Read gen Àlenanawo 4 Bible Online

Àlenanawo 4 - gen bible

Àlenanawo 4

¹Aò! Leke wɔ̀ ò! Sìkaa jo nyrɔ̃! Sìka kè klɛ̃na nyɛnyɛa jo trɔ vĩi! Mawuxɔmè be èkpe xɔ̀asìwo kãkã ɖo èmɔzɛ̃kpliwo keŋu nu.

²Ziɔ̀n ŋusùvi kèwo wo bùnà, sìgbè sìka-kɔ̃wo nènea, leke wɔ̀, wo va le bù wo sìgbè ànyikɔ-zewo nène, ànyikɔ-ze kèwo èzemètɔwo wɔ̀ ku àlɔ̀ a ò?

³Gbètewo ŋutɔ cã nana ànɔ, woabe èviwo, wo nɔna. Gãkea, dùkɔ̃ nyè be nyɔ̃nùvi yaa jo va nyrãku, sìgbè tatabòli, lè zògbè ji nène.

⁴Sìkɔ tì vifɛ̃wo, kaka woabe àɖewo tɛ lè ènu mè. Ɖèviwo le biɔ ènu ɖùɖu, vɔ̀a, àmè ɖe mu lè, la na wo ò.

⁵Àmè kèwo ye ɖùnà ènu viviwo sãa le ku àdɔ̀ ku lè èmɔwo to. Àmè kèwo dona àwù jɛ̃ dàzòwo sãa lè ègbeɖiɖɔɛwo mè.

⁶Dùkɔ̃ nyè be nyɔ̃nùvia be èvuɛ̃ wu Sodɔ̀m be èdù kè wo sɔ pu ànyi lè àɖàbà pòpo ɖèka mè, eye àmè ɖekpe mu tɔ ɛ̀ àsi òa.

⁷Woabe hùɛ̃yiwo kɔ̀ wu ɖèti-fu, eye wo ɣe wu nyìnɔsi. Woabe àgbàze mè bìa, wo nyɔ wu jònu eye wo nya kpɔkpɔ sìgbè hòci nène.

⁸Gãke fifìa, wo nyrɔ̃ wu àka, kè àmè ɖekpe mu gbà jènàsi wo lè èmɔ ji ò. Woabe àgbàze nyrɔ̃ lè woabe èpuwo ŋuti, eye be va pu sìgbè ànakè nène.

⁹Àmè kèwo ci èwui nuawo tɔ̀ nyɔ wu àmè kèwo ku àdɔ̀-kuawo tɔ̀. Wo gbɔjɔ, wo srè, eye wo ku, ɖoa, àgblè mè nuku ɖekpe mu lè, la le wo ɖo tè ò.

¹⁰Nyɔ̃nù kèwo àmè be ènu wɔ̀nà ŋuzĩzĩ naawo sɔ woawo ŋutɔ be àlɔ̀wo ɖà woabe èviwo, eye wo nyi ènu ɖùɖu na wo, wàlɛbɛ kè wo crɔ̃ dùkɔ̃ nyè be nyɔ̃nùvia.

¹¹Tɔhonɔ̀ hũ ènu lè yebe èjìbibi nu keŋu-keŋu, eye be kɔ̀ yebe àdɔ̀mèze be àdã ɖo ànyi. E tɔzò Ziɔ̀n be èdùa eye be bì ku dodoeawo keŋu.

¹²Ànyigbã ji be èfìɔwo mu xɔ̀ sè ò, xixeamètɔ ɖekpe cã mu xɔ̀ sè be kɛ̃tɔwo ku èvuɛ̃ ji na àmètɔwo la teŋu fla Yèruzàlɛm be àgbowo, la ɖo e mè ò.

¹³Gãkea, ekèa jɔ̀, ɖo yebe gblɔ̃ɖɛtɔwo be èvuɛ̃wo, ku yebe hũbonɔwo be àgɔ̀jèjewo ŋuti. Woawo ye kɔ̀ àmè jɔ̀jɔɛwo be èhũ ɖɛ lè èdùa mè.

¹⁴Fifìa, wo le mù, le dã lè èmɔwo ji, sìgbè àmè kèwo be ŋùkuviwo gbãa nène. Wo pò èhũ, àleke be àmè ɖekpe mu teŋu la tɔ àsi woabe àwù ŋuti ò.

¹⁵Àmèwo le do àpa ɖo woa ta be: “Mì tètè yì! Mì, àmè màkɔ̀màkɔwo! Mì tètè yì! Mì tètè yì! Mì mu gbà tɔ mi àsi ò!” Ekè wo le si, eye wo le dãa, wo gblɔ̃ lè dùkɔ̃wo dòmè be: “Wo mu gbà teŋu nɔ̀ mia dòmè ò!”

¹⁶Tɔhonɔ̀ ŋutɔ kã wo hlɛ̃. Mu gbà la kpɔ woa ji ò. Àmè ɖe mu gbà le do bùbu Hũbonɔwo ŋuti ò. Eye wo mu gbà le si àmè sĩsĩwo ò.

¹⁷Gbà wua, miabe ŋùkuviwo kpɔ èmɔ ji, kaka e tì wo. Mi le kpɔ èmɔ na xɔ̀ na àmè, so èdù kè mu la teŋu xɔ̀ na mi òa gbɔ.

¹⁸Ŋùkuvi lè miabe àfɔ̀ɖèɖe ɖe sia ɖe yomè, àleke be, miabe èmɔwo ji zɔ̃zɔ̃ cã nyi èdɔ. Miabe ènuwuwu gogo. Ŋùkèkè nenè ye gbà kpɔ̀tɔ̀ na mi ò? Miabe ènuwuwu ɖo ŋutɔ cã vɔ̀!

¹⁹Àmè kèwo le tĩ mia yomè awo le pu dù wu èhɔ̃, lè àya mè. Wo nyà mi lè ètowo ji, eye wo tre èmɔ̀ na mi, lè zògbè ji.

²⁰Miabe àgbè gbɔ̃gbɔ̃ kè Tɔhonɔ̀ sì àmì na a, jè woabe èdo mè. Mi susu be, lè Tɔhonɔ̀ be vɔ̃vɔ̃lì mèa, mi la nɔ̀ àgbè, lè dùkɔ̃wo dòmè.

²¹Kpɔ jìjɔɛ, ne wòa sò àyo, èwò, Edɔ̀m nyɔ̃nùvi, kè lè Uz-nyigbã jia! Wò la mu àhà, eye wò la ɖè àma.

²²Oò! Ziɔ̀n nyɔ̃nùvi, ètodɔ̃ wòa la vɔ̀. Mu la na ègàtɔnugbe ji wòa la gbà yì ŋùkɔ̀ ò. Vɔ̀a èwò, Edɔ̀m nyɔ̃nùvi, èvuɛ̃ wòwo la xɔ̀ ètodɔ̃, eye wo la ɖè wò àma.