Read gen Yeremìa 46 Bible Online

Yeremìa 46 - gen bible

Yeremìa 46

¹Tɔhonɔ̀ be ègbè kè ɖì na Yeremìa, gblɔ̃ɖɛtɔa, so dùkɔ̃ kèwo mu jèsi Mawu ò a ŋuti.

²Ègbè kè ɖì so Faraɔ̀n Nekò, Ejiptè be èfìɔa be àhùakɔ̃ kè àhùa gble do lè Karkemìs, lè Efratà be ètɔ̀a to, wàlɛbɛ kè Babɛ̀l be èfìɔ, Nèbukàdnezà ɖù e ji, lè Yehoyakìm, Yosìas be èvia be èfìɔɖùɖu lè Yudà-nyigbã ji be èpè ènègɔ̃a mèa ye nyi be:

³“Mì sɔ mìabe àkpoxɔ̀nu gã ku vi, bla àkpà, ne mìa zɔ̃ to, na àhùawɔ̀wɔ.

⁴Mì bla àkpà na èsɔawo! Mì lia àhùakèkeviawo mè! Mì cɔ̃ ègàkukuawo, ne mìa sɔ̀gbè ɖɛ! Mì ɖa mìabe èhuãwo, ne mìa do ègàwùwo!”

⁵Nukɛ ye mù le kpɔ ŋua ò? Vɔ̃vɔ̃ le ɖo wo! Wo le dɔ̃ yì ŋùgbe! Woabe kãlìwo dòmè gbã! Wo si kpìtì-kpìtì, kãkã, lè èdù ji, ŋùgbe mà kpɔ! Eye vɔ̃vɔ̃ bla woa kpata!” Tɔhonɔ̀ ye gblɔ̃ ɛ̀.

⁶Àmè kè fò wu lè èdùpupu mèa mu la teŋu si ò, eye àmè kè wɔ̀nà kãlì wua, mu la teŋu si, so Efratà be ètɔ̀a-to, yì àvego lɔ̀ge ò. Wo klɛ̃ àfɔ̀, eye wo jè ànyi.

⁷“Àmè kɛ ye nyi ekèa kè hɔ̃ gbãnà, sìgbè ètɔ̀ gã kèwo be èsìwo le fìɔ, le blù, eye wo le mlìawo nène ò?

⁸Ejiptè ye hɔ̃ gbãnà, sìgbè ètɔ gã kèwo be èsìwo le fìɔ, le blù, eye wo le mlìawo nène. E gblɔ̃ be: 'Mù la hɔ̃, eye mù la cɔ̃ ànyigbãa ji, mù la crɔ̃ èdùgãwo ku àmè kèwo ye lè woa mèa.

⁹Mì, èsɔ-dotɔwo! Mì zɔ̃ ɖo woa ji! Mì, àhùakèkevi-kùtɔwo! Mì sɔ àdã ɖo woa mè! Mì, Kusì ŋusùwo ku Put ŋusù kèwo hɛ̃nà àkpoxɔ̀nuawo! Mì, Ludò be ŋusù àŋùdàtɔwo! Àhùawɔ̀tɔwo keŋu, mì zɔ̃ ɖo woa ji kãlìtɔ̀!'”

¹⁰Vɔ̀a, gbè ŋua gbèa, Tɔhonɔ̀ tɔ̀ be nyi Tɔhonɔ̀, àhùadù Mawu be ŋùkèkè be nyi èhlɔ̃biɔ gbè kè be la biɔhlɔ̃ yebe kɛ̃tɔwoa ye. Èwui la vũvũ àmè, kaka la ɖɔpò. Èwui la nù woabe èhũ, be la sù ì. Ɖoa, Tɔhonɔ̀, Àhùadù Tɔhonɔ̀a, la ɖù vɔsa be àzã, e la wɔ̀ vɔsa, lè àvego-nyigbãa ji, lè Efratà be ètɔ̀a to.

¹¹Ejiptè tùgbɛ̀jɛ lè àxue, zɔ̃ yì Gilead-toa ji, ne wòa yì ji èdɔ̀-mi, gãkea, nya ɛ̀ be, gbalo ye wò le ji àtikè, lè ɖùsi ku èmìɔ̃ mè. Ɖoa, wò mu la xaya ò.

¹²Dùkɔ̃ kèwo mu jèsi Mawu òawo la sè àpo ŋùkpɛ̃ be ènyà, ɖoa, àpo àbòbo la ɖì ɖo ànyigbã keŋu ji. Kãlìwɔ̀tɔ ɖe la klɛ̃ kãlìwɔ̀tɔ bu, eye wo àmè èvèawo la jè ànyi.

¹³Àŋɛ̀ kè Tɔhonɔ̀ do na Yeremìa, gblɔ̃ɖɛtɔa, so lekè Nèbukàdnezà, Babɛ̀l be èfìɔa la va kpe àhùa ku Ejiptètɔwo ɖoa ye nyi:

¹⁴“Kãkã ènyà kèa lè Ejiptè-nyigbã ji, lè Migdɔ̀l be àsadaawo keŋu mè, kãkã ɛ̀ lè Mènfis ku Tafanhɛ̀s cã be: Mì jràɖo, ne mìa sɔ̀gbè. Ɖoa, èwui la vũvũ àmèwo, trɔ do mì gòdòo!

¹⁵Nukɛ ŋuti wo la sɔ mìabe kãlìwo pu ànyi, do ò? Wo mu teŋu nɔ̀tè ò, ɖoa, Tɔhonɔ̀ ye xla wo ɖo ànyi.

¹⁶E la na be wo la nɔ klɛ̃ àfɔ̀, eye wo la nɔ jè woa nɔ̀nɔwo ji, eye wo la nɔ gblɔ̃ be: 'Mì sitè, mia trɔ jo, yì mia ŋutɔ miabe dùkɔ̃wo gbɔ, lè mia de-nyigbã ji, jo lè ètamèsɛ̃tɔwo be èwui nu!'

¹⁷Funua, wo la ɖo nyikɔ na Faraɔ̀n, Ejiptè be èfìɔa be: 'Hòyò-hòyò wɔ̀tɔ kè mu teŋu wɔ̀ ènu ɖekpe, wàlɛbɛ kè hùenua ɖo ò a.'

¹⁸Èfìɔ kè be nyikɔ wo yɔna be Tɔhonɔ̀, Ŋusɛ̃kpatatɔa gblɔ̃ be: 'Mù tà àpe àgbè be kɛ̃tɔa la va, ku kpɛ̃kpɛ̃, sìgbè lekè Tabɔ̀r lè, lè ètowo dòmè, eye Karmèl-toa lè, lè àpù nua nène.'

¹⁹Mì pòtɛ àgbã, ne mìa yì ci ègbe ji, mì, nyɔ̃nùvi Ejiptètɔwo, ɖoa, Nɔf la trɔ zũ àxuedo eye àmè mu la gbà kpɔ̀tɔ̀ ɖo yebe èglìkpowo mè ò.

²⁰Ejiptè nyi ènyìnɔvi nyakpɔkpɔ ɖe, gãkea, àdãgbã ɖewo lè àzɔ̃lì ji gbãnà, wo gbãnà so àvego ɖo e ŋuti.

²¹Àgbãtè gbãdãgbã kèwo ye lè yebe àhùakɔ̃wo dòmè, ekèwo wo do àmì sìgbè ènyìsuviwo nèneawo ŋutɔ cã mu la teŋu nɔ̀ e nu ò. Woa cã, wo la trɔ, eye wo la si. Ɖoa, jɔ̀gbèvuɛ̃ be ŋùkèkè gbãnà, la va tù wo, ètodɔ̃dɔ̃ be àzã gbè va ɖo na wo.

²²Ne kɛ̃tɔawo bla àkpà gbãnà ku ŋusɛ̃, eye wo le èfiɔwo ɖo àsi, sìgbè àmè kèwo ye le yì àti sò gbe nènea, Ejiptèviwo la nɔ fã sìgbè èdã kè le sia be ègbè nène.

²³Tɔhonɔ̀ gblɔ̃ be: Wo la pò yebe àve kɔ̀ ɖɛ, to e gbɔ be àvea ɖɔ, eye be ɖo kpɛ̃kpɛ̃ cã a. Ɖoa, wo sùgbɔ wu hùesuviwo, eye hɛ̃hlɛ̃ mu lè woa ŋuti ò.

²⁴Ejiptè be nyɔ̃nùvia la ɖù ŋùkpɛ̃, eye wo la so ɛ̀ do àsi na àvegotɔwo.”

²⁵Tɔhonɔ̀ Ŋusɛ̃kpatatɔ, Izràɛl be Mawu a gblɔ̃ be: “Kpɔɖa! Mù la hɛ̃ ètodɔ̃ va Amɔ̀n kè nyi Nɔ be èdùmètɔwo be vòdua ji, mù la hɛ̃ ètodɔ̃ va Faraɔ̀n, Ejiptè be èfìɔa ji, eye mù la hɛ̃ ètodɔ̃ va yebe èfìɔwo ji. Ɛ̃ɛ, mù la hɛ̃ ètodɔ̃ va na Faraɔ̀n, eye mù la hɛ̃ ètodɔ̃ va na àmè kèwo ye le gba ɖo e ŋutiawo.

²⁶Mù la sɔ wo do àsi na àmè kèwo ye le ji woabe èkuawo, mù la sɔ wo do àsi na Nèbukàdnezà, Babɛ̀l be èfìɔa ku yebe àgbònùglawo.” “Gãkea, e yomè a, àmèwo la gbà nɔ̀ Ejiptè-nyigbã ji, sìgbè leke wo nɔ̀ e ji sãa nène.” Tɔhonɔ̀ ye gblɔ̃ ɛ̀.

²⁷“Vɔ̀a, èwò yaa, mù gbà vɔ̃ ò, Yakɔb, sumɔ̃vi nyè. Izràɛl, àdìka mu gbà sò wò ò, ɖoa, mù la ɖè wo so dìdìpe godo! Mù la hlùɛ̃ jìjimèvi wòwo gã, so ànyigbã kè ji wo kplɔ̀ wo yì gble ɖoa ji. Yakɔb la gbà kpɔ fàfa ku gbɔ̃jɛ̃, eye àmè ɖekpe mu la gbà do ŋùklɛ̃ na ɛ̀ ke ò.

²⁸Tɔhonɔ̀ be: 'Mù gbà vɔ̃ ò, Yakɔb, sumɔ̃vi nyè. Ɖoa, mù lè ku wò.' Tɔhonɔ̀ ye gblɔ̃ ɛ̀. To e gbɔ be mù crɔ̃ dùkɔ̃ kèwo keŋu dòmè mù kã mì hlɛ̃ ɖoa gbidi-gbidi cã a, nyè mu la crɔ̃ mìawo ya gbidi ò. Vɔ̀a mù la pò mì, gãkea, lè ɖoɖo nu. Nyè mu la dokpò èto dɔ̃dɔ̃ na wò ò” Tɔhonɔ̀ ye gblɔ̃ ɛ̀.