Read gen Bàruk 4 Bible Online

Bàruk 4 - gen bible

Bàruk 4

¹Ànyasã nyi Mawu be èsewo be xoma, e nyi Èsea kè lè sɔ na tɛ̀gbɛ̀dò, àmè kèwo kpata tɛna ɖo e ŋutia, wo la yì àgbè mè, vɔ̀a àmè kèwo tànàsi ì ɖɛa, wo la ku.

²Trɔ va, Yakɔb, eye le è ɖo àsi; zɔ̃ tùtà kɔ̀kɔa gbɔ, dogò yebe kɛ̃klɛ̃a.

³Mù gbà sɔ àpo ŋutikɔ̀kɔa na àmè bu ò, mù gbà sɔ àpo èglowɔ̀nuwo na àmèjro be dùkɔ̃ ɖe ò.

⁴Sìtumewo mi nyi, Izràɛl, ɖoa mi teŋu jèsi ènu kè jènà eji na Mawua!

⁵Hɛ̃ èjì, dùkɔ̃ nyè, èwò Izràɛl be ŋùɖo-nua.

⁶Wo sà mì na dùkɔ̃wo, mu nyi ɖo mìabe cɔ̃crɔ̃ ŋuti ò; vɔ̀a kè mì do àdɔ̀mèze na Mawua ŋuti ye wo tasì mì ɖo kɛ̃tɔwo simè;

⁷ɖo mì hɔ̃ èjì na mìabe Ɖotɔa savɔ na vòduwo, mu nyi na Mawu ò;

⁸mi ŋlɔ̀be Mawu kòkòɖàbì kè na mì nuɖùɖu, mi do ŋuzĩzĩtɔ àmè kè hɛ̃ mìa, Yeruzàlɛm.

⁹E kpɔ Mawu be àdɔ̀mèzea ɖùɖù kɔ̀ ɖo mìa ji eye e gblɔ̃ be: 'Mì ɖo èto, Ziɔ̀n be èkpa-tɔ-kpatɔwo, Mawu sɔ vevesèse gãɖe be èba pò mù;

¹⁰ɖoa mù kpɔ gàtɔgbemè be èba kè Tɔhonɔ̀a sɔ pò èvi nyè ŋusùviwo ku nyɔnùviwo,

¹¹mù hɛ̃ wo ku jìjɔɛ, vɔ̀a lè ŋuzĩzĩ ku vevesèse mè ye mù tàsi wo ye wo jo.

¹²Àmè ɖekpe mu gbà kpɔ jìjɔɛ ne àhòsì mù nyi eye àmè fuuwo gble mù ɖɛa ò. Mù ci dòmè xà ɖo àpe èviwo be nuvuɛ̃a ŋuti, ɖoa wo tètè yì àzɔ̀ge na Mawu be Èsea;

¹³wo mu la nya yebe pòpòfiɔwo ò, wo mu zɔ̃ ɖo Mawu be ɖoɖowo ji ò, nèneake wo mu sɔ àmè hɛ̃hɛ̃ ku jɔ̀jɔɛnyinyi be èmɔa yì ò.

¹⁴Wo ne va, Ziɔ̀n be èkpa-tɔ-kpatɔ ŋuãwoa, mì ɖoŋù gàtɔgbemè be èba kè Tɔhonɔ̀ sɔ pò èvi nyè ŋusùwo ku nyɔnùwoa ji!

¹⁵Ɖoa e sɔ dùkɔ̃ ɖe so dìdìpe va jè ɖo woa ji, dùkɔ̃ èŋùmàkpɛ̃tɔ le do ègbè bàɖà-bàɖà, àmè kèwo hati mu ɖo bùbu na àmègãxo cã ò, kèwo mu ku ŋuzĩzĩ na ɖèvi cã ò,

¹⁶kèwo le àhòsì be èvi ɖèveawo, kplɔ̀ jo gble àmèa ya ɖɛ àkòŋùgò le xɔ̀ yebe nyɔnùviwo lè e si.

¹⁷Vɔ̀a ènyè ya, àleke mù la teŋu va do mì àlɔ̀ ò?

¹⁸Àmè kè sɔ jɔ̀gbèvuɛ̃ ŋuawo be èba pò mìa ye la gbĩ mì lè mìabe kɛ̃tɔwo simè.

¹⁹Mì zɔ̃, èvi nyèwo, mì zɔ̃! Ènyè ya, mù ci fiyè kpò, àkòŋùgò ɖo àmèwo gble mù ɖɛ;

²⁰mù ɖè ŋutifafa be sayà a dàɖɛ, mù sɔ àpe blìbɔ̀ blìbɔ be kòtòkuvɔa do; mù la kɔ ègbè yì ji ɖoɖa Tɔhonɔ̀ lè àpe ŋùkèkèwo kpata mè.

²¹Mì hɛ̃ èjì, èvi nyèwo! Mì kɔ ègbè yì ji ɖoɖa Mawu gbɔ eye e la gbĩ mì lè àmèjiɖùɖua simè, lè mìabe kɛ̃tɔwo be àsiwo mè;

²²ɖoa ènyè ya, mù sɔ mìawo be gãgã be ŋùɖoa ɖo Tɔhonɔ̀ ji eye Kɔ̀kɔ̀ɛtɔa ɖo jìjɔɛ ɖèka ɖoɖa mù: ŋuzĩzĩ kuku na àmèa la va na mì sɔ̀sɔɛɖe so Tɔhonɔ̀ mìabe hlùɛ̃tɔa gbɔ.

²³Ɖoa lè ŋuzĩzĩ ku vevesèse mè ye mù tàsi mì eye mì jo, vɔ̀a Mawu la gbà trɔ mì sɔ na mù lè jìjɔɛ ku àwuyaya mè tɛ̀gbɛ̀dò.

²⁴Àleke Ziɔ̀n be èkpa-tɔ-kpatɔwo le kpɔ mìabe gàtɔgbemè nɔ̀nɔ fifìa, nèneake sɔ̀sɔɛɖea wo la kpɔ àmè hlùɛ̃gã kè la va so mìabe Mawua gbɔ yeŋu: e la va na mì ku Tɔhonɔ̀ be gogo dàzò ku àcɔ ɖoɖo.

²⁵Èvi nyèwo, mì hɛ̃ àdòdò xɔ̀ àdɔ̀mèze kè so Tɔhonɔ̀a gbɔ va na mì; kɛ̃tɔa le tĩ èwò yomè, vɔ̀a sɔ̀sɔɛɖea wò la kpɔ yebe cɔ̃crɔ̃ eye èwò ya, wò la sɔ àfɔ̀ ɖiki hũɖomè na ɛ̀.

²⁶Àpe kebe-kebeviwo nɔ zɔ̃ to èmɔ klìcà-klìcàwo ji, wo ɖè wo jo sìgbè èlãha kè kɛ̃tɔwo fĩ kplɔ̀ joa nène.

²⁷Mì nɔ hɛ̃ èjì, èvi nyèwo, eye mì kɔ ègbè yì ji ɖoɖa Mawu, ɖoa àmè kè kplɔ̀ mì yì funua la ɖo ŋùku mìa ji.

²⁸Kè e nyi be mì ɖo susu be yèwoa ɖèvò lè Mawu ŋutia, eŋuã, ne mì trɔ èjì mè vɔ̀a, mì hlùɛ̃do zè gbɔ̀ zè èwo sɔ do àfɔ̀ na ɛ̀.

²⁹Ɖo àmè kè sɔ jɔ̀gbèvuɛ̃ ŋuãwo be èba pò mìa, e la hɛ̃ jìjɔɛ màvɔ̀tɔ̀a èdu-du ku mìabe gãgã va na mì.

³⁰Hɛ̃ èjì, Yeruzàlɛm! E la fa àkɔ na wò, àmè ŋuã kè ɖo nyikɔ na wòa.

³¹Bàbà na àmè kèwo do àyà na wò eye wo jɔ̀jì ɖo àpo ànyijèjea ŋutia!

³²Bàbà na èdù kèwo àpo èviwo va nyi kluviwo lèa. Bàbà na eya kè xɔ̀ èvi wòwoa.

³³Ɖoa, sìgbè àleke e jɔ̀jì ɖo àpo ànyijèjea ŋuti eye e jròwe ɖo àpo cɔ̃crɔ̃a ŋutia, nèneake e la xà ènu so ye ŋutɔ be gbãgbã ɖiwa ŋuti;

³⁴mù la ɖè èdùamètɔ gbogbo kèwo nyi jìjɔɛ na ɛ̀a jo, eye yebe jajra la trɔ zũ vevesèse,

³⁵ɖo Tɔhonɔ̀ la na be èzò ɖe la zrò jè e ji sɔ na ŋùkèkè sùgbɔ, eye gbɔ̃gbɔ̃ vuɛ̃wo cã la nɔ̀ e mè sɔ na gàmè dìdiɖe.

³⁶Yeruzàlɛm ɖè èkɔ̀ kpɔ èwèzɛ̃pe ɖoɖa eye kpɔ jìjɔɛ kè le va na wò so Mawu gbɔa.

³⁷Kpɔɖa: wo gbãnà vɔ̀, èvi kèwo ye wò kpɔ wo kplɔ̀ jo sã, wo gbãnà e yomè kè Kɔ̀kɔ̀ɛtɔa be ènyà bɔ̀ wo so èwèzɛ̃pe sɔ yì èwèɖoxɔ̀pea, le ya wu so Mawu be gogoa ŋuti.