Read gen Yeremìa 50 Bible Online

Yeremìa 50 - gen bible

Yeremìa 50

¹Ègbè kè Tɔhonɔ̀ do àsi na Yeremìa, gblɔ̃ɖɛtɔa, so Babɛ̀l be èdù kè lè Kàldea be ànyigbã jia ŋutia ye nyi be:

²“Mì ɖè è gblɔ̃, ne mìa gblɔ̃ ɛ̀ lè dùkɔ̃wo dòmè, mì do àplãŋuga ɖo e ji, ne mìa ɖè è gbèfã! Mì mu gbà wla ɛ̀ ò, vɔ̀a mì gblɔ̃ be: 'Wo la xɔ̀ Babɛ̀l be èdùa, vòdu Bɛl la ɖù ŋùkpɛ̃, yebe legbawo la ɖɔ ku ŋùkpɛ̃, eye wo la gbã yebe èkpetatawo

³Ɖoa, dùkɔ̃ ɖe so àvego gbãnà, la ɖè àhùa kpe na ɛ̀, eye be la trɔ yebe ànyigbã zũ àxue gbãgbã. Àmè ɖekpe mu la gbà nɔ̀ funua ò, ɖoa, àgbètɔwo, èlãwo cã, woa kpata, wo la si jo.

⁴Tɔhonɔ̀ gblɔ̃ be: Gbè ŋua gbèa, gà ŋua mèa, Izràɛlviwo ku Yudàviwo la nɔ̀ àvi ji, wo la nɔ ji Tɔhonɔ̀, woabe Mawu be ŋùmè ɖodu.

⁵Wo la biɔ èmɔ kè yì Ziɔ̀n-dùa mè; funua ye wo la trɔ ŋùmè ɖoɖa, eye wo la va tɛ ɖo Tɔhonɔ̀ ŋuti, la ɖùzò kòkòɖàbì kè wo mu la ŋlɔ̀be ò a, ku ì.

⁶Àlɛ̃ bubuwo ye dùkɔ̃ nyèa va trɔ zũ. Woabe kplɔ̀tɔwo flù wo, eye wo kplɔ̀ wo trã, yì ètowo ji; wo sã lè ètowo ku ètokɔ̃ɛ̃wo tamè, eye wo mu gbà ɖonù woa ŋutɔwo be jɛ̃gbɔ̃pe ò.

⁷Àmè ɖekpekpe kè dogò woa, vũvũna wo; woabe kɛ̃tɔwo gblɔ̃ be: 'Mu nyi miabe àgɔ̀jèje ye be nyi ò, ɖoa, wo wɔ̀ ènuvuɛ̃ ɖo Tɔhonɔ̀, kè ŋutɔ ye nyi woabe èlãnyìpe àdodoe a, Tɔhonɔ̀ kè nyi woa tɔgbewo be ŋùɖoa ŋuti.'

⁸Mì si, jo lè Babɛ̀l! Mì hũ, jo lè Kaldeatɔwo be ànyigbã ji, ne mìa nɔ̀ sìgbè gbɔgbɔɛ kè le kplɔ̀ èlãhaa nène.

⁹Ɖoa, kpɔɖa, mù la fɔ̃ dùkɔ̃ gã ɖewo be èhabɔ̀bɔ, so àvego-nyigbã ji, eye mù la ɖo wo na Babɛ̀l. Wo la ɖo, la kpe àkɔ ku ì. Nène a ye wo la so àvego, la va xɔ̀ ɛ̀. Woabe àŋùwo la nɔ̀ sìgbè àhùawɔ̀tɔ kãlì, kèwo mu dànà àdàgbà ò a nène.

¹⁰Eye wo la hlà Kàldea-nyigbãa keŋu-keŋu. Nène a, àmè kèwo kpata la hlà ɛ̀awo la kpɔ woa tɔ̀ sùsùi ɖe. Tɔhonɔ̀ ye gblɔ̃ ɛ̀.

¹¹Ɖoa, mì kpɔ jìjɔɛ, eye mì sò àyo, mì, àmè kèwo ye ɖo àpe ècrɔ̃nuwo mèawo, mì tìkpo sìgbè ènyìnɔvi kè le gbìdì èlùa nène, eye mì fã sìgbè èsɔsuwo nène.

¹²Vɔ̀a, mìa nɔ̀ ye ɖù ŋùkpɛ̃ ŋutɔ, àmè kè jì mìa ye wo la ɖìgbɔ! E ye la nyi mlɛ̃a le èdùwo dòmè! Zògbè, èkuɖì-nyigbã ku ègbàse, ye be la nyi!

¹³Tɔhonɔ̀ be àdɔ̀mèzea la na be àmè ɖekpe mu la nɔ̀ funua ò, eye be la trɔ zũ àxuedo keŋu-keŋu! Àmè kèwo keŋu la to Babɛ̀l ŋuti va yìawo be ènu la ku, eye wo la do àpa, ne wo kpɔ yebe àbìwo keŋuã.

¹⁴Mì àmè kèwo keŋu dànà àŋùtuawo, mì bla àkpà, trɔ do Babɛ̀l be èdùa gòdòo! Mì dà ɛ̀, eye mì mu gbà ku ŋuzĩzĩ na ɛ̀ ku àŋùti kui ɖèka ŋutɔ cã ò! Ɖoa, e wɔ èvuɛ̃ ɖo Tɔhonɔ̀ ŋuti

¹⁵Mì do àpa ɖo e ta, so àfi sia àfi! E na èta, yebe sɔtiwo ŋɛ̃; yebe èglìwo mù, jè ànyi. Ekè e nyi Tɔhonɔ̀ be èhlɔ̃biɔbiɔa; miawo cã, mì biɔ ɛ̀ èhlɔ̃! Miawo cã, mì wɔ̀ ènu kè be wɔ̀ ku mìa ku ì.

¹⁶Mì crɔ̃ àmè kèwo keŋu dona ènu ɖo àgblè mè, ku ekèwo keŋu zãna àgɔ̃, sɔ yànà ènuawo lè Babɛ̀l-nyigbã ji. Lè èwui mà-ku ŋuzĩzĩ nua, àmè sia àmè ne trɔ yì yebe dùkɔ̃ gbɔ, àmè sia àmè ne si yì ye ŋutɔ be èdù mè.

¹⁷“Izràɛlviwo nyi èlãha kè kã hlɛ̃a, èlãha kè jãŋùtawo nyà ɖo ègbea. Àmè cucugbã kè vũvũ ìa, ye nyi Sirìa be èfìɔa. E yomè a, àmè kè gbã èpu na ɛ̀a, ye nyi Nèbukàdnezà, Babɛ̀l be èfìɔa”.

¹⁸Ekèa ŋuti Tɔhonɔ̀, Ŋusɛ̃kpatatɔ, Izràɛl be Mawu a gblɔ̃ be: “Mù la dɔ̃ èto na Babɛ̀l be èfìɔa ku yebe ànyigbã jitɔwo sìgbè lekè mù dɔ̃ èto na Sirìa be èfìɔa nène.

¹⁹Gãkea, mù la kplɔ̀ Izràɛlviwo gbɔ̀, va woa ŋutɔwo be èlãnyìpe, ne woa ɖù ègbe lè Karmèl-to ku Basàn-to ji. Wo la ɖùnu, la ɖɔpò, lè Efràyim ku Gilead be ètokɔ̃ɛ̃wo tamè.

²⁰Tɔhonɔ̀ gblɔ̃ be: 'Gbè ŋua gbèa, gà ŋua mèa, wo la ji Izràɛlviwo be àgɔ̀jèje, gãkea, ɖekpe mu la nɔ̀ ànyi ò. Wo la ji Yudàviwo be ènuvuɛ̃wo, gãkea, wo mu la kpɔ ɖekpe ò. Ɖoa, mù la sɔ kè, àmè kpɔ̀tɛ kèwo mù gbleɖɛa.'”

²¹Tɔhonɔ̀ gblɔ̃ be: “Mì ɖè àhùa kpe na Mɛratayìm-nyigbã jitɔwo ku àmè kèwo ye lè Pekɔd-dù mèawo! Mì kplɔ̀ wo do! Mì wù wo, ne mìa crɔ̃ wo gbidi! Tɔhonɔ̀ ye gblɔ̃ ɛ̀. Mì wɔ̀ ɖo ègbè kè mù ɖè na mìa keŋu ji!

²²Àhùa be àpawo ku ènugbãgbã gãɖe le ɖì lè ànyigbãa ji

²³Leke wɔ̀ ye ànyigbã bliboa be hãmà gbã, eye be kãkã lekea ò! Leke wɔ̀ ye Babɛ̀l-nyigbãa zũ àxuedo lè dùkɔ̃wo dòmè lekea ò!

²⁴Ɛ̃ɛ, Babɛ̀l! Mù li gàmɔ ɖɛ na wò, eye wò jè e mè, gbɔ̀xue wò va nya! Wo kpɔ wò, eye wo le wò, Ɖoa, wò kpe àkɔ ku Tɔhonɔ̀!

²⁵Tɔhonɔ̀ hũ ènu lè yebe ènujràɖope nu, eye be ɖè yebe àdɔ̀mèze be àhùawɔ̀nuwo to. Ɖoa, Tɔhonɔ̀ Ŋusɛ̃kpatatɔ kè lè ye ɖokoe sia, ɖo èdɔ ɖe la wɔ̀, lè Kaldeatɔwo be ànyigbã ji.

²⁶Mì so dìdìpe be àgowo ji, va bɔ̀ do è, mì hũ ènu lè, yebe àvàwo nu, mì fɔ̀ èdùa mè be ènuwo bɔ̀ èta èta, sìgbè èbli nène; mì crɔ̃ èdùa mètɔwo gbidi, eye àmè ɖekpe mu gbà ci àgbè ò.

²⁷Mì wù woabe ènyìsuviwo kpata, mì kplɔ̀ wo keŋu yì èlãwùpe! Hèlu na wo, ɖoa woabe èŋù kè, woabe ètodɔ̃dɔ̃ be àzãa sù.

²⁸Mì ɖo èto àmè kèwo siawo, àmè kèwo si àhùa so Babɛ̀l-nyigbã jia, wo gblɔ̃ leke Tɔhonɔ̀, miabe Mawu biɔhlɔ̃ ɖoa, e biɔhlɔ̃ ɖo yebe mawuxɔa ta.

²⁹Mì yɔ àŋùtidàtɔwo ɖo Babɛ̀l ŋuti! Mì, àmè kèwo keŋu dànà àŋùtiawo, mì ɖo àsàɖa trɔ do è, eye mì mu gbà ɖè àsi lè àmè ɖe ŋuti, ne bèa si ò. Mì ɖo ènu kèwo be wɔ̀awo tèpe na ɛ̀, mì wɔ̀ ènu kèwo tutu be wɔ̀awo na ɛ̀. Ɖɔa, Tɔhonɔ̀, Izràɛl be Kɔ̀kɔ̀ɛtɔa ye be kpɔ ŋùkumè na.

³⁰Ekèa ŋuti ye woabe ɖèkajɛwo la ku ci èmɔwo dòmè ɖo, eye gbè ŋua gbèa, woabe gbãdãgbãwo keŋu la miɔ̃ ènu.” Tɔhonɔ̀ ye gblɔ̃ ɛ̀.

³¹Tɔhonɔ̀, Ŋusɛ̃kpatatɔa gblɔ̃ be: “Kpɔɖa! Nyè ku wò ye kpe ènyà, èwò, àmè màbùtɔ! Ɖoa, àpo àzã sù! Àpo ètodɔ̃dɔ̃ be gàmè sù!

³²Àmè màbùtɔa la klɛ̃ àfɔ̀, la jè ànyi. Eye àmè ɖekpe mu la fɔ̃ ɛ̀ ɖotè ò. Mù la tɔzò yebe èdùwo. Èzò kèa la fiɔ̃ èdù kèwo keŋu trɔ do èa.”

³³Tɔhonɔ̀, Ŋusɛ̃kpatatɔa gblɔ̃ be; Wo le zĩ Izràɛlviwo ɖo ànyi, sìgbè leke wo le zĩ Yudàviwo cã ɖo ànyia nène. Àmè kèwo ye le zĩ wo ɖɛawo le wo ɖɛ goŋu-goŋu, eye wo gbe be yèwo mu la ɖè àsi lè woa ŋuti ò.

³⁴Gãkea, Izràɛlviwo ku Yudàviwo be hlùɛ̃tɔa yaa, ŋusɛ̃tɔ ye be nyi. Yebe nyikɔ ye nyi Tɔhonɔ̀, Ŋusɛ̃kpatatɔ! E sɔ ŋusɛ̃ la xɔ̀ ènyà ɖo woa ta, àleke be bèa hɛ̃ fàfa va na woabe ànyigbãa, vɔ̀a, bèa na èzĩ ne tɔ̀ lè Babɛ̀ltɔwo dòmè.

³⁵Tɔhonɔ̀ gblɔ̃ be: “Èwui ne ɖo Kaldeatɔwo dòmè! Èwui ne ɖo Babɛ̀ltɔwo dòmè! Ne ɖo woabe àgbònùglawo ku àɖàŋùɖètɔwo dòmè!

³⁶Èwui ne ɖo yebe àjè gblɔ̃ɖɛtɔwo dòmè! Woabe ètagbɔ ne gble! Èwui ne ɖo yebe kãlìwo dòmè! Àdìka so àmè ne titɔ wo!

³⁷Èwui ne ɖo woabe èsɔwo ku woabe àhùakèkewo dòmè! Èwui ne ɖo àgbãtè gbãdãgbã kèwo keŋu so àfi buwo va lè woa mèawo dòmè, Wo ne ɖɔ ɛ̀, sìgbè nyɔ̃nùwo nène. Èwui ne ɖo woabe àdɔ̀kùnuwo dòmè, ne woa hlà wo jo!

³⁸Èku ne ɖì ɖo woabe èsìwo ji, ne woa pu keŋu, ɖoa, legbawo be ànyigbã ye be nyi. Legba kèwo dona ŋùklɛ̃ na wo, kaka wo flùnàa.

³⁹Ekèa ŋuti ye ègbesewo ku ègbevũwo sò àxue ɖo funua, eye àzexewo lè funua ɖo. Àgbètɔ mu la gbà nɔ̀ funua ò. E la ci gbalo, so jìjimè yì jìjimè.

⁴⁰Tɔhonɔ̀ gblɔ̃ be: “Sìgbè lekè Mawu mù Sodɔ̀m ku Gòmɔrà pu ànyi, kpe ɖo èdù kèwo trɔ ɖo woawo ŋuti nènea, nènea ke ye àmè ɖekpe mu la nɔ̀ funu ò. Àmè ɖekpe mu la sò àxue ɖo funua ò.

⁴¹Kpɔɖa! Àhùakɔ̃ ɖe so àvego gbãnà. Dùkɔ̃ gãɖe ku èfìɔ gbogbo ɖewo le fìɔ, so ànyigbãa be nukpòpe gbãnà.

⁴²Wo le àŋùdàti ku èhuãwo ɖo àsi, ètamèsɛ̃tɔwo ye wo nyi, eye wo mu kuna ŋuzĩzĩ na àmè ò. Ekè wo lè woabe èsɔwo ji gbãnàa, wo le ɖì, sìgbè àpù kè le wɔ̀ àdã a nène, wo ɖo, sìgbè ŋusù kèwo gbãnà àhùa-gbe jiawo nène, wo gbãnà, la va ɖè àhùa kpe na wò, èwò, Babɛ̀l nyɔ̃nùvi!

⁴³Ekè Babɛ̀l be èfìɔa sè woabe ènyàa, yebe àlɔ̀wo gbɔjɔ, àgbɔ̃ ciji na ɛ̀, eye be sè veve, sìgbè nyɔ̃nù kè le le èkua nène.

⁴⁴Sìgbè lekè jãŋùta sona Yɔrdàn-tɔ̀ be àvewo mè, liana èto, vana èlãnyìpe kèwo mè àgbè lèa nènea, nènea ke ye, lè àvòmèa, mù la nyà Babɛ̀l, jo lè yebe ànyigbã ji. Àmè kɛ ye nyi àmè cãcã kè mù la sɔ ɖo e nu ò? Ɖo a, àmè kɛ ye la pò àdègbè lè ŋùkɔ̀ na mù ò? Eye, àlɛ̃kplɔ̀tɔ kɛ ye la teŋu nɔ̀tè lè ŋùkɔ̀ na mù ò?”

⁴⁵Ekè a ŋuti a, mì sè ènu kè Tɔhonɔ̀ ɖo ɖo Babɛ̀l ŋuti a, susu kè be ɖo ɖo Kaldeatɔwo be ànyigbãa ŋutia; lè nyàwototo mèa Tɔhonɔ̀ la crɔ̃ woabe èlãnyìpewo gbidi!

⁴⁶Eye, ne àmèwo sè be wo dà àsi ɖo Babɛ̀l jia, ànyigbã bliboa la hũhũ, eye Babɛ̀l be àbòbo la ɖì lè dùkɔ̃wo dòmè.