Read gen Bàruk 1 Bible Online

Bàruk 1 - gen bible

Bàruk 1

¹Xoma kèa nyi xoma kè Bàruk kè nyi Nèrià be èvia ŋlɔ̀. Nèrià nyi Màseyà be èvi, eye Màseyà nyi Sèdekìa kè Helkià jìa be èvi. E ŋlɔ̀ ɛ̀ lè Babɛ̀l.

²Xoma kèa le ɖo èkpe èpè àtɔ̃ be ŋùkuɖoji-zã ji, wàlɛbɛ kè Babɛ̀lviwo gbã èdùa eye wo tɔ ɛ̀ èzò. Ènu kèa jɔ̀, lè wètri ètɔ̃gɔ̃a be ŋùkèkè adrɛ̃gɔ̃a gbè.

³Bàruk hlɛ̃ xoma kèa lè Yèkonìa, Yòakim be èvi kè nyi Yudà be èfìɔa ku dùkɔ̃ blibo kè va, la sè xoma a mè be ènyà a be ŋùkɔ̀.

⁴Àmè kèwo kpata lè Babɛ̀l, eye wo nɔ̀nà ètɔ̀ sàsra kè wo yɔna be Sud-a be àgowo ji a: èdù nunɔ̀tɔwo, hùɛ̃yiwo, èfìɔviwo, xòmègawo, ku dùkɔ̃a kpata nɔ̀ funua.

⁵Àmè ŋuawo kpata nɔ̀ Tɔhonɔ̀ be ŋùkumè, fã àvi, bla-nu, eye wo fãkue.

⁶E yomè a, wo jɔ̀ ègà, sɔ zɔ̃ ɖo ènu kè àmè sia àmè la teŋu na a ji.

⁷Wo sɔ ègà kè a ɖoɖa Yeruzàlɛm, na mawunɔ Yòakim, Helkiya be èvi kè nyi Salum be tɔgbeyɔvi a, ku na mawunɔ kpɔ̀tɛawo kudo dùkɔ̃ kè kpata lè Yeruzàlɛm ku ì, gà ŋua mè a.

⁸Jè ŋùkɔ̀ a, Bàruk yì fɔ̀ Tɔhonɔ̀ be àxue a mè be ènuzãzã kèwo wo ɖè to lè àdoa mè a, ne bèa gbìgbɔ̀ trɔ wo va Yudà be èdùa mè, lè wètri Sìvan be ŋùkèkè èwogɔ̃a gbè. Wo nyi klòsalò be ènuzãzã kèwo Sèdekìa, Yòsià be èvi, Yudà be èfìɔa, na wo wɔ̀ a.

⁹Ɖo a, wo lɔ wo jo yì Babɛ̀l, hùe kè nu Babɛ̀l be èfìɔ, Nèbùkàdnezà le Yèkonìa, èdùdɔnunɔ̀tɔwo ku àɖàŋù-dɔwɔ̀tɔwo kudo èdù mèviwo so Yeruzàlɛm, yì gàtɔnugbe lè Babɛ̀l-a ke.

¹⁰Eye àhùaleawo sɔ ègbè do àsi kè a ɖoɖa Yeruzàlɛmtɔwo be: “Mi le sɔ ègà kè a ɖoɖa mì, ne mì a plè lifi ku èlã kèwo, wo la sɔ wɔ̀ vɔsa blibo ku èvuɛ̃ sɔkè be vɔsa a. Mì ɖo la wɔ̀ vɔsa kè a ku ènunana kèa lè Tɔhonɔ̀, miabe Mawu be vɔsakpea ji.

¹¹Mì fãkue ɖo Nèbùkàdnezà, Babɛ̀l be èfìɔa, ku èvia Bàltazar cã be àgbè ta, àleke be woabe ŋùkèkèwo la nɔ̀ sìgbè jiŋùkusi be ŋùkèkèwo lè ànyigbã ji nène.

¹²Ekè a le na be Tɔhonɔ̀ la na mi ŋusɛ̃, la do jìjɔ̀ɛ na mi, ne mi la teŋu nɔ̀ èfìɔ Nèbùkàdnezà ku èvia Bàltazàr be ŋusɛ̃ gɔ̃mè, mia bɔ̀bɔ mia ɖokoewo na wo dìdi ɖe, eye mia kpɔ gomè lè woabe àdɔ̀mè nyuɛ̃ mè.

¹³Mì fãkue na Tɔhonɔ̀, miabe Mawu a, ɖo mia ta, ɖo a mi jè àgɔ̀ do Tɔhonɔ̀ miabe Mawu a, eye kaka va na fifì a, Tɔhonɔ̀ be àdɔ̀mèze hɛli-hɛlia mu trɔ lè mia yomè ò.

¹⁴Mi sɔ xoma kè a le ɖoɖa mì, ne mì a hlɛ̃ ɛ̀, lè àmèwo keŋu be ŋùkɔ̀, lè Tɔhonɔ̀ be àxuea mè. Mì la hlɛ̃ ɛ̀ lè Gòxɔwo be Àzãɖùɖu be gàmè, la hũ èvuɛ̃wo mè, ku wàlɛbɛ kè be la jè be woa wɔ̀ ɛ̀a.

¹⁵Mì la gblɔ̃ be: 'Tɔhonɔ̀, miabe Mawu, ènu ɖekpe mu lè kè wo la sɔ dohùɛ do wò ò. Miawo ye e jè be èŋù ne kpɛ̃, sìgbè egbè nène. Ɛ̃ɛ, miawo ye, Yudà ku Yeruzàlɛm-dùkɔ̃ mètɔwo,

¹⁶ku miabe èfìɔwo, miabe àmè ŋùkutawo, miabe mawunɔwo, miabe gblɔ̃ɖɛtɔwo ku jìjìmè kèwo yomè, mi jèawo!

¹⁷Mi nyi àgɔ̀jètɔwo lè gbɔ wò, Tɔhonɔ̀!

¹⁸Mi mu nɔ̀ ègbè ji na wò ò, mi mu sè àpo ègbè ò, Tɔhonɔ̀, miabe Mawu! Wàlɛbɛ kè wò sɔ àpo èseawo ɖo ŋùkɔ̀ na mi a, mi gbe be mi mu la zɔ̃ ɖo woa ji ò.

¹⁹So kaka gà kè mè Tɔhonɔ̀ ɖè mia tɔgbewo jo lè Ejiptè be ànyigbã ji, kaka va na egbè a, mi mu sè Tɔhonɔ̀, miabe Mawu be ègbè ò, eye mi mu ɖo èto ènyà kè be le gblɔ̃ na mia cã ò.

²⁰Eye, mi le do è jèsìdo egbè be, jɔ̀gbèvuɛ̃ jè mia ji, sìgbè lekè Mosè gblɔ̃ ɛ̀ na mi, wàlɛbɛ kè wò kplɔ̀ mi so Ejiptè, le yì ànyigbã kè ji nyìnɔsi ku ànyisi bɔ lè, kè be àjɔ̀gbè, wò fìã na mia tɔgbewo a nène.

²¹Wò ɖo gblɔ̃ɖɛtɔwo ɖoɖa mi, vɔ̀a, mi mu ɖo èto ènyà kè wo xɔ̀ so gbɔ wò na mi ò.

²²Àmè sia àmè sɔ yebe susu bàɖàwo, sɔ sumɔ̃ vòduwo, eye be wɔ̀ ènu kè mu jènà ŋùmè na Tɔhonɔ̀, miabe Mawu òa.”