Read gen Bàruk 3 Bible Online

Bàruk 3 - gen bible

Bàruk 3

¹Tɔhonɔ̀ àhùakɔ̃wo be Mawu, Izràɛl be Mawu, èkla ɖe kè lè nuxàxa mèa, gbɔ̃gbɔ̃ ɖe kè ŋuti ɖèɖe tea ye le do àpa ɖoɖa wò.

²Ɖo èto jro, Tɔhonɔ̀, eye kpɔ ɖo e-mè, ɖoa mi dà lè ji wò;

³nyàwo ye, èwò ya wò le tɛ̀gbɛ̀ kaka yì màvɔ, vɔ̀a miawo ya, mi crɔ̃ gbidi-gbidi.

⁴Ye ŋutia, Tɔhonɔ̀ àhùakɔ̃wo be Mawu, Izràɛl be Mawu a, sè Izràɛl be àmèkukuwo be kuefã, àmè kèwo jè àgɔ̀ do wòa be èviwo: wo mu ɖo èto Tɔhonɔ̀ woabe Mawua be ègbè ò, eŋu a jɔ̀gbèvuɛ̃wo va tɛ ɖo mia ŋuti.

⁵Mù gbà ɖoŋù miabe ètɔwo be ènu màjɔ̀-màjɔwo ji ò, vɔ̀a lè gàpòpo yèa mèa, ɖo ŋùku àpo àlɔ̀ ku àpo nyikɔa ji,

⁶ɖo èwò ye nyi Tɔhonɔ̀ miabe Mawua eye mi la pò mlã wò, Tɔhonɔ̀.

⁷Ye ŋuti ye wò sɔ àpo sisi do miabe èjìwo mè: ne mia fã yɔ àpo nyikɔa. Mia pò mlã wò lè miabe ègbejinɔ̀nɔ mè, ɖoa mi ɖè miabe ètɔ kèwo dà lè ji wòa be ènu màjɔ̀-màjɔ bliboa jo lè miabe èjìwo mè.

⁸Kpɔɖa: mi lè ègbejinɔ̀nɔ kèa mè fikè wò kãkã mi ɖoa, sìgbè ŋùkpɛ̃ ku kpɛ̃sɛ̃ nène ɖo miabe èdɛ̃ ɖɔ̀lia ŋuti, xà ɖo miabe ètɔ kèwo ɖè woa ɖokoe jo lè Tɔhonɔ̀ miabe Mawua ŋutia, be ènu màjɔ̀-màjɔwo kpata ŋuti.

⁹Ɖo èto, Izràɛl, àgbè be ɖoɖowoa, mi wɔ̀ èto ne mia kpla sɔ ŋɔjè ènu mè.

¹⁰Nukɛ jɔ̀, Izràɛl? Nukɛ ŋuti wò lè kɛ̃tɔwo be èdù mè ò? Nukɛ ŋuti wò ku tɔgbe lè àmèjrovi be ànyigbã ji ò?

¹¹Nukɛ ŋuti wò lɔ ɖiɖɔɛ ku kukuwo ɖo, eye nukɛ ŋuti wò sɔ ɖokoe wò ɖo àmè kèwo le yì kuwodea domè ɖo ò?

¹²E lè nène, ɖo wò ɖèkɔ̀ lè ànyasã be jɔ̀pea ŋuti.

¹³Ne wò kè zɔ̃ Mawu be èmɔ ye à, wò la kè nɔ̀ ɖàgbè mè sɔ yì tɛ̀gbɛ̀dò.

¹⁴Nɔ nya fikè ènumèŋɔŋɔjèa lè, fikè ŋusɛ̃a lè, fikè nunyanya lèa, ne wòa nya zè ɖèka fikè ye èpè sùgbɔ ɖoɖo ku àgbèa lè, fikè ŋùkuviwo be kɛ̃klɛ̃ ku ɖàgbèa lè.

¹⁵Àmè kɛ kè ɖo Ànyasã be nɔ̀pe ŋuti ò, eye àmè kɛ gɛ̃ ɖo yebe àdɔ̀kùwo mè maa?

¹⁶Fikɛ dùkɔ̃wo be ègawo lè ò, eye àmè kèwo ɖùnà ànyigbã ji be ègbemèlãwo jia ɖe?

¹⁷Fikɛ àmè kèwo gblena ku jiŋùkusi be xèviwo lè ò, àmè kèwo bɔ̀nà klòsalò ku sìka ɖɛ, ènu kèwo ŋuti àgbètɔ ɖewo dona jì ɖoa, àmè kèwo be àdɔ̀kùnuwo mu ɖo sɛ̃pe ò a?

¹⁸Fikɛ àmè kèwo wɔ̀nà èdɔ ku klòsalò eye wo sɔna ɛ̀ wɔ̀nà woabe ŋùku ɖoɖo ji be ènuwo ò, àmè kèwo be wɔwɔwo nyinà àɖàŋù ɖèɖe a?

¹⁹Wo crɔ̃, wo ɖiɖi gɛ̃ ɖo kuwode, eye àmè buwo sitè lè woa tèpe.

²⁰Vifɛ̃tɔwo kpɔ kɛ̃klɛ̃ eye wo nɔ̀ ànyigbã ji; vɔ̀a wo mu va jèsi ènunya be èmɔa ò,

²¹wo mu le ŋùku ɖo yebe èmɔviwo ŋuti ò, eye wo mu hlùɛ̃ do na ɛ̀ ò; èviwo le woa ɖokoewo ɖo àzɔ̀ge lè woa ètɔwo be àzɔ̃lìa gbɔ.

²²Wo mu sè è lè Kanàn cã ò, wo mu kpɔ ɛ̀ lè Temàn cã ò;

²³Agàr be viwo ŋutɔ cã, àmè kèwo le ji ènuwo be jèsi lè ànyigbã ji a, Meràn ku Temàn be àsìsàtɔwoa, èdrũ totɔwo ku nuwo be jèsi-jitɔwo, wo mu jèsi Ànyasã be èmɔa ò eye wo mu ɖo ŋùku àpe èmɔviwo ji ò.

²⁴Oò Izràɛl, àleke Tɔhonɔ̀ be àxuea lòlò ɖo mɔ̃, àleke yebe jiɖùpea lè gã gbàjà ɖo mɔ̃!

²⁵E lè gãɖe eye mu ɖo nuwuwu ò, e kɔkɔ yì ji eye mu ɖo jijemè ò.

²⁶Funua ye wo jì àmèjɔ̀asuwo xɔ̀ nyikɔa lè, gɔ̃mèjèje be hùenu tɔwo, wo lè kàkò, eye wo ɖùtù na àhùawɔ̀wɔ.

²⁷Mu nyi be Mawu cã wo ò, mu nyi woawo ye e sɔ ènuwo be nyanya be èmɔ fiɔ ò;

²⁸eye wo crɔ̃, ɖo ènu kè ŋutia wo mu ɖo ènu mè ŋɔŋɔjè ò: wo crɔ̃ ɖo woabe èto màɖo-màɖoa ŋuti.

²⁹Àmè kɛ lia èto yì jiŋùkusi, àmè kɛ yì ɖiɖi lilikpowo va ànyi ò?

³⁰Àmè kɛ yì àpùa godo, àmè kɛ kè ɖo e ŋuti, hɛ̃ ɛ̀ gbɔ̀ va to sìka ècigãtɔ̀ be àsìxɔ̀xɔ mè ò?

³¹Àmè ɖekpe mu lè kè jèsi èmɔa ò, àmè ɖekpe ŋutɔ cã mu lè kè jro be yèa sɔ àfɔ̀topea kplɔ̀ ɛ̀ do ò.

³²Vɔ̀a àmè kè nyana ènu sia ènuwo jènà si ì, e kè ɖo e ŋuti to yebe ènu gɔ̃mèsèse be ŋusɛ̃ mè; e jrà ànyigbã ɖo sɔ na màvɔ, e yomè a, e ɖɔ ɛ̀ ku èlã àfɔ̀-ènèawo;

³³e dɔ̃na kɛ̃klɛ̃a eye e yìnà; e yɔ ɛ̀ kpòa, e sènà ègbè na ɛ̀ ku hũhũ tìtìtì,

³⁴wètriviwo le klɛ̃ lè woabe àzã ŋùtè nɔ̀nɔa mè eye wo kpɔ jìjɔɛ;

³⁵e yɔ wo eye wo xɔ̀ ègbè be: Miawo ye ya! Wo le klɛ̃ ku àwuyaya do woabe Ɖotɔa.

³⁶Eya ye nyi miabe Mawu, eye wo mu la sɔ èbu ɖekpe sɔ kpe è ò.

³⁷E ɖè èmɔ keŋu kè kplɔ̀nà yìnà sijèje gbɔ eye be sɔ ɛ̀ fiɔ Yakɔb, yebe sumɔvia, kudo Izràɛl, yebe àmè ɖèvea.

³⁸Eŋuã yomè a, wo kpɔ ɛ̀ lè ànyigbã ji eye e va nɔ àgbètɔwo dòmè.