Read gen Yeremìa 6 Bible Online

Yeremìa 6 - gen bible

Yeremìa 6

¹Bɛnyamìn be jìjimèviwo, mì si jo lè Yèruzàlɛm, ne mìa yì bè! Mì ku èkpɛ̃ lè Tekoa-dùa mè! Mì tù àplãŋuga ɖo Bɛt-Kerɛ̀m! Ɖoa jɔ̀gbèvuɛ̃ so èvègo[12] gbãnà mìa ji. Gbledo gã ɖe ŋutɔ ye gbãnà.

²Ziɔ̀n be tùgbɛ̀jɛ àgbòjãjã kè nya kpɔkpɔ kakaa, mù la crɔ̃ ɛ̀!

³Èlãkplɔ̀tɔwo, la kplɔ̀ woabe èlãhawo va tù ì. Wò la tù woabe gòxɔwo trɔ do è, eye àmè sia àmè la nɔ kã lè yebe èlãnyìpea ŋuti, la nɔ ɖù.

⁴Mì jràɖo, ne mìa sɔ àhùa yì kpe è! Mì so, mìa kpe àhùa ku ì, dɔ̃ŋùkusu jàse! Bàbà na mi, ɖoa èwè le cɔ̃ vɔ̀, eye fìɛ̃si kplɔ̀ vìvìti gbãnà vɔ̀.

⁵Ɛ̃ɛ, mì so, ne mia ɖè àhùa kpe è, lè èzãa mè, ne mia gbã yebe àgbògbòwo!

⁶Tɔhonɔ̀ Ŋusɛ̃kpatatɔa gblɔ̃ be: “Mì sò àtiwo, ne mìa tɔ̃ èkpa trɔ do Yèruzàlɛm. Ɖoa, èdù kèa ye ɖo la xɔ̀ ètodɔ̃, e ɖɔ ku àmè tɛ ɖo ànyi sɔ̃ŋu.

⁷Sìgbè lekè èsìdo lena fàfa ɖo èsì mè ɖɛ nènea, nènea ke ye be lenabè na yebe èvuɛ̃jɔ̀jɔa yeŋu. Àleke be, èhũnyànyrã ku gbegblewo le blù lè èdù kèa mè. Ekèawo nyi yebe èdɔ̀lele ku àbì kèwo ye lè ŋùku nyè mèa.

⁸Yèruzàlɛm, trɔ èdɛ̃! Ne mu nyi nène ò a, èkla nyè la trɔ lè yo wò mè, eye mù la trɔ ànyigbã wòa zũ zògbè, àleke be àmè ɖekpe mu la gbà teŋu nɔ̀ e ji ò!

⁹Tɔhonɔ̀ Ŋusɛ̃kpatatɔa ɖè ègbè be: “Mì kɛ̃ Izràɛlvi kèwo ye kpɔ̀tɔ̀a ŋutɔ cã, kui ɖèka, kui ɖèka, sìgbè vɛ̃kuwo nène! Àlɔ̀ ne gbìgbɔ̀ to vɛ̃kaawo ŋuti, sìgbè lekè vɛ̃ku yàtɔa bɔ̀nà vɛ̃-ku awo nène.”

¹⁰Àmè kɛ ye mù la pò nupo na, ne bèa nyi ɖaseɖùtɔ nyè ò? Àmè kɛ ye la ɖo èto mù ò? Kpɔɖa, woabe ètowo trì, eye wo nyi àtɔ̀tɔ̀nɔ̀wo sɔ̃ŋu, àleke be wo mu gbà teŋu sè ènu ò. Tɔhonɔ̀ be ènyàa le tɔ èto mè na wo. Mu nyana sèse na wo ò.

¹¹“Ekèa ŋuti ye Tɔhonɔ̀ be àdɔ̀mèze ɖɔ mù fuu, eye, e tì mù be ma le è ɖo àdɔ̀mè.” Kɔ̀ ɛ̀ ɖo ɖèviwo ji lè èmɔ̃ ji, kɔ̀ ɛ̀ ɖo ɖèkajɛ ku tùgbɛ̀jɛwo be èha ji. Ɖoa, ne hùenua sùa, wo la kplɔ̀ èsrɔ̃ ku èsrɔ̃tɔwo keŋu àhùale. Wo la kplɔ̀ àmè sĩsĩwo keŋu, nyagãwo ku tɔgbe kukuiwo keŋu.

¹²Woabe àxuewo la trɔ zũ àmè buwo tɔ̀. Woabe àgblèwo ku woa-srɔ̃ cã la trɔ zũ àmè buwo tɔ̀, ɖoa, mù la do àlɔ̀ ɖoɖa dùkɔ̃ kèa gbɔ. Mù la do àlɔ̀ ɖoɖa àmè kèwo lè ànyigbã kèa jiawo gbɔ.” Tɔhonɔ̀ ye gblɔ̃ ɛ̀.

¹³Woa kpata, so ɖèvi ji, kaka va kɔ̀ ɖo àmègãxo ji, èfĩnu ku àlè bàɖà ɖùɖù kpò ye jɔ̀nàjì na wo! Gblɔ̃ɖɛtɔwo ku hũbonɔwo keŋu, àmèflùtɔwo ɖèɖe kpò ye wo nyi.

¹⁴Wo le bla dùkɔ̃ nyèa be àbì, sìgbè ɖe ye àbìa mu lòlò ò nène. Wo le gblɔ̃ be: 'Ŋuti fàfa na mì! Ŋuti fàfa na mì!' Wàlɛbɛ kè wo nya be ŋuti fàfa ɖekpe mu lè òa.

¹⁵“Èŋù le kpɛ̃ wo ɖo woabe ènu nyɔŋuawo ŋutia? Gbèɖe! Ŋùkpɛ̃ ɖekpe mu lè ŋùmè na wo ò. Wo mu jro la nya ènu kè wo yɔna be ŋùkpɛ̃a ŋutɔ cã ò! Ekèa ŋutia, wo la ci àmè ci àhùawo dòmè. Wo la ci ànyigbã, wàlɛbɛ kè mù la dɔ̃ èto na woa!” Tɔhonɔ̀ ye gblɔ̃ ɛ̀.

¹⁶Tɔhonɔ̀ gblɔ̃ be: “Mì nɔ̀tè lè èmɔ̃wo ji, ne mìa kpɔ; Mì biɔ blèmà be èmɔ̃wo ta sè be: Ekɛ ye nyi nyuɛ̃ tɔa màa. Ne mì zɔ̃ e jia, mì la kpɔ gbɔ̃jɛ̃ na mìabe èklawo. Vɔ̀a, mì gblɔ̃ be: “Mi mu la zɔ̃ e ji ò!”

¹⁷Mù ɖo ɖiatɔwo, ne woa nɔ kpɔ mìa ji. Mù gblɔ̃ na wo be: “Mì ɖo èto èkpɛ̃a be ɖìɖi!” Vɔ̀a, wo ɖo e ŋuti na mù be: “Mi mu la ɖo èto ò!”

¹⁸Ekèa ŋutia, dùkɔ̃wo, mì sè, eye èwò, àmèhaa cã, sè ènu kè la va jɔ̀, lè dùkɔ̃ nyè dòmèa.

¹⁹Èwò, ànyigbã a sè, be mù jro la hɛ̃ àfɔ̀ku va dùkɔ̃ kèa ji. Àfɔ̀ku kè le nyi ye ŋutɔ be èvuɛ̃ ɖoɖo be fɛ̃tua, ɖoa, mu sɔ èɖe lè àpe ènyà mè ò, eye be gbe àpe ɖoɖowo ku ènufiɔfiɔwo.

²⁰Nukɛ ye mù la sɔ lifi kè wo hɛ̃ so Sabà vaa, wɔ̀ ò? Nukɛ ye mù la sɔ ègbe xɔ̃xũɛ fiofio kè so dìdìpe-nyigbã jia wɔ̀ ò? Mìabe ènumème vɔ̀sawo mu jè ŋùmè na mù ò, eye mìabe àkpedodo vɔ̀sawo mu jɔ̀jì na mù ò.”

²¹Ekèa ŋuti ye Tɔhonɔ̀ gblɔ̃ be: “Mù la ɖo àfɔ̀klɛ̃nuwo ŋùkɔ̀ na dùkɔ̃ kèa. Ètɔwo ku èviwo la klɛ̃ wo, la jè ànyi. Àxuekɔ̀tɔwo ku èxlɔ̃wo la jè woa ji, la crɔ̃.”

²²Tɔhonɔ̀ gbà gblɔ̃ be: “Kpɔɖa! Àhùakɔ̃ ɖe so èvègo-nyigbã ji, gbãnà. Dùkɔ̃ gã ɖe le blù, so ànyigbã be ènukpòpe gbãnà.

²³Wo le àŋùtu ku àŋùtiwo ɖo àsi. Wo nyrãku, eye wo mu kuna ŋuzĩzĩ na àmè ò. Kè wo lè woabe èsɔwo ji gbãnàa, ekèa le ɖì sìgbè àpù kè le wɔ̀ àdãa nène. Wo bla àkpà, sìgbè ŋusù kèwo le yì àhùawo nène, la va kpe àhùa ku wò, Aò, èwò, Ziɔ̀n nyɔ̃nùvi!”

²⁴Ekè mi sè woabe nyikɔa, Miabe àbɔwo mè gbɔjɔ, àkpɔ̃ ɖɔ mi fuu, sìgbè nyɔ̃nù kèwo le le èku nène.

²⁵Ziɔ̀n nyɔ̃nùvi, mù gbà to yì àgblè ji ò; mù gbà zɔ̃ le èmɔ̃wo ji ò. Ɖoa, èwui lè èkɛ̃tɔa si, eye vɔ̃vɔ̃ trɔ do è gòdò.

²⁶“Dùkɔ̃ nyè be nyɔ̃nùvi, tà kòtòku, ne wòa mlì lè àfi mè. Làmɔɛ̃, ne wòa na àle veveɖe, sìgbè àmè kè be àkòŋùgòvi crɔ̃a nène. Ɖoa, zãɖe kèa, ènugbletɔa la va jè mìa ji, lè àvòmè.”

²⁷“Mù sɔ wò ɖo ègàsrètɔ, eye dùkɔ̃ nyèa nyi ègàkɔ̃, ne wòa kè ŋùku kpɔ wo, ne wòa do woabe àzɔ̃lì kpɔ.”

²⁸Woa kpata, wo nyi àglajètɔ kèwo be èjìwo trì, kèwo zɔ̃nà lè èhlɔ̃dãdã be èmɔwo jia. Woabe èjìwo sɛ̃ŋu wu gàjɛ̃ ku gàyìbɔ kèwo be wɔ̀nawo nyi àkaɖa ɖèɖe sɔ̃ŋua.

²⁹Gbɛ̀dɛ be àya pò nupoa le pò àya ku àdã, ne èzòa bèa srè suŋubuia to lè e mè. Gãkea, gbalo ye wo le srè è, gbìgbɔ̀ le srè è. Vɔ̀a, àmè kèwo jɔ̀vuɛ̃awo gbe toto.

³⁰Woawo ye wo yɔna be “klòsalò kè wo crìa” ɖoa, Tɔhonɔ̀ crì wo godo.