ejiptè, lè àvego, lè Migdɔ̀l, lè Tafanhɛ̀s ku Mènfis kudo ekèwo keŋu yì ci Ejiptè be àpùgoawo ye nyi be:

²“Tɔhonɔ̀ Ŋusɛ̃kpatatɔ, Izràɛl be Mawu a gblɔ̃ be: Mì kpɔ jɔ̀gbèvuɛ̃ gã kèwo mù na, wo jɔ̀ ɖo Yèruzàlɛm ku Yudà-nyigbã ji-dùwo keŋu jiawo. Egbèa wo zũ èglìkpowo, eye àmè ɖekpe mu gbà lè woa mè ò,

³ɖo èvuɛ̃ kè wo wɔ̀a ŋuti. Wo do àdɔ̀mèze na mù, wàlɛbɛ kè wo tɔzò lifi na èdù bu mètɔwo be vòduwo, eye wo sumɔ wo. Nyàwoa, woa ku woa tɔgbewo cã a, wo mu jèsi vòdu ŋuawo kpɔ gbèɖe ò.

⁴Gbè sia gbèa, mù dɔ̃na sumɔ̃vi nyè, gblɔ̃ɖɛtɔwo ɖoɖa, eye wo gblɔ̃nà be: 'Mì mu gbà wɔ̀ ènu nyɔŋu ŋua kèwo mù crìa ò!'

⁵Gãkea, wo mu ɖo èto, àlo woa sɔ èɖe lè e mè ò. Wo mu trɔ lè woabe èvuɛ̃jɔ̀jɔ yomè, àlo, woa nɔ̀tè lifi fiɔ̃fiɔ̃ na èdù bu mètɔwo be vòduwo ò.

⁶Eŋuã ŋuti ye àpe àdɔ̀mèze hɛlia kɔ̀ ɖɛ ɖo. Àpe àdã wɔ̀wɔ fiɔ̃ Yudà-nyigbã ji-dùwo ku Yèruzàlɛm be àxuedòmè-mɔwo, ènu kèa na be wo trɔ zũ àxuedo ku èglìkpo kèwo wo nyi egbèawo.”

⁷Fifìa, ènyà kè Tɔhonɔ̀ Mawu, Ŋusɛ̃kpatatɔ, Izràɛl be Mawu a gblɔ̃a ye nyi be: “Nukɛ ŋuti ye mì le hɛ̃ jɔ̀gbèvuɛ̃ gã kèawo va mìa ɖokoewo ji ɖo, wàlɛbɛ kè mì le na Yudàvi ŋusù ku nyɔ̃nùwo, ɖèvi ku vifɛ̃wo le crɔ̃, àleke be àmè ɖekpe mu gbà le kpɔ̀tɔ̀ na mì ɖo ò?

⁸Nukɛ ŋuti ye mì la nɔ do àdɔ̀mèze na mù ku ènu kèwo mì sɔ mìabe àlɔ̀wo wɔ̀, la nɔ tɔzò lifi na èdù bu mètɔwo be vòduwo lè Ejiptè, àfi kè mì va lèa ɖo ò? Mì la crɔ̃ mìa ɖokoewo, eye mì la na, mì la trɔ zũ kpɛ̃sɛ̃-nu ku àlɔmèɖènu lè ànyigbã ji dùkɔ̃wo keŋu dòmè.

⁹Ɖe ye mì ŋlɔ̀be ènu bàɖà kèwo mìa tɔwo ku Yudà be èfìɔwo kudo èfìɔsrɔ̃wo wɔ̀a, àlo ènu bàɖà kèwo mìa ŋutɔwo, mì wɔ̀ ku mìa srɔ̃wo lè Yudà-nyigbã ji ku lè Yèruzàlɛm be àxuedòmè-mɔwo jia?

¹⁰Kaka va na egbèa, mìa tɔwo mu bɔ̀bɔ̀ woa ɖokoewo, àlo, woa ɖè èjìmè tɔtrɔ fiɔ ò. Wo mu zɔ̃ ɖo èse ku ɖoɖo kèwo mù sɔ do àsi na mìa ku mìa tɔwoa ji ò.”

¹¹Ekèa ŋutia, Tɔhonɔ̀ Ŋusɛ̃kpatatɔ, Izràɛl be Mawu a gblɔ̃ be: kpɔɖa, mù ɖo è goŋu be mù la hɛ̃ jɔ̀gbèvuɛ̃ va mìa ji, eye mù la crɔ̃ Yudà-nyigbã jitɔwo kpata.

¹²Mù la ɖè Yudàvi kpɔ̀tɛ kèwo ɖo è kplikpã be yèwo la yì ci Ejiptè-nyigbã jiawo jo. Wo la crɔ̃ keŋu-keŋu lè Ejiptè. Wo la ci èwui nu, àlo, wo la ku àdɔ̀-ku. So ɖèvi ji, kaka yì àmègãwo jia, wo la ci èwui nu, àlo, wo la ku àdɔ̀-ku. Eye wo la trɔ zũ kpɛ̃sɛ̃-nu ku ènu nyɔŋu, wo la nyi èhùɛɖonu ku àlɔmè ɖènu.

¹³Mù la sɔ èwui, èdɔ̀vuɛ̃ ku àdɔ̀wùamè dɔ̃ èto na àmè kèwo ye lè Ejiptè awo sìgbè lekè mù dɔ̃ èto na àmè kèwo ye lè Yèruzàlɛm nyigbã jiawo nène.

¹⁴Yudàvi kpɔ̀tɛ kèwo ye yì ci Ejiptè awo dòmètɔ ɖekpekpe mu la si, to lè e mè, àlo, la ci àgbè, ne bèa trɔ yì Yudà-nyigbã kè ji woa ŋutɔwo jro be yèwo la trɔ yì nɔ̀a ò. Ɖekpe mu la trɔ yì, tovò na àmè vi kèwo ye si àhùaawo ò”.

¹⁵Ekèa yomè a, ŋusù kèwo keŋu nya be yèwo srɔ̃wo fìɔ̃na lifi na èdù bu mètɔwo be vòduwo, ku nyɔ̃nù kèwo ye lè funua, àmèha gã ɖe kudo àmè kèwo keŋu lè àpùgo ku àvego lè Ejiptè awo gblɔ̃ na Yeremìa be:

¹⁶“Mi mu la ɖo èto àŋɛ̀ kè wò do na mi, lè Tɔhonɔ̀ be nyikɔ mèa ò.

¹⁷Mi la wɔ̀ ènu sia ènu kè mi gblɔ̃ be mi la wɔ̀a godo: mi la tɔzò lifi na jiŋùkusi be nyɔ̃nùfìɔ eye mi la sɔ àhà kɔ̀ èsì ɖɛ na ɛ̀, sìgbè lekè mìawo ku mia tɔgbewo, mìabe èfìɔwo ku mìabe àgbònùglawo wɔ̀na ɛ̀, lè Yudà be èdùwo ku Yèruzàlɛm be àxuewo dòmèa nène. Lè hùe ŋua nua, ènu ɖùɖu sùgbɔ nɔ̀ mia si, mi nɔ̀ nyɔna mè, eye mi mu kpɔna gbledo ɖekpe ò.

¹⁸Vɔ̀a, so kaka gà kè mè mi mu gbà le tɔzò lifi na jiŋùkusi be nyɔ̃nùfìɔ ò, eye mi mu gbà le sɔ àhà le kɔ̀ èsì ɖɛ na ɛ̀ ò a, mi mu gbà ɖo ènu ɖekpe ò, eye mi le crɔ̃ lè èwui nu, eye mi le ku àdɔ̀-ku.”

¹⁹Nyɔ̃nùawo gbà gblɔ̃ be: “Ne mi tɔzò lifi na jiŋùkusi be nyɔ̃nùfìɔa, eye mi sɔ àhà kɔ̀ ɖɛ na ɛ̀a, ɖe ye mia srɔ̃wo mu nya be mi wɔ̀nà klàko ɖo yebe nɔ̀nɔmè ji, eye mi sɔna àhà kɔ̀nà èsì ɖɛ na ɛ̀ ò a?”

²⁰Ekèa yomè a, Yeremìa gblɔ̃ na àmèha a be ŋusù ku nyɔ̃nù kèwo ye le ɖo ènyà ŋuti na ɛ̀awo be:

²¹“Ɖe ye Tɔhonɔ̀ mu ɖoŋù, eye be bù lifi kè mìa ku mìa tɔwo, kudo mìabe èfìɔwo, gbàkudo mìabe àgbònùglawo, ku dùkɔ̃ kè lè ànyigbãa jia, mì tɔzò lè Yudà be èdùwo ku Yèruzàlɛm be àxuewo dòmè ŋuti ò a?

²²Wàlɛbɛ kè mìabe èvuɛ̃wɔ̀wɔ ku miabe ènunyɔŋu wɔ̀wɔ tìkɔ̀ na Tɔhonɔ̀a, mìabe ànyigbãa trɔ zũ èglìkpo ku èxɔ̀ gbãgbã kèwo mè àmè ɖekpe mu gbà lè ò, sìgbè lekè be lè egbèa nènea. Ekèa keŋu le nyi kpɛ̃sɛ̃ kèwo èdùa mènɔ̀tɔwo hɛ̃ va ànyigbãa ji.

²³Ekè mì tɔzò lifia, mì wɔ̀ èvuɛ̃ ɖo Tɔhonɔ̀ ŋuti, mì mu sè ètonu na ɛ̀, àlo, mì mu zɔ̃ ɖo yebe èse ji ò; kè mì mu wɔ̀ ɖo yebe ɖoɖowo nu, àlo, yebe ègbèɖèɖe ji ò a, jɔ̀gbèvuɛ̃ kèawo le jɔ̀ ɖo mìa ji, sìgbè lekè mì le kpɔ ɛ̀ fifìa nène”.

²⁴Ekèa yomè a, Yeremìa gblɔ̃ na dùkɔ̃ bliboa kèwo dòmè nyɔ̃nùawo cã lèa be: “Mìa Yudàvi kèwo kpata lè Ejiptè-nyigbã jiawo, mì sè ènyà kè Tɔhonɔ̀ le gblɔ̃ na mìa:

²⁵Tɔhonɔ̀, Ŋusɛ̃kpatatɔ, Izràɛl be Mawu a gblɔ̃ be: Mìa ku mìa srɔ̃wo, mì ɖè è fiɔ, to mìabe wɔ̀naawo ji be, mì wɔ̀ ɖo àtãŋu kè mì kã, wàlɛbɛ kè mì gblɔ̃ be: 'Mi la wɔ̀ ɖo miabe àjɔ̀gbè kè mi fiã be mi la tɔzò lifi, eye mì la sɔ àhà kɔ̀ èsì ɖɛ na jiŋùkusi be nyɔ̃nùfìɔa.' Ekèa ŋutia, mì yì e ji. Mì wɔ̀ ènu kè be àjɔ̀gbè mì fiãa! Mì wɔ̀ ɖo mìabe àtãŋua ji!

²⁶Gãkea, mì, Yudàvi kèwo ye lè Ejiptè-nyigbã jiawo, mì sè ènyà kè Tɔhonɔ̀ gblɔ̃a be: 'Mù tà nyikɔ gã nyèa na mì be, àmè ɖekpe mu la nɔ̀ Yudàviwo dòmè, lè Ejiptè-nyigbãa be àfi ɖekpe, kè la gbà yɔ nyikɔ nyè, àlo, la gbà kã àtãŋu ɖo nyikɔ nyè ji ò'. Ekèa, kaka kè Tɔhonɔ̀ Èfìɔ Gã Ɖìnyia lè àgbèa.

²⁷Ɖoa, mù le kpɔ woa ji, ɖo èvuɛ̃ ŋuti; mu nyi ɖo ènyuɛ̃ ŋuti ò. Yudàvi kèwo ye lè Ejiptè-nyigbã jiawo la crɔ̃ lè èwui nu, eye wo la ku àdɔ̀-ku, kaka na gà kè mè, wo la crɔ̃ vɔ̀ gbidia.

²⁸Àmè kèwo la si lè èwui nu, eye wo la trɔ so Ejiptè yì Yudà-nyigbã jiawo la hùe ŋutɔ. Ekèa yomè a, Yudàvi kpɔ̀tɛ kèwo ye va ci Ejiptè-nyigbã jiawo be àmèha bliboa la nya àmè kè be ènyà ye nyi nyàwo, lè tɔ̀ nyè ku woa tɔ̀ dòmèa.'

²⁹Tɔhonɔ̀ gblɔ̃ be: 'Ekèa la nyi jèsìdo na mì be mù la dɔ̃ èto na mì lè fikèa, àlekè be mìa nya be ènyà kèwo mù gblɔ̃ ɖo mìa ŋutiawo la va e mè dododo.'

³⁰Tɔhonɔ̀ gblɔ̃ be: 'Mù la sɔ Faraɔ̀n Hofrà, Ejiptè be èfìɔa do àsi na yebe kɛ̃tɔ kèwo la jro la ɖè yebe àgbèawo, sìgbè lekè mù sɔ Sedekìa, Yudà be èfìɔa do àsi na Nèbukàdnezà, Babɛ̀l be èfìɔ, yebe kɛ̃tɔ kè jro la ɖè yebe àgbèa nène.'”