Read gen Àlenanawo 1 Bible Online

Àlenanawo 1 - gen bible

Àlenanawo 1

¹Aò! Leke wɔ̀ ò! Èdù kè ɖɔ ku àgbètɔwo sãa, mì kpɔ lekè be ci àkòŋùgò ɖa! E ye kè nyi èdù gã lè dùkɔ̃wo dòmè sãa, mì kpɔ lekè be trɔ sìgbè àhòsì nènea ɖa! E ye kè nyi èfìɔvi nyɔ̃nù, lè èdùwo dòmè sãa, va trɔ sìgbè kluvi nène, lè woa dòmèa?

²Èzã bliboa, àvi ji kpò be nɔ̀nà hèhèhè, àɖàsì srànà lè yebe àlɔgowo ji, yebe àzìãviwo keŋu dòmètɔ ɖekpe mu lè, la fa àkɔ na ɛ̀ ò. Exlɔ̃awo keŋu hũ lè e yomè, trɔ zũ yebe kɛ̃tɔwo.

³Lè èvlododo gã ɖe ku kluvi nyinyi mèa, wo kplɔ̀ Yudà yì gàtɔnugbe. E ci dùkɔ̃wo dòmè, eye mu kpɔ jɛ̃gbɔ̃pe ò. Àmè kèwo keŋu le tĩ e yomè awo yì xe è eye wo xa ɛ̀ lè èdɔ̃viwo mè.

⁴Ziɔ̀n be èmɔwo ci siayi, ɖoa, àmè ɖekpe mu le va àzãɖùpea ò. Yebe àgbowo keŋu ci gbalo, yebe hũbonɔwo keŋu le ŋɛ̃. Yebe tùgbɛ̀jɛwo le lòfũ, eye Ziɔ̀n lè vevesèse mè kaɖi kaɖi.

⁵Yebe kɛ̃tɔwo trɔ zũ àpetɔwo lè e nu, yebe crìtɔwo le sò àyo, ɖoa, Tɔhonɔ̀ le do àyà na ɛ̀, ɖo yebe àglajèje gbogboa ŋuti. Yebe àdɔ̀mèviwo ɖo ègbe, eye kɛ̃tɔwo be àsi jè woa ji.

⁶Ziɔ̀n tùgbɛ̀jɛa bu yebe bùbua keŋu. Yebe kplɔ̀tɔwo trɔ sìgbè àgbò kèwo mu kpɔ ègbeɖùpe ò nène. Eye wo le tè woabe gbɔ̀jɔ̀gbɔjɔa yì, lè ŋùkɔ̀ na woabe yomètĩtɔwo.

⁷Lè yebe dãdãwo ku vevesèsewo be ŋùkèkèwo jia, Yèruzàlɛm le ɖoŋù yebe gbè ɖe gbè be kɛ̃klɛ̃ ku yebe àdɔ̀kùnuwo keŋu. Wàlɛbɛ kè yebe dùkɔ̃a ci kɛ̃tɔwo sia, àmè ɖekpe mu lè, la do è àlɔ̀ ò. Ekè yebe kɛ̃tɔwo ɖè ŋùku kpɔ ɛ̀a, wo kò lekè be crɔ̃ ɖoa.

⁸Yèruzàlɛm jè àgɔ̀ veve ɖe, ekè a ŋuti be zũ ènu nyɔŋu ɖo. Àmè kèwo keŋu dona bùbu e ŋutiawo le crì ì, ɖo a, wo kpɔ yebe àmã. Ye ŋutɔ gbɔ̃ fùu, trɔ ŋùgbe, eye be ɖè ye ɖokoe ɖo àsà mè.

⁹Yebe èɖipòpo lè yebe àvɔ ŋuti. Mu bù ènu kè la va jɔ̀, lè ekè a yomè a ŋuti kpɔ ò. Eye be jè ànyi, ŋùdãtɔ̀ veve ɖe, Àleke be àsiɖoàkɔ na àmètɔ ɖekpe mu lè na ɛ̀ ò. E le gblɔ̃ be: “Aò, Tɔhonɔ̀, kpɔ lekè wò dà mù ɖo ànyi, eye èkɛ̃tɔ a le pò àsi àkɔ ɖa!”

¹⁰Èkɛ̃tɔa ɖo àsi Yèruzàlɛm be ènu xɔ̀asìwo keŋu ji, eye Yèruzàlɛm kpɔ dùkɔ̃ kèwo sɛ̃nà vòduawo, dùkɔ̃ kèwo ŋuti, wò ŋutɔ wò do èse ɖo be wo mu gbà ɖo èhabɔ̀bɔ kèwo nyi tɔ̀ wɔ̀awo mè òa, wo ɖo Yèruzàlɛm be kɔ̀kɔ̀ɛpea.

¹¹Yebe dùkɔ̃ a keŋu le ŋɛ̃. Wo le ji ènu ɖùɖu, wo sɔ woabe àdɔ̀kùnuwo do àwòba sɔ xɔ̀ ènu ɖùɖu, ne woa teŋu ci àgbè. “Aò Tɔhonɔ̀! Ɖè èkɔ̀, ne wòa kpɔ lekè mù ɖìgbɔ ɖoa ɖa!”

¹²Ekèa mu wɔ̀ ènu ɖekpe na mì, àmè kèwo to èmɔa ji va le yìa òa? Mì kè ŋùku, ne mìa kpɔ, ne vevesèse ɖe wu vevesèse nyè, vevesèse kè Tɔhonɔ̀ do na mù, lè yebe àdɔ̀mèze hɛli-hɛli be ŋùkèkèa ji màa!

¹³E ɖo èzò ɖoɖa mù, so jiŋùkusi. E ɖo è ɖoɖa èpu nyèwo be ètù mè. E tre èmɔ na àfɔ̀ nyèwo, e mlì mù jè ŋùgbe, sìgbè nyɔ̃nù kè ci àgbaa nène, eye mù ci ènuxàxa mè.

¹⁴Nuvuɛ̃ nyè kèwo nyi èkɔ̀gàwo na mù a, e sɔ ye ŋutɔ be àlɔ̀ bla wo, sìgbè ànakè nène, eye be sɔ wo kpla èkɔ̀ na mù. Wo kpɛ̃, eye ŋusɛ̃ vɔ̀ lè ŋuti nyè. Tɔhonɔ̀ do mù àsi, na àmè kèwo ji nyè mu teŋu kpe òa.

¹⁵Tɔhonɔ̀ nyà kãlìwɔ̀tɔ kèwo ye lè gbɔ nyèa to, e bɔ̀ àhùakɔ̃ gã ɖe ɖo ŋuti nyè, ne woa gbã ɖèkajɛ kãlìwɔ̀tɔ nyèwo hãnyà hãnyà. Tɔhonɔ̀ tùkù Yudà tùgbɛ̀jɛ lè àxuea, eye be fiɔ̃ Yudàvi jè tùgbɛ̀jɛa sìgbè vɛ̃ nène,

¹⁶Ènu kèawo ŋuti mù le fã àvi, eye ŋùkuvi nyèwo le kplɔ̀ àɖàsì ɖo. Xɔ̀namètɔ ɖekpe mu gogo mù ò, eye àmè ɖekpe mu lè, la gbɔ̀ àgbè èkla nyè ò. Èvi nyèwo kã àsigba, àlɔ̀gba, ɖoa, kɛ̃tɔa si ye ŋusɛ̃ lè.

¹⁷Ziɔ̀n kè àbɔ, vɔ̀a, àkɔfatɔ ɖe mu lè na ɛ̀ ò Tɔhonɔ̀ ɖè èse to na Yakɔb be yebe àxuekɔ̀tɔwo la zũ yebe àfɔ̀klɛ̃nuwo Yèruzàlɛm trɔ zũ ègbeɖiɖɔ lè woa dòmè

¹⁸Tɔhonɔ̀ be ènyà ye jɔ̀! Ɖoa, nyè mu wɔ̀ ɖo yebe ègbè ji ò. Mìa dùkɔ̃wo keŋu, mì ɖo èto, ne mìa kpɔ vevesèse nyèwo ɖa. Wo kplɔ̀ èvi nyè, tùgbɛ̀jɛ ku ɖèkajɛwo yì àhùale.

¹⁹Mù fã yɔ àzìãvi nyèwo, vɔ̀a, woawo ya, wo gble mù ɖɛ. Hũbonɔ ku àmègã nyèwo ku lè èdùa mè, wàlɛbɛ kè wo le ji ènu ɖùɖu, la sɔ hlùɛ̃ woa ɖokoewo ɖo àgbèa.

²⁰Aò, Tɔhonɔ̀! Kpɔ lekè mù lè ènuxàxa mè, eye èkla nyè le pò èkubaɖa ɖa! Èjì nyè gbã ɖo àkpɔ̃ mè, ɖo ètonu màsè ŋuti. Èwui le gble ènu lè xixenu, eye èku va sò àxue ɖo àxomè

²¹Aò! Mì sè lekè mù le ŋɛ̃ ɖoa ɖa! Àmè ɖekpe mu lè, la fa àkɔ na mù ò. Ekè kɛ̃tɔ nyèwo keŋu sè àpe jɔ̀gbè vuɛ̃ a, wo le sò àyo be wo dro èvuɛ̃ be àgbãa na mù. Na ne ŋùkèkè kè be ènyà wò gblɔ̃a ne va jro! Ne woawo cã, woa trɔ sìgbè ènyè nène.

²²Ne woabe èvuɛ̃ jɔ̀jɔ ne va ŋùkɔ̀ na wo, ne wòa wɔ̀ ènu kè wò wɔ̀ ku mù, ɖo èvuɛ̃ nyèwo keŋu ŋutia kudo woawo cã, ɖoa, àpe ŋɛ̃ŋɛ̃wo sùgbɔ eye èjì nyè gbɔjɔ.