Read gen Yeremìa 47 Bible Online

Yeremìa 47 - gen bible

Yeremìa 47

¹Tɔhonɔ̀ be ègbè kè ɖì na Yeremìa, gblɔ̃ɖɛtɔa, so Filistìtɔwo ŋuti, gbɔ̀xue Faraɔ̀n, Ejiptè be èfìɔa ne ɖè àhùa kpe na Gaza-nyigbã ji tɔwoa ye nyi ekèa.

²Tɔhonɔ̀ gblɔ̃ be: “Kpɔɖa, èsìwo le ɖɔ, so àvego, wo le trɔ zũ ètɔ̀ wɔ̀adã gbãnà. Wo la ɖɔ lè ànyigbãa kpata ji, eye wo la cɔ̃ ènu kèwo kpata lè e jiawo wo la cɔ̃ èdùwo ku àmè kèwo ye lè woa mèawo. Èdùawo mètɔwo la kpà àbòbo, àmè kèwo keŋu lè èdùawo mèawo la na àle.

³Ne wo sè èsɔawo be àfɔ̀kpawo lè èdù ji gbãnàa, ne wo sè kɛ̃tɔawo be àhùakèkeviwo gbãnaa, ne wo sè àhùakèkeviawo be àfɔ̀wo be ɖìɖi gbãnàa, èvitɔwo mu la trɔ kpɔ woabe èviwo gbɔ, ne woa kpe ɖo woa ŋuti ò; ɖoa, vɔ̃vɔ̃ la na be woabe àlɔ̀wo la gbe hùãhuã.

⁴Ɖoa, ŋùkèkè va ɖo ne woa crɔ̃ Filistìtɔwo kpata, ne woa ɖè Tirò ku Sidɔ̀n be xɔ̀namètɔ kpɔ̀tɛ kèwo ye ci àgbèawo jo. Ɖoa Tɔhonɔ̀ la crɔ̃ Filistìtɔwo, kpòe ɖe, àmè kèwo ye kpɔ̀tɔ̀ so Kaftɔ̀r be àpùdòmèkɔ̃ɛa jiawo.

⁵Gazàtɔwo la lũ èta, la sɔ lɔ̀fũ. Askelɔ̀ntɔwo la bɔ̀nu kpoo. Aò, mì àmè kèwo kpɔ̀tɔ̀ lè gbà mèa, kaka na hùe kɛ nu ye mì la kpɔ̀tɔ̀ nɔ sì mìa ɖokoewo ò?

⁶Mì le do àpa be: 'Aò, Tɔhonɔ̀ be èwui! Kaka va na gà kɛ mè, gbɔ̀xue wò la gbɔ̃jɛ̃ ò? Trɔ ɖo àpo àku mè, jè e mè, ne wòa nɔ̀ ànyi kpoo!'

⁷Vɔ̀a, leke ye be la teŋu gbɔ̃jɛ̃ ɖo, ekè e nyi be Tɔhonɔ̀ ye ɖè ègbè na ɛ̀a ò? Ekè be ɖè ègbè na ɛ̀, be ne kpãŋùkɔ̀ Askelɔ̀n ku àpùtoa mè ò? Funua ye wo le dogò lèa yeŋu.”