Read gen Yeremìa 7 Bible Online

Yeremìa 7 - gen bible

Yeremìa 7

¹Ènyà kè Tɔhonɔ̀ gblɔ̃ na Yeremìaa ye nyi ekèa:

²Nɔ̀tè ɖo Tɔhonɔ̀ be àxuea be àgbonu, eye, lè funua, do àŋɛ̀ kèa be: “Mì, Yudà dùkɔ̃ kè kpata tona àgbo kèa nu, yì sɛ̃nà Tɔhonɔ̀a, mì sè.

³Ènyà kè Tɔhonɔ̀ Ŋusɛ̃kpatatɔa, Izràɛl be Mawu a gblɔ̃a ye nyi: Mì trɔ mìabe àgbènɔ̀nɔ ku mìabe ènuwɔ̀nawo, ne ma na mìa nɔ̀ ànyigbã kèa ji.

⁴Mì mu gbà nɔ ɖo èto àmè flùnya kè le gblɔ̃ be: “Tɔhonɔ̀ be mawuxɔa ye nyi ekèa! Tɔhonɔ̀ be mawuxɔa ye nyi ekèa! Tɔhonɔ̀ be mawuxɔa ye nyi ekèa! E lè àfi kèa” ò.

⁵Vɔ̀a, ne mì trɔ mìabe àgbènɔ̀nɔ ku mìabe wɔ̀nawo nyàwo, ne mì le wɔ̀ jɔ̀jɔɛ ku mìa nɔ̀nɔwo,

⁶ne mì mu le zĩ àmèjrowo, cɔɛviwo, àlo àhòsìwo do ànyi, eye mì mu le kɔ̀ èɖe mà-nyãtɔwo be èhũ ɖɛ, lè tèpe kèa, eye ne mì mù gbà le dɔ̃ jɔ̀gbèvuɛ̃ va mìa ɖokoewo ji ku èdù bu mè vòdu sɛ̃sɛ̃ òa,

⁷eŋuã, mù la na, mì la nɔ̀ tèpe kèa, lè ànyigbã kè mù sɔ na mìa tɔgbe-tɔ̀gbèwoa ji, so mà-vɔ, sɔ yì mà-vɔ mè.

⁸Vɔ̀a, kpɔɖa! Ènyà fùflu màɖìnyàwo ji kpò mì xɔ̀nàsè.

⁹Mì susu be mì la kpɔ̀tɔ̀ nɔ fìfĩ, la nɔ wù àmè, la nɔ wɔ̀ àhasì, la nɔ kã àtãŋu ɖo vòduwo ji, la nɔ tɔzò lifi na vòdu Baal ku vòdu bu kè mì mu jèsi òa,

¹⁰eye, ekèa yomè a, mì la gbà va, nɔ̀tè ɖo ŋùkɔ̀ na mù, lè àxue kèa mè, àxue kè ŋuti wo yɔ nyikɔ nyè ɖoa mè, la nɔ gblɔ̃ be: “Mi gã!” Mì gã lè ènu nyɔŋu ŋuawo wɔ̀wɔ mèa?

¹¹Àxue kèa, kè ji nyikɔ nyè lèa va trɔ zũ fiãfìtɔwo[13] be bèbèpe na mìa? Vɔ̀a, ènu kè ènyè ya, mù le kpɔa yeŋu. Tɔhonɔ̀ ye gblɔ̃ ɛ̀.

¹²Mì yì Silò[14], tèpe kè mù sɔ ɖo nɔ̀pe sãa, ne mìa kpɔ ènu kè mù wɔ̀ lè funua, ɖo dùkɔ̃ nyè Izràɛl be èvuɛ̃jɔ̀jɔ ŋutia ɖa.

¹³Wàlɛbɛ kè mì wɔ̀ ènu kèawo keŋuã, mù pò nupo na mì, gbìgbɔ̀ pò nupo na mì, gãkea mì gbe be yèwo mu la ɖo èto ò. Mù yɔ mì, vɔ̀a mì gbe be yèwo mu la tɔ̀ ò.

¹⁴Ekèa ŋutia, fifìa, ènu kè mù wɔ̀ ku Silòa, ke ye mù la wɔ̀ ku àxue kè ŋuti nyikɔ nyè lèa, mawuxɔ kè ŋuti mì dojì ɖoa, tèpe kè mù sɔ na mìa ku mìa tɔgbewoa.

¹⁵Mù la sɔ mì dãŋùgbe ɖo dìdìpe lè ŋùku nyè mè, sìgbè lekè mù wɔ̀ ku mìa nɔ̀vi, Efràyimviwoa nène.”

¹⁶“Ekèa ŋutia, mù gbà fãkue ɖo dùkɔ̃ kèa ta ke, àlo, la biɔ ènu na wo, àlo, la xɔ̀ ènyà ɖo woa ta ke ò. Mù gbà ɖè kuku na mù ɖo woa ta ò, ɖoa, nyè mu la ɖo èto wò ò.

¹⁷Wò mu le kpɔ ènu kè wo le wɔ̀ lè Yudà be èdùwo mè, ku Yèruzàlɛm be èmɔ̃wo ji òa?

¹⁸Èviwo le bɔ̀ ànakè, ètɔwo le do èzò, eye nyɔ̃nùwo le blù èma, le wɔ̀ kpɔ̃nɔ ku klàko na jiŋùkusi be fìɔ-srɔ̃. Wo le kɔ̀ àhà ɖɛ, le savɔ na vòdu buwo, la sɔ do àdɔ̀mèze na mù.

¹⁹Vɔ̀a ɖe, ènyè ye wo le do àdɔ̀mèze na a? Tɔhonɔ̀ ye le gblɔ̃ ɛ̀. Mu nyi woa ŋutɔwo bòhũ ye wo le wɔ̀ èvuɛ̃ ku, na woa ŋutɔwo be ŋùkpɛ̃ òa?”

²⁰Ekèa ŋutia, Tɔhonɔ̀ Ŋusɛ̃kpatatɔa gblɔ̃ be: “Àpe àdɔ̀mèze ku àpe àdã la kɔ̀ ɖo tèpe kèa ji, e la kɔ̀ ɖo àgbètɔ ji, e la kɔ̀ ɖo èlã ji, e la kɔ̀ ɖo àgblèmètiwo ji, e la kɔ̀ ɖo ànyigbã be kusɛ̃sɛ̃wo ji. Àdɔ̀mèze nyèa nyi èzò ɖe kè wo mu la teŋu ci òa.”

²¹Tɔhonɔ̀ Ŋusɛ̃kpatatɔa, Izràɛl be Mawu a gblɔ̃ be: “Mì yì e ji, mì sɔ mìabe ènumème vɔ̀sawo kpe ɖo mìabe vɔsa kpɔ̀tɛawo ŋuti, ne mìa ŋutɔwo mìa ɖù èlãawo!

²²Ɖoa, kè mù kplɔ̀ mìa tɔgbe-tɔ̀gbèwo to lè Ejiptè, eye mù pò nupo na woa, mu nyi ɖe kpò mù do èse na wo, so ènumème ku vɔ̀sawo ŋuti ò.

²³Vɔ̀a, mù ɖè ègbè kèa na wo be: Mì sè ègbè na mù, ne ma nyi mìabe Mawu, ne mìawo cã mìa nyi àpe dùkɔ̃. Mì zɔ̃ ɖo ɖoɖo kèwo keŋu mù do àsi na mìawo nu, àleke be ènu ne nyɔ na mì.

²⁴Gãkea, wo mu ɖo èto, àlo, sɔ èɖe lè e mè ò. Bòhũa, wo sĩkã, eye ènu bàɖà kè jro woa, ye wo wɔ̀nà. Ekè wo la nɔ yì ŋùkɔ̀a, wo jo le yì ŋùgbe bòhũ.

²⁵So kaka hùe kè nu mìa tɔgbe-tɔ̀gbèwo jo lè Ejiptè, kaka va na fifìa, àzã jè àzã jia, mù ɖona sumɔ̃vi nyè, gblɔ̃ɖɛtɔwo[15] ɖoɖa mì, gàsiagàmè.

²⁶Vɔ̀a mì mu ɖo èto, àlo, sɔ èɖe le e mè ò. Mì lìa èkɔ̀, eye mì wɔ̀ ènuvuɛ̃ wu mìa tɔgbe-tɔ̀gbèwo.

²⁷“Ne wò gblɔ̃ ekèa keŋu na woa, wo mu la ɖo èto wò ò. Ne wò yɔ woa, wo mu la tɔ̀ na wò ò.

²⁸Ekèa ŋutia, gblɔ̃ na wo be: “'Dùkɔ̃ kèa nyi dùkɔ̃ kè mu sènà ègbè na Tɔhonɔ̀, yebe Mawu ò, eye mu lɔ̃nà xɔ̀nà ètodɔ̃ ò. Nyàwototoa ku, e bu lè woa nu, eye mu gbà tona le ènu mè na wo ò.”

²⁹Tɔhonɔ̀ gblɔ̃ be: “Kpà àpo sɛ̃sɛ̃dɔ be èɖàa, ne wòa sɔ ɛ̀ dãŋùgbe. To àlenana be èhà, lè èto pɔplɔwo tamè. Ɖoa, lè yebe èjìbibi mèa, Tɔhonɔ̀ gbe jìjimè kèa, kè le do àdɔ̀mèze na ɛ̀a, eye be trɔ ŋùgbe do è.”

³⁰Tɔhonɔ̀ gblɔ̃ be: “Yudà-nyigbã jitɔwo le wɔ̀ ènu bàɖà lè ŋùmè na mù. Wo li woabe legba nyɔŋuwo ɖo àxue kè ŋuti nyikɔ nyè lèa mè, eye wo dovlo è.

³¹Wo tù Tofɛ̀t be èyɔ̀xɔ ɖo Bɛn-Hinɔ̀n be bàlìa mè, ne woa nɔ tɔzò woabe ŋusùviwo ku nyɔ̃nùviwo lè funua, ènu kè be ègbè nyè mu ɖè na wo, àlo susu kpɔ ò a.”

³²Tɔhonɔ̀ gblɔ̃ be: “Ekèa ŋutia, mì kpɔ nyuɛ̃ ɖe, ɖoa ŋùkèkèwo gbãnà, ekè àmèwo mu la gbà nɔ yɔ tèpe kèa be Tofɛ̀t, àlo Bɛn-Hinɔ̀n be Bàlìa mè ò. Wo la nɔ yɔ ɛ̀ be “Àmè cɔ̃crɔ̃ Bàlì mè”, ɖoa, wo la va nɔ ɖì àmè[16] ɖo Tofɛ̀t, kaka na gà kè mè tèpe mu la gbà nɔ̀ ànyi òa.

³³Ekèa yomè a, dùkɔ̃ kèa be àmèkukuawo la zũ ènuɖùɖu na àyamè xèviwo ku ànyigbã ji be èlãwo, eye àmè ɖekpe mu la nɔ̀ ànyi, la nyà wo jo ò.

³⁴Eye, lè Yudà be èdùwo mè ku Yèruzàlɛm be èmɔ̃wo jia, mù la na àyosòso, ku jìjɔɛkpɔkpɔ nu la sò. Àmè ɖe mu la gbà sè nyɔ̃nùkpetɔ ku nyɔ̃nùkpekpe be jìjɔɛ be ègbèɖìɖi ke ò, ɖoa, ànyigbã kèa be èdùwo la zũ èglìkpowo ku cɔ̃crɔ̃ sɔ̃ŋu.