Read gen Yeremìa 8 Bible Online

Yeremìa 8 - gen bible

Yeremìa 8

¹Tɔhonɔ̀ gblɔ̃ be: “Wàlɛbɛ ŋua, wo la hɔ̃ Yudà be èfìɔwo ku àgbònùglawo be èpuwo, hũbonɔwo ku gblɔ̃ɖɛtɔwo be èpuwo, wo la hɔ̃ Yèruzàlɛmtɔwo be èpuwo to lè yɔ̀dowo mè.

²Wo la sia wo ɖo èwè nu, ɖo wètri nu, ɖo jiŋùkusi be wètrivi kèwo keŋu wo lɔ̃, kèwo wo sumɔ, kèwo yomè wo nɔ̀, kèwo wo biɔna ènu sè, eye wo sɛ̃nàawo nu. Wo mu la bɔ̀ wo ɖodu, àlo woa ɖì wo ò, vɔ̀a, wo la nɔ̀ kpò sìgbè ègbeɖiɖɔ lè ànyigbã nène.

³Tɔhonɔ̀ Ŋusɛ̃kpatatɔa gblɔ̃ be: Àfi ɖekpekpe kè mù la nyà dùkɔ̃ [17] jɔ̀vuɛ̃ kèa kã hlɛ̃ ɖoa, àmè kèwo keŋu la ci àgbè lè woa dòmèawo la lɔ̃ èku lè àgbè gbɔ.”

⁴“To na wo be: Tɔhonɔ̀ gblɔ̃ be: “Ne àmè jè ànyi a ɖe, e sɔna ànyi jèpea wɔ̀nà ànyi mlɔ̃pea?” [18] Ne àmè trã èmɔ̃a ɖe, mu trɔna vana ŋùgbea?

⁵Fifìa ɖe, nukɛ ŋutɔ ŋuti, Yèruzàlɛm be dùkɔ̃ kèa, èmɔ kpò be jo trãnà ò? Eye mu lɔ̃nà trɔna lè bùsu be èmɔ̃ ji ò? Èdùamètɔwo sĩnàkã, la kù ɖo àjèɖàɖa ŋuti, eye wo gbe tɔtrɔ.

⁶Mù ɖo èto wo nyuɛ̃ ɖe, vɔ̀a, wo mu gblɔ̃ ènyà ɖɔ̀hũi ɖekpe ò. Àmè ɖekpe mu trɔ èjì mè le èvuɛ̃wɔ̀wɔ mè, gblɔ̃ be: “Nukɛ mù wɔ̀ ŋua ò?” Woa dòmètɔ ɖe sia ɖe sɔ ye ŋutɔ be èmɔ̃, sìgbè èsɔ kè lũ ku àdã, ɖo àhùa mèa nène.

⁷Èglò, lè àya mè ŋutɔ cã nyana gà kè mè be hũnà joa. Eye peplelu, hluɛ̃vi ku àticrɔɛwo jènàsi woabe gbɔ̀gbɔ hùenu. Vɔ̀a, dùkɔ̃ nyè yaa, mu nya Tɔhonɔ̀ be ɖoɖowo ò.”

⁸Leke ye mì la teŋu nɔ gblɔ̃ be: “Ènunyatɔwo mi nyi, ɖoa, Tɔhonɔ̀ be èsea lè mia si!” Wàlɛbɛ kè, lè nyàwototo mèa, xomaŋlɔ̀tɔwo be ènuŋlɔ̀ti trɔ ɛ̀ zũ àjè ò?

⁹Èŋù la kpɛ̃ ènunyatɔawo, àdìka la sò wo, eye wo la le wo. Ekè wo dovlo Tɔhonɔ̀ be ènyàa, àɖàŋù kɛ hati ye lè woa si fifì ò?

¹⁰“Ekèa ŋuti, mù la sɔ woa-srɔ̃wo na ŋusù buwo, eye mù la sɔ woabe àgblèwo na àmè kèwo la xɔ̀ woawo, so ɖèviwo ji, kaka sɔ yì sĩsĩawo jia, woa kpata, wo nyi àlè kpòtoe ɖùtɔwo. Gblɔ̃ɖɛtɔwo ku hũbonɔwo keŋuã, àmèflùtɔwo ɖèɖe kpò ye wo nyi.

¹¹Wo le bla dùkɔ̃ nyè be àbì, sìgbè àbìa mu lòlò ò nène. Wo le gblɔ̃ be “Ŋuti fàfa na mì! Ŋuti fàfa na mì!” Wàlɛbɛ kè wo nya be ŋuti fàfa ɖekpe mu lè ò.[19]

¹²Èŋù le kpɛ̃ wo, ɖo ènu nyɔŋu kè wo wɔ̀a ta loo? Kpao! Èŋù mu kpɛ̃nà wo gbèɖe ò! Wo mu nya ènu kè wo yɔna be ŋùkpɛ̃a ŋutɔ cã ò! Ekèa ŋutia, wo la ci àmè ci àhùawo dòmè. Wo la ci ànyigbã, wàlɛbɛ kè mù la dɔ̃ èto na woa!” Tɔhonɔ̀ ye gblɔ̃ ɛ̀.

¹³Tɔhonɔ̀ gblɔ̃ be: “Mù ɖo è be woa nu ne ci. Mù la xɔ̀ woabe nukuyàyawo lè woa si. Vɛ̃ku mu la nɔ̀ woabe vɛ̃kawo ji ò. Vòti-kusɛ̃sɛ̃ mu la nɔ̀ woabe vòtiwo ji ò, eye woabe àmàkpawo la yrɔ̀. Ènu kèwo mù na woa, wo la xɔ̀ wo lè woa si.

¹⁴Nukɛ ye na be mi kpɔ̀tɔ̀ lè ànyi kpo ò? Mì va mia bɔ̀, ne mia si yì àgbògbòdùwo mè, àleke be mia crɔ̃ lè funuawo! Ɖoa, Tɔhonɔ̀, miabe Mawu jro la crɔ̃ mi, Eye be do àɖi èsì mè, ne mia nù, ɖoa, mi wɔ̀ ènuvuɛ̃ ɖo e ŋuti.

¹⁵Mi le kpɔ èmɔ̃ na ŋuti fàfa, vɔ̀a, ènu ɖɔ̀hũi ɖekpe mu le jɔ̀ ò. Mi le kpɔ èmɔ̃ na wàlɛbɛ kè wo la dà èdɔ̀ na mia, vɔ̀a, kpɔɖa, àdìka kpò ye le sò mi.

¹⁶So kaka Dàn-nyigbã ji ke mi le sè yebe èsɔwo le gbɔ̃ so. Kè yebe èsɔ-suwo be fãfã le ɖìa, ànyigbã bliboa le hũhũ. Wo va le vũvũ ànyigbã a ku ènu kèwo keŋu lè e jia. Wo va la vũvũ èdùa ku àmè kèwo lè e mèa.”

¹⁷Tɔhonɔ̀ gblɔ̃ be: “Mù la dɔ̃ èdã ku jàkpàtà kèwo ŋuti gbèsa ɖekpe nu ɖìnà òa, ɖoɖa mìa dòmè, eye wo la ɖù mì.”

¹⁸Aò, leke ye mù la wɔ̀, la ɖo àsi àkɔ na ɖokoe nyè ò? Àkpɔ̃ kè lè àkɔ ji na mù a, na be èjì nyè gbɔjɔ.

¹⁹Aò, kpɔɖa! Dùkɔ̃ nyè be nyɔ̃nùviwo le fã àvi, so kaka dìdìpe-nyigbã ɖe ji be: “Tɔhonɔ̀ mu lè Ziɔ̀n òa? Ziɔ̀n be èfìɔa mu lèa? Eye, nukɛ ŋuti wo le do àdɔ̀mèze na mù ku woabe èkpetata wo ɖo ò? Nukɛ ŋuti wo le do àdɔ̀mèze na mù ku woabe legba mà ɖì ènu ŋuawo ɖo ò?

²⁰Nukuyàyaa nu va yì vɔ̀. Zòzo hùenua nu va yì vɔ̀. Gãkea, wo mu hlùɛ̃ mi gã ò.”

²¹Ekè wo pò dùkɔ̃ nyè be nyɔ̃nùvia, nyè cã, àpe lãmè gbã. Mù le làmɔɛ̃, ɖoa, èjì nyè gbã.

²²Èdɔ̀mi ɖekpe mu lè Gilead-nyigbã jia? Èdɔ̀dàtɔ ɖekpe mu lè funua? Eye nukɛ ŋuti dùkɔ̃ nyè be àbìa mu le ku ò?

²³Aò, àmè kɛ ye la trɔ èta nyè zũ èsìjɔ̀pe, eye ŋùkuvi nyèwo zũ àɖàsì vudo, ne ma fã dùkɔ̃ nyè be àmè ci àhùawo ò?