Read gen Yeremìa 51 Bible Online

Yeremìa 51 - gen bible

Yeremìa 51

¹Tɔhonɔ̀ gblɔ̃ be: “Kpɔɖa, Mù la fɔ̃ ènugbegble be gbɔ̃gbɔ̃ ɖo Babɛ̀l ku Kaldeatɔwo ŋuti[56]

²Mù la ɖo àmèjrowo na Babɛ̀l, ne woa fu ì, sìgbè èlù nène, ne woa kãkã woabe ànyigbãa. Babɛ̀ltɔwo ku Kaldeatɔwo be jɔ̀gbèvuɛ̃ gbèa, wo la kpe àkɔ ku ì, so àfi sia àfi.”

³Mì mu gbà ɖè èmɔ na àŋùtidàtɔ, ne bèa dɔ̃ yebe àŋùdàtia mè ò. Mì mu gbà ɖè èmɔ na ɛ̀, ne bèa bla àkpà cã ò. Mì mu gbà ku ŋuzĩzĩ na woabe ɖèkajɛwo ò. Mì crɔ̃ woabe àhùakɔ̃a gbidi!

⁴Àmè kèwo xɔ̀ èku-biawo la jè ànyi, lè Babɛ̀l-nyigbã ji, wo la wù wo, lè Babɛ̀l be èmɔwo ji,

⁵ɖoa, to e gbɔ be woabe àlɔ̀wo ɖɔ ku àgɔ̀jèje, lè èdùa mè, lè Izràɛl be Kɔ̀kɔ̀ɛtɔa be ŋùmè cã a, Izràɛlviwo ku Yudàviwo be Mawu kè nyi Tɔhonɔ̀ Ŋusɛ̃kpatatɔa mu gble wo ɖɛ ò.

⁶“Mì si jo lè Babɛ̀l! Àmè sia àmè ne hlùɛ̃ yebe àgbè, ne mì mu gbà ci e mè, ɖo Babɛ̀l be èvuɛ̃wo ta ò. Ɛ̃ɛ, Tɔhonɔ̀ be èhlɔ̃biɔ gbè ye ɖo! E la ɖo Babɛ̀ltɔwo be ènu kèwo wo wɔ̀a tèpe, na wo.

⁷Babɛ̀l nɔ̀ sìgbè sìka kogò nène, lè Tɔhonɔ̀ be àlɔ̀ mè. E kpe àhà na ànyigbã bliboa, be nù, eye be mu. Dùkɔ̃wo nù yebe vɛ̃a, eye fifìa[57], wo jè àɖàhùa.

⁸Babɛ̀l jè ànyi kpàtà, lè àvò mè, eye be gbã! Mì na àle ɖo e ta! Mì ji àmì, ne mìa sì do yebe àbìwo ji. Èta mu nyɔ ò a, yebe lãmè la xaya.

⁹'Mi la kè dà ègbe lè Babɛ̀l ŋuti, vɔ̀a, èdɔ̀ màvɔ ye be le le, eye mi mu teŋu dà ɛ̀ na ɛ̀ ò. Ekèa ŋutia, mi ɖè àsi lè e ŋuti, ne àmè sia àmè ne yì àxue, ɖoa, yebe kòjoɖoɖo kɔkɔ, yì tɔ jiŋùkusi. E kɔ yì tɔ kaka[58] lilikpowo mè ke.'

¹⁰Tɔhonɔ̀ sò ènyà jɔ̀jɔɛ na mi. Mì va, mia yì Ziɔ̀n, mia yì gblɔ̃ ènu kèwo keŋu Tɔhonɔ̀, miabe Mawu a wɔ̀ na mia.”

¹¹Mì ɖa àŋùtiawo! Mì kpla àkpoxɔ̀nuawo! Tɔhonɔ̀ fɔ̃ Madìantɔwo be gbɔ̃gbɔ̃, ɖoa, yebe ètaɖojinu ye nyi be ne crɔ̃ Babɛ̀l. Tɔhonɔ̀ la biɔhlɔ̃, e la biɔhlɔ̃ ɖo yebe mawuxɔa ta.

¹²Mì do àplãŋuga ɖo Babɛ̀l be èglìwo ta! Mì na ɖiatɔwo ne sùgbɔ kpe è! Mì ɖo èzãɖiatɔwo ɖɛ! Mì na àmèwo ne doxa! Ɖoa, Tɔhonɔ̀ jro la wɔ̀ ɖo yebe ɖoɖo nu, e jro la wɔ̀ ɖo susu kè be ɖo ɖo Babɛ̀l ŋutia ji.

¹³Mì àmè kèwo ye lè ètɔ̀ gãwo toa, mì àmè kèwo si àdɔ̀kùnuwo lèa, mìabe ènuwuwu ɖo! Hùe kè nu, mì la sɛ̃ ɖoa ɖo.

¹⁴Tɔhonɔ̀, Ŋusɛ̃kpatatɔa tà ye ɖokoe be: 'Mù la na àmèwo la sùgbɔ va cɔ̃ mìa ji gòdò, sìgbè lekè hùesuviwo sùnàgbɔa nène, eye wo la nɔ do jiɖùɖu be àpa ɖo mìa ta.'

¹⁵Àmè kè sɔ yebe àcɛ̀ wɔ̀ ànyigbãa, ekè sɔ àɖàŋù ɖo xixea, e ye sɔ yebe ènunya vlũ jiŋùkusiwo.

¹⁶Ne e ɖè ègbè, sìgbè èji be ègbèɖìɖi nènea, jiŋùkusi be èsìwo blùnà, ku àpa. E nana lilikpowo fɔ̃na so ànyigbã be ènukpòpewo, e ɖona èjikèzò ɖoɖa ku èsìjàja, eye be ɖènà àyawo to, so woabe wlapewo.

¹⁷Ekèa nana be sùkunɔ̀wo kpò àgbètɔwo keŋu nyina ku woabe ènunyawo; legba litɔwo keŋu be legbawo wɔ̀nà ŋùkpɛ̃ na wo, ekè woabe èkpetatawo nyi àjèɖànuwo ɖèɖe, àti kpàkpa kèwo mu la teŋu gbɔ̃ ò a.

¹⁸Wo nyi ènu màɖìnu kèwo ye ɖì kòkòewo, ekèwo la crɔ̃ keŋu, wàlɛbɛ kè wo la ɖo kòjo na woa.

¹⁹Vɔ̀a Mawu kè nyi Yakɔb be ècrɔ̃nua yaa mu lè lekea ò, ɖoa, e ye wɔ̀ ènuwo kpata, kpe ɖo Izràɛl be xòmè kè nyi ye ŋutɔ ye tɔ̀a ŋuti. Tɔhonɔ̀ Ŋusɛ̃kpatatɔa ye nyi yebe nyikɔ.

²⁰Kùŋùdrù, àhùawɔ̀nu ye wò nyi na mù. Èwò ye mù sɔ gbã èdùwo, èwò ye mù sɔ kãkã èfìɔduwo.

²¹Èwò ye mù sɔ crɔ̃ èsɔwo ku èsɔdotɔwo. Èwò ye mù sɔ crɔ̃ àhùakèke ku woa kùtɔwo.

²²Èwò ye mù sɔ crɔ̃ ŋusù ku nyɔ̃nùwo, èwò ye mù sɔ crɔ̃ àmè sĩsĩwo ku vifɛ̃wo. Èwò ye mù sɔ crɔ̃ ɖèkajɛ ku tùgbɛ̀jɛwo.

²³Èwò ye mù sɔ crɔ̃ èlãkplɔ̀tɔwo ku èlãhawo, èwò ye mù sɔ crɔ̃ àgblèdàtɔwo ku woabe èdɔwɔ̀lãwo, èwò ye mù sɔ crɔ̃ èdùjikpɔtɔwo ku èdùjiɖùtɔwo.

²⁴Mìawo ŋutɔ, mìabe ŋùku mè ye mù la ɖo èvuɛ̃ kèwo keŋu Babɛ̀ltɔwo ku àmè kèwo nɔ̀nà Kàldeawo wɔ̀ lè Ziɔ̀n-nyigbã jia tèpe na wo lè.” Tɔhonɔ̀ ye gblɔ̃ ɛ̀.

²⁵Tɔhonɔ̀ gblɔ̃ be: “Kpɔɖa, nyè ku wò ye ɖo ènyà. Èwò, èto kè gblena ènua, èwò kè gble ànyigbã bliboa. Mù la vlũ àlɔ̀ ɖo ŋuti wò, la mlì wò, so àkpãwo tamè, la sɔ wò wɔ̀ èzòka be èto,

²⁶àleke be wo mu la gbà sɔ àpo èkpe ɖekpe, sɔ wɔ̀ koŋùjikpe ke ò. Nène a ke ye wo mu la gbà sɔ àpo èkpe ɖekpe sɔ wɔ̀ dodoe ke ò. Ɖoa, wò la ci àxue toto tɛ̀gbɛ̀dò!” Tɔhonɔ̀ ye gblɔ̃ ɛ̀.

²⁷Mì do àplãŋuga ɖo ànyigbãa ji. Mì ku èkpɛ̃ lè dùkɔ̃wo dòmè! Mì bla àkpà na dùkɔ̃wo, ne woa kpe àhùa ku Babɛ̀l! Mì yɔ èfìɔdu kèawo va ɖo e ŋuti: Àrarat, Minì, Askenàz be èfìɔduwo. Mì cã àhùagbèɖètɔ ɖo e ŋuti. Mì dɔ̃ èsɔ sùgbɔ sìgbè hùesuviwo nène, ɖo e ŋuti.

²⁸Mì bla àkpà na dùkɔ̃wo, ne woa kpe àhùa ku ì. Mì kpe Madìan be èfìɔwo, mì kpe woabe èdùjiɖùtɔwo ku woabe àgbònùglawo, ku èdù kèwo keŋu wo kpà àcɛ̀ naawo mètɔwo va!

²⁹Ànyigbã a hũhũ eye be pò tìtìtì, ɖoa, ènu kèwo Tɔhonɔ̀ ɖo ɖo Babɛ̀l ŋutiawo le jɔ̀, ne Babɛ̀l be ànyigbãa ne trɔ zũ àxuedo, àleke be àmè ɖe mu gbà teŋu nɔ̀ e ji ò.

³⁰Babɛ̀l be kãlìwo na èta, eye wo ci woabe àgbògbòwo mè. Woabe ŋusɛ̃ gbɔjɔ, eye wo ci sìgbè nyɔ̃nùwo nène. Wo tɔzɔ̀ èdùa mètɔwo be nɔ̀pewo, eye wo ŋɛ̃ woabe àgbowo be gàkpowo

³¹Àŋɛ̀dotɔ ɖe kplɔ̀ àŋɛ̀dotɔ bu do, eye àmèdɔ̃dɔ̃ ɖe lè àmèdɔ̃dɔ̃ bu yomè, ne woa yì gblɔ̃ na Babɛ̀l be èfìɔa be wo le yebe èdù bliboa,

³²be wo xa ètɔ̀sòpea, be wo tɔzò àplaawo, be gbãdãgbãawo si, eye wo kã hlɛ̃.”

³³Tɔhonɔ̀ Ŋusɛ̃kpatatɔa, Izràɛl be Mawu a gblɔ̃ be: “Babɛ̀l be nyɔ̃nùvia[59] lè sìgbè èlùpòpe nène, lè hùe kè nu, wo tùnà àfɔ̀ e ji, sɔ jɔ̀nà e jia nène. Eyomè, zãɖea, nuku yàya hùenu la ɖo na ɛ̀.”

³⁴“Nèbukàdnezà, Babɛ̀l be èfìɔa vũvũ mi, e na mi titɔ, eye be na mi trɔ zũ ègò gbalo. Sìgbè lekè èhɔ̃ mì nà ènu nènea, e sɔ mi mì. E sɔ miabe ènu viviwo ɖɔ yebe pòdo, eye be nyà mi ɖo ègbe.

³⁵Ziɔ̀n nyɔ̃nù ne gblɔ̃ be: “Ètamè kè wo sɛ̃ ɖo ŋutilã nyè ŋutia, ne trɔ jè Babɛ̀l ji.” Yèruzàlɛmtɔwo ne gblɔ̃ be: “Miabe èhũ ne trɔ jè Kaldeatɔwo ji.”

³⁶Ekèa ŋutia, Tɔhonɔ̀ gblɔ̃ be: “Kpɔɖa! Mù la xɔ̀ ènyà ɖo ta wò, eye mù la biɔhlɔ̃ na wò. Mù la pu yebe ètɔ̀wo, eye mù la na yebe èsìdowo la pu.

³⁷Babɛ̀l la trɔ zũ èglìkpowo ɖèɖe, e la nyi gbètewo be nɔ̀pe, e la nyi ènunyɔŋu ku àlɔmèɖènu, tèpe kè àmè ɖekpe mu la nɔ̀ ò a.

³⁸Èdùa mètɔwo kpata le ɖè ègbè, sìgbè jãŋùtawo nène, wo le fã, sìgbè ègbemèlãwo nène.

³⁹Ne èzò ɖo lãmè na wo keŋu vɔ̀a, mù la wɔ̀ ènu ɖùɖu na wo, ne woa sɔ ɖù àzã, eye mù la na wo àhà, wo la mu, àleke be wo la kònu, do àpa, e yomè a, wo la ɖo àlɔ̃ mè, ne wo mu gbà fɔ̃ gbèɖe ke ò.” Tɔhonɔ̀ ye gblɔ̃ ɛ̀.

⁴⁰Mù la kplɔ̀ wo yì wùwùgbe, sìgbè àlɛ̃wo, sìgbè àgbòwo, sìgbè ègbɔsuwo, lè yì èlãwùpe nène.

⁴¹Leke wɔ̀ ò! Àlɔ̀ sù Sesàk ji! Sesàk kè nyi ànyigbã bliboa be àdègbè pò nupoa, wo xe è! Ènunyɔŋu kɛ ye Babɛ̀l nyi, lè dùkɔ̃wo dòmè lekea ò!

⁴²Àpù la fɔ̃ ɖo Babɛ̀l ji, eye yebe àsrɔ̀kewo be àdã la cɔ̃ e ji.

⁴³Yebe èdùwo la trɔ èglìkpowo, wo la zũ zògbè-nyigbã pupuwo, ànyigbã kèwo ji àmè ɖekpe mu lè ò a ànyigbã kèwo ji àmè ɖekpe mu la to ò a.

⁴⁴Mù la dɔ̃ èto na vòdu Bɛl lè Babɛ̀l, eye be la tru ènu kè be mìa. Dùkɔ̃wo mu la gbà nɔ tɔ̀zĩ ɖo e ŋuti ke ò. Ɛ̃ɛ, Babɛ̀l be èglìwo la mù!

⁴⁵Mì, àmè kèwo nyi tɔ̀ nyèawo, mì to lè èdùa mè! Àmè sia àmè ne hlùɛ̃ yebe àgbè, lè Tɔhonɔ̀ be àdɔ̀mèze hɛli-hɛlia nu.

⁴⁶Àgbɔ̃ mu gbà ciji na mì, àlo, àdìka ne sò mì, ne mì le sè ènyà kèwo ye le ɖì, lè èdùa mè ò. Ne ènyà ɖe ɖì èpè kèa mèa, èbu la ɖì, lè kè kplɔ̀ ɛ̀ do a mè. Èhlɔ̃dãdã lè èdùa mè be ènyà; ètamèsɛ̃tɔ ɖe kè nyà ètamèsɛ̃tɔ bu joa be ènyà.

⁴⁷Ɖo kpɔɖaa, ŋùkèkèwo gbãnà, ekè mù la dɔ̃ èto na Babɛ̀l be legbawo godo! Wo la dovlo yebe ànyigbã bliboa, eye yebe àmè kèwo ye la xɔ̀ àbìawo la ci e mè.

⁴⁸Wàlɛbɛ ŋua, ye jiŋùkusi ku ànyigbã kudo ènu kèwo keŋu lè woa mèawo la to èjiɖùɖu be èhà ɖoɖa, ɖo Babɛ̀l ŋuti. Nyàwo ye be nyi be àvego ye ènugbãtɔwo la so, la va ɖè àhùa kpe na ɛ̀.” Tɔhonɔ̀ ye gblɔ̃ ɛ̀.

⁴⁹“Ànyigbã bliboa jitɔwo ci àhùa, ɖo Babɛ̀l ta. Fifìa, Babɛ̀l cã ɖo la ci àhùa, ɖo Izràɛlvi kèwo ye ci àhùaawo ta[60].

⁵⁰Mì, àmè kèwo ye si lè èwui nua, mì jo, mì mu gbà dɔ̃ àfɔ̀ ò! Mì nɔ ɖoŋù Tɔhonɔ̀, ne mì lè dìdìpe-nyigbã jia, eye mìa nɔ bù Yèruzàlɛm ŋuti.”

⁵¹“Wo dovlo mi, ɖoa, wo zũ mi, eye ŋùkpɛ̃ cɔ̃ miabe ŋùmè, ekè èdù bu mètɔwo ɖo kɔ̀kɔ̀ɛpea, lè Tɔhonɔ̀ be àxuea mèa.”

⁵²Gãkea, Tɔhonɔ̀ gblɔ̃ be: “Ŋùkèkèwo gbãnà, ekè mù la dɔ̃ èto na woabe legbawo, eye àmè kèwo xɔ̀ àbìawo la nɔ ŋɛ̃ lè ànyigbã bliboa ji.

⁵³Eye ne Babɛ̀l yì kaka jiŋùkusi ŋutɔ cã a, eye be na yebe àgbògbò gãwo gbà sɛ̃ŋu kpe è ŋutɔ cã a, mù la dɔ̃ ènu gbãtɔwo ɖoɖa ɛ̀.” Tɔhonɔ̀ ye gblɔ̃ ɛ̀.

⁵⁴Àpadodo le ɖì so Babɛ̀l, ènu gbãgbã gãɖe be ègbè le ɖì, so Kaldeatɔwo be ànyigbã ji.

⁵⁵Ɛ̃ɛ, Tɔhonɔ̀ ye le crɔ̃ Babɛ̀l, eye be la ci yebe àpa dodowo nu. Kɛ̃tɔwo be àhùakɔ̃wo la lũ va, sìgbè àsrɔ̀ke gãwo nène, eye woabe ègbèwo be ɖìɖi ye mi la nɔ sè.

⁵⁶Ènugbãtɔ la va ɖo Babɛ̀l ŋuti, la le Babɛ̀l be kãlìwo, la ŋɛ̃ woabe àŋùdàtiwo. Ɖoa, ènutèpeɖotɔ be Mawu ye Tɔhonɔ̀ nyi. E la ɖo ènuwo tèpe keŋu-keŋu

⁵⁷“Mù la na yebe àgbònùglawo ku yebe àɖàŋùɖètɔwo la mu àhà, sìgbè lekè yebe èdùjiɖùtɔwo ku àmè ŋùkutawo cã la mu ì, gbàkudo yebe kãlìwo keŋuã nène. Wo la yì àlɔ̃mè gbidi, eye wo mu la gbà fɔ̃ gbèɖe ò!” Èfìɔ kè be nyikɔ ye nyi Tɔhonɔ̀a ye gblɔ̃ ɛ̀.

⁵⁸Tɔhonɔ̀, Ŋusɛ̃kpatatɔ a gblɔ̃ be: “Babɛ̀l be èglì tìtriawo la mù pu ànyi, so ègũ mè ke! Eye wo la tɔzò yebe àgbo kɔ yì jiawo. Dùkɔ̃awo wɔ̀ èdɔ ɖo àya mè. Woabe àmèhawo jè àgbàgba na èzò.”

⁵⁹Ègbè kè Yeremìa, gblɔ̃ɖɛtɔa do àsi na èdɔwɔ̀tɔwo jikpɔtɔ, Serayà kè nyi Neriyà, Màseyà be èvia be èvi, wàlɛbɛ kè be yì Babɛ̀l ku Sedekìa, Yudà be èfìɔa, lè Sedekìa be èfìɔɖùɖu be èpè ènègɔ̃a mèa ye nyi ekèa.

⁶⁰Yeremìa ŋlɔ̀ jɔ̀gbèvuɛ̃ kèwo la jɔ̀ ɖo Babɛ̀l jiawo ɖo èlãgbàze ji. E ŋlɔ̀ ènu ŋuawo keŋu ɖo èlãgbàze ji.

⁶¹Yeremìa gblɔ̃ na Serayà be: “Ne wò yì Babɛ̀l nyigbã jia, kpɔ e gbɔ be wòa hlɛ̃ ènyà kèawo keŋu ne woa sè.

⁶²Ekèa yomè a, wò la gblɔ̃ be: “Aò, Tɔhonɔ̀! Wò gblɔ̃ be yè la crɔ̃ tèpe kèa, àleke be àgbètɔ, èlã cã mu la nɔ̀ fikèa ò.”

⁶³Ne wò hlɛ̃ ènyà kèa vɔ̀a, bla èkpe ɖo e ŋuti, ne wòa dà ɛ̀ ɖoɖa Efratà be ètɔ̀a mè.

⁶⁴Ekèa yomè a, gblɔ̃ be: “Lekea ye Babɛ̀l la gũ, ne mu gbà fɔ̃ gbèɖe ke ò, ɖo jɔ̀gbèvuɛ̃ kèwo mù la hɛ̃ va e jiawo ŋuti. Lekea ye yebe dùkɔ̃wo la crɔ̃.” Fikèa ye Yeremìa be ènyàgblɔ̃ɖɛawo vɔ̀ ɖo.