Read gen Yeremìa 45 Bible Online

Yeremìa 45 - gen bible

Yeremìa 45

¹Lè èpè ènègɔ̃a, lè Yehoyakìm, Yosìas bè èvia be èfìɔɖùɖu hùenu, lè Yudà-nyigbã jia, ekè Bàruk ŋlɔ̀ ènyà kèwo Yeremìa, gblɔ̃ɖɛtɔa to na ɛ̀awo vɔ̀a, ènyà kè Yeremìa, gblɔ̃ɖɛtɔa gbà gblɔ̃ na Bàruk, Neriyà be èvia ye nyi ekèa:

²“Tɔhonɔ̀, Izràɛl be Mawu a le gblɔ̃ na wò, Bàruk be:

³Wò gblɔ̃ be: 'Bàbà na mù! Tɔhonɔ̀ gbà sɔ àkpɔ̃ kpe àpe vevesèse; ènuxàxa tìkɔ̀ na mù, eye nyè mu kpɔ gbɔ̃jɛ̃ ɖekpe ò!'

⁴Gblɔ̃ ènyà kèa na ɛ̀: 'Tɔhonɔ̀ gblɔ̃ be: Mù la mù ènu kè nyè ŋutɔ mù tùa pu ànyi, eye mù la hɔ̃ ènu kè nyè ŋutɔ mù ɖoa, jo lè ànyigbã bliboa ji.

⁵Eye èwò yaa, wò be yè le ji ènu gãwo na ɖokoe wòa? Mù gbà ji wo ò, ɖoa, mù la hɛ̃ jɔ̀gbèvuɛ̃ va ŋutilãwo keŋu ji. Gãkea, àfi ɖekpekpe kè èwò yaa, wò la yìa, mù la na àpo àgbè ya la to so e mè, tètè.'” Tɔhonɔ̀ ye gblɔ̃ ɛ̀.