Read gen Yeremìa 49 Bible Online

Yeremìa 49 - gen bible

Yeremìa 49

¹Àŋɛ̀ kè Tɔhonɔ̀ do ɖoɖa Amɔ̀nviwoa ye nyi ekèa: “Ɖe ye ŋusùvi ɖekpe mu lè Izràɛl si ò a? Ècrɔ̃dùtɔ ɖekpe mu lè e si ò a? Eye nukɛ ŋuti ye Malkɔ̀m va sɔ Gad-nyigbãa, sɔ wɔ̀ ye tɔ̀, eye yebe dùkɔ̃wo va lè Gad-nyigbã ji be èdùwo mè ɖo ò?”

²Tɔhonɔ̀ gblɔ̃ be: “Vɔ̀a, ŋùkèkèwo gbãnà, ekè mù la na àhùa be àpa la ɖì, lè Rabà, Amɔ̀nviwo be èdù gãa mè. Èglìkpo ɖèɖe kpò be la va trɔ zũ, eye wo la tɔzò kɔpe kèwo ye trɔ ɖo èawo keŋu. Ekèa yomè a, Izràɛlviwo cã la nyà àmè kèwo nyà wo toawo to”. Tɔhonɔ̀ ye gblɔ̃ ɛ̀.

³Aò, mìa Hɛsbɔ̀ntɔwo, mì na àle! Ɖoa, wo crɔ̃ Ayì be èdùa. Aò, mìa Rabàtɔwo, mì fã àvi! Mì tà kòtòku, ne mìa làmɔɛ̃! Mì pu dù sã, lè èglìawo dòmè! Ɖoa, wo la kplɔ̀ mìabe èfìɔa jo, àhùale, kpe ɖo yebe hũbonɔwo ku àgbònùglawo ŋuti.

⁴Èwò, nyɔ̃nùvi wɔ̀ ànùkua, nukɛ ŋuti wò sɔ àpo bàlìa le pò àdègbè ɖo ò? Wò sɔ bàlì do àmà wòwo le pò àdègbè, ɖoa, wò le ɖoŋù ɖo àpo àdɔ̀kùnuwo ŋuti, eye wò le gblɔ̃ be: “Àmè kɛ ye la kpe àkɔ ku mù ò?

⁵Tɔhonɔ̀, Ŋusɛ̃kpatatɔa gblɔ̃ be: 'Kpɔɖa, mù la hɛ̃ vɔ̃vɔ̃ va na wò, sɔ to èdù kèwo ye pòxla wòawo keŋu ji; wo la nyà mìa dòmètɔ ɖe sia ɖe ɖo ègbe, eye àmè ɖekpe mu la bɔ̀ àmè kèwo siawo ò.

⁶Gãkea, ekèa yomè a, mù la gbìgbɔ̀ kplɔ̀ Amɔ̀n be jìjimèviwo gbɔ̀, eye mù la likè wo.'” Tɔhonɔ̀ ye gblɔ̃ ɛ̀.

⁷So Edɔ̀m ŋutia, ènyà kè Tɔhonɔ̀, Ŋusɛ̃kpatatɔa gblɔ̃a ye nyi kèa: “Ɖe ye àdòdò mu gbà lè Temàn-nyigbã ji ò a? Ɖe ye ènunyatɔwo be àɖàŋùɖoɖo kua? Ɖe ye ènunyatɔwo be àdòdò nyìnyɔ̀a?

⁸Mì trɔ, ne mìa si! Mì si yì wla ɖo àkpãdo gòglòwo mè, mì àmè kèwo ye lè Dedàn-nyigbã jia! Ɖoa, gàmè sù, ne ma dɔ̃ èto na Esaò be jìjimèviwo, eye mù la hɛ̃ jɔ̀gbèvuɛ̃ va woa ji.

⁹Ne vɛ̃kuyàtɔwo va gbɔ wòa, ɖe ye wo mu gblena ènukuicãtɔwo tɔ̀a ɖɛ ò a? Ne fìãfìwo va, èzã mèa, mu nyi ènu kè wo la teŋu sɔa kpò ye wo fĩnà ò a?

¹⁰Vɔ̀a ènyè ŋutɔ ye la ɖe àma Esaò. Mù la klo ènu lè yebe wawlape ŋuti, àleke be mu la teŋu bè ò. Yebe jìjimèviwo, yebe xòmètɔwo ku yebe àxuekɔ̀tɔwo la crɔ̃, eye ye ŋutɔ nu cã la gũ.

¹¹Mì gble mìabe ècɔɛviwo ɖɛ, mù la kpɔ woabe àgbè ji; mìabe àhòsìwo cã teŋu dojì ɖo ŋuti nyè.”

¹²Tɔhonɔ̀ gblɔ̃ be: “Kpɔɖa! Ne àmè kèwo ètodɔ̃ be kogòa nùnu mu jè naawo ŋutɔ cã le nù ì kòkòkòa ɖe, nukɛ ŋuti, wo mu la dɔ̃ èto na èwò ya ò? Gbèɖe! Wò mu la dokpò ètodɔ̃ xɔ̀xɔ ò. Ɛ̃ɛ, ɖe ye wò la nù ì!”

¹³Tɔhonɔ̀ gblɔ̃ be: “Mù tà ɖokoe nyè be Bosrà la trɔ zũ àxuedo, èglìkpo gbãgbãwo, àlɔmèɖènu ku kpɛ̃sɛ̃nu, eye èdù kèwo keŋu lè yebe ànyigbã jiawo la trɔ zũ èglikpowo gbidi.”

¹⁴Mù sè àŋɛ̀do so Tɔhonɔ̀ gbɔ, àmèdɔ̃dɔ̃ va ɖo dùkɔ̃wo dòmè be: “Mì bɔ̀, ne mìa zɔ̃ ɖo e ji! Mì so, ne mìa kpe àhùa!”

¹⁵Ɖoa, mù la na, wò la hùe lè dùkɔ̃wo dòmè. Wo la dovlo wò, lè àgbètɔwo dòmè.

¹⁶Àdìka kè wò sònà na àmèwoa, ku jajra kè lè àpo èjì mèawo flù wò, èwo kè nɔ̀nà àkpãwo be tòtro mè, èwò kè kùkpla ètokɔ̃ɛ̃ kɔkɔwo be àɖɔ̀mèa, ne wò ɖo àtɔ̃, sìgbè èhɔ̃ nène, ɖo kaka èji ŋutɔ cã a, mù la tùtù wò, so kaka funua, pu ànyi! Tɔhonɔ̀ ye gblɔ̃ ɛ̀.

¹⁷Edɔ̀m-nyigbãa la trɔ zũ àxuedo, àleke be àmè sia àmè kè la to e ŋuti, va yìa be ènu la ku, ɖo yebe gbãgbãa ŋuti, eye yebe àbìwo la ɖì kòkoe na ɛ̀.

¹⁸Tɔhonɔ̀ gblɔ̃ be: “Sìgbè leke wo mù Sodɔ̀m ku Gòmɔrà pu ànyi ku èdù kèwo pòxla woa nènea, nènea ke ye àmè ɖekpe mu la gbà nɔ̀ funua ò. Àmè ɖekpe mu la gbà ci e mè ò.”

¹⁹“Sìgbè leke jãŋùta liana Yɔrdàn-tɔ̀a be àgo ɖo àvewo, tona jè èlãnyìpe do àmàwo mèa nènea, nènea ke ye mì nyà Edɔ̀m jo lè yebe ànyigbã ji, lè àvò mè. Àmè kɛ ye nyi àmè cãcã kè mì la sɔ ɖo e nu ò? Ɖoa, àmè kɛ ye lè, kè sɔ ku mì ò? Àmè kɛ ye la pò àdègbè lè ŋùkɔ̀ na mù ò? Eye àlɛ̃kplɔ̀tɔ kɛ ye la teŋu nɔ̀tè lè ŋùkɔ̀ na mù ò?”

²⁰Ekèa ŋutia, sè ènu kè Tɔhonɔ̀ ɖo ɖo Edɔ̀m ŋuti ɖa, sè sùsu kè be ɖo ɖo àmè kèwo lè Temàn ŋuti ɖa: “Wo la kplɔ̀ èlãhaa be èviwo jo, e la crɔ̃ woabe èlãhaa be èviwo, ɖo ènu kè wo wɔ̀a ŋuti.

²¹Leke wo la jè ànyi ɖoa, la na ànyigbã la hũhũ. Woabe àvifãfã la ɖì yì kaka plãŋùpòfɛ̃ be àpùa nu.

²²Kpɔɖa, kɛ̃tɔa la vlũ àwàda, la zrò, so èji gbãnà, ɖo Bosrà ji. Gbè ŋua gbèa, Edɔ̀m be kãlìwo be èjìwo la nɔ̀ sìgbè nyɔ̃nù kè le le èkua be èjì nène.

²³Ɖo Dàmaskò ŋutia, Tɔhonɔ̀ gblɔ̃ be: “Hamàt ku Arpad ɖù nùkpɛ̃, ɖoa, wo sè ènyà vuɛ̃; woabe èjì gbã, woabe susuwo blù, sìgbè àpù kè mu ɖo gbɔ̃jɛ̃ ò a nène.

²⁴Dàmaskòtɔwo be lãmè tu, wo trɔ, be yèwoa si, ɖoa, àdìka sò àmè titɔ wo, àkpɔ̃ ku vevesèse bla wo, vevesèse kè lè sìgbè nyɔ̃nù kè le le èkua be vevesèse nène.

²⁵Leke wɔ̀ ye wo gble èdù nyuɛ̃, xɔ̀ nyikɔ, kè nyi àpe vivisèse be àgbògbòa ɖɛ ɖo ò?

²⁶Ekèa ŋuti ye woabe ɖèkajɛwo la ci àxuewo dòmè godo, eye woabe àhùawɔ̀tɔwo keŋu la miɔ ènu, gbè ŋua gbè ɖo”. Tɔhonɔ̀ Ŋusɛ̃kpatatɔa ye gblɔ̃ ɛ̀.

²⁷Mù la tɔzò Dàmaskò be èglìwo, mù la fiɔ̃ Bɛn-Hadàd be àgbògbòwo.”

²⁸Ènyà kè Tɔhonɔ̀ gblɔ̃ so Kedàr ku Hasɔ̀r be èfìɔdu kèwo Nèbukàdnezà, Babɛ̀l be èfìɔa ɖe àhùa kpe na a ye nyi be[55]: Tɔhonɔ̀ gblɔ̃ be: “Mì so, ne mìa ɖè àhùa kpe na Kedàr be èdùa, ne mìa crɔ̃ èwèzɛ̃pe be dùkɔ̃a.

²⁹Wo la lɔ woabe gòxɔwo ku woabe èlãhawo jo, woabe gòxɔ be àvɔwo ku woabe àgbãwo keŋu, la jo ku woabe èsɔ èkpovènɔ̀wo, eye àmèwo la do àpa ɖo woa ŋuti be: “Àhlùanu so àfiwo kpata!”

³⁰Mì si jo, àfɔ̀ ne sɔ̀ na mì! Mì, àmè kèwo nɔ̀nà Hasɔ̀r dù mèa, mì bè ɖo àkpãdowo mè! Tɔhonɔ̀ ye gblɔ̃ ɛ̀

³¹“Mì so, ne mìa ɖè àhùa kpe na dùkɔ̃ kè mu sɔ ède lè e mè ò a! Mì ɖè àhùa kpe na dùkɔ̃ kè kã ɖo ye ɖokoe jia!” Tɔhonɔ̀ ye gblɔ̃ ɛ̀. Mì ɖè àhùa kpe na dùkɔ̃ kè nu àgbo ku gàmèti mu lè ò a. Dùkɔ̃ kè be àmèwo lè gbàjà jia.

³²Woabe èsɔ èkpovènɔ̀wo la trɔ àmɔ̀nyɔ̀nuwo, woabe èlãha gàawo la zũ ènuhlàjowo. Mù la kã ègɛ̃lũtɔ kèawo hlɛ̃ do xixe koŋù ènèawo be àya nu, eye, so àfiwo kpataa, mù la hɛ̃ jɔ̀gbèvuɛ̃ va woa ji. Tɔhonɔ̀ ye gblɔ̃ ɛ̀.

³³“Hazɔr-nyigbãa la trɔ gbètewo be nɔ̀pe. E la trɔ zũ àxuedo, kaka yì, eye àmè ɖekpe mu la gbà teŋu nɔ̀ e ji ò. Àgbètɔ ɖekpe mu la gbà teŋu nɔ̀ funua ò.”

³⁴Lè Yudà be èfìɔ Sedekìa be èfìɔɖùɖu be gɔ̃mèjèje a, Tɔhonɔ̀ be ègbè ɖì na Yeremìa, Tɔhonɔ̀ be gblɔ̃ɖɛtɔa, so Elàm-nyigbãa ŋuti:

³⁵Ènyà kè Tɔhonɔ̀ Ŋusɛ̃kpatatɔa gblɔ̃a ye nyi be: “Kpɔɖa, mù la ŋɛ̃ Elàm be àŋùdàti kè ŋutɔ ye nyi woabe ŋusɛ̃a.

³⁶Mù la na àya sɛ̃sɛ̃wo, so jiŋùkusi be koŋù ènèawo ji la va pò ɖo Elàm-nyigbãa ŋuti. Mù la kã Elàmviwo hlɛ̃ ɖo ànyigbã be àya ènèawo nu, eye dùkɔ̃ ɖekpe mu la nɔ̀ ànyi, kè dòmè Elàmviwo mu la ci ègbè lè ò.

³⁷Mù la na Elàmviwo la hũhũ, lè woabe kɛ̃tɔwo be ŋùkɔ̀. Mù la hɛ̃ jɔ̀gbèvuɛ̃ va woa ji. Lè àmè kèwo ye le ji woabe èkuawo be ŋùkɔ̀. Jɔ̀gbèvuɛ̃ kè nyi àpe àdɔ̀mèze hɛlia. Tɔhonɔ̀ ye gblɔ̃ ɛ̀. Mù la sɔ èwui kplɔ̀ wo do, kaka na gà kè mè mù la gũ woa.

³⁸Mù la ɖùfìɔ lè Elàmviwo nu, eye mù la crɔ̃ woabe èfìɔ ku àgbònùglawo. Tɔhonɔ̀ ye gblɔ̃ ɛ̀.

³⁹Gãkea, lè ŋùkèkè kèwo ye gbãnàawo mèa, mù la gbìgbɔ̀ ɖo Elàm tè.” Tɔhonɔ̀ ye gblɔ̃ ɛ̀.