Read gen Yeremìa 9 Bible Online

Yeremìa 9 - gen bible

Yeremìa 9

¹“Àmè kɛ ye la na mù èmɔ̃zɔ̃tɔwo be zɛ̃pe, lè zògbè ji àleke be ma gble dùkɔ̃ nyèa ɖɛ, ne ma hũ jo lè woa gbɔ, yì ci zògbè jì ò? Ɖoa, woa kpataa, àhasìtɔwo ku àmè mà-wɔ̀ ànùkuawo kpò wo nyi!

²Wo ɖa woabe àɖewo ɖɛ, sìgbè àŋùtuwo nène, ne woa sɔ ɖà àjè. Mu nyi nyàwototo mè, ye wo to, kpɔ ŋusɛ̃ ɖo ànyigbã kèa ji ò. Ɖoa, wo jona lè èvuɛ̃ ɖe gbɔ, yìnà èvuɛ̃ bu gbɔ, eye wo mu jèsi mù ò.” Tɔhonɔ̀ ye gblɔ̃ ɛ̀.

³Tɔhonɔ̀ gblɔ̃ be: “Àmè sia àmè ne kpɔ nyuɛ̃ ɖe so nɔ̀via ŋuti; àmè ɖekpe mu gbà ɖoŋù ɖo èxlɔ̃ ɖe ŋuti ò, ɖoa, nɔ̀vi ɖekpekpe nyi àmèflùtɔ, eye èxlɔ̃ ɖekpekpe nyi àmèwùtɔ.

⁴Èxlɔ̃ le flù èxlɔ̃, eye àmè ɖekpe mu le to nyàwo ò. Wo na àjèɖàɖa ma do woabe àɖewo, eye wo le ku kutre na èvuɛ̃wɔ̀wɔ.”

⁵Tɔhonɔ̀ gblɔ̃ be: “Àjèɖàɖa dòmè ye wò lè! Eye woabe ànùkua màwɔ̀ na be wo gbe be yèwo mu la jèsi mù ò.

⁶Ekèa ŋuti, Tɔhonɔ̀ Ŋusɛ̃kpatatɔa gblɔ̃ be: Kpɔɖa, mù la gbìgbɔ̀ srè wo, eye mù la do wo kpɔ. Ɖoa, nukɛ ye mù la gbà teŋu wɔ̀ wù ekèa, ɖo dùkɔ̃ nyè be nuvuɛ̃wɔ̀wɔ ŋuti ò?

⁷Woabe àɖewo nyi àŋùti wùamèwo. Àjè kpò woabe àɖe ɖànà. Wo sɔna àɖe gblɔ̃nà ènyà viviwo na woa nɔ̀nɔwo, gãkea, lè woabe èjìwo mèa, wo trena èmɔ̃ na woa nɔ̀nɔwo.

⁸Tɔhonɔ̀ gblɔ̃ be: Nyè mu la dɔ̃ èto na wo, ɖo ekèa ŋutia? Èkla nyè mu la biɔ èhlɔ̃, dùkɔ̃ kèa hatia?”

⁹Mù le fã àvi, le na àle, lè ètoawo ji, mù le na àle, ɖo zògbè be èlãnyìpewo ta, ɖoa, wo tɔzò wo, eye wo ci gbalo; àmè ɖekpe mu gbà tona woa ji ò, eye èlãha ɖekpe be fãfã mu le ɖì lè woa ji ò. Àyamè xèviwo si jo, eye èlãwo cã hũ jo.

¹⁰Tɔhonɔ̀ gblɔ̃ be: “Mù la na Yèruzàlɛm la trɔ zũ èglìkpo ɖèɖe, e la nyi gbètewo be nɔ̀pe, mù la na Yudà be èdùwo la trɔ zũ àxuedo, àleke be àmè ɖekpe mu la gbà teŋu nɔ̀ woa mè ò.”

¹¹Àmè kɛ si ye àɖàŋù sù, ne bèa sè ekèa gɔ̃mè ò? Àmè kɛ ye Tɔhonɔ̀ pò nupo, sɔ ekèa do àsi na, ne bèa teŋu ɖè e gɔ̃mè ò? Nukɛ ŋuti ye Tɔhonɔ̀ crɔ̃ ànyigbã a, be ne trɔ zũ zògbè, àleke be àmè ɖekpe mu gbà teŋu to e ji ɖo ò?

¹²Tɔhonɔ̀ gblɔ̃ be: “Ekèa le jɔ̀, ɖoa, wo trɔ ŋùgbe do àpe èse kè mù sɔ ɖo ŋùmè na woa; wo mu ɖo èto mù ò, eye wo mu zɔ̃ ɖo èse nyèa ji ò.

¹³Bòhũa, wo zɔ̃ ɖo woabe èjìwo be tìtri nu, wo kplɔ̀ vòdu Baalwo do, sìgbè lekè woa tɔwo fiɔ woa nène”.

¹⁴Ekèa ŋuti Tɔhonɔ̀ Ŋusɛ̃kpatatɔ, Izràɛl be Mawu a gblɔ̃ be: “Kpɔɖa, mù la na dùkɔ̃ kèa ènuɖùɖu vève, be la ɖù, eye mù la kpe àɖi be èsì na ɛ̀, be la nù.

¹⁵Ekèa yomè a, mù la kã wo hlɛ̃, ɖo dùkɔ̃ kèwo woa ŋutɔwo ku woa tɔwo mu jèsì òa, dòmè. Eye mù la tĩ woa yomè ku èwui, kaka na hùe kè nu mù la crɔ̃ woa.”

¹⁶Tɔhonɔ̀ Ŋusɛ̃kpatatɔa gblɔ̃ be: Mì biɔ sè! Mì yɔ nyɔ̃nù àvifãtɔwo va, Mì yɔ woa dòmètɔ kèwo ye ɖo àɖàŋùawo va!

¹⁷Wo ne va kaba! Ne woa to àlenana be èhà, ɖo mìa ta, Kaka ne miabe ŋùkuviwo ne fã àɖàsì yòyòyò! Kaka ne miabe àɖàbàwo ne sìɔ̃ èsì bàbàbà!

¹⁸Ɖoa àvigbè le ɖì so Ziɔ̀n be: “Aò! Leke wɔ̀ ye mi crɔ̃ lekea ò! Aò! Ŋùkpɛ̃ gã kɛ ye nyi ekèa, lè mia ji ò! Fifìa, mi ɖo la gble mia de-nyigbã ɖɛ, ɖoa miabe àxuewo gbã keŋu-keŋu.”

¹⁹Mìa, nyɔ̃nùwo, mì sè Tɔhonɔ̀ be ènyà. Mì kè èto ɖo yebe ènu mè-nyàa ŋuti. Mì fiɔ àlenana be èhà jìji, mìabe nyɔ̃nùviwo, Mì fiɔ ènuxàxa mìa hatiwo.

²⁰Ɖoa, èku to flɛsɛ̀, va ɖo mia ji, e gɛ̃ ɖo miabe èfìɔsawo mè, e va sò miabe èviwo lè èmɔ̃wo ji, e va sò ɖèkajɛwo lè èdù be àgbowo nu.

²¹Tɔhonɔ̀ gblɔ̃ be: “Ɖè ènyà kèa sia be: 'Àgbètɔwo be kukuwo la nɔ̀ gbàjà ji, sìgbè ègbeɖiɖɔ nène, wo la nɔ̀ sìgbè nuku sò ci ànyi, lè nukuyàtɔwo be ŋùgbe nène, wo la nɔ̀ sìgbè nuku sò ci ànyi kè àmè ɖekpe mu lè, la bɔ̀ òa nène.'”

²²Tɔhonɔ̀ gblɔ̃ be: “Àɖàŋùɖètɔ mu gbà nɔ pò àdègbè, so yebe àɖàŋù ɖèɖe ŋuti ò. Ŋusɛ̃tɔ mu gbà nɔ pò àdègbè, so yebe ŋusɛ̃ ŋuti ò. Ècitɔ mu gbà nɔ pò àdègbè, so yebe ècikpɔkpɔ ŋuti ò.

²³Bòhũa, ne àmè ɖe la pò àdègbè a, ne pò àdègbè be yè nya ènu, sɔ jèsi mù, be ènyè Tɔhonɔ̀a, mù kɔ̀nà àdɔ̀mè, wɔ̀nà ànùkua, mù sònà ènyà jɔ̀jɔɛ, mù wɔ̀nà jɔ̀jɔɛ lè ànyigbã ji. Ɛ̃ɛ, ekèa ye jɔ̀nàjì na mù!” Tɔhonɔ̀[20] ye gblɔ̃ ɛ̀.

²⁴Tɔhonɔ̀ gblɔ̃ be: “Kpɔɖa, èŋùwo la va kè, ekè mù la dɔ̃ èto na àmè kèwo sò èvo lè ŋutilã mè ɖèɖe kpòa.

²⁵Mù la dɔ̃ èto na Ejiptè ku Yudà-nyigbã jitɔwo, na Edɔ̀m ku Amɔ̀n-nyigbã jitɔwo, na Mòab-nyigbã jitɔwo ku àmè kèwo keŋu lũnà ègɛ̃, eye wo nɔ̀nà zògbè-nyigbã kèwo lè dìdìpea jia. Ɖoa, dùkɔ̃wo keŋu nyi àtɔ̀tɔ̀nɔ̀, eye Izràɛlviwo ŋutɔ cã be èjìwo lè èvomàsò mè.”