Read gen Yeremìa 52 Bible Online

Yeremìa 52 - gen bible

Yeremìa 52

¹Sedekìa ɖo èpè woeɖèka. Ènɔa be nyikɔ ye nyi Hàmutàl; e nyi Yeremìa kè so Libnà be èvi ŋusù.

²E wɔ̀ ènu bàɖà lè Tɔhonɔ̀ be ŋùmè, sìgbè leke Yekonìa, wɔ̀a nène.

³Ènu kèwo keŋu jɔ̀ lè Yèruzàlɛm ku Yudà-nyigbã jiawo do àdɔ̀mèze na Tɔhonɔ̀, àleke be e sɔ wo dãŋùgbe boo. E va va e mè be Sedekìa jè àgla ɖo Babɛ̀l be èfìɔa ŋuti.

⁴Lè Sedekìa be èfìɔɖùɖu be èpè àsiɖèkɛgɔ̃a be wètri èwogɔ̃a be ŋùkèkè èwogɔ̃a gbèa, Nèbukàdnezà, Babɛ̀l be èfìɔa kplɔ̀ yebe àhùakɔ̃ bliboa, sɔ zɔ̃ ɖo Yèruzàlɛm be èdùa ji. Wo xa ɛ̀, eye wo zĩ e ji. Wo do àsàɖa trɔ do è.

⁵Wo xɔ̀ èdùa, eye wo zĩ e ji, kaka na èfìɔ Sedekìa be èfìɔɖùɖu be èpè woeɖèkagɔ̃a mè.

⁶Lè wètri ènègɔ̃a be ŋùkèkè àsiɖèkɛgɔ̃a jia, àdɔ̀wùamè va sɛ̃ŋu lè èdùa mè, àleke be ènu ɖùɖu mu gbà va lè, ne àmèwo ne ɖù ò.

⁷Ekèa na be wo ŋɔ èdùa be èglìa, eye àhùakɔ̃ bliboa si jo. To e gbɔ be Babɛ̀ltɔwo trɔ do èdùa cã a, gbãdãgbãwo to àgbo kè lè èglìkpa èvè dòmè, lè èfìɔ be àyaxɔ̀xɔ be àbɔ mèa gbɔ, jo, èzã mè. Wo si, tùtà Àrabà be ànyigbã ji,

⁸vɔ̀a, Kaldeatɔwo be àhùakɔ̃a nyà èfìɔ Sedekìa ɖo nu, eye wo va yì xe è, le Yerikò be ànyigbã gbàjàwo ji. Yebe gbãdãgbãwo keŋu kã hlɛ̃, lè e ŋuti,

⁹eye àsi jè èfìɔ Sedekìa ji. Wo kplɔ̀ ɛ̀ yì na Babɛ̀l be èfìɔa, lè Riblà, lè Hamat-nyigbã ji; funua ye be ɖo kòjo na ɛ̀ lè.

¹⁰Lè Riblàa, Babɛ̀l be èfìɔa na wo sò èta na Sedekìa be èviwo, lè Sedekìa ŋutɔ be ŋùmè. E na wo wù Yudà be àgbònùglawo cã keŋu-keŋu.

¹¹Ekèa yomè a, e gbã ŋùkuviwo na Sedekìa, eye be na wo sɔ gàjɛ̃ be kɔ̀sɔ̀ kɔsɔ bla ɛ̀, eye be kplɔ̀ ɛ̀ yì Babɛ̀l, sɔ do ègàkpa mè, kaka sɔ na yebe èku gbè.

¹²Lè Nèbukàdnezà be èfìɔɖùɖu be èpè woeàsiɖèkɛgɔ̃a be wètri àtɔ̃gɔ̃a be ŋùkèkè èwogɔ̃a gbèa, Nebuzàradàn, èfìɔdua be ɖiatɔwo be àhùagbèɖètɔ kè nɔ̀nà Babɛ̀l-fìɔa be ŋùkɔ̀a va Yèruzàlɛm.

¹³E tɔzò Tɔhonɔ̀ be mawuxɔa, èfìɔsaa, ku àxue kèwo keŋu lè Yèruzàlɛm be èdùa mèa. E tɔzò èxɔ̀ gãwo kpata.

¹⁴Kaldeatɔwo be àhùakɔ̃ blibo kè lè èfìɔdua be ɖiatɔwo be àhùagbèɖètɔa be èse gɔ̃mèa mù èglìkpa kèwo keŋu pòxla do Yèruzàlɛm be èdùawo pu ànyi.

¹⁵Nebuzàradàn, ɖiatɔwo be àhùagbèɖètɔa kplɔ̀ èdùamètɔ kèwo nyi wɔ̀amènɔ̀ wuawo dòmètɔ ɖewo ku àmè kèwo kpɔ̀tɔ̀ ɖo èdùa mèawo kudo àlɔ̀nu-dɔwɔ̀tɔ kpɔ̀tɛawo gbàkudo àmè kèwo ye jo èta na Babɛ̀l be èfìɔa keŋu jo àhùale.

¹⁶Vɔ̀a, Nebuzàradàn gble àmè kpɔ̀tɛ kèwo nyi wɔ̀amènɔ̀ wu, lè èdùa mèawo ɖɛ, ne woa nɔ dè àgblèwo ku vɛ̃-gblewo.

¹⁷Kaldeatɔwo gbã Tɔhonɔ̀ be àxuea be gàjɛ̃ sɔtiawo, gɔ̃mèɖonu kèwo wo ɖènaawo ku gàjɛ̃ be àdàwa kèwo ye lè Tɔhonɔ̀ be àxue mèawo, eye wo kɔ gàjɛ̃awo keŋu jo yì Babɛ̀l.

¹⁸Wo fɔ̀ èzewo, sɔfìwo, kàklawo, gàtiwo, ètrewo, àgbãawo ku gàjɛ̃nu kèwo keŋu wo zãna na sɛ̃sɛ̃, lè mawuxɔa mèawo cã jo.

¹⁹Èfìɔdua be ɖiatɔwo be àhùagbèɖètɔa fɔ̀ àyawawo, lififiɔ̃nuwo, èhũwuwu be àgbãwo, èzewo, kãligbɛ̃tiwo, àgbãwo ku ètre kèwo wo zãna na àhà be vɔ̀sawo, ènu kèwo keŋu wo sɔ sìka àku-àku ku klòsalò àku-àku wɔ̀awo jo.

²⁰Gàjɛ̃ kè wo kpɔ lè mawuxɔa be sɔti èvèawo mèa, ekè wo kpɔ lè àdàwa a mèa, ekè wo kpɔ lè gàjɛ̃ be ènyì-su be tata woèvè kèwo ye lè e gɔ̃mèa mèa, ekè wo kpɔ lè gɔ̃mèɖonu kè wo ɖènà, kè Salomɔ̀n wɔ̀ ɖo Tɔhonɔ̀ be àxuea mèa, gàjɛ̃ be ènu kèawo keŋu wu dàda.

²¹Sɔti ɖe sia ɖe yìji àbɔglìgo woènyi, eye èkà àbɔglìgo woèvè ye la trɔ do è. Ɖe sia ɖe be tìtri mè nyi dèglèfèsu ènè be dìdi mè. Èmɔ lè dòdò mè na ɛ̀.

²²Gàjɛ̃ be èta kè wo wɔ̀ na sɔti ɖe sia ɖe a yìji àbɔglìgo àtɔ̃, eye wo ɖo àcɔ na ɛ̀ ku ènutata kè wo gbĩ ku yòvobòɖà trɔ do gòdò; ekèa keŋu nyi gàjɛ̃ be ènutata. Sɔti kpɔ̀tɛ kèwo ŋuti yòvobòɖàwo gbà lèawo cã nyi ɖèka ŋùku mè.

²³Yòvobòɖà tata kèwo wo lɔ̃ trɔdoawo lè èkà èvè ci woeàdɛ̃, eye woa kpata kpedoawo nyi yòvobòɖà èkà èvè takpo.

²⁴Ɖiatɔwo be àhùagbèɖètɔa kplɔ̀ Sereyà, hũbonɔ gãa, Sèfanìa, hũbonɔ kè kplɔ̀ ɛ̀ do a ku àgboɖiatɔ ètɔ̃awo àhùale.

²⁵Lè àmè kèwo ye gbà lè èdùa mèawo dòmèa, e gbà le èdɔnunɔ̀tɔ kè kpɔna àhùawɔ̀tɔwo jia, kpe ɖo èfìɔa be àɖàŋùɖètɔ adrɛ̃ ŋuti. E le ènuŋlɔ̀tɔ kè lè ŋùkɔ̀ na àmè kèwo kpɔna èdùa mètɔwo be gbãdãgbãwo xɔ̀xɔ be èdɔa jia cã, kpe ɖo ŋusù èkà takpo kèwo wɔ̀nà èdɔ ku ì, kèwo wo kpɔ lè èdùa mèawo ŋuti.

²⁶Nebuzàradàn, ɖiatɔwo be àhùagbèɖètɔa le woawo keŋu, eye be kplɔ̀ wo yì na Babɛ̀l be èfìɔa lè Riblà.

²⁷Lè Riblà funua, èfìɔa na wo sò èta lè woa nu, lè Hamàt be ànyigbã ji. Nène a ye wo kplɔ̀ Yudàviwo yì gàtɔnugbe, lè àmè buwo dea yeŋu.

²⁸Àmè kèwo Nèbukàdnezà kplɔ̀ yì gàtɔnugbea be hɛ̃hlɛ̃ mè ye nyi: Lè èpè adrɛ̃gɔ̃ a mèa, e kplɔ̀ Yudàvi hotu ɖèka èkà èwì vɔ àtɔ̃ takpo ci ètɔ̃ (3023).

²⁹Lè Nèbukàdnezà be èpè woènyigɔ̃a mèa, e kplɔ̀ àgbètɔ àlɔ̀ ènyi gbã vɔ èvè (832) jo lè Yèruzàlɛm.

³⁰Lè yebe èpè èwìvɔ àtɔ̃gɔ̃a mèa, Nebuzàradàn, ɖiatɔwo be àhùagbèɖètɔa kplɔ̀ Yudàvi àlɔ̀ adrɛ̃ èkà ci àtɔ̃ (745) yì gàtɔnugbe. Àmèawo kpata lè àgbètɔ hotu èvè àlɔ̀ àdɛ̃ (4600).

³¹Kè wo kplɔ̀ Yudà be èfìɔ yì gàtɔnugbe be èpè ègbãvɔ adrɛ̃gɔ̃ a mè, lè èpè kè mè Evil-Mɛridàk ɖùfìɔ lè Babɛ̀l nyigbã jia, èfìɔa ɖè àsi lè Yehoyakìm, Yudà be èfìɔa ŋuti, eye be ɖè è to lè ègàkpa mè, lè wètri woèvègɔ̃a be ŋùkèkè wìvɔàtɔ̃gɔ̃a gbè.

³²E sɔ àdɔ̀mè nyuɛ̃ pò nupo ku ì, eye be na ɛ̀ bùbu tèpe kè pòta na èfìɔ kpɔ̀tɛ kèwo kpata kpena ɖo Babɛ̀l be èfìɔa ŋuti lè Babɛ̀l nyigbã jia.

³³E na Yehoyakìm ɖè yebe ègàmènɔ̀tɔ be àwùwo ɖɛ, eye be na Yehoyakìm ɖùnà ènu lè èfìɔa be èkplɔ̃ ŋuti, lè yebe àgbènɔ̀-zã kpɔ̀tɛawo keŋu mè.

³⁴Babɛ̀l be èfìɔa kpɔ Yehoyakìm ji, e lenabè na ɛ̀, eye be nana ɛ̀, gbè sia gbè be ènu kèwo jè na yebe èhiãwo, kaka yì ɖo yebe èku gbè.