Read gen Yeremìa 48 Bible Online

Yeremìa 48 - gen bible

Yeremìa 48

¹Ènyà kè Tɔhonɔ̀, Ŋusɛ̃kpatatɔ, Izràɛl be Mawu a gblɔ̃ so Mòab ŋutia ye nyi be: Hèlu na Nebò be èdùmètɔwo, do a, e la crɔ̃ ɛ̀! Wo la dovlo Kiriatayìm be èdùa eye wo la xɔ̀ ɛ̀. Àgbògbòa la ɖù ŋùkpɛ̃, eye be la hũhũ.

²Wo mu la gbà kafu Mòab dùkɔ̃a ke ò. Ŋusùwo la bla èse lè Hɛsbɔ̀n, ne woa crɔ̃ ɛ̀, eye wo la gblɔ̃ be: 'Mì va, ne mia gũ dùkɔ̃ ŋua.' Wo la crɔ̃ wò, Madmèn cã, eye èwui la nɔ̀ yo wò mè.

³Mì ɖo èto, ne mìa sè àpa le ɖì, so Horanayìm ènugbãgbã ku zigìdi gã ɖe be àpa.

⁴Wo la mù Mòab pu ànyi, eye Mòabtɔwo be èviwo la nɔ na àle.

⁵Wo lè èmɔa ji, le lia ètoa tùtà Luhìt. Wo lè àvi ji veve ɖe, ɖo èdù kèwo crɔ̃awo ta, eye woabe hèhè dodowo le ɖì, wàlɛbɛ kè wo le ɖì àbù, tùtà Horonayìm be èdùa mè.

⁶Mì si! Mì si, ne mìa ɖè mìabe àgbè! Mì nɔ̀ sìgbè Àroà, Èdù kè ci ànyi, lè zògbè jia nène.

⁷Ekè mì dojì ɖo mìabe wɔ̀nawo ku mìabe àdɔ̀kùnuwo ŋutia, mìawo cã, wo la le mì jo. Wo la le Kemɔ̀s cã jo, ku yebe hũbonɔwo kudo àgbònùglawo.

⁸Ènugbãtɔa la va ɖo èdù ɖe sia ɖe ŋuti, eye èdù ɖekpe mu la to lè e mè ò. Wo la crɔ̃ bàlìwo, eye wo la gbã èto gbàjàwo, ɖoa, Tɔhonɔ̀ ye gblɔ̃ ɛ̀.

⁹Mì kɔ̀ èjè ɖo Mòab ji, ɖoa, e la trɔ zũ àxuedo, yebe èdùwo la trɔ zũ èglìkpowo, eye àmè ɖekpe mu la gbà nɔ̀ woa mè ò.

¹⁰Kpɛ̃sɛ̃ la ɖì àmè kè la sɔ àlɔ̀ gblɔ̀dɔ̀ wɔ̀ Tɔhonɔ̀ be èdɔa ŋuti! Kpɛ̃sɛ̃ la ɖì àmè kè la sɔ yebe èwui ɖo ŋùgbe, eye be la gbe èhũ kɔ̀kɔ̀ ɖɛa!

¹¹“So kaka ɖèvi mè kè ye Mòab kpɔ gbɔ̃jɛ̃ so, sìgbè àhà kè be gɔ̃mè lè kpoo, ekè wo mu trɔ so ègò ɖe mè, yì ègò bu mè ò nène. Mu yì ègàtɔnugbe ò. Ekèa ŋuti yebe vivi gbà lè e ŋuti, eye yebe hɔ̃hɔ̃ɛ mu trɔ ò.”

¹²Tɔhonɔ̀ gblɔ̃ be: “Gãkea, èŋùwo gbãnà, la va kè, ekè mù la ɖo ŋusù kèwo trɔna ènu so ègò ɖe mè, yìnà ègò bu mèawo ɖoɖa, ne woa ɖɔ̀lì ènu kè lè Mòab be ègòwo mèawo kɔ̀ ɖɛ, ne wo la xla ègòawo ɖo ànyi.

¹³Ekèa yomè a, èŋù la kpɛ̃ Mòab ɖo Kemɔ̀s ŋuti, sìgbè lekè èŋù kpɛ̃ Izràɛl be àxuea, wàlɛbɛ kè wo dojì ɖo Betɛ̀l ŋutia nène.

¹⁴Leke wɔ̀, mì kãsè le gblɔ̃ be: 'Àhùawɔ̀tɔwo mi nyi, ŋusù kèwo wɔ̀nà kãlì lè àhùa-gbe jiawo' ɖo ò?

¹⁵Wo la crɔ̃ yebe èdùwo, àhùakɔ̃wo la va cɔ̃ yebe èdùwo, eye wo la ɖè èta lè yebe ɖèkajɛvi àgbòjãjãwo nu” èfìɔ kè wo yɔna be Tɔhonɔ̀, Ŋusɛ̃kpatatɔa ye gblɔ̃ ɛ̀.

¹⁶Mòab be cɔ̃crɔ̃ hùenu ɖo vɔ̀. Yebe jɔ̀gbèvuɛ̃ hùenu la va èzã ɖe kèa.

¹⁷Mì, àmè kèwo keŋu gogo èawo, mì làmɔɛ̃. Mì, àmè kèwo keŋu jèsi ìawo, mì gblɔ̃ be: 'Leke àtikplɔ sɛ̃ŋu kèa la ŋɛ̃ ɖo ò! Leke àtikplɔ sɛ̃ŋu kèa la ŋɛ̃ ɖo ò!'

¹⁸Ɖì so kaka àfi kè àpo gogo kɔ wò ɖoa, èwò, Divɔ̀n-dù mètɔ, ne wòa bɔ̀bɔ̀ nɔ̀ ànyi ɖo ànyigbã pupu ji, ɖoa kɛ̃tɔ kè la crɔ̃ Mòab-nyigbã a la va kpãŋùkɔ̀ wò, ne bèa gbã àpo àgbògbò-dùwo.

¹⁹Èwò, Àroà be èdùmètɔ, nɔ̀tè ɖo èmɔ to, ne wòa ɖia èmɔa; biɔ ènyà ŋusù kè si va le yìa; biɔ ènyà nyɔ̃nù kè wo hlùɛ̃ gãa. Biɔ wo be: 'Nukɛ ye jɔ̀ ò?'

²⁰Ekè wo hũhũ Mòab be èdùa, e ɖù ŋùkpɛ̃. Mì na àle, ne mìa kpà àbòbo, Mì yì gblɔ̃ ɛ̀, lè Arnɔ̀n be Mòab crɔ̃!

²¹Kòjoɖoɖo va jè èto-nyigbã gbàjàa ji, e va jè Holɔ̀n, Yahsà, ku Mefahàt be èdùwo ji,

²²Kòjoɖoɖo va jè Dibɔ̀n, Nebò ku Bɛt-Dilatayìm be èdùwo ji

²³kòjoɖoɖo va jè Kiriatayìm, Bɛt-Gamul ku Bɛt-Mɛhɔ̀n ji.

²⁴Kòjoɖoɖo va jè Kerìɔt ku Bosrà, kudo èdù kèwo keŋu lè Mòab-nyigbã be dìdìpe ku kpòepeawo ji.

²⁵“Wo ŋɛ̃ àzò na Mòab, eye wo sò yebe àbɔ jo”, Tɔhonɔ̀ ye gblɔ̃ ɛ̀.

²⁶Tɔhonɔ̀ gblɔ̃ be: “Mì na àhà Mòab bèa nù, ne bèa mu! Ɖoa e tɔ àsi àkɔ ɖo Tɔhonɔ̀ ŋuti. Mì tàsi Mòab bèa blìbɔ̀ ye ŋutɔ be tutru mè. Mì tàsi ì, bèa ɖì kòkoe!

²⁷Ɖe ye Izràɛl mu trɔ zũ àlɔmè ɖènu na mì ò a? Ɖe ye wo le è lè fìãfìwo dòmè, ye ŋuti mì hũhũna èta ku ŋùmèkãkã, wè sia wè kè mì le gblɔ̃ yebe ènyàa?”

²⁸Mì, àmè kèwo lè Mòabviwo dòmèa, mì jo gble mìabe èdùwo ɖɛ, ne mìa yì nɔ̀ àkpãwo-to mè; mì nɔ̀ sìgbè àhɔ̃ne kè le ɖo àtɔ̃, ɖo àkpãdo nua nène.

²⁹Mì sè lèkè Mòabtɔwo jrana ɖoa, leke wo kpɔna woa ɖokoewo ɖoa, leke wo kɔkɔna woa ɖokoewo ɖo èji ɖoa, Leke wo dànà ègbè àmè ɖoa.

³⁰Tɔhonɔ̀ gblɔ̃ be: “Mù nya woabe àmè mà-bu, gãkea, woabe àdã wɔ̀wɔ mu nana ènu ɖekpe ò.”

³¹Ekèa ŋuti mù le na àle, ɖo Mòab ta, Mòab bliboa ta, ye mù le do àpa, be woa va do mù àlɔ̀ ɖo. Mù le kpà àbòbo ɖo Kir-Harsɛt ŋusùwo ŋuti.

³²Mù le fã ɖo ta wò, Sibnà be vɛ̃-gble, sìgbè leke Yazɛ̀r fãnà àvia nène. Àpo àlɔ̀zɛ̃wo kèkè, kaka yì ɖo àpùta, wo yì ɖo kaka Yazɛ̀r be àpùa ta. Ènugbãtɔa va jè àpo èkusɛ̃sɛ̃ ɖìɖi be èkpòwo ji

³³Jìjɔɛkpɔkpɔ ku àyosòsowo nu sò, lè Mòab-nyigbã be àgblèwo ku àtikusɛ̃sɛ̃ be àgblèwo mè. Mù sò vɛ̃ nu, lè vɛ̃fiɔ̃nuwo mè. Àmè ɖekpe mu gbà le fiɔ̃ vɛ̃ku, ku àyosòso be èhà be àpadodo ke ò. To e gbɔ be àpadodowo le ɖì cã a, wo mu nyi jìjɔɛ be àpadodowo ò.

³⁴“Woabe àpadodowo le ɖì so Xɛsbɔ̀n, kaka va ɖo Elealè ku Yahsà. Wo le ɖì so Zoar kaka le yì Horonayìm ku Eglat-Selisiyà ke, ɖoa, Numrìm be èsìwo ŋutɔ cã pu.

³⁵Mù la gũ àmè kèwo sanavɔ lè ètowo ji, eye wo tɔna èzò lifi na woabe vòduwo lè Mòab nyigbã jiawo.” Tɔhonɔ̀ ye gblɔ̃ ɛ̀.

³⁶“Ekèa ŋuti ye àpe èjì be hèhè ɖo Mòab ŋuti, le ɖì sìgbè èzè kè wo le kua nène, àpe èjì be hèhè ɖo Kir Harɛ̀s be ŋusùwo ŋuti, le ɖì sìgbè èzè kè wo le kua nène; ɖoa àdɔ̀kùnu kèwo keŋu wo bɔ̀ na woawo le ku.

³⁷Ekèa ŋutia, wo plɔ èta ɖe sia ɖe, wo lũ ègɛ̃ ɖe sia ɖe, wo do àbì àlɔ̀ ɖe sia ɖe ŋuti, eye wo sã kòtòkuwo ɖo àlì ɖe sia ɖe.

³⁸Àlenana kpò ye le ɖì, lè Mòab be èxɔ̀wo kpata ta, ku lè yebe àbɔwo mè. Ɖoa mù sɔ Mòab xla ɖo ànyi, sìgbè èze kè àmè ɖekpe mu gbà le ji ò a nène.” Tɔhonɔ̀ ye gblɔ̃ ɛ̀.

³⁹“Mòab gbã loo ò! Mòabtɔwo na àle loo ò! Oò, Mòab trɔ ŋùgbe ku ŋùkpɛ̃ loo ò! E va zũ àlɔmè ɖènu ku ènunyɔŋu na èdù kèwo keŋu trɔ ɖo èa.”

⁴⁰Ènyà kè Tɔhonɔ̀ gblɔ̃a ye nyi be: “Kpɔɖa! Èkɛ̃tɔa la vlũ àwàda, la zrò, so èji gbãnà, ɖo Mòab ji, sìgbè èhɔ̃ nène.

⁴¹E la le Kerìɔt be èdùa ku àgbògbòawo. Gbè ŋua gbèa, Mòab be kãlìwo be èjìwo la nɔ̀ sìgbè nyɔ̃nù kèwo le le èkuawo be èjìwo nène.

⁴²Wo crɔ̃ Mòab, eye mu la gbà nyi dùkɔ̃ ò, ɖoa, e tɔ àsi àkɔ ɖo Tɔhonɔ̀ ŋuti.

⁴³Àhlùanuwo, èdowo ku èmɔ̀tetrewo ye le nɔ̀tè kpɔ mì, Mìa Mòab be èdùkɔ̃wo!” Tɔhonɔ̀ ye gblɔ̃ ɛ̀.

⁴⁴“Àmè ɖekpekpe kè la si lè àhlùanuwo nua, la gɛ̃ jè èdo mè. Àmè ɖekpekpe kè la to lè èdoa mèa, èmɔ̀ la le è. Ɖoa, mù la hɛ̃ ètodɔ̃ be èpè va Mòab ji.” Tɔhonɔ̀ ye gblɔ̃ ɛ̀.

⁴⁵Àmè kèwo ye siawo gbɔjɔ, eye wo lètè ɖo Hɛsbɔ̀n be vɔ̃vɔ̃lì mè, ɖoa, èzò ɖe bì so Hɛsbɔ̀n, èzò be àɖe so Sihɔ̀n. E fiɔ̃ Mòab be ètonu, e fiɔ̃ àdègbè pòtɔ kèawo be èviwo be àzòdòmèwo.

⁴⁶Hèlu na mì, mia Mòabtɔwo! Kemɔ̀s be dùkɔ̃a crɔ̃, ɖoa, wo le mìabe ŋusùviwo jo, yì gàtɔnugbe, eye wo kplɔ̀ mìabe nyɔ̃nùviwo àhùale.

⁴⁷“Gãkea, lè ŋùkèkè kèwo gbãnàa mèa, mù la gbìgbɔ̀ sɔ Mòab be nyɔnaa na ɛ̀.” Tɔhonɔ̀ ye gblɔ̃ ɛ̀. Fikèa ye kòjo kè wo ɖo na Mòabtɔwoa sɛ̃tè ɖo.