Read gen Àlenanawo 3 Bible Online

Àlenanawo 3 - gen bible

Àlenanawo 3

¹Ènyè ye nyi ŋusù kè sè veve lè yebe àdɔ̀mèze be èba nu,

²e dɔ̃ mù jo, eye be na mù zɔ̃ lè vìvìti mè, mu nyi lè kɔ̀kɔ̀ɛ nu ò.

³Ènyè ŋuti kpò be le èba ɖo, so ŋùdekɛ̃nyɛ kaka èzã do.

⁴E nyɔ̀ ŋutilã ku àgbàze lè ŋuti nyè, eye be gbã èpu lè lãmè na mù.

⁵E sɔ àɖi ku vevesèse tɔ̃ èkpa, tro do mù.

⁶E dà mù ɖo vìvìti mè, sìgbè blèmà be àmè kukuwo nène.

⁷E ɖo èglì trɔ do mù, ne nyè mu gbà si ò, eye be do mù kɔ̀sɔ̀kɔsɔ kpɛ̃kpɛ̃.

⁸Ne mù le do àpa, le fã yɔ ɛ̀ ŋutɔ cã a, e tuna èto do kuefã nyèwo.

⁹E tu èmɔ na mù ku èkpe gãwo, eye be gɔ̃dɔ̃ àfɔ̀tope nyèwo.

¹⁰E lè na mù sìgbè gbète kè bè ɖɛ, sìgbè jãŋùta kè doxa ɖɛa nène.

¹¹E kplɔ̀ mù jo lè àfɔ̀-mɔa ji, trã èmɔa na mù, flù mù ɖɛ ɖo ŋuzĩzĩ mè.

¹²E dɔ̃ èkà mè na yebe àŋùdàtia, eye be sɔ mù wɔ̀ èlã kè àŋùtia la jè a.

¹³E sɔ àŋùti kèwo keŋu lè yebe àku mèawo trɔ̃ àyìku nyèwo.

¹⁴Ènyè ye va trɔ zũ ènukòkoe na dùkɔ̃ nyè mètɔwo keŋu eye wo kpà èhà do mù, jìnà, kaka èzã dona.

¹⁵E sɔ ègbe veve ɖɔpò na mù, eye be kpe àɖi na mù, mù nù.

¹⁶E na àhlìhãkpe gbã àɖu na mù, eye be blìbɔ̀ mù lè èzò-fi mè.

¹⁷Wo xɔ̀ ŋuti fàfa lè èkla nyè si, eye mù ŋlɔ̀be ènu kè jɔ̀gbènyuɛ̃ nyia.

¹⁸Ekèa ŋuti mù gblɔ̃ be: “E vɔ̀ na mù keŋu!” Mù bu ŋùɖo ɖo Tɔhonɔ̀ ŋuti!

¹⁹Ne mù ɖoŋù àpe àyàɖùɖu ku dãdãa, e nyina ègbe veve ku àɖi na mù.

²⁰Mù le ɖoŋù ì, gbà le ɖoŋù ì, eye èkla nyè gbɔjɔ lè ènyè mè.

²¹Gãkea, ènu kè mù jro la ɖoŋù, ekè be ŋùɖo ye lè àsi nyèa ye nyi be:

²²Tɔhonɔ̀ be àdɔ̀mè nyuɛ̃ gãa nu mu vɔ̀ ò, eye yebe èvuɛ̃ sɔ kè àmèa mu vɔ̀ ò.

²³Vɔ̀ bòhũa, wo nɔ̀nà yeye ŋùdekɛ̃nyɛ sia ŋùdekɛ̃nyɛ. Oò, àpo ànùkua wɔ̀wɔ lòlò loò!

²⁴Eye èkla nyè gblɔ̃ be: “Tɔhonɔ̀ ye nyi àpe mamã ekèa ŋuti mù le kpɔ e sinu ɖo.”

²⁵Tɔhonɔ̀ wɔ̀nà nyuɛ̃ na àmè kèwo donajì ɖo e ŋutia, na èkla kè gbe jina ɛ̀ kpòa.

²⁶E nyɔ be àmè ne nɔ̀ ànyi kpoo, kpɔ Tɔhonɔ̀ be hlùɛ̃gã.

²⁷E nyɔ be àmè ne sɔ èkɔ̀ga, lè yebe ɖèvi mè.

²⁸Àmè ɖo la nɔ̀ àsà mè, la bɔ̀nu kpoo, ne Tɔhonɔ̀ ɖo è na ɛ̀a.

²⁹Àmè ɖo la bɔ̀bɔ̀ èta, la do ènu ègũ, èta mu nyɔ òa, ŋùɖo gbà lè!

³⁰Àmè ɖo la ɖo èto mè ɖɛ, na àmè kè le pò èa, wo teŋu gbà lɔ ŋùkpɛ̃ cɔ̃ èta na ɛ̀.

³¹Ɖoa, Tɔhonɔ̀ mu gbena àmè gbidi-gbidi ò.

³²Ɖoa, ne e dɔ̃nà èto veve ɖe cã a, lè yebe àdɔ̀mè nyuɛ̃ gbãgoa mèa, e gbà kuna ŋuzĩzĩ na àmè.

³³Ɖoa mu jrona gbɔ̀xue dona èfũ na àgbètɔ, àlo, dona àyà na àgbètɔ be èviwo ò.

³⁴Ne wo sɔ àfɔ̀ le gbidi èdù ɖe mè be ègàmènɔ̀tɔwo keŋuã,

³⁵ne wo le zĩ àmè be jèna ɖo ànyi, lè Mawu èji hũitɔa be ŋùmèa,

³⁶ne wo trɔ èta do ègũ na àmè be ènyàa, lè kòjo mèa, Tɔhonɔ̀ mu la kpɔ ɛ̀a?

³⁷Àmè kɛ ye pònà nupo, eye be vana e mè, ne mu nyi Tɔhonɔ̀ ye ɖègbè ò?

³⁸Mu nyi Mawu èji hũitɔa be ènu mè ye èvuɛ̃ ku ènyuɛ̃ sona òa?

³⁹Nukɛ be àle ye àgbètɔ àgbèagbèa la na, wàlɛbɛ kè wo dɔ̃ èto na ɛ̀, ɖo yebe èvuɛ̃wo ta ò?

⁴⁰Mia ŋutɔ, mi kpɔ miabe àfɔ̀ɖèɖewo, mia jrò woa mè kpɔ, ne mia trɔ jè ŋùkɔ̀ Tɔhonɔ̀.

⁴¹Mia kɔ miabe èjìwo ku àlɔ̀wo yìji ɖoɖa Mawu gbɔ, ne mia gblɔ̃ be:

⁴²“Mi wɔ̀ ènuvuɛ̃ eye mi jè àgla, eye èwò yaa, wò mu sɔkè ò.

⁴³Wò sɔ àdɔ̀mèze trɔ do ɖokoe wò, eye wò tĩ mia yomè, wò le crɔ̃ mi, ŋùgbe mà kpɔ.

⁴⁴Wò sɔ lilikpowo trɔ do ɖokoe wò, àleke be kuefã ɖekpe mu gbà ɖo e mè, la gogo wò ò.

⁴⁵Wò sɔ mi wɔ̀ ègbeɖiɖɔ, kɔkɔli lè dùkɔ̃wo dòmè.

⁴⁶Miabe kɛ̃tɔwo keŋu li ènu ɖo mia ŋuti.

⁴⁷Vɔ̃vɔ̃ na èdowo ye nyi mia tɔ̀. Wò sɔ wo tre èmɔ̀ na mi, la sɔ gble mi.

⁴⁸Ŋùkuvi nyèwo le kplɔ̀ èsì yòyòyò, ɖoa, wo crɔ̃ dùkɔ̃ nyè, Ziɔ̀n nyɔ̃nùvia.

⁴⁹Ŋùkuvi nyèwo le kplɔ̀ àɖàsì ètè mà tɔ,

⁵⁰kaka na gà kè mè Tɔhonɔ̀ la bɔ̀bɔ̀ kpɔ mù so jiŋùkusia.

⁵¹Ènu kè le jɔ̀ ɖo èdù nyè mè be nyɔ̃nùwo keŋu jia le ve ŋùkuvi na mù, yì kaka èkla mè ke.

⁵²Àmè kèwo crì mùawo le tĩ yo nyè mè, yàkàtɔ̀. Wo le nyà mù ɖo ènu, sìgbè èhlùɛ̃vi nène.

⁵³Wo jro la ci àgbè nyè ɖo èdo mè, eye woa fɔ̀ èkpewo ɖo ji nyè.

⁵⁴Ènyè àmètia, mù ci èsì gɔ̃mè, eye mù susu be: “E vɔ̀ na mù!”

⁵⁵Lè èdo be gòglòpe kea, Aò! Tɔhonɔ̀, nyikɔ wò ye mù fã yɔ!

⁵⁶Wò sè, mù do àpa be: “Mù gbà tu èto do àpe àpa, na hlùɛ̃gã ò.

⁵⁷Wò dɔ̃ gogo mù, ekè mù yɔ wòa. Eye wò gblɔ̃ be: “Mù gbà vɔ̃ ò!”

⁵⁸Oò Tɔhonɔ̀, wò xɔ̀ ènyà ɖo nu nyè. Wò hlùɛ̃ àgbè nyèa gã.

⁵⁹Aò Tɔhonɔ̀, wò kpɔ èvuɛ̃ kè wo wɔ̀ ku mù a, ekèa ŋutia, sò jɔ̀jɔɛ na mù.

⁶⁰Wò kpɔ lekè woabe èhlɔ̃ biɔbiɔ yì ègũ ɖoa, ku ènu kèwo keŋu wo ɖo ɖo ŋuti nyèa.

⁶¹Aò Tɔhonɔ̀, wò sè woabe èzũwo, ku ènu kèwo keŋu wo ɖo ɖo ŋuti nyèa.

⁶²Ènu kèwo keŋu kɛ̃tɔ nyèwo le ɖè èkpa, sɔ le gblɔ̃ so ŋuti nyè gbè sia gbèa.

⁶³Ɖè ŋùku, ne wòa kpɔ wo ɖa! Ànyi wo nɔ̀ ò, ètènu wo lè ò, ènyè ye nyi èhà lè ènu mè na wo, wo jìnà.

⁶⁴Ɖo e tèpe na wo jro, Tɔhonɔ̀, ɖo lekè be jè ɖoa nu, Ne woa nɔ̀ woabe àlɔ̀nu-dɔwɔ̀wɔwo nu.

⁶⁵Sɔ ètamèsɛ̃sɛ̃ cɔ̃ woabe èjì ji, e la nyi àpo kpɛ̃sɛ̃ na wo.

⁶⁶Sɔ àpo àdɔ̀mèze kplɔ̀ wo do. Eye crɔ̃ wo, lè jiŋùkusi gɔ̃mè.