Read gen Yeremìa 5 Bible Online

Yeremìa 5 - gen bible

Yeremìa 5

¹Mì ɖìsà to Yèruzàlɛm be èmɔ̃wo ji. Mì sã ŋùku, ne mìa kpɔ; mì ji, to àgbowo nu, ne mì kpɔ àmè ɖèka pɛ kè wɔ̀nà ènu jɔ̀jɔɛa, ne mì kpɔ àmè ɖèka tigɔ̃ kè jina nyàwototoa, mù la sɔ èvuɛ̃wo kè èdù kèa.

²Wo gblɔ̃nà be: “Mù tà Tɔhonɔ̀!” Gãkea, ɖe kpò wo kãna àtãŋu gbalo.

³Aò Tɔhonɔ̀, mu nyi nyàwo ye àpo ŋùkuwo le jìa? Wò pò wo, gãkea, mu ɖo èlãmè na wo ò. Wò crɔ̃ wo, gãkea, wo gbe be yèwo mu la xɔ̀ ètodɔ̃dɔ̃ ò. Wò sɛ̃ woabe ŋùmè wu èkpe, eye wo gbe be yèwo mu la trɔ ètamè ò.

⁴Ènyè yaa, mù susu be: “Àmè kèawoa, ŋuzĩzĩtɔwo kpò ye wo nyi. Wo mu nyana ènu ò, ɖoa, wo mu nya Tɔhonɔ̀ be èmɔ̃wo ò, eye wo mu nya woabe Mawu be èseawo ò.

⁵Ekèa ŋutia, mù la yì woabe àgbònùglawo gbɔ. Mù la pò nupo ku wo, ɖoa, mù kã ɖo e ji be woawo yaa, wo nya Tɔhonɔ̀ be èmɔ̃wo, eye wo nya Mawu be èseawo.” Vɔ̀a, wo ɖo ègbè èdu, ŋɛ̃ èkɔ̀kùtia, eye wo sò èkàawo.

⁶Ekèa ŋuti, jãŋùta la so àve mè, va trɛ̃ wo, gbète la so zògbè ji, va crɔ̃ wo. Èkpɔ̃ la doxa na wo ɖo woabe èdùwo gbɔ, ne bèa vũvũ àmè ɖe kpekpe kè la kãsè to kpòa, ɖoa, woabe àglajèje le yì e ji, eye woabe èmɔ̃tãtrãwo le sùgbɔ.

⁷Ne ènuwo le yì lekea, nukɛ ŋuti mù la sɔ kè wò ɖo ò? Èvi wòwo gble mù ɖɛ, eye wo sɔ vòdu màɖìnuwo le kã àtãŋu. Mù na wo ènu kèwo keŋu wo hiãawo, Gãkea, wo gbà le wɔ̀ àhasì, eye wo le tɔ̀zĩ, le pò vàvàvà lè gbòlòxɔ mè.

⁸Wo lè sìgbè èsɔ-su do àmì kèwo sitè lè ŋusù mèawo nène, eye àmè sia àmè le ɖè ègbè, le yɔ àmè bu be èsrɔ̃.

⁹Tɔhonɔ̀ gblɔ̃ be: Nyè mu la dɔ̃ èto na wo, ɖo ènu kèawo ŋuti òa? Èkla nyè mu la biɔ èhlɔ̃ dùkɔ̃ kèa hati òa?

¹⁰Mì ɖo yebe vɛ̃-gblewo mè, ne mìa gble ènu, vɔ̀a, mì mu gbà kãkã e kpata ò. Mì hɔ̃ woabe èkàwo, ɖoa, àmè kèawo mu nyi Tɔhonɔ̀ tɔ̀ ò.

¹¹Tɔhonɔ̀ gblɔ̃ be: “Izràɛl be àxue ku Yudà be àxue wɔ̀ àhasì ɖo ŋuti nyè.”

¹²Wo gbe ènu le Tɔhonɔ̀ ŋuti, gblɔ̃ be: “Mu la wɔ̀ ènu ɖekpe ò! Èvuɛ̃ ɖekpe mu la jɔ̀ ɖo mia ji ò! Mi mu la kpɔ èwui, àlo àdɔ̀wùàmè ku ŋùku ò!

¹³Gblɔ̃ɖɛtɔwoa, àya kpò wo nyi, Mu nyi Mawu ye pònà nupo to woa ji ò. Woawo ŋutɔwo ŋuti kpò woabe ènyàwo la ɖì!”

¹⁴Ekèa ŋuti Tɔhonɔ̀ Ŋusɛ̃kpatatɔa gblɔ̃ be: “Ekè dùkɔ̃a le pò nupo lekea, mù la na, ènyà nyè kè lè ènu wò mèa la nyi èzò, eye dùkɔ̃ kèa la nyi ànakè kè be la fiɔ̃a.

¹⁵Tɔhonɔ̀ gblɔ̃ be: Oò! Izràɛl be àxue, mù la kplɔ̀ dùkɔ̃ ɖe so dìdìpe va, kɔ̀ ɖo mìa ji! Blèmà dùkɔ̃ sɛ̃ŋu ɖe, dùkɔ̃ kè be ègbè mì mu sè òa. Dùkɔ̃ kè be ènupòpo gɔ̃mè, mì mu sè òa.

¹⁶Woabe àŋùtiwo be àkpòwo lè sìgbè yɔ̀do lè nùvòwo nène. Woa kpata, wo nyi kãlìwɔ̀tɔwo.

¹⁷Wo la ɖù àpo nukuyàya, Wo la ɖù [10] àpo nukuwo ku àpo ènuɖùɖuwo vɔ̀. Wo la ɖù ŋusùvi wòwo ku nyɔ̃nùvi wòwo vɔ̀. Wo la ɖù ènyìha wòwo ku àlɛ̃ha wòwo vɔ̀. Wo la ɖù èvòwo vɔ̀ lè àti wòwo ji, eye wo la vɔ̀ àhà wò keŋu. Wo la sɔ èwui sɔ crɔ̃ àgbògbò be èdù kèwo ŋuti wò ɖonaŋù ɖoawo.

¹⁸Tɔhonɔ̀ gblɔ̃ be: “Lè hùe ŋua nu ŋutɔ cã a, nyè mu la crɔ̃ mì gbidi-gbidi ò.

¹⁹Eye, ne dùkɔ̃a biɔ be: “Nukɛ ŋuti ye Tɔhonɔ̀, miabe Mawu a na, ènu kèawo keŋu le jɔ̀ ɖo mia ji mà a?” Wò la ɖo e ŋuti na wo be: Tɔhonɔ̀ gblɔ̃ be: “Ekè mì trɔ lè yo nyè mè, yì le sɛ̃ èdu bu mè be vòduwo, lè mìawo ŋutɔ mìa dea, fifìa mì la yì nyi kluviwo na àmèjrowo, lè èdù bu kè mu nyi mìa tɔ̀ òa mè.”

²⁰Mì gblɔ̃ ènyà kèa na Yakɔb be àxuea, eye mì gblɔ̃ ɛ̀, ne woa sè è le Yudà-nyigbã ji be:

²¹Mì, dùkɔ̃ ci bòmè, mànya ènu kèa, àmè kèwo si ŋùkuwo lè, vɔ̀, wo mu le kpɔ ènu òa, àmè kèwo si ètowo lè, vɔ̀, wo mu le sè ènu òa.

²²Tɔhonɔ̀ gblɔ̃ be: Mì mu la bù mù ò ɖe? Mì mu la vɔ̃, la pò tìtìtì lè ŋùkɔ̀ na mù òa? Ènyè kè wɔ̀ èkɔ, sɔ ɖo lipò na àpùa. Sɛ̃pe mà-vɔ kè wo mu la teŋu fla òa, be nyi na ɛ̀. Àsrɔ̀kewo teŋu mlì, vɔ̀ ŋusɛ̃ bu mu lè woa si ò. Wo la teŋu ɖè ègbè, vɔ̀ wo mu la teŋu[11] fla ɛ̀ ò.

²³Vɔ̀a, èjì kè sĩnàkã, eye be jè àglaa ye lè dùkɔ̃ kèa si. Wo trãmɔ, eye wo sɔ woa ŋutɔwo be èmɔ̃.

²⁴Wo mu gblɔ̃ lè woabe èjìwo mè be: “Mia vɔ̃ Tɔhonɔ̀, miabe Mawu kè ɖo èji jàja ɖo yebe dɛnu, àvìvɔ hùenu be èji, ku zòzo hùenu be èji, eye be ɖo nukuyàya be kuasiɖawo, ɖo ɖoɖonu ɖɛ na mia” ò.

²⁵Mìabe èvuɛ̃wo ye le gble ɖoɖo kèawo, mìabe ènuvuɛ̃wo ye le xe èmɔ na ènunyuɛ̃ kè Mawu ɖo ɖɛ na mìa.

²⁶Ɖoa, àmè vuɛ̃wo lè dùkɔ̃ nyè mètɔwo dòmè. Wo lè sisiɔ̃, doxa ɖɛ, sìgbè àmè kè tre èmɔ̃ na xèvia nène, vɔ̀a, woawo yaa, wo trena èmɔ̃ na àgbètɔwo.

²⁷Sìgbè lekè xèvi ɖona àja mè nènea, woabe àxuewo ɖɔ ku èfĩnuwo, Ekèa na be wo va kpɔ èci, eye wo va kpɔ ŋusɛ̃.

²⁸Wo va do àmì, eye wo va le klɛ̃. Woabe èvuɛ̃wɔ̀wɔ mu ɖo sɛ̃pe ò. Wo mu sònà ènyà jɔ̀jɔɛ ò, eye wo mu sònà jɔ̀jɔɛ na ècɔɛvi, ne ècɔɛvi tɔ ne jɔ̀ ò. Wo mu xɔ̀nà ènyà ɖo wɔ̀amènɔ̀vi ta ò.

²⁹Tɔhonɔ̀ le biɔ be: “Nyè mu ɖo la dɔ̃ èto na wo, ɖo ekèa ŋutia? Nyè mu la biɔ èhlɔ̃ dùkɔ̃ kèa hatia?

³⁰Ènu jiŋɔ ku ènu nyɔŋu ɖe le jɔ̀ lè ànyigbã a ji.

³¹Gblɔ̃ɖɛtɔwo be ènyàgblɔ̃ɖɛwo nyi àjè sɔ̃ŋu. Mawunɔwo sɔ woa ŋutɔwo be àlèɖùɖu le kpàcɛ̀. Gãkea, dùkɔ̃ nyè le kpɔ jìjɔɛ so ekèa ŋuti; Fifìa ɖe, nukɛ ye mì la wɔ̀, ne vɔ̀vɔnua va ɖo ò?”